Sofonias 3:1-20
3 Pakaskasi la iyan rebelyoso, marutak, tan managpairap a syudad!+
2 Agto ontutulok ed anggan siopan boses;+ agto mangaawat na disiplina.+
Agto nanmatalek ed si Jehova;+ agto inmasingger ed Dios to.+
3 Singa saray managlem a leon iray prinsipe to a walad loob to.+
Singa saray lobo ed labi iray ukom to;Ag-ira mangikekera na anggan sakey a pukel a nangatngat anggad kabuasan.
4 Benger iray propeta to, lalakin managsaol.+
Pinabanday na saray saserdote to so bengatlan masanto;+Sinumlang day ganggan.+
5 Si Jehova et matunong diad pegley to;+ anggapoy ginawa ton aliwa.
Kinabuasan ton ipapaamta iray panangukom to,+Ya ag-onsasaew a singa say liwawa na agew.
Balet samay agmatunong et agto amtay ombaing.+
6 “Dineral ko ray nasyon; ataynanan iray tori ra ed suyok.
Dineral ko ray karsada ra, pian anggapoy makadalan.
Ataynanan ya aderal iray syudad da, tan anggapo lay toon manaayam.+
7 Inkuan ko, ‘Seguradon ontakot kad siak tan awaten moy disiplina,’*+
Pian agnaderal so panaayaman to+—Mikuentaan ak ed sikato lapud* sarayan amin.
Balet mas impilit day manggawa na mauges.+
8 ‘Kanian mantultuloy kayon manilalo* ed siak,’+ so imbaga nen Jehova,‘Anggad samay agew ya ontalindeg ak pian manamsam,*Ta desisyon ko a tiponen iray nasyon, tan pandaragupen iray panarian,Pian ikalbok ed sikara so sanok ko, say mandarlang a pasnok ko;+Ta ondalang so interon dalin diad mangapoy-apoy a seseg ko.+
9 Diad satan a panaon et umanen tan pagmaliwen kon puron lenguahe so lenguahe na saray totoo,Pian ontawag iran amin ed ngaran nen Jehova,Tan mankakasakey iran manlingkor* ed sikato.’+
10 Manlapud rehyon na saray ilog na Etiopia,Saramay mikakasi ed siak, say anak a bii na saray nitaytayak a totook, et mangiyakar ed siak na regalo.+
11 Diad satan ya agew et agka la nabainganLapud amin a ginawam ya impanrebelde ed siak,+Ta ekalen kod limog mo iramay mapaatagey tan malastog;Tan agka lan balot magmaliw a mapaatagey diad masanton palandey ko.+
12 Abuloyan kon mansiansia ed pegley mo iray mapaabeba tan mauyamon totoo,+Tan pasalimbengan ira ed ngaran nen Jehova.
13 Agmanggaway ag-inkatunong iramay akera ed Israel;+Ag-ira mantila, tan agnaromog ed sangi ra so mapalikdon dila;Mangan* ira tan ondukol ira, tan anggapoy manaktakot ed sikara.”+
14 Eyag kad liket, O anak a bii na Sion!
Eyag kad impanalom, O Israel!+
Manliket ka tan manggayaga ka ed interon pusom, O anak a bii na Jerusalem!+
15 Inekal la nen Jehova so panangukom tod sika.+
Pinataynan to lay kalaban mo.+
Say Ari na Israel, si Jehova, et walad pegley mo.+
Agmo la takotan so kadederal.+
16 Diad satan ya agew et oniay nibaga ed Jerusalem:
“Agka ontatakot, O Sion.+
Agkomon onlaylay iray limam.
17 Si Jehova a Dios mo et walad pegley mo.+
Sikatoy mangiliktar bilang Sakey a makapanyari.
Sikatoy manliket a maong lapud sika.+
Sikatoy manpareen* lapud panangaro tod sika.
Sikatoy manggayaga lapud sika tekep na maliket ya eyag.
18 Tiponen ko iramay maneermen lapud ag-ira akaonla ed saray piestam;+Ag-ira akaonla ed sika lapud inako ray kabandayan parad sikato.+
19 Diad satan a panaon et onkiwas ak sumpad amin a mamapairap ed sika;+Tan iliktar ko imay mankitley,+Tan tiponen ko imay nitaytayak.+
Pagmaliwen ko ran sakey a bengatlan nirayew tan bantog*Diad amin a dalin ya abaingan ira.
20 Diad satan a panaon et ipawil ta kayo,Sano tiponen ta kayo.
Ta pagmaliwen ta kayon sakey a bengatlan bantog* tan nirayew+ ed amin a totoo diad dalin,Sano tiponen ko iray narel ed sikayo diad pakanengneng yo,” so inkuan nen Jehova.+
Paimanod leksab
^ Odino “Sikatoy dusaen ko lapud.”
^ Odino “panametek.”
^ Odino “maan-anos kayon manalagar.”
^ Odino posiblin, “ontalindeg ak bilang sakey a tasi.”
^ Odino “mandayew.”
^ Odino “Mankabkab.”
^ Odino “ag-onesel; magmaliw ya agmapaga; napenek.”
^ Literal, “sakey a ngaran.”
^ Literal, “sakey a ngaran.”
