Kapitulo 4

Dios​–Siopa?

1. (a) Anto ran dirios so dadayewen na totoo? (b) Anton pandumaan so ginawa na Biblia ed “dirios” tan “Dios”?

 DAKEL a dirios so dadayewen ed sankamundoan. Wala so nilaksalaksan dirios na Shinto, Budista, Hindu tan saray relihyon na tribu. Saray dirios a singa si Zeus tan Hermes so dinayew diad agew na saray apostoles nen Jesus. (Gawa 14:11, 12) Kanian mipakna so Biblia a “wala so dakel a ‘dirios,’” ingen ibabaga to met a “diad tua et wala so sakey a Dios say Ama ed sikatayo, a nanlapuan na amin a bengatla.” (1 Corinto 8:5, 6) No sika so natepetan, ‘Siopa iyan Dios?’ anto so ibagam?

2. Antoray nanduruman panmoria na totoo ed Dios?

 ² ‘Sikato so Katawan,’ so iyebat na dakel. Odino nayarin ikuan da: ‘Sikato so sakey ya Espiritu ed tawen.’ Tinawag na diksionaryo so Dios a: “Say Supremon Sakey.” Sano natepetan: ‘Anto so ngaran na Dios?’ arum a totoo so onebat na, ‘Jesus.’ Ag-isipen na arum so Dios a bilang sakey a persona, noagta bilang sakey a makapanyarin puersa a wala ed anggan iner a pasen. Tan manduaruwa ni ingen so arum no kasin wala so sakey a Dios. Kasin makaseguro itayo a sikato so wala?

PETEG A WALA SO DIOS

3. Panoy inlesa na sakey ya abung?

³ No onnengneng ka ed marakep ya abung, agta morekdeken mo no siopa so angipaalagey? No ibaga na sakey ed sika ya anggapo so angipaalagey ed abung, noagta basta linmesan bukor, kasin sisiaen mo? Siempre andi! A singa inkuan na sakey a managsulat na Biblia: “Balang abung so impaalagey na sakey.” Amin so mikabat ed satan. Bueno, sirin, agta akuen tayo so lohikal a konklusyon na managsulat na Biblia: “Say angipaalagey na amin a bengatla et say Dios”?​—Pebreos 3:4.

4. Panoy inlesa na saray binilbilyon a bibitewen?

⁴ Imanoen pa so talba ed saray binilbilyon a bibitewen to. Ingen amin da so ontetelek ed katawenan unong ed saray leyes a mamapasiansia ed sikara diad ayadyarin relasyon ed balang sinansakey. “Siopa so amalsa ed sarayan bengatla?” so tepet ya abayaglan intepet. Makabaliksan so niiter ya ebat: “Saman so Sakey ya amilang ed ehersito ra, amin et tinawag tora ed ngaran.” (Isaias 40:26) Seguradon kakulangkulangan so panisip a saray  binilbilyon a bibitewen et basta ginawa ra so inkasikara, tan, anggapo so anggan anton panangiwanwan, et tinibukel da so baleg a sistema na bitewen ya ontetelek ed ontan lan makapakelaw ya oksuy!​—Salmo 14:1.

5. (a) Anton kibanbana so wala, ed inkasikara, a saray piesa so mantutoop pian magmaliw a panagtadtar na karne? (b) Anto so ipanengneng na saya nipaakar ed talba tayo?

⁵ Sayan organisadon maong a talba so aglinmesa ed inkasikaton dili. Kinaukolan to so sakey a matudion Amalsa a walaan na baleg a pakayari. (Salmo 19:1, 2) Sakey a negosyante ya atepetan no akin a sikato so manisia ed Dios so angipaliwawa a diad pabrika to et nakaukolan na sakey ya ugaw a bii so duaran agew diad pakaaral ed no panon ton toopen so 17 piesa na panagtadtar na karne. “Siak lambengat so managgawa na panagteteg,” kuanto. “Ingen saya so kabat ko, a sarag mon kalugen so 17 piesa na panagtadtar na karne ed lababo diad ontumbok a 17 bilyon a taon tan agkan balot nawalaan na panagtadtar na karne.” Sayan talba, a pati saray dakerakel a porma na bilay ed dalin, so mas lalon kumplikado nen say panagtadtar na karne. No say ontan a makina et nakakaukolan to so sakey ya onsianon managgawa, maseguro itayo a nakaukolan so sakey a Makapanyarin-amin a Dios a mamalsa ed amin a bengatla. Agta say galang so nepeg ya onla ed sikato nipaakar ed ginawa to?​—Apocalipsis 4:11; Gawa 14:15-17; 17:24-26.

