Kada taon, tatalaranan na saray totoo nen Jehova so saniiba dan panselebra ed Memoryal. Pigaran simba antis odino kayari na Memoryal, uusaren tayo iratan ya espisyal a pankanawnawa pian nidayew tan nipanengneng tayoy pisasalamat tayod si Jehova lapud regalo ton dondon. (Efe 1:3, 7) Singa bilang, papasyaen tayoy pangimbita ed arum pian makaatendi rad Memoryal. Say arum et sarag dan i-adjust so eskedyul da pian makapan-auxiliary payunir, balanglan 30 o 50 oras so abeten da diad saray bulan na Marso odino Abril. Kasin labay mon aruman so panaon mod ministeryo legan na panaon na Memoryal? Antoy makatulong pian nagawaan mo itan?

Kaslakan, dakel so nagawaan tayo no masakbay tayo lan manplano. (Pro 21:5) Lapud asingger lay panaon na Memoryal, natan la so marakep ya pamplano. Isip mo no anto ray labay mon gawaen pian napalaknab moy ministeryom legan na panaon na Memoryal, tan nonot mo no anto ray kaukolan mon gawaen pian naabet mo iratan ya goal mo. Insan ipikasim ed si Jehova ya bendisyonan toy sagpot mo.—1Jn 5:14, 15.

Wala kasi naisip mon paraan pian napalaknab moy ministeryom legan na panaon na Memoryal?