Alanor Ka ed Makanan Salisalan
Kapitulo 12
Alanor Ka ed Makanan Salisalan
1, 2. (a) Akin a say nengneng na pambilay mo so peteg a makabaliksan ed sika? (b) Diad siopa ni a satan so makabaliksan, tan akin?
PETEG a makabaliksan no panon so pambilay mo. Kabaliksan to ed sika so balanglan maliket ya arapen odino makapasinagem. Diad kaunoran et determinaen to no kasin napaso ka a kaiba na sayan mundo odino makaliktar ka ed anggaan to tan onloob ed matunong a balon mundo na Dios a ditan et manbilay ka na ando lan ando.—1 Juan 2:17; 2 Pedro 3:13.
2 Ingen say pangikurang mo ed bilay mo so mangapekta a lalo nen say sika lambengat. Arum so nalalanor. Say gawaen mo so mangapekta met ed sikara. Alimbawa, no saray atateng mo so mabilay, say gawaen mo so nayarin mangitarok ed sikara na kagalangan da odino kababaingan. Kuan na Biblia: “Say makabat ya anak so mamaliket ed Ama, tan say makulangkulang ya anak so kaermenan na ina to.’’ (Uliran 10:1) Lalon importante, say pangikurang mo ed bilay mo so mangapekta ed si Jehova a Dios. Balanglan sikato so mamaliket ed sikato odino mamaermen ed sikato. Akin? Nisesengeg ed sakey a makanan salisalan a kalalanoran mo.
KASIN SARAY TOTOO SO MAGMALIW A MATOOR ED DIOS?
3. Anton angat so ginawa nen Satanas ed si Jehova?
3 Sayan salisalan so pinatalindeg nen Satanas a Diablo. Pinatalindeg to sanen ayarian toy Adan tan Eva a mamuyak ed ganggan na Dios tan sirin akikasakey ed sikato diad impanrebelde ed Dios. (Genesis 3:1-6) Saya so angiter ed si Satanas na samay nilikna ton letnegan na iyangat ed si Jehova: ‘Saray totoo so manlingkor ed sika lambengat nisesengeg ed naala ra ed sika. Ikdan moak pa lambengat na pankanawnawa tan pabenegen ko so siopaman ed sika.’ Anggaman sarayan salita so agpinmatnag a peteg ed Biblia, malinew ya imbaga nen Satanas so singa onia ed Dios. Saya so nipanengneng ed libro na Biblia nen Job.
4, 5. (a) Siopa si Job? (b) Anto so agawa ed tawen ed agew nen Job?
4 Si Job so sakey a toon nambilay ed dakel iran siglo kayari na impanrebelde ed tanamanan na Eden. Sikato so sakey a matunong tan matoor ya aripen na Dios. Balet kasin satan so makabaliksan ed Dios odino ed si Satanas a si Job so matoor? Ipanengneng na Biblia ya ontan. Ibabaga to’d sikatayo so nipaakar ed impatnag nen Satanas ed arap nen Jehova ed saray korte na tawen. Imanoen so tema na tongtongan da:
5 “Natan sikato so agew sanen saray anak na tuan Dios so linmoob a mangala na pasen da ed arap nen Jehova, tan anggan si Satanas so linmoob ed utel da. Insan si Jehova so angikuan ed si Satanas: ‘Iner so nanlapuan mo?’ Diad saman et inmebat si Satanas ed si Jehova tan kuanto: ‘Manlapud impanliberliber ed dalin tan manlapud impanakar diman.’ Tan inkuan nen Jehova ed si Satanas: ‘Kasin inteen mo so pusom ed si aripen kon Job, ya anggapo so singa sikato ed dalin, sakey a lakin andi-tilol tan maptek, ontatakot ed Dios tan ombebeneg ed mauges?’ ’’—Job 1:6-8.
6. Anton salisalan so ipanengneng na Biblia a linmesa ed agew nen Job?
6 Akin a binitla nen Jehova ed si Satanas a si Job so sakey a toon maptek? Malinlinew, wala so sakey a salisalan no kasin si Job so mansiansian matoor ed si Jehova odino andi. Isipen pa so tepet na Dios, “Iner so nanlapuan mo?’’ tan say ebat nen Satanas a, “Manlapud impanliberliber ed dalin tan manlapud impanakar diman.’’ Sayan tepet tan ebat nen Satanas so mangipanengneng ya aabuloyan nen Jehova si Satanas a nawalaan na bulos a pankanawnawan mangitarok na angat to a nayarian ton pabenegen so siopaman ed Dios. Bueno, anto so ebat nen Satanas ed tepet nen Jehova nipaakar ed katooran nen Job?
7, 8. (a) Nisesengeg ed anton rason so imbaga nen Satanas a si Job so manlilingkor ed Dios? (b) Anto so gawaen nen Jehova a pangareglo ed salisalan?
