Ukom 9:1-57
9 Diad saginonor et linmad Siquem si Abimelec+ ya anak nen Jerubaal, diad saray agagi nen ina to tan oniay inkuan tod sikara tan ed interon pamilya nen laki to:*
2 “Ipangasi yon tepetan so amin a papangulo* na Siquem, ‘Dinan so magmaong parad sikayo, manuley ed sikayo so amin a 70 lalaki ya ananak nen Jerubaal,+ odino manuley ed sikayo so sakey a laki? Tan nonot yo a siak so pukel tan laman yo.’”*
3 Kanian saman ya imbaga to et impasabi na saray agagi nen ina to ed amin a papangulo na Siquem, tan atangguyor ira* ya ontumbok ed si Abimelec, ta inkuan da: “Sikatoy mismon agi tayo.”
4 Insan sikatoy inikdan da na 70 piraso na pilak a nanlapud abung* nen Baal-berit,+ tan inyupa iratan nen Abimelec ed saray lalakin anggapoy gagawaen tan agmangikabkabilangan, ta pian sikatoy ibaan da.
5 Kayari na satan et sikatoy linmad abung na ama to diad Ofra+ tan pinatey to ed sakey a bato iray agagi to,+ saray ananak nen Jerubaal, 70 lalaki. Si Jotam labat a sankayugtanan ya anak nen Jerubaal so akaliktar, ta inmamot.
6 Insan nantitipon so amin a papangulo na Siquem tan say interon Bet-milo tan ginawa ran ari si Abimelec,+ diad asingger ed baleg a kiew, diad abay na lusek a walad Siquem.
7 Sanen impaamta ra itan ed si Jotam, sikatoy tampol a linma tan nanalagey ed toktok na Palandey Gerizim,+ tan oniay inkelyaw tod sikara: “Dengel yo ak, sikayo ran papangulo na Siquem, pian dengelen kayo na Dios.
8 “Nensaman a panaon et wala ray kiew a linman manuro na sakey ya ari a manuley ed sikara. Kanian inkuan dad kiew ya olibo, ‘Uleyan mo kami.’+
9 Balet inkuan ed sikara na kiew ya olibo, ‘Taynan ko ta so larak ko,* ya uusaren da ed pangigloria ed Dios tan ed totoo, pian onla ak a manpayapay ed tagey na arum a kiew?’
10 Insan inkuan na saray kiew ed kiew ya igos, ‘Gala tan uleyan mo kami.’
11 Balet inkuan ed sikara na kiew ya igos, ‘Taynan ko ta so masamit iran prutas ko, pian onla ak a manpayapay ed tagey na arum a kiew?’
12 Insan inkuan na saray kiew ed sengeg na ubas, ‘Gala tan uleyan mo kami.’
13 Inmebat ed sikara imay sengeg na ubas, ‘Taynan ko ta so balon alak ko a mamapaliket ed Dios tan ed totoo, pian onla ak a manpayapay ed tagey na saray kiew?’
14 Diad kaunoran et inkuan na amin a kiew ed samay sabisabit, ‘Gala tan uleyan mo kami.’+
15 Diad saman et oniay inkuan na samay sabisabit ed saray kiew, ‘No talagan labay yo ak a turoen ya ari yo, gali dia, sirom kayod silong ko. Balet no andi, ompaway ed siak so apoy tan poolan to iray sedro ed Lebanon.’
16 “Natan, kasin matua tan mapagalang so inkiwas yo nen ginawa yon ari si Abimelec,+ tan kasin kamaongan so impatnag yo ed si Jerubaal tan ed sankaabungan to, tan kasin ginawa yo so manepeg ed sikato?
17 Sanen akilaban so amak parad sikayo,+ inrisga toy bilay* to pian niliktar to kayo manlapud lima na Midian.+
18 Balet natan et sinmumpa kayod sankaabungan nen amak tan pinatey yod sakey a bato iray ananak to, 70 lalaki.+ Insan yo ginawan ari na saray papangulo na Siquem si Abimelec ya anak tod aripen ton bii,+ lapu labat ta sikatoy agi yo.
19 On, no matua tan mapagalang so inkiwas yo parad si Jerubaal tan ed sankaabungan to diad sayan agew, manliket kayod si Abimelec tan sikatoy manliket met komon ed sikayo.
