Ukom 5:1-31
5 Diad saman ya agew et kinansion nen Debora+ iyan kansion,+ a kaibay Barak+ ya anak nen Abinoam:
2 “Lapud ag-abedber a buek* diad Israel,Lapud impanboluntaryo na saray totoo,+Idayew yoy Jehova!
3 Talineng yo, sikayo ran arari; dengel yo, sikayo ran manuley:
Mangansion ak parad si Jehova.
Mangansion ak na panangidayew ed* si Jehova,+ say Dios na Israel.+
4 Jehova, sanen pinmaway kad Seir,+Sanen nanakar ka a papaway ed teritorya na Edom,Yinmegyeg so dalin, tan pinmelag so katawenan,Angiyibung na danum iray lurem.
5 Atunaw* iray kapalandeyan ed arapan nen Jehova,+Anggan say Sinai ed arapan nen Jehova,+ say Dios na Israel.+
6 Diad saray agew nen Samgar+ ya anak nen Anat,Diad saray agew nen Jael,+ anggapoy ondadalan ed saray karsada;Saray managbiahe et ondadalan ed sananey iran karsada.
7 Tinmaynan la* iray manaayam ed saray baryo diad Israel;Naandi la ra anggad inmakto ak, siak, si Debora,+Anggad inmakto ak ya ina ed Israel.+
8 Nampili ra na balon dirios;+Insan niwalay guerra ed saray puerta.+
Anggapoy nanengneng a panagsamper, odino gayang,Diad 40,000 lalaki ed Israel.
9 Say pusok et walad saray komandante na Israel,+A namboluntaryon kaiba na saray totoo.+
Idayew yoy Jehova!
10 Sikayo ran akalugan ed saray kolor-lati ya asno,Sikayo ran akayurong ed saray ankablin karpet,Tan sikayo ran manaakar ed karsada,Imano yo!
11 Nadngel so boses na saray mangibubunog na danum ed kawalaan na saray panag-asolan;Insalaysay da diman iray matunong a gawa nen Jehova,Saray matunong a gawa na saray totoo ton manaayam ed baryo diad Israel.
Insan linmasur iray totoo nen Jehova ed kawalaan na saray puerta.
12 Onliing ka, onliing ka, O Debora!+
Onliing ka, onliing ka, mangansion ka!+
Alagey ka, Barak!+ Awit mo iray narel mo, sika ya anak nen Abinoam!
13 Insan linmad saray gagalangen a totoo iramay akera;Linmad siak iray totoo nen Jehova pian onsumpad saray mabibiskeg.
14 Diad Efraim so nanlapuan da, saramay walad lawak;*Ontutumbok irad sika, O Benjamin, diad limog na saray totoom.
Manlapud Makir+ et linmasur iray komandante,Tan manlapud Zebulon iramay mangaawit ed baston na managlistay sundalo.*
15 Saray prinsipe ed Isacar et kaiba nen Debora,Singa si Isacar et ontan met si Barak.+
Sikatoy nibakin manakar ed patar a lawak.*+
Pirmi so panangusisa na puso ed saray ulop diad tribu nen Ruben.
16 Akin et yinmurong kad pegley na duaran sako,Ya ondedengel kad pantotogtog da na plauta ra parad saray pulok?+
Ta pirmi so panangusisa na puso ed saray ulop diad tribu nen Ruben.
17 Say Gilead et nansiansia ed biek na Jordan;+Tan say Dan, akin et sikatoy nansiansia ed saray barko?+
Say Aser et yinmurong a nanmeneng ed gilig na dayat,Tan sikatoy nansiansia ed saray daongan* to.+
18 Say Zebulon et totoon inrisga ray bilay da* ya anggad patey;Ontan met ed Neftali,+ ed saray atagey a pasen.+
19 Sinmabi iray arari, akilaban ira;Insan akilaban iray arari na Canaan+Diad Taanac, ed abay na danum na Megido.+
Anggapoy nala ran pilak.+
20 Manlapud tawen et akilaban iray bitewen;Manlapud saray dalan da et akilaban ira sumpad si Sisera.
21 Inyanor ira na say agus* na Kison,+Say agus* ed abayag lan panaon, say agus* na Kison.
Ginatinan mo ray mabibiskeg, O kamarerwak.*
22 Insan manbanegbeg ed dalin iray sali na saray kabayoLapud mapmaples ya ombabatik iray kalakian a kabayo to.+
23 ‘Isamba yoy Meroz,’ so inkuan na anghel nen Jehova,‘On, isamba yo ray manaayam ditan,Ta ag-ira linma ya ontulong ed si Jehova,Pian ontulong ed si Jehova a kaiba iray makapanyari.’
24 Narayrayew ed saray bibii si Jael+
Say asawa nen Heber+ a Keneo;
Sikato so narayrayew ed amin a bibiin manaayam ed tolda.
25 Danum so kinerew nen Sisera; gatas so inter to.Inikdan toy mapalet a gatas* a walad marakdakep a yaong.+
26 Ginawat na lima to so palpal na tolda,Tan say kawanan a lima to so maso na komikimey.
Tan minaso toy Sisera, binetag toy ulo to,Tan minekmek to tan binutaw to iray alupising to.+
27 Diad pegley na saray sali to et atumbay Sisera; sikatoy alukbob tan niparukol;Diad pegley na saray sali to et sikatoy atumba tan alukbob;Diad atumbaan to et diman inatey.
28 Tinmandag ed bintana so sakey a bii,Say ina nen Sisera et tinmakiling ed bintanan nansanib,‘Akin et agni sinmabi so karwahe to?
Akin et naatrasadon maong so pambanegbeg na saray karwahe to?’+
29 Sikatoy ebatan na sankarunongan ed saray kaiba ton gagalangen a bibii;On, ebatan to met lanlamang so inkasikato,
30 ‘Aapagen da la anganko so samsam,Sakey a bii,* duaran bii* parad kada sundalo,Saray samsam a kinoloran ya abel parad si Sisera, saray samsam a kinoloran ya abel,Sakey a binurdaan a kawes, kinoloran ya abel, duaran binurdaan a kawesParad beklew na saray anamsam.’
31 Kanian naandi komon iray kalaban mo,+ O Jehova,Balet saray mangaaro ed sika et magmaliw komon a singa say agew sano ombutay tan onsinag a maliwliwawa.”
Tan say dalin et awalaay kaligenan* ed loob na 40 taon.+
Paimanod leksab
^ Odino “saray sundalon ag-abedber so buek da.”
^ Odino “Mantogtog tan mangansion ak parad.”
^ Odino posiblin, “Yinmegyeg.”
^ Odino “Naandi.”
^ Odino “abeban patar.”
^ Odino posiblin, “iramay mamebemben ed kagawaan na eskriba.”
^ Odino “abeban patar.”
^ Odino “saray pasen a tutundaan.”
^ Odino “minudmora day kamarerwa ra.”
^ Odino “kulos.”
^ Odino “kulos.”
^ Odino “kulos.”
^ Odino “Inikdan toy krema.”
^ Literal, “ya eges.”
^ Literal, “eges.”
^ Odino “kareenan.”
