No maong so relasyon na Kristianon sanasawa, napagalangan day Jehova tan maliket iran dua. (Mar 10:9) Pian nawalaan iray Kristiano na mabiskeg tan maliket ya relasyon ed magmaliw ya asawa ra, nepeg dan unorey prinsipyo na Biblia diad pampili na asawa.

Miinaroan ka labat no ‘linmampas ka lad taon na kalangweran mo,’ atan may panaon ya makmaksil ni seksual ya pilalek mo ya nayarin makaapekto ed saray desisyon mo. (1Co 7:36) Usar mod sankaabigan iray panaon ya single ka ni, pabiskeg moy relasyon mo ed Dios tan paaligwas mo ni ray Kristianon kualidad mo. No ontan so gawaen mo, walay nitulong mo pian magmaliw ya mabiskeg tan maliket so relasyon yo no wala lay asawam.

Antis kan ompayag ya mangasawa odino miasawa, mangusar kay magenap ya panaon pian kabaten so “peteg ya inkatoo ed dalem na puso” na inarom. (1Pe 3:4) No wala ray panduaruwaan mo, pantongtongan yo itan ya saninaro. Singa met ed arum nin relasyon na too, kaukolan ya mas akapokus ka ed no antoy niiter mo aliwan no antoy naawat mo. (Fil 2:3, 4) No iyaaplikam la ray prinsipyo na Biblia legan ya anggapo ni asawam, mainomay mo labat ya ituloy iratan no wala lay asawam, tan magmaliw kayon maliket legay bilay.

BANTAYAN SO VIDEO YA MANPARAAN PARAD PANANGASAWA—PART 3: ‘KUENTAEN SO NAGASTOS,’ INSAN EBATAN IRAYAN TEPET:

• Diad gapo, kumusta so relasyon na samay sister ed si Shane?

• Anto ray naiimano to may sister legan ton mas nakakabat si Shane?

• Panon ya tinulongan na atateng to, tan anton dugan desisyon so ginawa to?