20 Balet no andi, ompaway komon ed si Abimelec so apoy tan poolan na satan iray papangulo na Siquem tan say Bet-milo,+ tan ompaway komon so apoy ed saray papangulo na Siquem tan say Bet-milo, tan poolan na satan si Abimelec.”+
21 Insan tinmakas si Jotam+ tan batik ed Beer, tan nanayam diman lapud si Abimelec ya agi to.
22 Nanuley* si Abimelec ed Israel diad loob na taloy taon.
23 Insan say Dios et inabuloyan ton manbusolan* si Abimelec tan saray papangulo na Siquem, tan ag-ira nanmatoor ed si Abimelec.
24 Agawa iya pian nibales so inkaruksa a ginawad saray 70 ananak nen Jerubaal. Ebatan nen Abimelec ya agi ra so dala ra lapud impamatey tod sikara,+ tan ebatan met itan na saray papangulo na Siquem lapud sikatoy tinulongan dan mamatey ed sarayan agagi to.
25 Kanian saray papangulo na Siquem et angipasen na saray lalakin mantambang ed sikato diad saray toktok na palandey, tan tatakewan day amin ya ondadalan ed kawalaan da. Diad saginonor et nipaamta itan ed si Abimelec.
26 Insan linmad Siquem si Gaal ya anak nen Ebed tan saray agagi to,+ tan nanmatalek ed sikato iray papangulo na Siquem.
27 Linma rad uma tan namburbor ira na ubas ed saray kaubasan da, pinespes da iratan, tan nampiesta ira, tan kayari na satan et linma rad abung na dios da+ tan angan tan inminum ira tan insamba ray Abimelec.
28 Insan oniay inkuan nen Gaal ya anak nen Ebed: “Siopa si Abimelec, tan siopa si Siquem pian sikatoy panlingkoran mi? Agta sikatoy anak nen Jerubaal,+ tan agta si Zebul so manunan opisyal to? Panlingkoran yo iray totoo nen Hamor ya ama nen Siquem! Balet akin et sikatoy panlingkoran mi?
29 No wala labat ed pakauley ko irayan totoo, ekalen koy Abimelec.” Insan inkuan tod si Abimelec: “Parakel moy armadam tan paway ka.”
30 Sanen nadngelan nen Zebul a prinsipe na syudad iray salita nen Gaal ya anak nen Ebed, dinmalang so sanok to.
31 Kanian sikatoy masekreto* ya angibaki na saray mensahero ed si Abimelec, ya inkuan to: “Wala lad Siquem si Gaal ya anak nen Ebed tan saray agagi to, tan lalagyaten day syudad ya onsumpad sika.
32 Kanian tatdang kad sayan labi, sika tan saray totoom, tan mantalaran kayo ed uma.
33 Kabutay na agew diad kabuasan et bangon kan masakbay tan lusob moy syudad; tan sano sikato tan saray kaiba ton totoo et ompaway a milaban ed sika, gawam so anggaay nayarian mo pian sikatoy natalom.”*
34 Kanian binmangon ed labi si Abimelec tan say amin a totoon kaiba to, tan apatiran grupo ira a nantalaran pian onlusob ed Siquem.
35 Sanen pinmaway si Gaal ya anak nen Ebed tan nanalagey ed lolooban diad puerta na syudad, inmalagey si Abimelec tan saray totoon kaiba to diad pasen a pantatambangan da.
36 Sanen anengneng nen Gaal iray totoo, inkuan tod si Zebul: “Wala ray totoon onlalasur manlapud saray toktok na palandey!” Balet inkuan ed sikato nen Zebul: “Anino na saray palandey so nanenengneng mo. Singa labat iratan lalaki.”
37 Agnambayag et inkuan nen Gaal: “Onlalasur iray totoo manlapud pegley na dalin, tan sakey a grupo so onsasabi diad dalan a kawalaay baleg a kiew na Meonenim.”
38 Inmebat si Zebul ed sikato: “Kawalaan to la may ilalastog mon, ‘Siopa si Abimelec pian panlingkoran mi?’+ Agta saraya may totoon nileglemew mo? Paway ka natan tan milaban kad sikara.”
