Legan na Nobyembre, pansagpotan tayon ipulong so maong a balita ya asingger lay mas marakep ya mundo. (Sal 37:10, 11; Apo 21:3-5) Iyuksoy moy eskedyul mo pian makapibiang ka ed sayan kampanya. No man-aplay ka bilang auxiliary payunir ed satan ya bulan, sarag mon aboten so 30 odino 50 ya kakaukolanen ya oras.

Gawam so anggaay nayarian mo ya manginabang na sakey a teksto nipaakar ed balon mundo ed dakel ya totoo anggad posible. No manpili ka na teksto ed Biblia, nonot mo no antoy makapainteres ed saray totoo ed teritorya yo. No interesado so katongtong mo diad unonan pitongtong, ikdan mo na kopya na publikon edisyon na Say Panag-bantayan No. 2 2021. Insan, pawilen ya tampol no posible tan salien ya igapo so panangiyaral na Biblia ya usaren so brosyur ya Panliketan so Bilay ya Anggapoy Anggaan! Talagan makapaliket no akapokus tayo ed pangipulong na “maong a balita nipaakar ed magmaong a bengatla”!—Isa 52:7.

BANTAYAN SO VIDEO NA ORIHINAL A KANSION YA DIA ED BALON MUNDO, INSAN EBATAN IRAYAN TEPET:

• Anton marakdakep ya arapen so iimadyinen na samay ugaw a bii?

• Anto ray tatalaranan mon nagawa ed balon mundo?

• Panon ya makatulong so pandalepdep ed ilalom pian niparaan moy sarilim ya mibiang ed kampanya no Nobyembre?—Luc 6:45