UUMANEN NA BIBLIA SO BILAY

Antoy akatulong ed sakey ya matakew tan bisyo toy mipustaan ya itunda so bisyo to tan umaney kabibilay to? Amtaen tayoy imbaga to.

“Agaylay Hilig Kod Karera na Kabayo.”—RICHARD STEWART

TAON NA INKIYANAK: 1965

BANSA: JAMAICA

APALABAS: MATAKEW TAN BISYO TOY MIPUSTAAN

ISTORYAY BILAY: Binmaleg ak ed mair-irap tan matoon lugar na Kingston, say capital na Jamaica. Dakdakel so anggapoy trabaho tan laganap so krimen ditan. Natatakot iray totoo ed saray gang. Inagew-agew ak ingen ya makakarengel na putok na paltog.

Makulikuli nanay mi tan iiter day nakaukolan min sanaagi. Seseguroen da ya makapanaral kami. Pero anggapoy hilig kod panaral, mas labay ko ni karera na kabayo. Nasasalik so man-skip ed eskuelaan tan onlad karera na kabayo. No maminsan siak ya mismo ingen so onlulugan ed kabayo.

Ag-abayag naadik ak lad pustay karera na kabayo. Nagmaliw ya imoral so kabibilay ko, mabii ak. Manma-marijuana ak tan mantatakew ak pian walay nagastos kod bisyok. Dakel so paltog ko, pero maong labat ta anggapoy apatey ko legan ak ya mantatakew.

Nen kien, narel ak na saray pulis tan inkulong da ak. Nen nibulos ak la, pinawil ko may datin kabibilay ko. Diad tua, mas grabe ak ni nen say dati. Anggano maamoy lupak, siga ak, misyosyodot ak, tan masebeg ak. Sarilik labat so sankanonot ko.

NO PANON YA INUMAN NA BIBLIA SO BILAY KO: Diad saman lanlamang ya magulon panaon na bilay ko, nanaral na Biblia si nanay ko tan nagmaliw ya Tasi nen Jehova. Apansin ko ya anguman si nanay ko, dinmakep so ugali da, kanian a-curious ak. Labay kon naamtaan no antoy akapanguman ed sikara. Kanian tetepetan ko la ray Tasi nipaakar ed Biblia.

Naamtaan ko ya duman maong so ibabangat na Saray Tasi nen Jehova ed arum ya relihyon tan ibabase dad Biblia iray bangat da. Sikara labat so kabat kon relihyon ya manpupulong ed kaabungan, ya singa ginawa na saray inmunan Kristiano. (Mateo 28:19; Gawa 20:20) Akombinse ak ya aya so tuan relihyon ta anengneng kon manaaroan iran talaga.—Juan 13:35.

Naaralan kod Biblia ya kaukolan kon umanen so kabibilay ko. Naamtaan kon kabusol nen Jehova ya Dios so seksual ya imoralidad, tan pian napaliket ko, kailangan kon itunda irayan marutak ya kagagawa. (2 Corinto 7:1; Hebreo 13:4) A-touch ak nen naamtaan ko ya wala manayay liknaan nen Jehova, sikatoy nasasakitan odino naliliketan ed saray gagawaen ko. (Proverbio 27:11) Intundak so panma-marijuanak, dinederal ko ray paltog ko, tan nansagpotan kon umanen so ugalik. Balet say sankairapan ya intundak et amay imoral ya kabibilay ko tan say pipupustak.

Nen unaan, agko labay ya ipaamtad saray kabarkadak ya manpapaiyaral ak na Biblia ed Saray Tasi nen Jehova. Balet anguman so panmoriak nen abasak so Mateo 10:33, ya oniay imbaga nen Jesus: “Siopaman a mangiburi ed siak ed arapan na totoo, sikatoy iburik met ed arapan nen Amak a walad tawen.” Atan so amakiwas ed siak ya ibagad saray kabarkadak ya manpapaiyaral ak ed saray Tasi. A-shock ira. Ag-ira makapanisia ya labay koy magmaliw ya Kristiano. Pero imbagak ed sikara ya agko la labay ya pawilen imay datin kabibilay ko.

MARAKEP IRAN RESULTA: Agaylay liket nen nanay ko nen anengneng to ya iyaaplikak lay prinsipyo na Biblia. Agmet la ra aburido ya ompan walay gagawaen kon kalokoan. Say pantotongtongan mi la natan et say panangaro mid si Jehova. No maminsan, nanononotan koy bilay ko nensaman. Agak makapanisia ya sarag ko manayay manguman diad tulong na Dios. Agko la aanap-anapen may imoral tan maluhon kabibilay ko.

No agko inawat so mensahe na Biblia, ompan inatey ak la odino akakulong ak natan. Pero natan, malikeliket kamin pamilya. Sulit so manlingkor ed si Jehova, kaibay masuportan asawak tan maunor ya anako. Misalsalamat ak ed si Jehova ta pinayagan to ak ya magmaliw ya parte na maaron Kristianon impanaagi. Misalsalamat ak met ta walay maan-anos ya angiyaral ed siak na katuaan na Biblia. Tan papablien ko iray pankanawnawan ibangat so Biblia ed arum. Tan say manunan pisalsalamatan ko et si Jehovan Dios lapud maaro tan mapangasin inyasingger to ak ed sikato.

[Blurb]

“Naamtaan ko ya wala manayay liknaan nen Jehova, sikatoy nasasakitan odino naliliketan ed saray gagawaen ko”

[Litrato]

Apansin ko ya anguman si nanay ko, dinmakep so ugali da

[Litrato]

Kaibak si asawak tan say anako