BILAY NA KRISTIANO
Nodnonot Yoy Asawa nen Lot
Akin et linmingaw ed benegan so asawa nen Lot legan iran ompapaway ed Sodoma? Ag-ibabaga na Biblia. (Ge 19:17, 26) Nanengneng ed konteksto na pasakbay nen Jesus ya posiblin labay ton pawilen iray bengatlan atilak to. (Luc 17:31, 32) Antoy gawaen tayo pian agnaandi so panangabobon na Dios ed sikatayo a singa agawad asawa nen Lot? Agtayo nepeg ya abuloyan ya manuna ed bilay tayo iray materyal ya bengatla. (Mat 6:33) Imbangat nen Jesus ya agtayo “nayarian so manpaaripen ed Dios tan ed Kayamanan.” (Mat 6:24) Pero antoy gawaen tayo no nalikas tayon sasamsamen la na materyal iran bengatla so panaon tayo ya para komon ed espiritual? Ipikasi tayod si Jehova ya ikdan to tayoy pakatebek pian nanengneng tayo no anto ran pananguman so gawaen tayo tan ikdan to tayoy pakpel tan biskeg ya gawaen iratan.
PAWILEN IMAY TALORAN PARTE A VIDEO YA NODNONOT YOY ASAWA NEN LOT, INSAN EBATAN IRAYAN TEPET:
-
Panon kon nipanengneng ya ‘nonodnonoten koy asawa nen Lot’?
Panon ya naapektoan so panagnonot, panagsalita, tan kiwas nen Gloria lapud desdes ya kaukolan toy makalmo na baleg a kuarta?
-
Panon itayon papasakbayan na makapuy ya alimbawa na asawa nen Lot?
-
Panon ya akatulong ed si Joe tan ed pamilya to so impangiyaplika dad saray prinsipyo na Biblia?
-
Panon ya naapektoan so espiritualidad nen Anna lapud pipiulop tod saray katrabaho to?
-
Akin ya kaukolan tayoy pakpel no nadedesdes tayon iyuna ed bilay tayo so kuarta?
-
Antoy ginawa nen Brian tan Gloria pian niyuna da lamet so espiritual?
-
Anto ran prinsipyo ed Biblia so nidanet ed sayan video?
