Kapitulo 16

Inggapo na Gobierno na Dios So Uley To

1. (a) Diad anto so abayaglan aalagden na saray totoo na pananisia? (b) Akin a say panarian na Dios so atawag na sakey a “syudad”?

 DIAD nilibulibon taon saray totoon walaan na pananisia ed gobierno na Dios so ninmengneng ed arapen diad panaon sano igapo to so uley to. Alimbawa, ibabaga na Biblia a si matoor ya Abraham “so manaalagar ed syudad a walaan na saray peteg a letnegan, a say managpaalagey tan managgawa na syudad et say Dios.” (Hebreos 11:10) Satan a “syudad” et say panarian na Dios. Balet akin ya atawag dia na sakey a “syudad”? Saya so lapud diad kadaanan iran panaon et maslak ed ari so panuley ed sakey a syudad. Kanian saray totoo so mabetbet a nanisip ed sakey a syudad bilang sakey a panarian.

2. (a) Antoy mangipanengneng a say Panarian so petepeteg ed saray inmunan babangatan nen Kristo? (b) Anto so kinaliktan dan naamtaan nipaakar ed satan?

 ² Say panarian na Dios so petepeteg ed saray inmunan patumbok nen Kristo. Saya so nipanengneng diad ampetang ya interes da ed uley to. (Mateo 20:20-23) Say tepet ed kanonotan da so: Kapigan so igapo nen Kristo tan saray babangatan to a manuley? Aminsan sanen si Jesus so pinmatnag ed saray babangatan to ed samay kayari na inkioli to, intepet da: “Katawan, kasin ipawil mo so panarian ed Israel diad sayan panaon?” (Gawa 1:6) Sirin, kasin sika so magunaet a makaamta no kapigan so igapo nen Kristo a manuley bilang ari ed gobierno na Dios, a singa saray babangatan nen Kristo nensaman?

SAY GOBIERNON IPIPIKASI NA KRISTIANOS

3, 4. (a) Antoy mangipanengneng a say Dios so naynay a nanuley bilang Ari? (b) Kanian akin ya imbangat nen Jesus iray patumbok ton mangipikasi ed isabi na panarian na Dios?

³ Imbangat nen Kristo iray patumbok to a manpikasi ed Dios: “Onsabi komon so panarian mo. Nagawa komon so linawam, unong ed tawen, ontan met ed dalin.” (Mateo 6:9, 10) Balet nayarin itepet na sakey: ‘Agta si Jehova a Dios so naynay a nanuley bilang ari? Tan no sikato so nanuley, akin ya ipikasi so isabi na panarian to?’

⁴ Tua, tinawag na Biblia si Jehova ya “Ari ed andi-anggaan.” (1 Timoteo 1:17) Tan kuanto: “Si Jehova a mismo so angiletneg a malet na trono to ed mismon katawenan; tan say dilin inkaari to so nanuley ed amin a bengatla.” (Salmo 103:19) Sirin si Jehova so lawas Supremon Manuley ed amin a pinalsa to. (Jeremias 10:10) Anggaman kuan, lapud impanrebelde ed pananguley to ed hardin na Eden, inyuksoy na Dios so nipaakar ed sakey a nikaduman gobierno. Saya so gobierno ya imbangat nen Jesu-Kristo ed saginonor diad saray patumbok to ya ipikasi. Say gagala to et say pamater ed saray probleman linmesa sanen si Satanas a Diablo tan saray arum so binmeneg ed pananguley na Dios.

5. No sikato so panarian na Dios, akin a sikato met so atawag na panarian nen Kristo tan say panarian na 144,000?

⁵ Sayan balon gobiernon Panarian so angawat na pakayari tan kanepegan a manguley a manlapud Baleg ya Ari, si Jehova a Dios. Sikato so panarian to. Naulit-ulit, sikato so tinawag na Biblia a “say panarian na Dios.” (Lucas 9:2, 11, 60, 62; 1 Corinto 6:9, 10; 15:50) Anggaman kuan, lapud tinuro nen Jehova so Anak to a Hepen Manuley, sikato met so atukoy a bilang panarian nen Kristo. (2 Pedro 1:11) A singa naaralan tayo la ed akadkaunan kapitulo, saray 144,000 a totoon nanlapud limog na katooan so miuley ed si Kristo diad  panarian to. (Apocalipsis 14:1-4; 20:6) Kanian sikato met so tutukoyen na Biblia a bilang “panarian da.”​—Daniel 7:27.