PETEG A PERSONA SO DIOS?

6. Akin a maseguro itayon say Dios so sakey a peteg a persona?

⁶ Manwarin maslak a totoo so mangikuan a manisia ra ed Dios, dakel so agmanisip ed sikato a bilang peteg a persona. Kasin sikato so peteg a persona? Bueno, nanengneng a no wala so intelihensya et wala so sakey a kanonotan. Alimbawa, nayarin ikuan tayo, ‘anguman so kanonotan ko.’ Tan kabat tayo a no wala so kanonotan et wala so sakey ya utek ed sakey a kabalgan a walaan na pihon uhas. Kanian, sirin, say baleg a kanonotan a responsabli ed amin a palsa so kayarian na baleg a Persona, say Makapanyarin-amin a Dios. Anggaman sikato so andian na materyal a laman, sikato so walaan na espiritual a laman. Kasin say espiritun persona so walaan na kabalgan? On, kuan na Biblia: “No wala so pisikal a laman, wala met so espiritual a laman.”​—1 Corinto 15:44; Juan 4:24.

7. (a) Antoy mangipanengneng a say Dios so walaan na sakey a pasen a panaayaman to? (b) Antoy mangipanengneng a sikato so walaan na sakey a kabalgan?

⁷ Lapud say Dios so sakey a persona a walaan na espiritual a laman, sikato so nepeg a walaan na pasen a panayaman. Ibabaga na Biblia ed  sikatayo a saray katawenan so “inletneg na [Dios] a pasen ya ayaman.” (1 Arari 8:43) Ontan met, nibaga’d sikatayo a si “Kristo so linmoob . . . ed tawen a mismo, pian ompatnag natan ed arap na persona na Dios a nisesengeg ed sikatayo.” (Hebreos 9:24) Arum a totoo so natumangan na bilay ed tawen diad Dios, a diad satan et awaten da so maespiritun laman. Nanengneng da la ed satan so Dios, so kuan na Biblia, tan magmaliw met laran singa sikato. (1 Juan 3:2) Saya, met, so mangipanengneng a say Dios so sakey a persona, tan walaan na sakey a kabalgan.

8, 9. (a) Panon a say alimbawa na sakey a planta na koriente so mangipanengneng ed arawi-dampoten a pakayari na Dios? (b) Anto so masanton espiritu na Dios, tan anto so nagawaan to?

⁸ Balet nayarin itepet na sakey: ‘No say Dios so sakey a peteg a persona a manaayam ed sakey a pasen diad tawen, panon ton nanengneng so amin a bengatlan nagagawa ed amin a pasen? Tan panon so pakalikna ed pakayari to ed amin a pasen na talba?’ (2 Awaran 16:9) Say katuaan a say Dios so sakey a persona so agbalot mamagetar ed pakayari to odino kinabalgan to. Nisay bawasan to so panamagalang tayo ed Sikato. (1 Awaran 29:11-13) Pian natulongan itayon mantalos ed saya, imanoen so arawi-dampoten iran epekto na sakey a planta na koriente.

⁹ Say sakey a planta na koriente so walad sakey a pasen odino diad asingger ed sakey a syudad. Ingen say elektrisidad to so niyutob ed amin na satan a pasen, a mangiter na liwawa tan koriente. Miulibay ed Dios. Sikato so walad katawenan. (Isaias 57:15; Salmo 123:1) Ingen say masanton espiritu to, a sikato so agnanengneng ya aktibon puersa to, so nalikna ed amin a pasen, diad interon talba. Diad panamegley na masanton espiritu to et pinalsa na Dios so katawenan, say dalin tan amin a bengatlan mabilay. (Salmo 33:6; Genesis 1:2; Salmo 104:30) Pian sarayan bengatla so napalsa, agkinaukolan na Dios a sikato so presente ed laman. Nayarian ton ibaki so espiritu to, say aktibon puersa to, a manggawa ed antokaman a labay to anggaman sikato so walad arawi. Agaylan makapakelkelaw a Dios!​—Jeremias 10:12; Daniel 4:35.

