Kaukolan ya nawalaan na mabiskeg a pananisia iray iyaaralan na Biblia pian napaliket day Dios. (Heb 11:6) Sarag tayon sabien so puso da panamegley na libron Panliketan so Bilay ya Anggapoy Anggaan! Karga na sayan libro iray makatulong ya teksto, malinew ya panagkatunongan, epektibon tepet, makapaseseg ya video, tan balibalin artwork. No tutulongan tayo ray iyaaralan tayo ya nawalaan na saray Kristianon kualidad tan relasyon ed Dios, singa tayo mangipapaalagey na pundasyon ya say uusaren tayo et saray materyales ya agnaderal na apoy.—1Co 3:12-15.

Wala ray totoo ya agda naimadyin ya sarag day magmaliw ya kaaro na Dios ta agda nanengneng. Kanian kaukolan tayo ran tulongan ya nakabat si Jehova tan napabiskeg so pananisia da ed sikato.

BANTAYAN SO VIDEO YA USAREY “PANLIKETAN SO BILAY YA ANGGAPOY ANGGAAN!” PIAN PABISKEGEN SO PANANISIA ED SI JEHOVA INSAN EBATAN IRAYAN TEPET:

• Panon tayon nibaga ya namparaan a maong imay sister parad pan-study da?

• Panon ton inusar so pigaran pinilin maong ya katulongan iran tepet pian nibalikas na iyaaralan so iisipen tan nalilikna to nipaakar ed Isaias 41:10, 13?

• Antoy epekto na video tan saray bersikulo na Biblia ed samay iyaaralan?

Agnatatalosan na dakel ya totoo so nipaakar ed dondon, odino ompan agda naisip ya regalo itan na Dios ed sikaran mismo. (Gal 2:20) Kanian kaukolan tayo ran tulongan pian napabiskeg so pananisia ra ed dondon bagat nen Jesus.

BANTAYAN SO VIDEO YA USAREY “PANLIKETAN SO BILAY YA ANGGAPOY ANGGAAN!” PIAN PABISKEGEN SO PANANISIA ED SI JESUS INSAN EBATAN IRAYAN TEPET:

• Panon tayon nibaga ya namparaan a maong imay brother parad pan-study da?

• Panon ton inusar so mikonektaan ya artikulo ya walad “Diskobrien” pian tulongan so iyaaralan to?

• Akin et importante so pangipikasi ed iyaaralan tayo?