Ukom 21:1-25
-
Nisalba so Benjamin bilang tribu (1-25)
21 Natan et oniay insamba na saray lalaki ed Israel diad Mizpa:+ “Agnepeg ya iter na siopaman ed sikatayo so marikit to ed sakey a lakin Benjaminita pian asawaen to.”+
2 Kanian linmad Bethel iray totoo+ tan yinmurong ira diman diad arapan na tuan Dios ya anggad labi tan inmakis ira a maksil.
3 Tan ibabaga ran: “O Jehova a Dios na Israel, akin et agawa iya ed Israel? Akin et nabalang natan ed Israel so sakey a tribu?”
4 Tan diad tinmumbok ya agew et binmangon ya asakbay iray totoo tan nampaalagey ira diman na sakey ya altar pian mangiyapay ira na saray apay a popoolan tan apay a pandurungoan.+
5 Insan inkuan na saray totoo na Israel: “Siopa ed saray amin a tribu na Israel so ag-akitipon diad arapan nen Jehova?” ta nansamba ra a siopaman ya ag-onla ed si Jehova diad Mizpa et pateyen.
6 Kanian nanermen iray totoo na Israel lapud agawa ed Benjamin ya agi ra. Inkuan da: “Sakey a tribu so naandi natan ed Israel.
7 Antoy gawaen tayo pian naikdan tayoy asawaen iramay akera, natan ta nansamba itayo lad si Jehova+ ya agtayo iter ed sikara so siopaman ed saray mamarikit tayo pian asawaen da?”+
8 Intepet da: “Dinan ed saray tribu na Israel so aglinma ed si Jehova diad Mizpa?”+ Nalmoan ya anggapoy anggan sakey ed Jabes-gilead a linmad kampo a kawalaay kongregasyon.
9 Sanen binilang iray totoo, anengneng dan anggapoy anggan sakey a wadman a taga Jabes-gilead.
10 Kanian angibaki diman so muyong na 12,000 sankabiskegan a lalaki. Oniay ingganggan dad sikara: “La kayo, tan patey yod espada iramay manaayam ed Jabes-gilead, anggan saray bibii tan ugugaw.+
11 Oniay gawaen yo: Patey yoy amin a lalaki, pati amin a bibiin akiakdol lad laki.”
12 Diad saray manaayam ed Jabes-gilead et akalmo ra na 400 a mamarikit, ya agni akiakdol ed laki. Kanian inawit da ra ed kampo diad Silo,+ a walad dalin na Canaan.
13 Insan say interon muyong et angipasabi na mensahe ed saray Benjaminita a walad baleg a bato na Rimon+ tan inyopresi rad sikara so kareenan.
14 Kanian diad saman et pinmawil so Benjamin. Inter dad sikara so bibii ya agda pinatey manlapud saray bibii ed Jabes-gilead,+ balet aliwan magenap iratan parad sikara.
15 Tan nanermen iray totoo lapud agawa ed Benjamin+ ta sikatoy insian nen Jehova ed saray arum a tribu na Israel.
16 Inkuan na saray mamatatken na muyong: “Antoy gawaen tayo pian naikdan tayo na asawaen iray akeran lalaki, ta naupot so amin a bibii ed Benjamin?”
17 Inyebat da: “Nepeg a naikdan na tawir iramay akaliktar a Benjaminita, pian agnaandi ed Israel so sakey a tribu.
18 Balet ag-itayo naabuloyan ya iter ed sikara so mamarikit tayo pian asawaen da, ta oniay insamba na saray totoo na Israel: ‘Naayew imay mangiter na bii pian asawaen na sakey a Benjaminita.’”+
19 Insan inkuan da: “Walay tinaon a piesta parad si Jehova diad Silo,+ a satan et walad amianen na Bethel tan bukig na manunan dalan a patagey manlapud Bethel a paarap ed Siquem tan diad abalaten na Lebona.”
20 Kanian oniay ingganggan da ed saray lalaki ed Benjamin: “La kayo tan mantambang kayo ed saray kaubasan.
21 Tan sano nanengneng yon ompaway iray kalangweran a bibii* ed Silo pian onsayaw ira, ompaway ed kaubasan so balang sakey ed sikayo tan puersaan a mangala na asawa to ed saray kalangweran a bibii ed Silo, insan pawil kayo ed dalin na Benjamin.
22 Tan sano ireklamo kami na saray kaamaan odino agagi ra, oniay ibaga mi ed sikara, ‘Kasian yo kami lapud sikara, ta agmi naikdan na asawaen so balang sakey ed sikara legan na guerra.+ Tutal, agyo met inter ed sikara iray mamarikit yo ed dilin panlabayan yo, a satan komon so pankasalananan yo.’”+
23 Kanian ontan so ginawa na saray lalaki ed Benjamin, tan angala ra na saray asawa ra ed saray onsasayaw a bibii. Kayari na satan et pinmawil la ra ed tawir dan dalin tan impaalagey da lamet iray syudad da+ tan nanayam ira ditan.
24 Diad saman a panaon et nansisian iray Israelita pian onla so balang sakey ed dilin tribu tan pamilya to, tan linma lay balang sakey ed dilin tawir ton dalin.
25 Diad saraman ya agew et anggapoy ari ed Israel.+ Say kaslakan a gagawaen na balang sakey et no antoy duga ed pakanengneng to.*
