Saray visual aid et naala toy atension na makakanengneng tan natulongan ya natalosan tan natandaan so aaralen to. Say Makapadinayew a Managbangat tayo, si Jehova, et angusar na saray visual aid pian ibangat iray importantin leksion. (Ge 15:5; Jer 18:1-6) Inusar met iratan na Sankamaongan a Managbangat tayo, si Jesus. (Mat 18:2-6; 22:19-21) Say sakey ya klase na visual aid ya talagan epektibo diad agano ni ran taon et say video. Kasin manguusar ka na saray video no ibabangat mo iray iyaaralan moy Biblia?

Walay samploran video ya imparaan pian natulongan itayon ibangat iray leksion ed brosyur ya Maong a Balita ya Nanlapud Dios! Kada title na video et miparad sakey ed saray mabakat ya tepet ed brosyur. Diad digital ya kopya na brosyur et walay link ya mangipanonot no kapigan ipabantay so kada video. Sakey ni, wala met iray video ya makatulong bilang kaaruman ya impormasyon parad saray nanduruman publikasyon ya uusaren ed panangiyaral ya walad Teaching Toolbox tayo.

Kasin say topic ed Biblia ya aaralen yo et singa mairap ya talosan na iyaaralan mo? Odino kasin walay pakakasubokan na iyaaralan mo? Nengnengen iray video ed jw.org® tan JW Broadcasting® ya nayarin makatulong ed sikato. Sarag yon bantayan ya dua so sakey ed saratan ya video insan yo pantongtongan.

Kada bulan, wala ray balon video ya ire-release. Legan mon babantayan iratan, nonot mo no panon mon usaren iratan no mangiyaaral ka.