Say nawalaan na maapit a relasyon ed si Jehova et saraman labat so malinis ed moral. (1Pe 1:14-16) No paliisan na saray iyaaralan na Biblia iray marutak ya kagagawa, magmaliw ya maliket so pamilya da tan maksil so laman da, ontan met, nagunggonaan irad pinansyal.

Malinew mon ipaliwawa iray estandarte nen Jehova ed moral, saray rason parad saratan, tan say maong ya resulta no unoren iratan. Manpokus ed no panon mon tulongan iray iyaaralan mo ya umanen so paraan na panagnonot da, diad ontan et nagawaan day labay nen Jehova. (Efe 4:22-24) Ipasegurom ed sikara ya diad tulong nen Jehova et sarag dan umanen so apasalan dan mauges a kagagawa. (Fil 4:13) Ibangat mo ra no panon iran masimoon ya manpikasi ed si Jehova no natutukso iran manggaway kasalanan. Tulongan mo ran nibiig iray makapatukson situasyon ya nepeg dan paliisan. Paseseg mo ran manggawa na saray bengatlan makagunggona imbes ya saray marutak ya kagagawa. Seguradon maliket ka no nanenengneng mo ray iyaaralan mo na Biblia ya manguuman diad tulong nen Jehova.

BANTAYAN SO VIDEO NA DRAMATIZATION YA TULONGAN IRAY IYAARALAN MO NA BIBLIA YA ITUNDA IRAY MARUTAK YA KAGAGAWA, INSAN EBATAN IRAYAN TEPET:

• Panon ya impanengneng na saray elder tan nen Neeta so talek da ed si Jade?

• Anto ni ginawa nen Neeta pian natulongan toy Jade?

• Panon ya kinmerew na tulong si Jade ed si Jehova?