AMINPIGA ya imbangat nen Jesus so tungkol ed pampikasi. Diad panaon to, manpipikasi iray Judion lider na relihyon “diad saray nansangaan na saray manunan karsada.” Akin ey? “Pian nanengneng ira na totoo.” Sankalikas ya labalabay day pairayew ed inkarelihyoso ra. Andurukey tan paulit-ulit so pikakasi ra, ya singa da papapawayen ya kailangan so mangusar na “dakel a salita” pian dengelen so pikakasi. (Mateo 6:5-8) Imbaga nen Jesus ya anggapoy gunggona na ontan ya kagagawa, kanian tinulongan to ray mapaabeban totoo pian naamtaan da no anto ray iwasan no manpipikasi. Pero, aliwan saratan labat so imbangat to.

Imbangat nen Jesus ya bitlaen tayod pikakasi tayo ya napasanto komon so ngaran na Dios, onsabi so Panarian To, tan nagaway linawa To. Imbangat met nen Jesus ya duga labat ya kerewen tayo ed Dios ya tulongan to tayo ed saray personal ya pankaukolan tayo. (Mateo 6:9-13; Lucas 11:2-4) Diad saray ilustrasyon nen Jesus, impanengneng to ya pian dengelen na Dios iray pikakasi tayo, dapat agtayo basta-basta onsusuko, walay pananisia tayo, tan mapaabeba tayo. (Lucas 11:5-13; 18:1-14) Tan aliwan angangga ed salita si Jesus, mapuersa so imbangat to ta ginawa ton mismo itan.—Mateo 14:23; Marcos 1:35.

Seguradon akatulong ed saray disipulo nen Jesus so instruksion to pian napaaligwas day pikakasi ra. Pero, inalagar ni nen Jesus so sampot ya labi to diad dalin antis ton imbangat ed saray disipulo to so sankaimportantian ya leksion ed pikakasi.

Diad sampot lan labi nen Jesus, pinaseseg to iray matoor ya apostol to. Dugaruga iman ya panaon pian ipaamtad sikara so balon paraan na pikakasi. Imbaga nen Jesus: “Siak so dalan tan say katuaan tan say bilay. Anggapoy makasabi ed Ama no aliwan diad panamegley ko.” Insan impromisa tod sikara: “Antokaman so kerewen yo diad ngaran ko, saya so gawaen ko, pian nigloria so Ama ed panamegley na Anak. No onkerew kayo na antokaman diad ngaran ko, gawaen ko itan.” Insan nen mansampot la, imbaga to: “Anggad natan et anggapo ni anggan sakey a kinerew yo diad ngaran ko. Kerew kayo tan makaawat kayo, pian magmaliw kayon malikeliket.”—Juan 14:6, 13, 14; 16:24.

Agnalinglingwanan iyan imbaga to. Imbaga ni ingen na sakey ya reperensya ya sakey iyan “baleg ya pananguman ed panagpikasi.” Aglabay ya ibaga nen Jesus ya sikato lay pampikasian. Imbes, inggapo to so balon paraan na iyasingger ed si Jehova ya Dios.

Tua, lanang ya dedengelen na Dios iray pikakasi na matoor iran lingkor to. (1 Samuel 1:9-19; Salmo 65:2) Balet, manlapu nen akisipanan so Dios ed bansan Israel, kailangan dan bidbiren ya say Israel so bansan pinili na Dios pian dengelen To so pikakasi ra. Tan nen panaon nen Solomon, kailangan dan bidbiren ya say templo so pinili na Dios ya pasen na panagbagatan. (Deuteronomio 9:29; 2 Awaran 6:32, 33) Pero, temporaryo labat iratan ya paraan na panagdayew. Insulat nen apostol Pablo, ya say Ganggan ed Israel tan say panagbagat ed templo et “anino labat na saray maabig a bengatlan onsabi, tan aliwan saya imay tuan bengatla.” (Hebreo 10:1, 2) Lapud anino labat iratan, nasalatan sirin na tudtua. (Colosas 2:17) Manlapu nen 33 C.E., agla akadepende ed pangunor ed Mosaikon Ganggan so pakawalaan na relasyon ed si Jehova. Imbes, akabase itan diad itulok ed samay ipapaimano na Ganggan—si Kristo Jesus.—Juan 15:14-16; Galacia 3:24, 25.

