Ukom 4:1-24
4 Balet sanen inatey lay Ehud, ginawa lamet na saray Israelita so mauges ed pakanengneng nen Jehova.+
2 Kanian inlako ira nen Jehova ed si Jabin ya ari na Canaan,+ a nanuley ed Hazor. Say pangulo na armada to et si Sisera, a manaayam ed Haroset+ na saray nasyon.*
3 Si Jabin* et walaan na 900 a pan-guerran karwahe a nantarem iray dalig da,*+ tan 20 taon to lan papairapen a maong iray Israelita,+ kanian tinmawag ed si Jehova iray Israelita.+
4 Diad saman a panaon, si Debora a sakey a propetesa+ tan asawa nen Lapidot so manguukom ed Israel.
5 Sikatoy onyuyurong ed silong na kiew a palma nen Debora ed baetan na Rama+ tan Bethel+ diad mapalandey a rehyon na Efraim; tan oonlad sikato iray Israelita parad panangukom.
6 Impatawag toy Barak+ ya anak nen Abinoam manlapud Kedes-neftali+ tan inkuan tod sikato: “Oniay ingganggan ed sika nen Jehova a Dios na Israel, ‘La ka* ed Palandey Tabor, tan mangipila kay 10,000 lalaki manlapud Neftali tan Zebulon.
7 Iyakar kod sika diad kulos na Kison+ si Sisera a pangulo na armada nen Jabin tan saray karwahe ton pan-guerra tan saray sundalo to, tan sikatoy iyawat kod limam.’”+
8 Diad saman et inkuan ed sikato nen Barak: “No mila kad siak, onla ak, balet no agka mila, agak met onla.”
9 Diad saman et inkuan to: “Mila ak ed sika. Balet, agniiter ed sika so kagalangan diad sayan pilaban mo, ta diad lima na sakey a bii so pangiyawatan nen Jehova ed si Sisera.”+ Insan akilay Debora ed si Barak diad Kedes.+
10 Impantitipon nen Barak ed Kedes so Zebulon tan Neftali,+ tan 10,000 lalaki so tinmumbok ed sikato. Akila met ed sikato si Debora.
11 Diad saman et sinmian lay Heber a Keneo ed saray Keneo,+ saray kailalakan nen Hobab a katulangan nen Moises,+ tan impaalagey toy tolda tod abay na baleg a kiew diad Zaananim, a walad Kedes.
12 Impaamta rad si Sisera a tinmatdang ed Palandey Tabor si Barak ya anak nen Abinoam.+
13 Tampol a tinipon nen Sisera so amin a karwahe ton pan-guerra—900 a karwahe a nantarem iray dalig da*—tan amin a sundalon kaiba to, manlapud Haroset na saray nasyon pian onla rad kulos na Kison.+
14 Oniay inkuan natan nen Debora ed si Barak: “La ka, ta saya so agew ya iyawat nen Jehova si Sisera ed limam. Agta si Jehova so onlad unaan mo?” Tan linmasur si Barak manlapud Palandey Tabor, a manumtumbok ed sikato so 10,000 lalaki.
15 Insan winetwet nen Jehova si Sisera tan amin a karwahe ton pan-guerra tan say interon armada to,+ tan pinatey to rad panamegley na espada nen Barak. Diad kaunoran et inmepas si Sisera ed karwahe to tan batik.
16 Inusilan nen Barak iray karwahen pan-guerra tan say armada ya anggad Haroset na saray nasyon. Kanian inatey ed espada so interon armada nen Sisera; anggapoy anggan sakey ya akera.+
17 Balet batik si Sisera ed tolda nen Jael+ ya asawa nen Heber+ a Keneo, ta walay kareenan ed baetan nen Jabin+ ya ari na Hazor tan say sankaabungan nen Heber a Keneo.
18 Insan pinmaway si Jael pian abeten toy Sisera tan inkuan tod sikato: “Loob ka dia, katawan ko, loob ka. Agka natatakot.” Kanian sikatoy linmoob ed tolda to, tan inulesan to.
19 Insan inkuan nen Sisera ed sikato: “Ipangasim, ikdan mo ak pay daiset a danum, ta makakainum ak la.” Kanian nilukasan toy katat a nankargay gatas tan pinainum to,+ insan to inulesan lamet.
20 Inkuan tod sikato: “Alagey kad lolooban na tolda, tan no walay onsabi a mantepet ed sika, ‘Walay linma dian too?’ ibagam ya, ‘Anggapo!’”
21 Balet angalay Jael ya asawa nen Heber na palpal na tolda tan martilyo. Insan sanen maitlep so ugip nen Sisera ta naksawan, sikatoy agnampalikas ya inmasingger tan impanek to so palpal ed alupising to ya anggad tinmalos ed dalin, kanian inatey.+
22 Linma diman si Barak pian anapen toy Sisera, tan pinmaway natan si Jael pian abeten to tan inkuan to: “Gala ta ipanengneng kod sika imay toon aanapen mo.” Sikatoy akilan linmoob tan anengneng toy Sisera ya inatey, ya akapanek so palpal ed alupising to.
23 Kanian diad saman ya agew et impanalo na Dios iray Israelita sumpad si Jabin ya ari na Canaan.+
24 Tan binmiskeg lan binmiskeg iray Israelita sumpad si Jabin ya ari na Canaan,+ anggad apatey day Jabin ya ari na Canaan.+
Paimanod leksab
^ Odino “Haroset-ha-goim.”
^ Literal, “Sikato.”
^ Literal, “karwahe a balatyang.”
^ Odino “Ipuestom iray sundalom.”
^ Literal, “karwahe a balatyang.”