SAY NENGNENG NA PERSONA SO DIOS

10. Anto so sakey a dalan na pakapikabat tayo ed Dios?

¹⁰ Kasin say Dios so nengneng na persona ya aroen tayon lalo no sikato so nakabat tayon maong? ‘Nayarin ontan,’ kuan yo, ‘ingen lapud agtayo nanengneng so Dios, panon so pakapikabat tayo ed sikato?’ (Juan 1:18) Ipapanengneng na Biblia so sakey a paraan sanen  inkuanto: “Ta saray agnanengneng a kalidad to so mabitabitar ya anengneng a nanlapud inkapalsa na mundo a manpatuloy, lapud sikara so amotektek diad panamegley na saray bengatlan agawa, anggan say maandon pakayari to tan inka-Dios to.” (Roma 1:20) Kanian saray bengatlan pinalsa na Dios so ontulong ed sikatayon mantalos ed no anto so nengneng na Dios, no sikara so peteg ya usisaen tayo tan morekdeken.

11. Anto so naaralan tayo nipaakar ed Dios a manlapud saray bengatlan ginawa to?

¹¹ A singa anengneng tayo la, say itangay ed mabitewen a katawenan so seguradon mangibaga’d sikatayo na kinabaleg tan kinalaknab na pakayari na Dios! (Salmo 8:3, 4; Isaias 40:26) Insan imanoen so dalin. Sikato so impasen na Dios ed liwang pian makala na suston karakel na petang tan liwawa ed agew. Tan imanoen so sikulo na danum. Ompelag so uran pian salogen to so dalin. Say danum so unagos ed saray ilog, a mamaarap ed saray dayat. Supsupen na agew so danum a manlapud kadayatan a singa sengaw, a napelag a singa uran pian salogen to so dalin lamet. (Eclesiastes 1:7) Agaylan karakel na makapakelaw iran sikulo a pakukurangen na Dios pian mangitarya na tagano, siruman tan amin a bengatlan nakaukolan na too tan ayep! Tan anto so ibaga na sarayan amin a bengatlan makapakelaw ed sikatayo nipaakar ed nengneng a persona so Dios? A sikato so sakey a Dios na baleg a kakabatan tan sikato so sankamapalaboan tan manatalima ed saray pinalsa to.​—Uliran 3:19, 20; Salmo 104:13-15, 24, 25.

12. Anto so ibangat na dilin laman mo ed inkasika nipaakar ed Dios?

¹² Imanoen mo so dilin laman mo. Mapatnag a sikato so agawan manggawa na mas nen say basta manbilay. Adesinyon makapakelaw a peteg pian panggayagaan so bilay. (Salmo 139:14) Saray mata tayo so aglabatla makanengneng ed andeket tan amputi noagta diad de-kolor, tan say mundo so napno na agaylan karakel na kolor a panggayagaan. Makaangob tan makataway itayo. Kanian say panangan so aliwa labatlan nakaukolan; nayarin makapaliket. Saratan a pakalikna so aliwan sigpot a nakaukolan ed bilay, noagta sikara so regalo a nanlapud sakey a maaro, mapalabo, manonot a Dios.​—Genesis 2:9; 1 Juan 4:8.

13. Anto so naaralan mo nipaakar ed Dios diad paraan na pidedeneng to ed totoo?

¹³ Say inengneng ed pidedeneng na Dios ed katooan so mangipanengneng met ed no anton nengneng so Dios. Sikato so walaan na mabiskeg a panlikna ed inkahustisya. Agto ipanengneng so panaglabi ed arum a rasa na totoo. (Gawa 10:34, 35) Sikato met so mapangasi tan mauyamo. Ibabaga na Biblia so pidedeneng to ed nasyon na Israel, ya  inliktar to ed inkaaripen diad Ehipto: “Sikato so mapangasi; . . . ninodnonot ton naynay a sikara so laman.” Ingen saray Israelitas so mabetbet a matunganga, tan saman so amaermen ed Dios. A singa ibabaga na Biblia: “Sikato so pinaimbel da . . . tan pinautot da so anggan say Masanton Sakey na Israel.” (Salmo 78:38-41; 103:8, 13, 14) Diad biek a dapag, sanen saray ariripen to so matulok ed ganggan to, say Dios so nanliket. (Uliran 27:11) Ontan met, dineskribe na Dios no panon so liknaan to sanen saray ariripen to so pinairap na kakabusol: “Say maniwit ed sikayo so manidiwit ed bukel na matak.” (Zacarias 2:8) Agta sika so napakiwas a mangaro ed Dios a walaan na ontan lan lugor ed saray mapaabeba, agmakanan totoo ed amin a rasa tan totoo?​—Isaias 40:22; Juan 3:16.

