Ed si Tito 2:1-15
2 Balet sika, itultuloy mon salitaen iray bengatlan mitunosan ed maabig* a bangat.+
2 Saray mamasiken et maadia* ra komon ed kagagawa ra, seryoso ra, limpioy kanonotan da, walaan iray mabiskeg a pananisia, panangaro, tan panagsungdo.
3 Ontan met, saray akukulaw et onkiwas komon a walaay respeto ed Dios, aliwa ran managpauges, aliwa ran mainum na alak, maong so ibabangat da,
4 pian nabilin* da ray malangwer a bibii ya aroen day kaasawaan da, aroen day ananak da,
5 magmaliw a limpioy kanonotan da, masimpit ira, mankimey ira diad abung,* maong ira, manpasakop irad kaasawaan da,+ pian agnamudmora so salita na Dios.
6 Ontan met, itultuloy mon pasesegen iray malangwer a lalaki a magmaliw a limpioy kanonotan da,+
7 ya ipanengneng mon sakey kan ehemplo na maabig iran gawa diad amin a paraan. Ibangat mo no antoy malinis* tekep na inkaseryoso,+
8 a maabig* komon so panagsalitam, ya ag-itan nabalaw,+ pian nabaingan iramay onsusumpa tan anggapoy nibaga ran negatibo* nipaakar ed sikatayo.+
9 Saray aripen et manpasakop komon ed saray amo ra diad amin a bengatla,+ a paliketen da ra, ag-ira maebat,
10 agda ra tatakewan,+ noagta ipanengneng da a talagan napanmatalkan ira, pian diad amin a paraan et lalon naparakep da so bangat na Dios a Manangiliktar tayo.+
11 Ta impatnag la na Dios so agnaparaan a kaabigan to, a manresultad kiliktar na amin a klase na totoo.+
12 Satan so mangipapasal ed sikatayon ipulisay so mauges a kagagawa tan minumundo iran pilalek+ tan manbilay itayon walaan na limpion kanonotan tan inkatunong tan debosyon ed Dios diad sayan kaplesan a sistema na mundo,*+
13 legan tayon aalagaren so maliket ya ilalo+ tan say maglorian kipatnag na makapanyarin-amin a Dios tayo tan say Manangiliktar tayo, si Jesu-Kristo,
14 ya inter toy sarili to parad sikatayo+ pian nibulos* itayo+ ed amin a klase na kaugsan tan pian nalinisan to itayo ran totoo to bilang espisyal a kayarian to, a maseseg ed maabig iran gawa.+
15 Itultuloy mon salitaen irayan bengatla tan manimbawa* ka tan mangipetek ka unong ed inter ed sikan autoridad.+ Agmo aabuloyan a walay manleglemew ed sika.
Paimanod leksab
^ Odino “makagunggona.”
^ Odino “balanse.”
^ Odino “napanonotan; nipasal.”
^ Odino “asikasoen day abung da.”
^ Odino posiblin, “Manbangat ka a walaay kalinisan.”
^ Odino “makagunggona.”
^ Odino “mauges.”
^ Literal, “pian nadondon.”
^ Odino “mamaseseg.”
