Ukom 11:1-40
11 Natan, si Jefte+ a Gileadita et sakey a mabiskeg a sundalo; sikatoy anak na sakey a paabang a bii, tan si Gilead so ama to.
2 Balet awalaan met si Gilead na saray ananak a lalaki ed asawa to. Sanen binmaleg irayan ananak nen asawa to, pinataynan day Jefte tan inkuan dad sikato: “Anggapoy natawir mo diad sankaabungan nen ama mi, ta anak ka na sananey a bii.”
3 Kanian tinaynan nen Jefte iray agagi to tan nanayam ed dalin na Tob. Tan akiulop ed sikato iray lalakin anggapoy gagawaen, tan tinmumbok irad sikato.
4 Agnambayag et akilaban iray Ammonita ed Israel.+
5 Tan sanen akilaban iray Ammonita ed Israel, linman tampol ed dalin na Tob iray mamatatken na Gilead pian alaen day Jefte.
6 Inkuan dad si Jefte: “Gala tan magmaliw kan komandante mi, pian labanan tayo iray Ammonita.”
7 Balet inkuan nen Jefte ed saray mamatatken na Gilead: “Agta pirmi so pamubusol yod siak kanian pinataynan yo ak ed abung nen amak?+ Akin et linma kayod siak natan sanen nagogonigon kayo?”
8 Diad saman et oniay inkuan na saray mamatatken na Gilead ed si Jefte: “Satan so rason no akin a pinmawil kami ed sika natan. No mila kad sikami tan milaban tayod saray Ammonita, magmaliw kan pangulo mi tan ed amin a manaayam ed Gilead.”+
9 Kanian inkuan nen Jefte ed saray mamatatken na Gilead: “No papawilen yo ak pian milaban ed saray Ammonita tan taloen ira nen Jehova parad siak, siak sirin so magmaliw a pangulo yo!”
10 Inmebat iray mamatatken na Gilead ed si Jefte: “Si Jehova komon so magmaliw a tasi* ed baetan tayo no agmi gawaen so imbagam.”
11 Kanian akilay Jefte ed saray mamatatken na Gilead, tan sikatoy impasen na saray totoo a pangulo tan komandante ra. Tan sinalita lamet nen Jefte so amin a kerew tod sikara ed arapan nen Jehova diad Mizpa.+
12 Insan angibaki si Jefte na saray mensahero ed ari na saray Ammonita,+ ya inkuan to: “Akin et onsusumpa kad siak* tan linma ka dia pian lusoben moy dalin ko?”
13 Kanian oniay inkuan na ari na saray Ammonita ed saray mensahero nen Jefte: “Lapud inala na Israel so dalin ko sanen pinmaway irad Ehipto,+ manlapud Arnon+ anggad Jabok tan anggad Jordan.+ Kanian nepeg a mareen mon ipawil itan.”
14 Balet angibaki lamet si Jefte na saray mensahero ed ari na saray Ammonita
15 pian ibaga rad sikato:
“Oniay inkuan nen Jefte: ‘Ag-inala na Israel so dalin na saray Moabita+ tan say dalin na saray Ammonita,+
16 ta sanen pinmaway irad Ehipto, nanakar so Israel ed kalawakan anggad Ambalangan Dayat+ tan akasabi rad Kades.+
17 Insan angibaki so Israel na saray mensahero ed ari na Edom,+ ya inkuan da: “Ipangasim, padalan mo kamid dalin mo,” balet agdinmengel so ari na Edom. Angibaki met irad ari na Moab,+ balet sikatoy ag-inmabuloy. Kanian nansiansia ed Kades so Israel.+
18 Sanen nanakar irad kalawakan, nilabsanan da so dalin na Edom+ tan dalin na Moab. Diad bandad bukig na dalin na Moab+ so dinalan da tan nankampo rad rehyon na Arnon; ag-ira linmampas ed ketegan na Moab,+ ta say Arnon so ketegan na Moab.
19 “‘Kayari na satan et angibaki so Israel na saray mensahero ed si Sihon ya ari na saray Amoreo, say ari na Hesbon, tan oniay inkuan na Israel ed sikato: “Ipangasim, padalan mo kamid dalin mo pian makaonla kamid dilin pasen mi.”+
20 Balet anggapoy talek nen Sihon ed idalan na Israel diad teritorya to, kanian tinipon nen Sihon so amin a totoo to tan nankampo rad Jahaz tan akilaban irad Israel.+
21 Diad saman et inyawat nen Jehova a Dios na Israel si Sihon tan amin a totoo to ed lima na Israel, kanian tinalo da ra tan kinayarian na Israel so interon dalin na saray Amoreo a manaayam ed saman a dalin.+
22 Tan kinayarian da so interon teritorya na saray Amoreo manlapud Arnon anggad Jabok tan manlapud kalawakan anggad Jordan.+
23 “‘Si Jehova a Dios na Israel so amataynan ed saray Amoreo diad arapan na saray totoo ton Israel,+ tan natan et pataynanen mo so Israel?