KASIN SI JESUS SO DIOS ODINO SAKEY A TRINIDAD?

14. Anto so bangat a Trinidad?

¹⁴ Siopa iyan makapakelaw a Dios? Ikuan na arum a totoon say ngaran to et Jesus. Ikuan na arum a sikato so sakey a Trinidad, anggaman say salitan “trinidad” so agnabasa ed Biblia. Unong ed bangat a Trinidad, wala so taloran persona ed sakey a Dios, salanti, wala so “sakey a Dios, Ama, Anak tan Espiritu Santo.” Saya so ibabangat na dakel a relihyoson muyongan, anggaman akuen da a satan so “sakey a misteryo.” Kasin susto so ontan iran panmoria ed Dios?

15. Panoy pangipanengneng na Biblia a say Dios tan si Jesus so duaran nambiigan a persona ya agnampara?

¹⁵ Bueno, kasin imbaga nen Jesus a sikato so Dios? Andi, agton balot imbaga. Imbes, diad Biblia et sikato so atawag na “Anak na Dios.” Inkuanto: “Say Ama so babaleg nen say siak.” (Juan 10:34-36; 14:28) Ontan met, impaliwawa nen Jesus a walaray bengatla ya agto kabat nisay kabat na saray angheles noagta kabat lambengat na Dios. (Marcos 13:32) Niarum ni, diad sakey ya inkagawa et si Jesus so nampikasi ed Dios, a kuanto: “Nagawa komon,  aliwan say linawak, noagta say linawam.” (Lucas 22:42) No si Jesus so Makapanyarin-amin a Dios, kasin sikato so manpikasi ed inkasikaton dili? Diad tua, kayari na impatey nen Jesus, kuan na Kasulatan: “Sayan Jesus so pinaoli na Dios.” (Gawa 2:32) Sirin say Makapanyarin-amin a Dios tan si Jesus so malinlinew a duaran nanbiigan a persona. Anggan diad kayari na impatey tan inkioli tan insegep to’d tawen, siansian si Jesus so agmipara ed si Ama to.​—1 Corinto 11:3; 15:28.

16. Anggaman si Jesus so atukoy a bilang “Dios,” anto so mangipanengneng ya aliwan sikato so Makapanyarin-amin a Dios?

¹⁶ ‘Balet agta si Jesus so atawag na sakey a dios ed Biblia?’ so nayarin itepet na sakey. Saya so tua. Ingen si Satanas so atawag met na sakey a dios. (2 Corinto 4:4) Diad Juan 1:1, a tutukoyen toy Jesus a bilang “say Salita,” kuan na arum a managpatalos na Biblia: “Diad gapo et say Salita, tan say Salita so wala ed Dios, tan say Salita so Dios.” Balet imanoen, ibabaga na bersikulo 2 a say Salita so “diad gapo et wala ed Dios.” Tan manwarin anengneng na totoo si Jesus, ibabaga na bersikulo 18 ya “anggapo so toon akanengneng ed Dios ed anggan kapigan.” (Authorized odino King James Version) Sirin naromog tayo ya arum a patalos ed bersikulo 1 et mangiter na dugan ideya ed orihinal a lenguahe sano basaen da: “Say Salita so wala ed Dios, tan say Salita so dibino,” odino “sakey a dios,” salanti, say Salita so sakey a mabiskeg a singa-dios. (An American Translation) Mabitar, si Jesus so aliwan Makapanyarin-amin a Dios. Diad tua, sinalita nen Jesus so Ama to a bilang “Dios ko” tan bilang “say alenleneg a tuan Dios.”​—Juan 20:17; 17:3.

17. Panon a say inkikalbo na masanton espiritu ed saray patumbok nen Jesus so mamaneknek a satan so aliwan sakey a persona?

