Sulat nen Santiago 4:1-17
4 Antoy sengegan na pankokolkol tan panlalaban yo? Agta makasengeg iratan ed saray pilalek na laman yo a mikokontraan ed saray kabiangan na laman yo?*+
2 Manpipilalek kayo, ingen ta anggapoy nagagamoran yo. Mamapatey tan mangaagum kayo, ingen ta anggapoy naaala yo. Mankokolkol tan manlalaban kayo.+ Anggapoy nagagamoran yo lapud agkayo onkekerew.
3 Sano onkekerew kayo, anggapoy naaawat yo lapud mauges so gagala yo, a labay yon usaren itan ed saray pilalek na laman yo.
4 Sikayo ran agmatoor,* agyo ta amta a say pikakaaro ed mundo et kabaliksan toy pambusol ed Dios? Siopaman sirin a labay toy mikaaro ed mundo et pagmamaliwen toy inkasikato a kabusol na Dios.+
5 Odino kasin iisipen yon anggapoy rason ya inkuan na kasulatan: “Lapud tendensia ya onibeg, walay ugali tayon manpirawat na nanduruman bengatla”?+
6 Balet, nadadaeg itan na iiter Ton agnaparaan a kaabigan. Kanian inkuan na kasulatan: “Say Dios et sumpad saray mapaatagey,+ balet iiter toy agnaparaan a kaabigan ed saray mapaabeba.”+
7 Kanian, manpasakop kayo ed Dios;+ balet sumpa yo so Diablo,+ tan ibatikan to kayo.+
8 Onapit kayo ed Dios, tan sikatoy onapit ed sikayo.+ Linisan yo ray lima yo, sikayo ran makasalanan,+ tan saray puso yo,+ sikayo ran agmakapandesisyon.
9 Abuloyan yoy sarili yon nagonigon tan manermen tan mannangis.+ Say panelek yo et magmaliw komon a panermen, tan say gayaga yo et magmaliw a pakadismaya.
10 Manpaabeba kayo ed arap nen Jehova,*+ tan iyatagey to kayo.+
11 Agagi, tundaan yo lay mansalita sumpad sakey tan sakey.+ Siopaman a mansasalita sumpad sakey ya agi odino manguukom ed agi to et mansasalita sumpad ganggan tan manguukom ed ganggan. Natan no uukomen moy ganggan, aliwa kan mananumpal na ganggan noagta sakey ya ukom.
12 Saksakey so Manangiter na Ganggan tan Ukom,+ samay makayarin mangiliktar tan maneral.+ Balet sika, siopa ka a mangukom ed kaparam a too?+
13 Dengel kayo natan, sikayo ran mangibabagan: “Natan odino nabuas et onla kami ed satan a syudad tan sakey taon kami ditan, tan mannegosyo tan manubo kami,”+
14 balet agyo amta no antoy nagawa ed bilay yo nabuas.+ Ta singa kayo kelpa a wala natan balet nagugunoyan et naandi la.+
15 Imbes, nepeg yon ibaga: “No linawa nen Jehova,*+ manbilay kami tan onia odino ontan so gawaen mi.”
16 Balet natan et ipapasirayew yoy mapangtan panaglastog yo. Saray ontan a panaglastog et mauges.
17 Kanian no say sakey et amta ton gawaen no antoy duga ingen ta agto gagawaen, sikatoy mankakasalanan.+
Paimanod leksab
^ Literal, “ed saray kabiangan yo.”
^ Literal, “mikakalugoran.”
^ Nengnengen so Apendise A5.
^ Nengnengen so Apendise A5.