24 Agta kayarianen moy antokaman ya iter ed sika nen Kemos+ a dios mo? Kanian siopaman a pataynanen nen Jehova a Dios mi ed arapan mi et sikato so pataynanen mi.+
25 Natan et magmaong ka ta nen si Balak+ ya anak nen Zipor, say ari na Moab? Kasin sikatoy akikolkol ed Israel odino akilaban ed sikara?
26 Legan a manaayam so Israel diad Hesbon tan ed saray angkekelag* a baley na satan+ tan diad Aroer tan saray angkekelag a baley na satan tan diad amin a syudad ed abay na saray tambib na Arnon ed loob na 300 a taon, akin et agyo iratan binawi ed saman?+
27 Agak nankasalanan ed sika, balet sika so manggagaway aliwa diad ilulusob mod siak. Komon ta si Jehova ya Ukom+ so mangukom natan ed saray totoo na Israel tan totoo na Ammon.’”
28 Balet agdinengel na ari na saray Ammonita so mensahe nen Jefte ya impasabi tod sikato.
29 Niwala so espiritu nen Jehova ed si Jefte,+ tan sikatoy dinmalan ed Gilead tan Manases pian onlad Mizpa na Gilead,+ tan manlapud Mizpa na Gilead et amaarap ed saray Ammonita.
30 Diad saman et nansamba+ si Jefte ed si Jehova, ya inkuan to: “No iyawat mod limak iray Ammonita,
31 siopaman ya ompaway ed puerta na abung ko ya onabet sano ompawil ak ed impanalok ed saray Ammonita et magmaliw a kien nen Jehova,+ tan sikatoy iyapay ko bilang apay a popoolan.”+
32 Kanian linman akilaban si Jefte ed saray Ammonita, tan inyawat ira nen Jehova ed lima to.
33 Dakdakel so pinatey to manlapud Aroer anggad Minit—20 syudad—tan anggad Abel-keramim. Kanian atalo na saray Israelita iray Ammonita.
34 Insan sinmempet si Jefte ed Mizpa,+ tan nitan lay marikit ton ompapaway pian onabet ed sikato, a mantotogtog na tamburin tan onsasayaw! Sikatoy alenleneg ya anak to. Nilikud ed sikato et anggapo lay anak ton laki odino bii.
35 Sanen sikatoy anengneng to, pinilat toy kawes to tan inkuan to: “O, ana’ko! Sinugatan moy pusok,* ta nagmaliw a sika so pataynanen ko. Nansamba ak lad si Jehova, tan agko la nayarin babawien.”+
36 Balet inkuan tod sikato: “Ama, no nansamba ka lad si Jehova, gawam ed siak so unong ed insipan mo,+ ta binmales si Jehova ed saray kalaban mon Ammonita parad sika.”
37 Insan inkuan tod ama to: “Abuloyan mon nagawa iya ed siak: Paulyan mo ak a manbukbukor ed loob na duay bulan, tan paulyan mo ak ya onlad kapalandeyan pian akisan koy inkamarikit ko a kaiba iray bibiin kaulop-ulop ko.”*
38 Diad saman et inkuan to: “La ka!” Kanian sikatoy inabuloyan ton onarawi ed loob na duay bulan, tan sikatoy linmad kapalandeyan a kaiba iray bibiin kaulop-ulop to pian nangisan toy inkamarikit to.
39 Kayari na duay bulan et sikatoy pinmawil ed ama to, insan sinumpal nen ama to so insamba to nipaakar ed sikato.+ Sikatoy agbalot akiakdol ed laki. Tan saya so nagmaliw a kustombre* ed Israel:
40 Kada taon, saray kalangweran a bibii ed Israel et oonla pian komendaan day marikit nen Jefte a Gileadita, apat agew ed sakey taon.
Paimanod leksab
^ Literal, “so makadngel.”
^ Literal, “Anto ed siak tan ed sika?”
^ Odino “walad kaliberliber.”
^ Literal, “Inyabeba mo ak a maong.”
^ Odino “pian onakis ak a kaiba iray kakaarok lapud agak lan balot makapiasawa.”
^ Odino “totontonen.”