¹⁷ No nipaakar ed “Espiritu Santo,” say natatawag a komatlon Persona ed Trinidad, anengneng tayo la a saya so aliwan sakey a persona noagta aktibon puersa na Dios. Inkuan nen Juan a Managbautismo a si Jesus so mamautismo ed masanton espiritu, unong a si Juan so amautismo ed danum. Sirin, unong a say danum so aliwan sakey a persona, say masanton espiritu so aliwan sakey a persona. (Mateo 3:11) Say impasakbay nen Juan so asumpal sanen, kayari na impatey tan inkioli nen Jesus, et nikalbo so masanton espiritu ed saray patumbok ton atiptipon ed Jerusalem. Kuan na Biblia: “Sikaran amin  so napno na masanton espiritu.” (Gawa 2:4) Kasin sikara so “napno” na sakey a persona? Andi, noagta sikara so napno na aktibon puersa na Dios. Sirin ipalinew na saray katuaan a say Trinidad so aliwan bangat na Biblia. Diad tua, abayag ni sakbay na inyakar nen Jesus diad dalin et saray dirios so dinayew ed ulop na talora, odino trinidad, diad saray pasen a singa diad kadaanan ya Ehipto tan Babilonia.

NGARAN NA DIOS

18. (a) Kasin “Dios” so personal a ngaran na Makapanyarin-amin a Dios? (b) Anto so personal a ngaran to?

¹⁸ Andi-duaruwan amin a kabat mo so walaan na sakey a ngaran. Say Dios so walaan met na sakey a personal a ngaran pian sikato so nibiig a  manlapud arum. ‘Agta “Dios” so ngaran to?’ so nayarin itepet na arum. Andi, ta say “Dios” so sakey lambengat a titulo, unong a say “Presidente,” “Ari” tan “Huis” so titulo. Naaralan tayo so ngaran na Dios diad Biblia, a ditan et pinmatnag ed ngalngalin 7,000 danay. Alimbawa, diad King James Version, nabasa so Salmo 83:18: “Pian komon nakabatan na totoo a sika, a say ngaran mo lambengat et JEHOVA, sankatageyan ka ed amin a dalin.” Ontan met, naromog so ngaran na Dios ed maslak a Biblia diad Apocalipsis 19:1-6 a singa kabiangan na balikas ya “Alleluia” odino “Hallelujah.” Kabaliksan na saya so “idayew si Jah,” pinatikeyan a porma na Jehova.

19. (a) Akin a nikelawan so arum a totoon makanengneng ed ngaran na Dios diad Biblia ra? (b) Iner so pinatnagan na ngaran ed King James Version?

¹⁹ Nikelawan so arum a totoon makanengneng ed ngaran na Dios diad Biblia ra. Mabetbet ya onia lapud say Biblia ra so sakey a mataltalag ton usaren so ngaran na Dios. Say King James Version, alimbawa, so angusar ed ngaran a “Jehova” diad Exodo 6:3, Salmo 83:18 tan Isaias 12:2 tan 26:4 lambengat. Anggaman ontan, sano ipatalos na sayan Biblia so ngaran na Dios ed titulon “Katawan” odino “Dios,” naynay a sayan titulo so inyan to ed angkabaleg a letra, a singa “KATAWAN” tan “DIOS,” ya ibiig to a manlapud saray kaslakan a salitan “Katawan” tan “Dios.” Imanoen iya ed Salmo 110:1.

20. (a) Akin a say ngaran na Dios so mabetbet ya agnausar? (b) Nepeg kasin usaren?

²⁰ ‘Balet akin,’ ikuan mo, ‘a say ngaran na Dios so agnausar ed amin a pasen a kawalaan to ed orihinal a teksto na Biblia? Akin a saray titulon KATAWAN tan DIOS so inkalapagan a nausar ed pasen to?’ Diad paunan-salita na American Standard Version insalaysay to no akin ya inusar to so ngaran na Dios a Jehova, tan no akin a diad abayag a panaon et satan a  ngaran so agnausar: “Saray Americanon Rebisador, kayari na maalwar ya impangimano, so sinmabi ed nankakasakey a kumbiksion a say Judion anito, ya angipasen na Madibinon Ngaran a sagradon tuloy ya ibalikas, so agla manaeg ed Ingles odino anggan dinan a bersyon . . . Sayan personal a ngaran, tekep na sagradon kisiglaotan to, so nipawil la natan ed pasen diad sagradon teksto a satan so agla nasuppiat.” On, saray totoon nampatalos ed Biblia diad Ingles so akaliknan say rason na impangekal ed ngaran na Dios so aliwan maabig. Kanian sikato so impawil da ed Biblia diad manepeg iran pasen to.

