Say disiplina et manunan mikonektaan ed ganggan tan panangibangat, balet kaiba met ed satan so pangipetek tan panusa. Didisiplinaen itayo nen Jehova pian duga so paraan na pandayew tayo ed sikato. (Rom 12:1; Heb 12:10, 11) No maminsan, nayarin ansakit so nadisiplina, balet manresulta itan ed inkatunong tan bendisyon. (Pro 10:7) Antoy nepeg ya tandaan na saramay manidisiplina tan saramay didisiplinaen?

Say manidisiplina. Gagawaen na saray elder, atateng, tan arum ni so anggaay nayarian dan aligen si Jehova ya ipatnag so kaabigan tan panangaro no manidisiplina ira. (Jer 46:28) Anggan say ambelat ya disiplina et nepeg ya iter unong ed pankaukolan na samay didisiplinaen tan gawaen itan lapud panangaro ed sikato.—Tit 1:13.

Say didisiplinaen. Antokaman so paraan na disiplina, nepeg ya agtayo itan ipupulisay noagta awaten tan iyaplika tayo itan ya tampol. (Pro 3:11, 12) Lapud ag-itayo perpekto, kaukolan tayon amin so disiplina ya nayarin naawat tayo diad nanduruman paraan. Nayarin diad saray nababasa tayo ed Biblia odino narerengel tayo ed aral. Balet no maminsan, wala ray makaawat na disiplina manlapud judicial committee. No awaten tan ontulok tayo ed disiplina, maabig so pansumpalan tayo tan manbilay tayoy andi-anggaan diad arapen.—Pro 10:17.

BANTAYAN SO VIDEO YA “SARAMAY AAROEN NEN JEHOVA ET DIDISIPLINAEN TO,” INSAN EBATAN IRAYAN TEPET:

• Antoy situasyon na bilay nen Canon nen ugaw ni, tan panon ya anguman itan?

• Anton maaron panagdisiplina so inawat to manlapud si Jehova?

• Antoy naaralan tayo ed eksperiensya to?