Salmo 85:1-13
Parad direktor. Salmo na saray anak a lalaki nen Kora.+ Sakey a kansion.
85 Angipatnag kay panangasi ed dalin mo, O Jehova;+Impawil mo ray narel ya ananak nen Jacob.+
2 Pinerdonam so lingo na totoom;Sinakbongan moy amin a kasalanan da.+ (Selah)
3 Pinokpokan moy pinasyan pasnok mo;Pinakepam so petang na sanok mo.+
4 Ipawil mo kami pa, O Dios na kilalaban mi,Tan agka la onsasanok ed sikami.+
5 Anggad angga kasi so isanok mod sikami?+
Pansiansiaen mo kasi pasnok mo diad amin a henerasyon?
6 Agmo kami la kasi pabiskegen lametPian manliket so totoom lapud sika?+
7 O Jehova, ipatnag mo pad sikami so matoor a panangarom+Tan iliktar mo kami.
8 Dengelen koy ibaga nen Jehova a tuan Dios,Ta salitaen toy kareenan ed totoo to,+ saray matoor ed sikato,Balet agmo ra aabuloyan a makalikna lamet na sobran kompiyansad sarili.+
9 Sikatoy akaparaan a mangiliktar ed saramay ontatakot ed sikato,+Pian say gloria to et mansiansia ed dalin tayo.
10 Say matoor a panangaro tan katooran et manbana ira;Say inkatunong tan kareenan et angoban day sakey tan sakey.+
11 Say katooran et ontubo ed dalin,Tan say inkatunong et onusdong manlapud tawen.+
12 On, iter nen Jehova no antoy maong,*+Tan say dalin tayo et mangiter na ani.+
13 Say inkatunong et manakar diad arapan na Dios+Tan magmaliw a basbas na saray kupbang to.
Paimanod leksab
^ Odino “so inkaaligwas.”