21. Anto so imbaga na Katolikon Douay Version nipaakar ed ngaran nen Jehova?

²¹ Wala raman so, anggaman kuan, manuppiat a say salitan “Jehova” so agnepeg ya usaren lapud sikato so aliwan peteg a ngaran na Dios. Alimbawa, say Katolikon Douay Version, ya ag-angusar ed ngaran na Dios diad manunan teksto to, so angikuan diad paimanod-leksab ed Exodo 6:3: “Arum a moderno so anibukel ed ngaran a Jehova . . . say tuan panangibalikas ed ngaran, a wala ed Hebreon teksto, diad abayag ya ag-impangusar, so natan abalang la.”

22. (a) Panoy inkirepresenta na ngaran na Dios ed Hebreon lenguahe? (b) Akin a walay problema ed pangamta no panon so orihinal ya inkibalikas ed ngaran na Dios?

²² On, a singa ibabaga dia na Katolikon Biblia, say ngaran na Dios so pinmatnag ed Hebreon teksto, unong ta say Hebreo so lenguahen akapangisulatan ed ununan 39 libro na Biblia. Ditan et nirepresenta so ngaran ed apatiran Hebreon letra, YHWH. Diad kadaanan iran panaon say Hebreon lenguahe so nisulat ya andian na vowels, saray letran singa say a, e, i, o tan u, ya ontulong ed sikatayon mangiter na manepeg a tanol ed saray salita. Kanian, say problema natan et anggapo so paraan na pikabat tayon eksakto ed no dinan iran vowels so inusar na Hebreos a dingan na saray konsonanten YHWH.

23. Panon a say letran “bldg” a para ed “building” so ontulong ed sikatayon mantalos ed problema na panangibalikas ed ngaran na Dios?

²³ Pian natulongan itayon mantalos ed problema, imanoen so salitan “building.” Ipasen a satan so ginmapon naynay ya insulat a “bldg,” tan, sinmabi panaon, say salita so agbalot imbalikas. Panon, sirin, so pikabat na sakey a toon manbilay na 1,000 taon manlapud natan ed no panon so pangibalikas ed “bldg” sano satan so nanengneng ton insulat? Lapud agton balot nadngel ya imbalikas itan tan agto kabat no anto ran vowels so wala ed salita, agto kabat a maseguro. Satan met so miulibay ed ngaran na Dios. Agkabat ya eksakto ed no panon so impangibalikas ed satan, anggaman isipen na arum ya eskolar a say “Yahweh” so susto. Anggaman ontan, say porman “Jehova” so inusar ed dakel iran siglos tan sankalaknaban lan kabat.

24. (a) Pian matukoy, akin a manepeg ya usaren tayo so ngaran na Dios? (b) Nisesengeg ed Gawa 15:14, akin ya importante so pangusar ed ngaran na Dios?

 ²⁴ Ingen, nepeg tayo kasin usaren so ngaran na Dios, anggamano nayarin agtayo nibabalikas ya eksakto ed saman so orihinal ya inkibalikas to? Bueno, uusaren tayo so kangaranan na arum a totoo ed Biblia, anggaman agtayo ra nibabalikas ed nengneng na inkibalikas da ed orihinal a Hebreo. Alimbawa, say ngaran nen Jesus so imbalikas a “Yesh’ua” ed Hebreo. Ontan met, manepeg ya usaren so ngaran na Dios, a niparungtal ed Biblia, balanglan ibalikas tayo na “Yahweh,” “Jehova,” odino diad arum a paraan a kaslakan ed lenguahe tayo. Say lingo et say isaew a mangusar ed satan a ngaran. Akin? Lapud saraman so agmangusar ed satan so agnibiig ed saraman so alaen na Dios a “totoo a para ed ngaran to.” (Gawa 15:14) Agtayo lambengat nepeg a kabaten so ngaran na Dios noagta idayew tayo ed arap na arum, a singa ginawa nen Jesus sanen wadia ed dalin.​—Mateo 6:9; Juan 17:6, 26.

SAKEY A DIOS NA GAGALA

25. (a) Anto ran bengatla nipaakar ed Dios so nayarin mairap ed sikatayo a talosan? (b) Antoy amakiwas ed si Jehova ya onggapon mamalsa?