6. Unong ed arum a totoo, kapigan so inggapon panuley na panarian na Dios?

⁶ Ikuan na arum a totoo a say Panarian so ginmapo lan manuley ed samay taon na impawil nen Jesus ed tawen. Ikuan dan si Kristo so ginmapon manuley sanen inkalbo to so masanton espiritu ed saray patumbok to ed samay agew na Judion piesta na Pentecostes nen taon 33 K.P. (Gawa 2:1-4) Balet say gobiernon Panarian ya inyuksoy nen Jehova a mamater ed amin na saray probleman pinalesa na impanrebelde nen Satanas so agginmapon manuley ed saman. Anggapo so mangipanengneng a say ‘ugaw a laki,’ a satan so gobierno na Dios a panuleyan nen Kristo, so nianak ed saman tan ginmapon manuley. (Apocalipsis 12:1-10) Bueno, kasin si Jesus so walaan na sakey a panarian ed samay taon 33 K.P.?

7. Diad siopa so nanuleyan nen Kristo nanlapulad 33 K.P.?

⁷ On, inggapo nen Jesus ed saman so manuley ed kongregasyon na saray patumbok to a, diad inggeter a panaon, et sikara so mikasakey ed sikato diad katawenan. Sirin sikara so sasalitaen na Biblia, legan a sikara so wala ed dalin, a naawit “ed panarian na Anak na aro [na Dios].” (Colosas 1:13) Balet sayan uley, odino “panarian,” ed saray Kristianon walaan na ilalo ed mangatatawen a bilay et aliwan say gobiernon Panarian ya imbangat nen Jesus ed saray patumbok to ya ipikasi. Sikato so sakey a panarian lambengat ed saray 144,000 a personan miuley ed sikato diad tawen. Diad inlabas na saray siglos et sikara so nagmaliw lambengat ya uuleyan to. Sirin sayan uley, odino ‘panarian na Anak na aro na Dios,’ so mangangga sano say unor a sakey ed sarayan uuleyan a walaan na mangatatawen ya ilalo so ompatey tan mikasakey ed si Kristo ed tawen. Sikara la so aliwan uuleyan nen Kristo, noagta sikara la ed satan so ararin kaiba to diad abayaglan insipan a gobiernon Panarian na Dios.

INGGAPO NA ULEY ED PEGLEY NA KAKABUSOL

8. (a) Antoy mangipanengneng a kayari na inkioli nen Kristo et wala so sakey a panaon na panalagar sakbay na igapo ton manuley? (b) Anto so imbaga na Dios ed si Kristo sanen panaon la na panuley to?

⁸ Sanen pinmawil si Jesus ed tawen kayari na inkioli to, agto inggapo so manuley ed saman bilang Ari ed gobierno na Dios. Noag ingen, wala so sakey a panaon na panalagar, a singa impaliwawa nen apostol Pablo: “Sayan too [si Jesu-Kristo] so angiyapay na sakey a bagat a para ed kasalanan diad ando lan ando tan yinmurong ed nikawanan na Dios, manlapud saman et manalagar ya anggad saray  kakabusol to so niiyan a gagatinan na sali to.” (Hebreos 10:12, 13) Sanen sinmabi so panaon ya igapo nen Kristo so panuley, imbaga nen Jehova ed sikato: “Onla kan manuley [odino, manalo] ed pegley na kakabusol mo.”​—Salmo 110:1, 2, 5, 6.

9. (a) Akin ya aliwan amin et malabay ed panarian na Dios? (b) Sanen inggapo na gobierno na Dios so uley to, anto so ginawa na nasyones?

⁹ Kasin ompatnag a makapakelaw ya anggan siopa et magmaliw a kabusol na gobierno na Dios? Ingen aliwan amin et malabay a manbilay ed leksab na sakey a gobiernon mankakaukolan ed saray uuleyan to a manggawa na maptek. Kanian kayari na impangibaga to ed no panon so panublay nen Jehova tan say Anak to ed pananguley na mundo, ibabaga na Biblia, “saray nasyones so sinmanok.” (Apocalipsis 11:15, 17, 18) Ag-inabrasa na nasyones so panarian na Dios lapud sikara so pinalikdo nen Satanas ya onsumpad satan.

