Tagleey 1:1-22
א [Aleph]*
1 Agayla a bukbukor to lay akayurong, samay syudad a nensaman et napnoy totoo!+
Agayla a sikatoy nagmaliw a singa biin balo, samay sakey a nensaman et matoo nen say arum a nasyon!+
Agayla a samay prinsesa ed limog na saray probinsya* et nagmaliw lan aripen!+
ב [Beth]
2 Sikatoy manak-akis kada labi,+ tan manag-agus iray lua ed aping to.
Anggapoy anggan sakey ed saramay manangaro to a manligliwa ed sikato.+
Sikatoy trinaidor na amin a kakaaro to;+ nagmaliw iran kalaban to.
ג [Gimel]
3 Say Juda et nibantak ed arum a dalin,+ a sikatoy pinairap tan inaripen.+
Kaukolan toy miayam ed saray nasyon;+ anggapoy aromog ton painawaan.
Sikatoy nabotan na amin a mamapasegsegang ed sikato sanen nagogonigon.
ד [Daleth]
4 Saray karsadan paonlad Sion et maneermen, lapud anggapoy oonlad piesta.+
Amin a puerta to et pinaulyanan;+ saray saserdote to et onnanangis.
Saray birhen* to et maneermen, tan pinasyay pakakagonigon to.
ה [He]
5 Saray kalaban to et nagmaliw a katawan* to; saray kakabusol to et anggapoy pagpaga ra.+
Ta impalikna nen Jehova ed sikato so ermen lapud karakel na impakasumlang to.+
Saray ananak to et inerel na kalaban.+
ו [Waw]
6 Naandin amin so karakpan na anak a bii na Sion.+
Saray prinsipe to et singa saray kalakian ya ulsa ya agmakaromog na napankabkaban,
Tan naknaksawan iran manaakar diad arap na saray malabay a mangerel ed sikara.
ז [Zayin]
7 Diad saray agew a maniirap tan andian na ayaman so Jerusalem, anonotan to
So amin a mablin bengatla a walad sikato nensaman.+
Sanen saray totoo to et niyawat ed lima na kalaban tan anggapoy mananulong to,+
Sikatoy anengneng na saray kalaban to tan inelekan* day inkagba to.+
ח [Heth]
8 Say Jerusalem et akagaway baleg a kasalanan.+
Kanian sikatoy nagmaliw a makapadimlan bengatla.
Amin iramay datin mamapagalang ed sikato et manleleglemew lad sikato, ta anengneng day inkalakseb to.+
Sikaton mismo et nanakis+ tan binmeneg lapud kababaingan.
ט [Teth]
9 Sankanengneng so inkarutak to diad saray palda to.
Agto ninonot so arapen to.+
Makapabigla so inkagba to; anggapoy anggan sakey a manligliwa ed sikato.
O Jehova, nengneng moy paniirap ko, ta say kabusol et ipapaatagey toy sarili to.+
י [Yod]
10 Amin a kayamanan to et inala na kalaban.+
Ta anengneng to a linmoob ed santuaryo to iray nasyon,+
Saramay ingganggan mo ya agnepeg ya onloob ed kongregasyon mo.
כ [Kaph]
11 Amin a totoo to et onaakis; manaanap iray tinapay.+
Saray mablin kayarian da et insalat dad naakan, pian mansiansia ra labat a mabilay.*
Imanom, O Jehova, tan nengneng mo, nagmaliw ak a singa biin* andi-kakanaan.
ל [Lamed]
12 Kasin anggapo labat iya ed sikayon amin ya ondadalan?
Imano yo tan nengneng yo!
Wala ta ni mas ansakit nen say impaliknad siak a sakit,
Say impasagmak ed siak nen Jehova diad agew na mandarlang a sanok to?+
מ [Mem]
13 Manlapud tawen et sikatoy angibaki na apoy pian poolan iray pukel ko,+ tan tinalo to so kada sakey ed saratan.
Sikatoy angibuskag na iket pian patitan so salik; apaatras to ak.
Ginawa to ak a sakey a biin pinaulyanan.
Sanagew ak a mansasakit.
נ [Nun]
14 Saray impakasumlang ko et singa pako, ya impansisingeran na saray lima to.
Inyan iraya ed tenger ko, tan naupot so kasil ko.
Inyawat ak nen Jehova ed lima na saramay agko sarag a labanan.+
ס [Samekh]
15 Imbantak nen Jehova so amin a mabibiskeg a totook.+
Sikatoy nampatawag na totoo a mantitipon pian onatakid siak tan deralen da ray kalangweran kon lalaki.+
Ginatin-gatinan nen Jehova so birhen ya anak a bii na Juda diad panagpespesan na ubas.+
ע [Ayin]
16 Manak-akis ak lapud sarayan bengatla;+ manag-agus iray luak.
Ta amin a nayarin manligliwa odino mamainawa ed siak* et arawrawi rad siak.
Saray anak kon lalaki et apaulyanan, lapud analo so kabusol.
פ [Pe]
17 Inyunat na Sion iray lima to;+ anggapoy anggan sakey a manligliwa ed sikato.
Ingganggan nen Jehova ya onsumpad Jacob so amin ya akapaliber a kalaban to.+
Say Jerusalem et nagmaliw a makapadimlan bengatla ed sikara.+
צ [Tsade]
18 Si Jehova et matunong,+ ta nanrebelde ak ed saray ganggan* to.+
Dengel kayo, amin yon totoo, tan nengneng yoy sakit a naliliknak,
Saray birhen ko* tan saray kalangweran kon lalaki et narel.+
ק [Qoph]
19 Tinmawag ak ed saray manangarok, balet trinaidor da ak.+
Diad syudad et inatey iray saserdotek tan saray mamatatken ko,
Legan iran manaanap na naakan pian mansiansia ran mabilay.*+
ר [Resh]
20 Nengneng mo, O Jehova, ta masyado lay pakakagonigon ko.
Saray walad loob* ko et singa kikiwalen.
Say pusok et manpukal, lapud alablabas so impanrebeldek.+
Diad paway et papaandien na espada iray ananak;+ diad loob na abung et singa itan patey.
ש [Shin]
21 Arengel na totoo so panaakis ko; anggapoy anggan sakey a manligliwa ed siak.
Arengel na amin a kabusol ko so mauges ya agawad siak.
Maliket ira, ta sika so angipasabid satan.+
Balet ipasabim ed sikara imay agew ya inyabawag mo,+ sano magmaliw iran singa siak.+
ת [Taw]
22 Komon ta makasabid sika so amin a kaugsan da, tan komon ta dusaen mo ra+
A singa ed impanusam ed siak lapud amin ya impakasumlang ko.
Ta pinasyay pannanangis ko, tan mansasakit so pusok.
Paimanod leksab
^ Saray kapitulo 1-4 et kansion a tagleey unong ed impantutumbokan na Hebreon alpabeto, odino diad estilon acrostic.
^ Odino “saray nasasakopan a distrito.”
^ Odino “Saray kalangweran a bibii.”
^ Literal, “ya ulo.”
^ Odino “nanliketan.”
^ Sakey a personipikasyon ya ontutukoy ed Jerusalem.
^ Odino “pian nipawil so kamarerwa ra.”
^ Odino “kamarerwak.”
^ Odino “Saray kalangweran kon bibii.”
^ Literal, “sangi.”
^ Odino “pian nipawil so kamarerwa ra.”
^ Literal, “Saray pait.”