²⁵ Anggaman nayarin mairap na kanonotan tayon talosan, si Jehova so andian a balot na gapowan tan andian a balot na anggaan. Sikato so “Ari ed ando lan ando.” (Salmo 90:2; 1 Timoteo 1:17) Sakbay na inggapo ton nampalsa, bukbukor nen Jehova ed sankatalbaan a liwang. Ingen agnayarin sikato so begtebegtew, lapud sikato so nagnap ed inkasikato tan anggapo so kulang ed sikato. Say aro so anenyeg ed sikato a mamalsa, pian iter to so bilay ed arum a panggayagaan da. Saray inmunan pinalsa na Dios et saray espiritun persona a singa sikato. Sikato so walaan na baleg a muyongan na mangatatawen iran ilalak sakbay na inkiparaan na dalin a para ed totoo. Ginagala nen Jehova ed sikara so pakaromog na abalbaleg a panliket ed bilay tan diad kimey ya inter ton gawaen da.​—Job 38:4, 7.

26. Akin a maseguro itayo a nasusumpal so gagala na Dios a para ed dalin?

²⁶ Sanen niparaan so dalin, impasen nen Jehova so sanasawa, si Adan tan Eva, diad sakey a pasen na dalin ya agawa lan paraiso. Gagala ton sikara so nawalaan na saray anak ya ontulok tan mandayew ed sikato, tan manginatnat ed saman a paraiso diad interon dalin. (Genesis 1:27, 28) A singa naaralan tayo la, anggaman kuan, saman ya engranden gagala so naamper. Pinili nen Adan tan Eva so ontunganga ed Dios, tan say gagala to so ag-asumpal. Ingen ta nasumpal met lamlamang, lapud satan so pangawat nen Jehova na katalo no agto sumpalen so ginagala to. Tan satan so agton balot gawaen! “Amin a bengatlan panliketan ko so  gawaen ko,” kuanto. “Sikato so sinalitak; gawaen ko met.”​—Isaias 46:10, 11.

27. (a) Akin a sikatayo so oneebat ed Dios? (b) Sirin anton tepet so nepeg tayon isipen a seryoso?

²⁷ Kasin nanengneng mo no iner so kinepegan mo ed gagala na Dios? Aliwan say basta panggawa ed antokaman a labay mon gawaen ya ag-imanoen so linawa na Dios. Ontan so ginawa nen Adan tan si Eva. Kabat da so linawa na Dios balet ta agda ginawa. Tan sikara so inmebat ed Dios. Kasin sikatayo, met, so onebat ed Dios? On, lapud say Dios so Subol na bilay tayo. Say bilay tayo so depende ed sikato. (Salmo 36:9; Mateo 5:45) Diad anton kalaknab, sirin, so pambibilay tayo a mitukoyan ed gagala na Dios ed sikatayo? Nepeg tayo so mannonot a seryoso ed saya, lapud say pankanawnawa tayo ed andi-anggaan a bilay so onsaral ed satan.

NO PANON SO PANDAYEW ED SI JEHOVA

28. Anto ran katulongan so inusar na arum a totoo diad pandayew ed Dios?

²⁸ Importante no panon so pandayew tayo ed si Jehova. Sikato so nepeg tayon dayewen ed paraan ya ibabaga to, anggamano saya so nayarin duma ed paraan a nibangat ed sikatayo. Alimbawa, ugali na arum a totoo so pangusar ed saray talintao diad panagdayew da. Nayarin ikuan da ya agda dadayewen so talintao, noagta say pakanengneng tan pakadiwit da ed satan so ontulong ed sikara a mandayew ed Dios. Ingen kasin labay na Dios a sikato so dayewen tayo diad tulong na saray talintao?

29. Panoy pangipanengneng na Biblia a lingo so pangusar ed saray talintao diad panagdayew?

²⁹ Andi, agto labay. Tan nisengeg ed sayan mismon rason imbaga  nen Moises ed saray Israelitas a say Dios so agbalot pinmatnag ed sikara diad anggan anton nanengneng ya indengan. (Deuteronomio 4:15-19) Diad tua, sakey ed saray Samploran Ganggan kuanto: “Agka manggawa ed inkasika na binubon talintao odino anggan anton kaulibay na antokaman . . . agka ondadakmomo ed sikara odino manlingkor ed sikara.” (Exodo 20:4, 5, say Katolikon Jerusalem Bible) Mogmon si Jehova labat so nepeg a dayewen. Inulit-ulit na Biblian impanengneng a makapuy so panggawa ed talintao odino ondakmomo ed arap to, odino dayewen so siopaman odino antokaman nilikud ed si Jehova.​—Isaias 44:14-20; 46:6, 7; Salmo 115:4-8.