10, 11. (a) Sanen inggapo na gobierno na Dios so uley to, anto so agawa ed tawen? (b) Anto so agawa ed dalin? (c) Sirin anton importantin punto so labay tayon nanonotan?

¹⁰ Sanen inggapo na gobierno na Dios so uley to, si Satanas tan saray angheles to so siansia nin manaayam ed tawen. Lapud sinumpa ra so uley na Panarian, tampol a tinmerak so bakal. Nansumpalan, si Satanas tan saray demonyos to so apagit ed tawen. Diad saya, inkuan na maksil a boses: “Natan et sinmabi so kilalaban tan say pakayari tan say panarian na Dios tayo tan say pakauley nen Kristo to.” On, say uley na gobierno na Dios so ginmapo! Tan diad inkaekal nen Satanas tan saray angheles to ed tawen, wala so panliliket diman. “Nisengeg ed saya manliket kayo, sikayon katawenan tan sikayon manaayam ed sikara!” kuan na Biblia.​—Apocalipsis 12:7-12.

¹¹ Kasin saya met so maliket a panaon a para ed dalin? Andi! Imbes, wala so sankabalgan a panaon na gonigon ed dalin. Ibabaga ed sikatayo na Biblia: “Kasi la so dalin tan say dayat, lapud say Diablo so inmakseb ed sikayo a walaan na baleg a sanok, a kabat ton antiktikey la so panaon to.” (Apocalipsis 12:12) Kanian saya so importantin punto a nonoten: Say igapo na uley na panarian na Dios so agmankabaliksan na tampol a deen tan kaligenan ed dalin. Say tuan kareenan so onsabi ed saginonor sano say panarian na Dios so mangontrol lan sigpot ed dalin. Saya so nagawa ed sampot na “antiktikey a panaon,” sano si Satanas tan saray angheles to so naekal la ta pian anggapo la so makapanggawa na gulo ed anggan siopa.

12. Akin a nailaloan tayon ibaga na Biblia ed sikatayo no kapigan so igapo na panarian na Dios a manuley?

¹² Balet kapigan so inkapagit nen Satanas ed tawen, a satan so nansengegan na gonigon diad dalin ed “antikey a panaon”? Kapigan so  inggapo na gobierno na Dios ed uley to? Kasin iter na Biblia so ebat? Ilaloan tayon iter to. Akin? Bueno, lapud abayagla nensaman et impasakbay na Biblia no kapigan so ununan ipatnag na Anak na Dios bilang sakey a too ed dalin tan magmaliw a Mesias. Diad tua, inturo to so mismon taon na impagmaliw ton Mesias. Anto, sirin, so nipaakar ed mas lalon importantin isasabi na Mesias, odino Kristo, a mangigapo na uley to ed Panarian? Seguradon ilaloan tayo ya ibaga met na Biblia ed sikatayo no kapigan so kagawa na saya!

13. Panoy impangipasakbay na Biblia ed mismon taon ya impatnag na Mesias ed dalin?

¹³ Balet nayarin itepet na sakey a too: ‘Iner so pangipapasakbayan na Biblia ed mismon taon na impatnag na Mesias ed dalin?’ Say libro na Biblia a Daniel so mangikuan: “Manlapud kipaway na ganggan diad pangipawil tan pangipaalagey-lamet ed Jerusalem ya anggad Mesias a Pangulo, wala so pitoran simba, ontan met ed anemaplo-tan-duan simba,” odino ami-amin et 69 simba. (Daniel 9:25) Saraya, anggaman kuan, so aliwan 69 a literal a simba, a tugyopen na 483 agew lambengat, odino masudsulok a sakey taon. Sikara so 69 a simban taon, odino 483 a taon. (Ipareng so Numeros 14:34.) Say ganggan ed pangipawil tan pangipaalagey-lamet ed bakor na Jerusalem so niiter nen 455 K.K.P. a (Nehemias 2:1-8) Sirin sarayan 69 simba na taotaon so anampot ed 483 taotaon ed saginonor, nen 29 K.P. Tan satan a mismon taon so inyasingger nen Jesus ed si Juan pian pabautismoan! Diad saman ya inkagawa et sikato so alanaan na masanton espiritu tan nagmaliw a Mesias, odino Kristo.​—Lucas 3:1, 2, 21-23.

