Diad panaon tayo, lanang lan walay nagagawan natural iran kalamidad. No nagawa iratan, kaukolan ya organisadon maong so pangiter na saray relief. Kanian inyuksoy na Mananguley ya Ulop ya kada branch office et nawalaan na Disaster Relief Department.

No naamtaan na saray agagi ed satan ya department ya walay agawan kalamidad, kontaken dan tampol iray elder diad satan ya lugar pian naamtaan no anto ray kaukolan na saray agagi. No grabe so agawan deral tan ag-itan nasarag na saray agagi ed satan ya lugar, mangiyasain so branch na kualipikadon agagi ya mangasikaso ed pangiter na saray tulong. Saratan ya agagi et nayarin manawag na saray boluntaryo odino onkerew ira na donasyon parad espisipikon kaukolan da, odino mangaliw ira na saray kaukolan ya suplay insan da iratan ibunog.

Dakel so maong ya resulta no ontan so gawaen. Naiwasan ya nasayang so sagpot, agmagulo, tan agnasayang so pundo tan saray materyales. Balet no basta labat onkikiwas iray agagi, kabaliktaran so nagawa.

Sarag ya amtaen na saray agagi ya tinuro na branch no pigay nagastos tan no panon karakel ya boluntaryo so kaukolan diad pangiter na relief. Sarag da met so mitongtong ed saray opisyal na gobierno ed satan ya lugar ya posiblin makatulong ed sikatayon napapeles so pangiter tayo na relief. Kanian agnepeg ya manggaway sarilin uksoyan iray indibidual ed pankolekta na pundo, pangipawit na saray relief suplay, odino pambiahe ed apektadon lugar no anggapoy naawat dan instruksion.

Pero siempre, no walay nagawan kalamidad, labalabay tayoy ontulong. (Heb 13:16) Inar-aro tayo ray agagi tayo! Antoy sarag tayon gawaen? Manuna ed amin, sarag tayon ipikasi iray biktima na kalamidad tan saramay mangiiter na tulong. Sarag tayo met so mandonasyon parad sankamundoan a kimey. Diad panangigiya na Mananguley ya Ulop, mas amta na saray branch office no antoy sankaabigan ya pangusaran ed saratan ya donasyon. Tan no bilang labay tayoy personal ya ontulong, sarag tayon ipaamta ya available tayo diad pan-fill out ed Local Design/Construction Volunteer Application (DC-50).

BANTAYAN SO VIDEO YA GRABEN DELAP DIAD BRAZIL, INSAN EBATAN IYAN TEPET:

Antoy pandinayewan mo ed saray ginawan relief effort na saray Tasi nen Jehova kayari na delap diad Brazil nen 2020?