7 “Diad saman inmebat si Satanas ed si Jehova tan kuanto: ‘Kasin tinmakot si Job ed Dios ya andi-kabaliksan? Ta sika so nanggawa na alar ed liberliber to tan ed abung to tan ed amin a bengatlan walad kaliberliber to? Saray kimey na lima to so benindisyonan mo, tan saray ayayep to so dinmakerakel ed dalin. Balet, diad panguman, iyunat mo so limam, ipangasim, tan diwit mo so amin a bengatlan walad sikato tan nengneng mo no kasin agto ka ayewen ed mismon lupam.’ ’’—Job 1:9-11.
8 Diad ebat to si Satanas so manbabaraan ed katooran nen Job ed Dios. ‘Lilingkoran ka nen Job,’ so insangsang nen Satanas, ‘lapud saray bengatlan inter mo ed sikato, aliwan lapud sika so inaro to.’ Inreklamo met nen Satanas ya uusaren nen Jehova so babaleg a pakayari to diad aliwan maabig a dalan. ‘Sikaton naynay so sinalimbengan mo,’ inkuanto. Sirin, pian naareglo so salisalan, inmebat si Jehova: “Nia! Amin a bengatlan walad sikato so walad limam. Ingen agmo iyuunat so limam a sumpad sikato!’’—Job 1:12.
9. Anton gonigon so indapo nen Satanas ed si Job, tan diad anton nansumpalan?
9 Tampol ginapoan nen Satanas a ginulo si Job. Amin na saray ayayep nen Job so impapatey to odino impatakew to. Insan saray 10 ilalak nen Job so impapatey to. Abalang nen Job so ngalngalin amin a bengatla, ingen sikato so nansiansian matoor ed si Jehova. Agto inayew so Dios. (Job 1:2, 13-22) Balet ag-anganggad’tan so inkagawa.
10. Antoy mangipanengneng a si Satanas so agsinmuko?
10 Pinmatnag lamet si Satanas a kaiba na arum ya angheles ed arap nen Jehova. Tinepet lamet nen Jehova ed si Satanas no anengneng to so katooran nen Job tan kuanto: “Sikato nin siansia so mamebemben a malet ed katooran to.’’ Diad saman inmebat si Satanas: “Baog ed baog, tan amin a bengatlan walad sakey a too so iter to nisesengeg ed kamarerwa to. Diad panguman, iyunat mo so limam, ipangasim, tan diwit mo so anggad pukel to tan laman to tan nengnengen no kasin agto ka ayewen ed mismon lupam.”—Job 2:1-5.
11. (a) Anto niran subok so indapo nen Satanas ed si Job? (b) Anto so nansumpalan?
11 Diad ebat, inabuloyan nen Jehova si Satanas a manggawa na antokaman a nayarian to ed si Job, anggaman kuan na Dios: ‘Agmo papateyen.’ (Job 2:6) Kanian kinabil nen Satanas si Job na makapasinagem a sakit. Abalbaleg so impanirap nen Job ya impikasi to la so ipatey to. (Job 2:7; 14:13, 14) Say mismon asawa to so sinmumpa’d sikato a kuanto: “Ayew mo so Dios tan ompatey ka!’’ (Job 2:9) Balet agnilabay nen Job a gawaen itan. “Anggad kauyos na linawak agko ekalen so katooran ko!’’ kuanto. (Job 27:5) Nansiansian matoor si Job ed Dios. Sirin apaneknekan a si Satanas so alingo diad angat to a lilingkoran nen Job so Dios lambengat nisesengeg ed materyal a gungguna tan aliwan nisesengeg ed aro. Nipanengneng met ya agnayarian nen Satanas a pabenegen so amin a manlapud panserbi ed Dios.
12. (a) Anton ebat so inter nen Job ed Dios diad angat nen Satanas? (b) Antoy pinaneknekan na katooran nen Jesus ed Dios?
12 Panon so pangipasen yon liknaan nen Jehova ed katooran nen Job? Saman so amaliket a maong ed sikato! Impaseseg na Salita na Dios: “Onkabat ka, anako, tan paliket mo so pusok, pian komon et naebatan ko so mamabalaw ed siak.’’ (Uliran 27:11) Si Satanas so mamabalaw ed si Jehova. Tan diad katooran to et pinaliket nen Job so puso na Dios. Saya so angiter ed Dios na ebat ed malastog a kantiaw nen Satanas odino angat a Sikato so aglingkoran na totoo ed silong na subok. Dakel nin arum so angiter met ed Dios na ontan ya ebat. Say sankabalgan ya ehemplo et say ayadyarin too a si Jesus. Binembenan ton malet so katooran to ed Dios anggaman ed amin a subok tan irap ya indapo nen Satanas ed sikato. Paneknekan na saya a say ayadyarin Adan so akapanggawa met komon na ontan no nilabay to, tan say Dios so aliwan agmatunong diad pangakaukolan to na nagnap a katutulok na too.
INER SO TALINDEGAN MO?
13. (a) Antoy gawaen na nengneng na pangikurang mo ed bilay mo diad salisalan? (b) Panon tayon napaliket so Dios odino napaermen?
