Salmo 80:1-19
Parad direktor; diad “Saray Lirio.” Sakey a panonot. Salmo nen Asaf.+ Sakey a kansion.
80 O Pastol na Israel, dengel ka komon,Sika a mangiwawanwan ed Jose a singa sakey a pulok.+
Sika ya akayurong ed trono diad tagey* na saray kerubin,+Onsinag ka komon.*
2 Diad arapan na Efraim, Benjamin, tan ManasesEt ipatnag mo komon so inkabiskeg mo;+Gala tan iliktar mo kami.+
3 O Dios, ipawil mo kami pa;+Paliwawam pad sikami so lupam, pian niliktar kami.+
4 O Jehova a Dios na saray armada, anggad kapigan ka onsumpad* pikakasi na totoom?+
5 Papakanen mo ra na lua a pinagkatinapay da,Tan papainumen mo ra na dakdakel a lua.
6 Inabuloyan mon pankokolkolan kami na saray kakaabay mi;Saray kakabusol mi et luludlureyen da kami anggad labay da.+
7 O Dios na saray armada, ipawil mo kami pa;Paliwawam pad sikami so lupam, pian niliktar kami.+
8 Impaway mod Ehipto so sakey a sengeg na ubas.+
Pinaekal mo ray nasyon tan intanem mo itan.+
9 Nampalin kay sakey a pasen parad satan,Linmamot itan, tan sinmaknap ed dalin.+
10 Siniroman to ray palandey,Tan sinakbongan na saray sanga to iray sedro na Dios.
11 Saray sanga to et inmabot anggad dayat,Tan saray simit to ya anggad Ilog.*+
12 Akin et inggebam iray padir na kaubasan,+Kanian amin ya ondadalan et mamopongsil na bunga to?+
13 Dederalen itan na saray baboy-ramo ed katakelan,Tan kakanen itan na saray atap ya ayep ed uma.+
14 O Dios na saray armada, pawil ka komon.
Usdong ka manlapud tawen tan nengneng mo!
Asikasom pa yan ubas,+
15 Say sengeg ya intanem na kawanan a limam,+Tan nengneng moy anak a laki* a pinabiskeg mo parad inkasika.+
16 Pinoolan+ tan apegpeg itan.
Diad pasnok mo* et naaandi ra.
17 Tulongan mo komon so lakin walad nikawanan mo,Say anak na too a pinabiskeg mo parad inkasika.+
18 Diad ontan et agmi ka taynanan.
Pansiansia mo kami pan mabilay, pian makatawag kami ed ngaran mo.
19 O Jehova a Dios na saray armada, ipawil mo kami pa;Paliwawam pad sikami so lupam, pian niliktar kami.+
Paimanod leksab
^ Odino posiblin, “pegley.”
^ Odino “Ipatnag moy liwawam.”
^ Literal, “onsanok ed.”
^ Salanti, say Eufrates.
^ Odino “sanga.”
^ Literal, “pasnok na lupam.”
