Diad pinuyanan ya sulat nen apostol Pablo ed si Tito, pinaseseg to iray kabataan, kaiba lay Tito, ya gawaen day anggaay nayarian dan magmaliw ya “ehemplo na maabig iran gawa diad amin a paraan.” (Tit 2:6, 7) Diad bandad sampot na satan ya kapitulo, imbaga to ya saray totoo nen Jehova et nilinisan la pian magmaliw iran “maseseg ed maabig iran gawa.” (Tit 2:14) Kaibad saratan ya maabig a gawa so pangipulong tan pangibangat nipaakar ed Panarian na Dios. No sakey kan kabataan, kasin sarag mon usaren so biskeg mo pian makapanlingkor ka bilang auxiliary odino regular payunir?​—Pro 20:29.

No labay moy manpayunir, iplanom no anto ray sarag mon gawaen pian nadampot mo itan. (Luc 14:28-30) Singa bilang, panon mon nasuportaan so sarilim ed pinansyal legan kan manlilingkor ya full-time? Panon mon naabot so kakaukolanen ya oras? Ipikasim itan ed si Jehova. (Sal 37:5) Itongtong mo itan ed atateng mo tan ed saray eksperiensyadon payunir. Insan manggawa kay paraan pian naabot itan ya kalat mo. Seguradon bendisyonan nen Jehova so maseseg ya panlilingkor mo!

BANTAYAN SO VIDEO YA SARAY KABATAAN YA PAPAGALANGAN DA SI JEHOVA, INSAN EBATAN IRAYA:

• Anto ran subok so inarap na arum pian makapanlingkor bilang payunir, tan panon dan asarag itan?

• Panon ya natulongan na atateng iray ananak da ya magmaliw ya regular payunir?

• Akin et importante ya manggawa kay eskedyul mo ed ministeryo?

• Panon ya napaseseg tan natulongan na agagi ed kongregasyon iray payunir?

• Anto ran bendisyon so nanaawat na saramay manlilingkor bilang payunir?