Antoy labalabay mod sakey ya kaaro? Seguro amay maiter, mabait, tan agto ka paulyanan. Ontan si Jehova. (Ex 34:6; Gaw 14:17) Dengelen to ray pikakasim. Tulongan to ka no walay problemam. (Sal 18:19, 35) Perdonaen to ka no akagawa kay lingo. (1Jn 1:9) Balibalin kaaro si Jehova awa?

Panon mon nakaaro si Jehova? Makatulong no basaen moy Biblia pian nakabat mo. Agka nababaingan ya mangistorya ed sikato. (Sal 62:8; 142:2) Ipanengneng mo ya importante ed sika iray importante ed si Jehova​—say Anak to, Panarian to, tan saray gawaen tod arapen. Iyistoryam met si Jehova ed arum. (De 32:3) No kaaroen moy Jehova, ituring to kan kaaro anggad angga.​—Sal 73:25, 26, 28.

BANTAYAN SO VIDEO YA SIKAYO RAN KABATAAN​—“TAWAYAN YO TAN NENGNENG YO A SI JEHOVA ET MAONG,” INSAN EBATAN IRAYA:

• Anto ray gawaen mo pian naidedikam so sarilim tan onkualipikan manpabautismo?

• Antoy nitulong na agagi diad panaglingkor mod si Jehova?

• Panon ya makatulong so ministeryo pian napabiskeg moy relasyon mod si Jehova?

• Anto la ray nagagawaan mo natan, tan anto ni ray goal mo parad arapen?

• Antoy labalabay mod si Jehova?