Salmo 27:1-14
Salmo nen David.
27 Si Jehova so liwawak+ tan say manangiliktar ko.
Anggapoy nepeg kon takotan.+
Si Jehova so manasalimbeng ed bilay ko.+
Anggapoy pakakebbiewan ko.
2 Sanen inataki ak na saray mauges a totoo a singa labay da ak a buagen,+Saray kalaban ko tan saray kabusol ko so atiror-tiror tan atumtumba.
3 Anggano mankampo sumpad siak so sakey ya armada,Agak makaliknay takot.+
Anggano walay miguerra ed siak,Matalek ak nin siansia.
4 Walay sakey a bengatlan kinerew kod si Jehova—Satan so pirawat ko—A makapanayam ak komon ed abung nen Jehova diad interon bilay ko,+Pian nanengneng koy kamaongan nen JehovaTan pian malikeliket ak ya onnengneng* ed templo* to.+
5 Ta iyamot to ak ed ayaman to diad agew na kairapan;+Iyakar to ak ed maamot a pasen diad tolda to;+Isapat to ak ed tapew na baleg a bato.+
6 Natan et taloen ko ray kakabusol ko ya akapaliber ed siak;Mangiyapay ak na saray bagat diad tolda to tan oneyag ak ed liket;Kansionan ko na panangidayew* si Jehova.
7 Dengel mo ak komon, O Jehova, sano ontatawag ak;+Kasian mo ak pa tan ebatan mo ak.+
8 Say pusok et mansasalita parad sika, a kuan to:
“Anap yo ak.”
Anapen ta ka, O Jehova.+
9 Agmo iyaamot so lupam ed siak.+
Agmo ipupulisay so lingkor mo lapud sanok mo.
Sikay mananulong ko;+Agmo ak komon ikakaindan odino tataynan, O Dios na kilalaban ko.
10 Anggano paulyan ak na mismon amak tan inak,+Si Jehova so mangasikaso ed siak.+
11 Ibangat mo pad siak so dalan mo, O Jehova,+Itonton mo ak pa ed basbas na kaptekan lapud saray kakabusol ko.
12 Agmo ak komon iyaawat ed saray kalaban ko,*+Ta wala ray palson testigo a sumpad siak,+Tan imbaga ran walay mauges a gawaen dad siak.
13 Kawalaan ko la kasi no agak anisiaA nanengneng koy kamaongan nen Jehova diad dalin na saray mabilay?*+
14 Manilalo kad si Jehova;+Manpakpel ka tan pabiskeg moy linawam.+
On, manilalo kad si Jehova.
Paimanod leksab
^ Odino “pian onnengneng ak tekep na panagdalepdep.”
^ Odino “santuaryo.”
^ Odino “Mantogtog tan mangansion ak parad.”
^ Odino “ed kamarerwa na saray kalaban ko.”
^ Odino posiblin, “Talagan manisia ak a nanengneng koy kamaongan nen Jehova diad dalin na saray mabilay.”
