Angasawa si Jacob
Ag-amta nen Jacob no anto ran subok so naeksperiensya to diad arapen lapud impangasawa to. Nagmaliw ya mankaribal si Raquel tan si Lea. (Ge 29:32; 30:1, 8) Balet anggano wala ray subok, anengneng nen Jacob ya sikatoy lanang ya tutulongan nen Jehova. (Ge 30:29, 30, 43) Diad inlabas na panaon, saray ilalak to et nagmaliw ya nasyon na Israel.—Ru 4:11.
Diad panaon tayo, saramay mandesisyon ya mangasawa o miasawa et makaeksperiensya na saray subok. (1Co 7:28) Anggaman ontan, siansia nin magmaliw ya maliket so panamaley da no manmatalek irad si Jehova tan iyaplika da iray prinsipyo na Biblia.—Pro 3:5, 6; Efe 5:33.