NO AKIN YA IMPORTANTE: Saray totoo et kaukolan ya ontawag ed ngaran nen Jehova pian niliktar. (Rom 10:13, 14) Balet, aliwan amin ya manaaral na Biblia et labay dan iyaplika iray estandarte nen Jehova. Uusaren tayoy mablin panaon tayo ed ministeryo ya tulongan iramay talagan labay day manguman pian napaliket day Jehova. No ag-onaaligwas so iyaaralan na Biblia anggano abayag met lan iyaaralan, mas maabig no usaren tayo lay panaon tayo ed saramay iyaasingger nen Jehova ed sikato tan ed organisasyon to. (Jn 6:44) Siempre, no diad arapen et napatnagan ya say datin iyaaralan et “walaan na dugan kipapasen na puso parad bilay ya andi-anggaan,” ituloy tayo lamet so pangiyaral na Biblia ed sikato.​—Gaw 13:48.

NO ANTOY GAWAEN:

• Komendaan so iyaaralan lapud labay toy nawalaan na suston kakabatan.​—1Ti 2:4

• Idanet ya importante so pangiyaplika ed nanaaralan.​—Luc 6:46-49

• Makaaron ipaliwawa ed sikato so ilustrasyon nipaakar ed toon angisibwag na bini, tan tepetan no akin ya agto iyaaplika iray nanaaralan to.​—Mat 13:18-23

• Mataktikan ipaliwawa no akin ya itundam so panangiyaral na Biblia ed sikato

• Ibagam ya sagpaminsan kan ombisita ed sikato pian pasesegen tan sarag yon ituloy lamet so panagaral diad arapen no onaaligwas la

BANTAYAN SO VIDEO, INSAN EBATAN IRAYA:

• Antoy naimanom ed samay impantongtong da ya pakapatnagan ya ag-onaaligwas ed espiritual so iyaaralan?

• Panon ya tinulongan na manangipalapag so iyaaralan pian natalosan ton importante so panggawa na pananguman?

• Panon ya impaamta na manangipalapag ya sikatoy mabulos ya mangituloy lamet ed panagaral diad arapen?