39 Kanian pinmaway si Gaal tan linmad unaan na saray papangulo na Siquem tan akilaban ed si Abimelec.
40 Inusilan nen Abimelec si Gaal, kanian sikatoy tinmakas, tan dakdakel so apatey anggad lolooban ed puerta na syudad.
41 Tan nantultuloy a nanayam si Abimelec diad Aruma, tan pinataynan nen Zebul+ si Gaal tan saray agagi to manlapud Siquem.
42 Diad tinmumbok ya agew et pinmaway iray totoo pian onla rad uma, tan nipaamta iya ed si Abimelec.
43 Kanian tinipon to iray totoo tan inapag to rad taloran grupo tan nantalaran irad uma. Sanen anengneng ton ompapaway ed syudad iray totoo, nilusob to ra tan pinatey to ra.
44 Inmataki si Abimelec tan saray grupo a kaiba to tan pinmuesto rad lolooban ed puerta na syudad, legan ya aatakien na duaran grupo so amin a walad uma, tan pinapatey da ra.
45 Sanagew ya akilaban si Abimelec ed satan a syudad tan asakop to itan. Pinapatey to ray totoon wadtan, insan inggeba toy syudad+ tan sinibwagan to na asin.
46 Sanen nadngelan itan na amin a papangulo a manaayam ed tori na Siquem, tampol iran linma ed kuarton amotan* a walad abung* nen El-berit.+
47 Sanen nipaamta ed si Abimelec a nantitipon so amin a papangulo a manaayam ed tori na Siquem,
48 tinmatdang ed Palandey Zalmon si Abimelec tan amin a lalakin kaiba to. Angalay Abimelec na wasay tan nambatang na sanga na kiew insan to sinakbat, tan inkuan tod saray totoon kaiba to: “No antoy anengneng yon ginawak, gawa yo met, apura yo!”
49 Kanian nambatang met na sanga so amin a totoo tan tinumbok day Abimelec. Insan da impaliber iray sanga diad gilig na kuarton amotan tan pinoolan da itan. Kanian inatey so amin a papangulo a manaayam ed tori na Siquem, manga 1,000 lalaki tan bibii.
50 Linmad Tebez si Abimelec; sikatoy nankampo pian onsumpad Tebez tan sinakop to itan.
51 Walay sakey a mabiskeg a tori diad pegley na syudad, tan batik diman so amin a lalaki tan bibii tan amin a papangulo na syudad. Insan inkapot da itan tan sinmapat ira ed atep na tori.
52 Linmay Abimelec ed kawalaan na tori tan nilusob to itan. Inasinggeran toy lolooban na tori pian poolan itan.
53 Insan walay sakey a biin angipelag na gilingan ed ulo nen Abimelec kanian abetag so lapislapis na ulo to.+
54 Tinawag ton tampol so lingkor ton manag-awit na armas to tan inkuan tod sikato: “Uyos moy espadam tan patey mo ak, pian agda ibagan, ‘Sakey a bii so amatey ed sikato.’” Kanian sikatoy dinuyok na lingkor to, tan sikatoy inatey.
55 Sanen anengneng na saray lalaki ed Israel ya inatey lay Abimelec, sinmempet la ran amin.
56 Kanian imbales na Dios ed si Abimelec so kaugsan a ginawa tod ama to diad impamatey tod 70 agagi to.+
57 Impawil met na Dios ed mismon ulo na saray lalaki ed Siquem so amin a kaugsan a ginawa ra. Kanian agawad sikara so samba ya imbalikas nen Jotam+ ya anak nen Jerubaal.+
Paimanod leksab
^ Literal, “pamilya ed sankaabungan na ama nen ina to.”
^ Odino posiblin, “ya akankayarian ed dalin.”
^ Odino “so kanayon yo.”
^ Literal, “tan nikiling so puso ra.”
^ Odino “templo.”
^ Odino “inkamabungak.”
^ Odino “kamarerwa.”
^ Odino “Inmakton singa prinsipe.”
^ Literal, “angibaki na mauges ya espiritu ed.”
^ Odino “masilib.”
^ Odino “gawam ed sikato so antokaman a posiblin nagawaan na limam.”
^ Odino “salimbengan.”
^ Odino “templo.”
