Ukom 12:1-15
12 Insan nantitipon iray lalaki ed Efraim tan binmaliw ira a linmad Zafon* tan inkuan dad si Jefte: “Akin et agmo kami tinawag a milad sika sanen binmaliw kan milaban ed saray Ammonita?+ Poolan mi so abung mo a pati sika.”
2 Balet inkuan nen Jefte ed sikara: “Pinasya so impilaban kod saray Ammonita, a kaibak iray totook. Kinmerew ak na tulong ed sikayo, balet agyo ak inyagel ed sikara.
3 Sanen anengneng ko ya agyo ak iyagel, denesidik ya irisgay bilay ko* tan milaban ed saray Ammonita,+ tan inyawat ira nen Jehova ed siak. Kanian akin et linma kayo dia natan pian milaban ed siak?”
4 Insan tinipon nen Jefte so amin a lalaki ed Gilead+ tan nilabanan da so Efraim; tinalo na saray lalaki ed Gilead so Efraim ya angikuan: “Sikayo ran Gileadita ed Efraim tan Manases et takas labat a nanlapud Efraim.”
5 Sinakop na Gilead iray atapew a kulos na Jordan+ diad arap na Efraim; tan sano wala ray ontakas a lalaki na Efraim, ibaga ran, “Pabaliw yo ak,” insan tepetan na lalaki ed Gilead so kada sakey ed sikara, “Efraimita ka?” Sano ibaga ton, “Andi!”
6 ikuan dad sikato, “Ibagam pay Shibolet.” Balet ibaga ton, “Sibolet,” lapud agto nibalikas a susto so salita. Insan sikatoy erelen da tan pateyen da diad saray atapew a kulos na Jordan. Kanian diad saman et 42,000 Efraimita so inatey.
7 Angukom ed Israel si Jefte ed loob na anem taon, tan kayari na satan et inatey si Jefte a Gileadita tan imponpon ed syudad to diad Gilead.
8 Si Ibzan a taga Betlehem so sinmublay ed sikato ya angukom ed Israel.+
9 Sikatoy awalaan na 30 ananak a lalaki tan 30 ananak a bibii. Imbaki to ray mamarikit to a miasawa ed saray lalaki ed sananey a boleg, tan sikatoy angiyakar na 30 bibii ya asawaen na saray ananak ton lalaki. Sikatoy angukom ed Israel ed loob na pitoy taon.
10 Insan inatey si Ibzan tan imponpon ed Betlehem.
11 Kayari to et si Elon a Zebulonita so angukom ed Israel; sikatoy angukom ed Israel ed loob na samploy taon.
12 Insan inatey si Elon a Zebulonita tan niponpon ed Aijalon diad dalin na Zebulon.
13 Kayari to et si Abdon ya anak nen Hilel a Piratonita so angukom ed Israel.
14 Sikatoy awalaan na 40 ananak a lalaki tan 30 apo a lalaki, a 70 asno so luluganan da. Sikatoy angukom ed Israel ed loob na waloy taon.
15 Insan inatey si Abdon ya anak nen Hilel a Piratonita tan niponpon ed Piraton ed dalin na Efraim diad palandey na Amalekita.+
Paimanod leksab
^ Odino posiblin, “binmaliw iran amaarap ed amianen.”
^ Odino “inyan koy kamarerwak ed dilin limak.”