NO KAPIGAN SO IGAPO NA GOBIERNO NA DIOS ED ULEY TO

14. Anto so irepresenta na “kiew” ed Daniel kapitulo kuatro?

¹⁴ Bueno, sirin, iner so pangipapasakbayan na Biblia ed taon ya igapo nen Kristo a manuley bilang ari ed gobierno na Dios? Sikato so wala ed sayan parehon libro na Biblia a Daniel. (Daniel 4:10-37) Ditan et sakey ya abalbaleg, kaatagey-tawen a kiew so nausar a mangirepresenta ed si Arin Nabucodonosor na Babilonia. Sikato so sankatageyan a toon manuley ed saman a panaon. Anggaman kuan, si Arin Nabucodonosor so apaskar a mangamtan wala so mas atagtagey a manuuley. Sayan sakey et “say Sankatageyan,” odino “say Ari na katawenan,” kuan nen Jehova a Dios. (Daniel 4:34, 37) Sirin, diad mas  lalon importantin dalan, sayan kaatagey-tawen a kiew, so sinmabin mangirepresenta ed supremon pananguley na Dios, ilautla diad pisiglaotan to ed dalin tayo. Say pananguley nen Jehova so nibalikas ed sakey a panaon diad panamegley na panarian ya inletneg to ed nasyon na Israel. Kanian saray ararin nanlapud tribu na Juda a nanuley ed saray Israelitas so nibagan “nanyurong ed trono nen Jehova.”​—1 Awaran 29:23.

15. Sanen say “kiew” so apupo, akin a sikato so binariberan?

¹⁵ Unong ed salaysay na Biblia ed Daniel kapitulo kuatro, say kaatagey-tawen a kiew so apupo. Anggaman kuan, say sengeg so atilak, tan binariberan na balatyang tan gansa. Saya so mangamper ed sengeg ya ontubo ya anggad panaon na Dios a pangekal ed bedber tan onggapon ontubo lamet. Balet panon tan kapigan so inkapupo na pananguley na Dios?

16. (a) Panon tan kapigan so inkapupo na pananguley na Dios? (b) Anto so nibaga ed unor ya ari na Juda a yinmurong ed “trono nen Jehova”?

¹⁶ Diad kurang na panaon, say panarian na Juda ya inletneg nen Jehova so nagmaliw a mauges ya inabuloyan toy Arin Nabucodonosor a maneral ed satan, a pupoen to. Saya so agawa ed taon 607 K.K.P. Diad saman a panaon et nibaga ed si Zedekias, say unor ya ari na Juda a yinmurong ed trono nen Jehova: “Ekal mo so balanget. . . . peteg ya anggapo so makankayarian ya anggad onsabi so walaan na legal a kanepegan, tan iter ko ed sikato.”​—Ezequiel 21:25-27.

17. Anton peryodo na panaon so ginmapo nen 607 K.K.P.?

¹⁷ Sirin say pananguley na Dios, a  singa inrepresenta na “kiew,” so apupo nen 607 K.K.P. Anggapo la so sakey a gobiernon mangirepresenta ed pananguley na Dios ed dalin. Sirin, nen 607 K.K.P. ginmapo so sakey a panat na panaon a diad kaunoran et tinukoy nen Jesu-Kristo a bilang “saray aturon panaon na nasyones,” odino, “saray panaon na Hentiles.” (Lucas 21:24; King James Version) Kaleganan na sarayan “aturon panaon” say Dios so andian na sakey a gobiernon mangirepresenta ed pananguley to diad dalin.

18. Anto so nagawa ed panampot na “aturon panaon na nasyones”?

¹⁸ Anto so nagawa diad panampot na sarayan “aturon panaon na nasyones”? Si Jehova so mangiter na pakayarin manuley ed samay Sakey “a walaan na legal a kanepegan.” Sayan Sakey et si Jesu-Kristo. Kanian no naamtaan tayo no kapigan so panampot na “aturon panaon na nasyones,” naamtaan tayo no kapigan so igapo nen Kristo a manuley bilang ari.

