No Martes, Abril 11, dakel ya inaktibon agagi so onatendi ed Memoryal. Ginapoan day pilulumbad batik parad bilay balet tinmantan ira lapud nanduruman rason, ya arum ed saratan et walad brosyur ya Pawil Ka Lad si Jehova. (Heb 12:1) Balet, mabmabli nin siansia ed si Jehova iray inaktibo ta sinaliw to ira panamegley na dala na Anak to. (Gaw 20:28; 1Pe 1:18, 19) Panon tayo ran natulongan ya ompawil ed kongregasyon?

Saray elder ed kongregasyon et panseseetan dan anapen tan tulongan iray inaktibon agagi no panon ya panseseetan ya anapen na managpastol so nababalang ya karnero. (Luc 15:4-7) Ipapanengneng na satan so maaron panangasikaso nen Jehova. (Jer 23:3, 4) Amin tayo, aliwan saray elder labat, et sarag tayon pasesegen iray inaktibo. Say pansasagpot tayon ipanengneng so kaabigan tan empatya et makapaliket ed si Jehova tan manresulta ed dakel ya bendisyon. (Pro 19:17; Gaw 20:35) Kanian, nonot mo no siopay nayarin pasesegen mo, tan gawam lan tampol itan!

BANTAYAN SO VIDEO YA PASESEGEN IRAY INAKTIBO, INSAN PANTONGTONGAN IRAYAN TEPET:

• Antoy ginawa nen Abbey nen walay biin akabat to ya agto amtan Tasi manaya?

• Akin et nepeg tayon asinggeran iray elder no labay tayon tulongan so sakey ya inaktibo?

• Panon ya namparaan si Abbey nen bisitaen to lamet si Laura?

• Panon ya impanengneng nen Abbey so inkapursigido, anos, tan aro nen papasesegen toy Laura?

• Antoy naaralan tayod ilustrasyon nen Jesus ya walad Lucas 15:8-10?

• Anto ray bendisyon lapud amin ya ginawan sagpot pian tulongan si Laura?