13 Kumusta so bilay mo? Nayarin isipen mo ya aliwan makabaliksan so pambilay mo. Balet makabaliksan. Balanglan satan so kabat odino andi, suportaan to so balanglan dapag na Dios ed salisalan odino dapag nen Satanas. Sika so tatalimaen nen Jehova, tan kaliktan to kan nanengneng a manserbi’d sikato tan manbilay na ando lan ando ed dalin. (Juan 3:16) Sanen saray Israelitas so nanrebelde ed Dios, sikato so naermenan odino asakitan. (Salmo 78:40, 41) Kasin say kurang na bilay mo so mamapaliket ed Dios odino mamapaermen ed sikato? Siempre, pian napaliket so Dios nakaukolan mon aralen iray ganggan to tan tuloken ira.
14. (a) No nipaakar ed seksual a relasyon, anto ran ganggan so nepeg tayon tuloken pian napaliket so Dios? (b) Akin a say panumlang ed saratan a ganggan so sakey a krimen?
14 Say manunan getma nen Satanas et say panangguyor to’d totoon mamuyak ed ganggan na Dios a manguley ed panangusar na pakayari ed panag-ilalak da, tan say oksuyan to ed panamaley tan say pamilya. Saray ganggan na Dios a manalimbeng na liket tayo so mangibabagan saray aliwan sanaasawan totoo so agnepeg a manggawa’d seksual a relasyon, tan saray walay kaasawaan so agmigawaan na seksual a relasyon ed siopaman nilikud ed saman so asawa ra. (1 Tesalonica 4:3-8; Hebreos 13:4) Sano sumlangen so ganggan na Dios, mabetbet a saray anak so nianak ya andian na saray atateng a mangaro tan mankaliktan ed sikara. Nayarin saray kainaan ni ingen so manpaekal, pateyen daray anak da antis a sikara so nianak. Niarum ni, dakel a managlawan so napepeketan na makapasinagem a sakit ed sekso a manesyang ed saray ugugaw a nayarin iyanak da. Gawa na kalamangan, sakey a krimen a sumpad Dios, so pirelasyonan ed sekso diad agmo asawa. Inkuan nen Job: “No say pusok so asagyat ed sakey a bii, tan nansanib ak a nantalaran ed puerta na kaabay ko . . . satan so makapabaing, sakey a krimen a kadusaan.’’—Job 31:1, 9, 11, The New American Bible.
15. (a) No manggawa itayo na pilalawanan, siopa so papaliketen tayo? (b) Akin a makabat so panulok ed saray ganggan na Dios?
15 Ag-itayo mankelaw a sayan mundon inuleyan na Diablo so gawaen ton singa normal tan singa duga ed sika so pigawaan na seksual a relasyon ed sakey a toon agmo asawa. Balet no gawaen mon ontan, siopa so paliliketen mo? Si Satanas, aliwan si Jehova. Pian napaliket so Dios, nepeg a sika so “onarawi ed pilalawanan.’’ (1 Corinto 6:18) Tua, aliwan naynay a mainomay so pagmaliw a matoor ed Dios. Aliwan mainomay met so ontan ed si Job. Balet nonoten, makabat so pangunor ed saray ganggan na Dios. Sika so lalon maliket natan no satan so gawaen mo. Balet, lalon importante, susuportaan mo so dapag na Dios ed salisalan tan paliliketen mo. Tan bendisyonan to ka ed bilay ya andi-anggaan diad liket ed dalin.
16. (a) Panoy inkabendisyonan nen Job ed katooran to? (b) Anto so nibaga nipaakar ed kasakitan a gawaen nen Satanas, a singa say impamatey ed 10 ilalak nen Job?
16 Tua, ayarian nen Satanas ya pinaduka si Job tan inatey so 10 ilalak to. Anggapoy suppiat a saya so baleg ya akapirdian nen Job. Balet sanen nansiansian matoor si Job, sikato so benindisyonan na Dios na mamidduan kinarakel na walad sikato sakbay a naabuloyan si Satanas a manubok ed sikato. Nagmaliw met si Job ya ama na 10 nin ilalak. (Job 42:10-17) Nagkalalo ni, maseguro itayon saray 10 ilalak nen Job a pinatey nen Satanas so napaoli ed bilay diad kioli na saray inaatey. Tua, anggapo so kasakitan odino gonigon ya akaabuloyan nen Satanas a gawaen a say maaron Ama tayo, si Jehova, so agmametek ed dilin inggeter ton panaon.
17. Akin a say nengneng na pambilay tayo so peteg a makabaliksan?
17 Sirin naynay a labay mon nonoten a no panon so pangikurang mo ed bilay mo so peteg a makabaliksan. Makabaliksan nagkalautla’d si Jehova a Dios tan ed si Satanas a Diablo. Saya so lapud sika so nalalanor ed salisalan no kasin saray totoo so magmaliw a matoor ed Dios odino andi.
[Tepetepet Parad Panagaral]
[Litrato ed pahina 106]
Inarap nen Job so angat nen Satanas ya anggapo so mansiansian matoor ed Dios diad leksab na subok
[Litrato ed pahina 110]
Krimen a sumpad Dios so seksual a pirelasyonan ed agmo asawa
[Litrato ed pahina 111]
Pinapalar na Dios si Job diad katooran to na mas lalon dakel nen say wala ed sikato diad sakbay to