Angiter si Jesus na superyor ya paraan na iyasingger ed si Jehova. Impaamta to ya sikatoy singa makapanyarin kaaro, ya angilukas na dalan pian dengelen tan ebatan na Dios so pikakasi tayo. Akin et ginawa iya nen Jesus para ed sikatayo?

Amin tayo et inyanak ya makasalanan, kanian anggan antoy gawaen tan ibagat tayo, ag-itayo nalinisan ed kasalanan tan anggapoy karapatan tayon nakaaro so masanton Dios, si Jehova. (Roma 3:20, 24; Hebreo 1:3, 4) Balet inter nen Jesus so perpekton bilay to bilang too tan binayaran toy kasalanan na totoo. (Roma 5:12, 18, 19) Kanian amin iramay malabay ya naperdona et nawalaan na pankanawnawan magmaliw ya malinis ed arapan nen Jehova tan ‘mabulbulos ya makapansalita’ ed Dios. Balet posible labat iya no ipanengneng day pananisia ed bagat nen Jesus tan manpikasi ira diad ngaran to.—Efeso 3:11, 12.

No manpipikasi tayo diad ngaran nen Jesus, ipapanengneng tayoy pananisia diad taloran papel to ed pakagawa na gagala na Dios: (1) Sikato so “Kordero na Dios,” ya imbagat pian naperdona so kasalanan tayo. (2) Sikatoy pinaoli nen Jehova tan natan et sikato lay “atagey ya saserdote” ya mangitatarya na saray bendisyon na dondon. (3) Sikato labat so “dalan” pian makaasingger ed si Jehova diad pikakasi.—Juan 1:29; 14:6; Hebreo 4:14, 15.

Napapagalangan si Jesus no manpikasi tayo diad ngaran to. Duga labat itan ya panamagalang, ta labay nen Jehova ya “diad ngaran nen Jesus et ontalimukor so amin a pueg . . . , tan ipaamta na amin a bibidbiren dan si Jesu-Kristo so Katawan diad kigloriaan na Dios ya Ama tayo.” (Filipos 2:10, 11) No manpipikasi tayo diad ngaran nen Jesus, niglogloria si Jehova, samay angiter na Anak to pian nabendisyonan itayo.—Juan 3:16.

Pian naamtaan tayoy kaatagey na posisyon nen Jesus, angusar so Biblia na nanduruman titulo tan ngaran pian ideskribe si Jesus. Ontulong iratan pian natalosan tayo so dakel ya bendisyon ed sikatayo lapud ginawa, gagawaen, tan gawaen ni nen Jesus parad sikatayo. (Nengnengen so kahon ya “ Saray Importantin Papel nen Jesus.”) Talagan naikdan si Jesus na “ngaran ya atagey nen say arum nin ngaran.” * Amin ya pakauley ed tawen tan diad dalin et niiter lad sikato.—Filipos 2:9; Mateo 28:18.

Pian dengelen nen Jehova iray pikakasi tayo, manpikasi tayo diad ngaran nen Jesus. (Juan 14:13, 14) Pero agtayo uulit-uliten ya ibaga so salitan “diad ngaran nen Jesus” ya singano apasalan tayo labat ya ibaga. Akin ey?

Niay sakey ya ilustrasyon. No akaawat kay sulat manlapud sakey ya businessman, diad sampot et kaslakan ya isusulat so “sincerely yours.” Parad sika, kasin aman ya talaga so nalilikna na businessman, odino tutumboken to labat so pormal ya paraan na panagsulat? No uusaren tayoy ngaran nen Jesus diad pikakasi tayo, kailangan ya manlapud puso itan aliwa labat ya singa pormal ya pansampot ed sulat. Kailangan ya ‘naynay tayon manpikasi,’ pero dapat gawaen tayo itan diad ‘interon puso,’ aliwan lapud apasalan labat.—1 Tesalonica 5:17; Salmo 119:145.

Panon mon naiwasan ya ibagay “diad ngaran nen Jesus” ya singa labat apasalan? Marakep no isipen mo iray balibalin kualidad nen Jesus. Isip mo no anto la ray ginagawa to tan mabulos ton gawaen parad sika. Diad pikakasi, pisalamatan tan idayew moy Jehova lapud agto insiblet so anak to. No ontan so gawaen mo, makapantiwala ka ed impromisa nen Jesus: “No walay antokaman a kerewen yod Ama, iter to itan ed sikayo diad ngaran ko.”—Juan 16:23.