30. (a) Anto so imbaga nen Jesus tan saray apostoles to a say pangusar ed talintao so makapuy? (b) Unong ed Deuteronomio 7:25, antoy nepeg a gawaen ed saray talintao?

³⁰ A singa nayarin inilaloan tayo, sirin, si Jesus so agbalot angusar na saray talintao diad panagdayew. “Say Dios so sakey ya Espiritu,” kuanto, “tan saramay mandayew ed sikato so nepeg a mandayew ed espiritu tan katuaan.” (Juan 4:24) Kinmiwas a mitukoyan ed sayan simbawa, anggapo ed saray inmunan patumbok nen Jesus so angusar na talintao a bilang katulongan ed panagdayew. Diad tua, insulat nen apostol ton si Pablo: “Manaakar itayo ed pananisia, aliwan diad pakanengneng.” (2 Corinto 5:7) Tan impasakbay nen apostol ton Juan: “Bantayan yo so inkasikayo a manlapud saray talintao.” (1 Juan 5:21) Akin ya ag-onnengneng ed liber na abung mo tan tepetan mo so inkasika no kasin sayan bilin so tutumboken mo?​—Deuteronomio 7:25.

31. (a) Anggaman nayarin agtayo natalosan so makasengeg ed ontan a ganggan na Dios, antoy manenyeg ed sikatayo a mangunor ed satan? (b) Anto so nepeg tayon salien a gawaen, tan anton imbitasyon so nepeg tayon awaten?

³¹ Say pandayew ed si Jehova, a Manamalsa, ed dalan ya iwanwan to so seguradon mangitarok ed sikatayo na puron liket. (Jeremias 14:22) Ipapanengneng na Biblia a saray nakakaukolan to so onkanan pankaabigan tayo, dingan na panmoria ed maandon gungguna. Tua a nayarin walaray panaon, nisengeg ed limitadon pikakabat tan eksperiensia tayo, ya agtayo nagnap ya apresyaen no akin a say ontan a ganggan ya inter na Dios so importantin tuloy, odino no panon so peteg a pankimey to a para ed kaabigan tayo. Ingen say mapekder a pananisia tayon mas dakel so kabat na Dios nen say sikatayo so nepeg a manenyeg ed sikatayon ontulok ed sikato a tekep na maliket a puso. (Salmo 19:7-11) Pambanikelan tayo, sirin, ya aralen so anggaan na nayarian tayo nipaakar ed si Jehova, ya awaten so imbitasyon: “O loob kayo, mandayew tan ondakmomo itayo; ontalimukor itayo ed arap nen Jehova a Managgawa tayo. Lapud sikato so Dios tayo, tan sikatayo so totoon papastolan to tan karnero ed lima to.”​—Salmo 95:6, 7.

[Tepetepet Parad Panagaral]

[Kahon ed pahina 42]

Saray apatiran pasen a pinatnagan na ngaran na Dios ed King James Version so nanengneng dia

Exodo 6:3

³ And I appeared unto Abraham, unto Isaac, and unto Jacob by the name of God Almighty, but by my name JEHOVAH was I not known to them.

Salmo 83:18

¹⁸ That men may know that thou, whose name alone is JEHOVAH, art the most high over all the earth.

Isaias 12:2

² Behold, God is my salvation; I will trust and not be afraid: for the LORD JEHOVAH is my strength and my song; he also is become my salvation.

Isaias 26:4

⁴ Trust ye in the LORD for ever: for in the LORD JEHOVAH is everlasting strength:

[Saray litrato ed pahina 34, 35]

No say abung et walaan na managgawa, . . . seguradon wala met so Managgawa ed mas lalon kumplikadon talba

[Litrato ed pahina 39]

Lapud si Jesus so nampikasi ed Dios, a kinerew ton say linawa na Dios, aliwan say linawa to, so nasumpal, saratan a dua so agnayarin parehon persona

[Litrato ed pahina 40, 41]

Panon a say masanton espiritu so persona, sano bansag a pinano to so ngalngalin 120 a babangatan?

[Litrato ed pahina 45]

Kasin manepeg so pangusar ed talintao diad panagdayew?