Say Memoryal so mangiter ed sikatayo na pankanawnawan nodnonoten iray bendisyon ed arapen ya nagmaliw a posible lapud dondon, a singa say kioli. Agkaibad gagala nen Jehova ya ompatey iray totoo. Kanian say panermen ed impatey na inad-aro so sakey ed sankasakitan ya nalikna tayo. (1Co 15:26) Ansakisakit ed si Jesus a nanengneng ya maneermen iray disipulo to lapud impatey nen Lazaro. (Jn 11:33-35) Lapud perpekton impatnag nen Jesus iray kualidad na Ama to, segurado tayon ansakisakit met ed si Jehova no nanengneng to tayon maneermen ed impatey na inad-aro tayo. (Jn 14:7) Pipirawaten la nen Jehova so panaon ya bilayen to lamet iray inatey a lingkor to, tan ontan met so nepeg ya nalikna tayo.—Job 14:14, 15.

Lapud si Jehova et Dios ya organisado, matalek tayo ya say kioli et nagawa ed mauksoy ya paraan. (1Co 14:33, 40) Kanian imbes ya ponpon, say nagawa et abeten tayo ray napaoli. Kasin dadalepdepen moy kioli, lalo la no maneermen kad impatey na inad-aro? (2Co 4:17, 18) Kasin misasalamat ka ed si Jehova lapud inter toy dondon tan impaamta tod Kasulatan ya nabilay lamet iray inaatey?—Col 3:15.

• Siopa ed saray kaarom tan kanayon mo so labalabay mon nanengneng lamet?

• Siopan karakter ed Biblia so labalabay mon nakabat tan nakatongtong?