Salmo 24:1-10
-
Linmoob so maglorian Ari
-
“Si Jehova so akanggawa ed dalin” (1)
-
Salmo nen David. Sakey a kansion.
24 Si Jehova so akanggawa ed dalin tan amin a wadtan,+Say mabunan dalin tan saramay manaayam ditan.
2 Ta impasen to itan a malet diad saray dayat+Tan pinansiansia to itan ya akaletneg diad saray ilog.
3 Siopay nayarin ontatdang ed palandey nen Jehova,+Tan siopay nayarin onalagey ed masanton pasen to?
4 Siopaman ya agmanggagaway kasalanan tan malinis so puso to,+Ya ag-angisamba na katilaan diad bilay Ko,*Tan agnansamba a mapalikdo.+
5 Sikatoy mangawat na saray bendisyon manlapud si Jehova+Tan inkatunong* manlapud Dios na kilalaban to.+
6 Saya may henerasyon na saramay manaanap ed sikato,Saramay manaanap ed sika, O Dios nen Jacob. (Selah)
7 Tangwa kayo, sikayo ran puerta;+Lukas kayo,* sikayo ran dagdaan lan lolooban,Pian makaloob so maglorian Ari!+
8 Siopa yay maglorian Ari?
Si Jehova a mabiskeg tan makapanyari,+Si Jehova a makapanyari ed pilalaban.+
9 Tangwa kayo, sikayo ran puerta;+Lukas kayo, sikayo ran dagdaan lan lolooban,Pian makaloob so maglorian Ari!
10 Siopa yay maglorian Ari?
Si Jehova na saray armada—sikato so maglorian Ari.+ (Selah)
Paimanod leksab
^ Odino “Kamarerwak,” ya ontutukoy ed bilay nen Jehova a diad panamegley na satan et mangisasamba so sakey.
^ Odino “hustisya.”
^ Odino “Alagey kayo.”