19. Diad panon karakel na “panaon” so kapater na pananguley na Dios ed dalin?

¹⁹ Unong ed Daniel kapitulo kuatro, sarayan “aturon panaon” so “pitoran panaon.” Impanengneng nen Daniel a wala so “pitoran panaon” a kaleganan to et say pananguley na Dios, a singa inrepresenta na “kiew,” so agkinmurang ed dalin. (Daniel 4:16, 23) Panon karukey irayan “pitoran panaon”?

20. (a) Panon karukey so sakey a “panaon”? (b) Panon karukey so “pitoran panaon”? (c) Akin ya ibilang tayo so sakey ya agew a sakey a taon?

²⁰ Diad Apocalipsis kapitulo 12, bersikulo 6 tan 14, naaralan tayo a  saray 1,260 agew so kasimbang na “sakey a panaon [salanti, 1 a panaon] tan saray panaon [salanti, 2 panaon] tan kapaldua na sakey a panaon.” Satan so dagup na 31/2 panaon. Kanian say “sakey a panaon” so kasimbang na 360 agew. Sirin, say “pitoran panaon” so 7 x 360, odino 2,520 agew. Natan no bilangen tayo so sakey ya agew a kasimbang na sakey a taon, unong ed pananontonan na Biblia, saray “pitoran panaon” so kasimbang na 2,520 taon.​—Numeros 14:34; Ezequiel 4:6.

21. (a) Kapigan so inggapo tan impanampot na “aturon panaon na nasyones”? (b) Kapigan so inggapon panuley na gobierno na Dios? (c) Akin a siansia nin manepeg so pangipikasi ed isabi na panarian na Dios?

²¹ Naaralan tayo la a saray “aturon panaon na nasyones” so ginmapo ed taon 607 K.K.P. Sirin no bilangen so 2,520 taon a manlapud saman a petsa, onsabi itayo ed 1914 K.P. Sikato so taon ya impanampot na sarayan “aturon panaon.” Nilaksalaksan totoon manbibilay ni so makanonot ed saray bengatlan agawa nen 1914. Diad saman a taon, inggapo na Guerra Mundial I so sakey a peryodo na makapakebbiew a gonigon a nantultuloy ya anggad agew tayo. Kabaliksan na saya a si Jesu-Kristo so ginmapon manuley bilang ari ed mangatatawen a gobierno na Dios nen 1914. Tan lapud say Panarian so ginmapo lan manuley, agaylan nipanpanaon a satan so ipikasi tayon “onsabi” tan punasen to so marelmeng a sistema na bengabengatla nen Satanas a manlapud dalin!​—Mateo 6:10; Daniel 2:44.

22. Anton tepet so nayarin itepet na arum?

²² Ingen nayarin itepet na sakey a too: ‘No si Kristo so pinmawil la a manuley ed panarian nen Ama to, akin a sikato so agtayo nanengneng?’

[Paimano ed leksab]

[Tepetepet Parad Panagaral]

[Tsart ed pahina 140, 141]

Nen 607 K.K.P. nagba so panarian na Dios ed Juda.

Nen 1914 K.P. ginmapon manuley si Jesu-Kristo a bilang ari ed mangatatawen a panarian na Dios 1914 K.P.

607 K.K.P.—1914 K.P.

Oktubre, 607 K.K.P.​—Oktubre, 1 K.K.P. = 606 TAOTAON

Oktubre, 1 K.K.P.​—Oktubre, 1914 K.P. = 1,914 TAOTAON

PITORAN PANAON HENTIL = 2,520 TAOTAON

[Litrato ed pahina 134]

“Kasin ipawil mo so panarian ed Israel diad sayan panaon?”

[Litrato ed pahina 139]

Say atagey a kiew ed Daniel kapitulo 4 so mangirerepresenta ed madibinon pananguley. Diad sakey a panaon et saya so nibalikas ed panamegley na panarian na Juda

[Litrato ed pahina 140, 141]

Say kiew so apupo sanen aderal so panarian na Juda 607 K.K.P.