No onnengneng ka ed makolor ya rosas, mabitewen ya tawen, odino marakdakep ya falls, kasin nanenengneng moy kimey na Manamalsa? Malinlinew ya ipapatnag na saray palsa ed kaliberliber tayo iray agnanengneng ya kualidad nen Jehova. (Rom 1:20) No dalepdepen tayo iray nanenengneng tayo, natebek tayoy pakapanyari, panangaro, karunongan, tan inkahustisya na Dios, pati say inkamaiter to.​—Sal 104:24.

Anto ray pigaran pinalsa nen Jehova ya nanenengneng mo kada agew? Anggano manaayam ka ed syudad, nayarin makanengneng ka na saray siwit tan kiew. No obserbaan mon maong iray pinalsa nen Jehova ontulong itan pian nabawasay kapagaan mo, dugay pangipasen mo ed saray problemam, ombiskeg so pananisiam ed abilidad nen Jehova ya mangasikaso ed sika ya anggad angga. (Mat 6:25-32) No wala ray anak mo, tulongan mo ran nanengneng da iray agnaparaan a kualidad nen Jehova. Legan ya naaapresya tayo iray palsa diad kaliberliber tayo, lalon onaapit itayo ed Manamalsa.​—Sal 8:3, 4.

BANTAYAN SO VIDEO YA IPAPANENGNENG NA SARAY MAKAPAKELAW YA PALSA SO GLORIA NA DIOS​—LIWAWA TAN KOLOR, INSAN EBATAN IRAYA:

• Akin et nanenengneng tayo iray kolor?

• Akin et masileng iray arum ya pinalsa?

• Akin et nandurumay kolor ya nanengneng tayo ed tawen?

• Anton balibalin kolor ed saray pinalsa so anengneng mo ed lugar yo?

• Akin et ipanaon tayo ya obserbaan iray pinalsa?