Salmo 74:1-23
Maskil.* Salmo nen Asaf.+
74 O Dios, akin et impulisay mo kami lan anggad-angga?+
Akin et ondadalang* so sanok mod pulok a walad panagpastolan mo?+
2 Nonot mo ray totoon nagmaliw a kayarian mo ed abayag lan panaon,+Say tribu a dinondon mo bilang tawir mo.+
Nonot moy Palandey Sion a nanayaman mo.+
3 La ka ed samay pasen a sigpot ya ageray.+
Dineral na kabusol so amin a walad masanton pasen.+
4 Saramay onsusumpad sika et manungol diad loob na pasen a panagdayewan ed sika.+
Inyan dad man iray bandira da bilang tanda.
5 Singa ra lalakin akaegna na saray wasay tan manbabatang diad makapal a katakelan.
6 Dineral dan amin iramay inyukit diman+ diad panamegley na saray wasay tan bareta.
7 Pinoolan day santuaryom.+
Pinabanday tan inggeba ra so tabernakulo a mamapagalang ed ngaran mo.
8 Sikara tan saray ilalak da et inkuan da diad puso ra:
“Amin a pasen a panagdayewan ed Dios diad dalin et nepeg a poolan.”
9 Anggapo ray tanda a nanengneng mi;Anggapo lay akeran propeta,Tan anggapod sikami so makaamta no anggad kapigan iya.
10 O Dios, anggad kapigan mankantiaw so kalaban?+
Kasin anggad angga ya agrespetoen na kabusol so ngaran mo?+
11 Akin et agmo igalaw so limam, say kawanan a limam?+
Ekal mo lad pagew mo tan panganggam la ra.
12 Balet say Dios so Arik manlapu la nensaman,Samay manggagawa na panangiliktar diad dalin.+
13 Ginulom so dayat diad panamegley na biskeg mo;+Binebetag mo ray ulo na angkakabaleg ya ayep ed dayat.
14 Minekmek mo ray ulo na Leviatan;*Impakan mo itan ed totoo, diad saramay manaayam ed desierto.
15 Nanggawa ka na saray pawayan na subol tan agus;+Pinaekat mo ray manag-agus ya ilog.+
16 Sikay akanggawa na agew, pati say labi.
Ginawam so liwawa tan say agew.+
17 Sikay angiyan ed amin a ketegan na dalin;+Ginawam so tiagew tan ambetel a panaon.+
18 Nonot moy pangakantiaw na kabusol, O Jehova,No panon ya agrerespetoen na makulangkulang a totoo so ngaran mo.+
19 Agmo iiter ed saray atap ya ayep so bilay* na palekpek mo.
Agmo lilingwanan ed anggad angga so bilay na napapairap a totoom.
20 Nonot mo komon so sipanan mo,Ta dakdakel so nagagawan karuksaan diad saray ambilunget a pasen ed dalin.
21 Komon ta samay nalalames et agnadismaya;+Komon ta samay pakaskasi tan samay mairap-bilay et idayew day ngaran mo.+
22 Alagey ka, O Dios, tan idepensam so kasom.
Nonot mo ya inagew-agew kan kakantiawan na samay makulangkulang.+
23 Agmo lilingwanan so ibabaga na saray onsusumpad sika.
Say ingal na saramay manrerebelde ed sika et lanang a makakasabid tagey.
