Kapitulo 6

Jesu-Kristo–Imbaki na Dios?

1, 2. (a) Anto so walan ebidensya a si Jesu-Kristo so peteg a persona? (b) Anto ran tepet so apalesa nipaakar ed si Jesus?

 NGALNGALIN amin natan so akadngel ed si Jesu-Kristo. Say impluensya to ed awaran so babaleg nen say anggan siopan too. Peteg, say kalendaryon inusar ed maslak a pasen ed mundo so nibase ed taon ya inisip ya inkianak to! A singa ibabaga na The World Book Encyclopedia: “Saray petsa sakbay na satan a taon so nilistan B.C., odino sakbay nen Kristo. Saray petsa kayari na satan a taon so nilistan A.D., odino anno Domini (ed taon na Katawan tayo).”

² Sirin si Jesus so aliwan bungay-isip labat a too. Sikato so peteg a nambilay bilang sakey a too ed dalin. “Diad kadaanan iran panaon anggan saray kalaban na Inkakristiano so agbalot nanduaruwa ed [aktual a kiwawala] nen Jesus,” so inkuan na Encyclopædia Britannica. Sirin siopa ta a si Jesus? Kasin sikato so peteg ya imbaki na Dios? Akin a sikato so bantog a tuloy?

NAMBILAY LA NENSAMAN

3. (a) Unong ed saray salita na anghel, iyanak nen Maria so anak na siopa? (b) Panon a posibli so pangiyanak nen Maria ed si Jesus?

³ Aliwan singa arum a too, si Jesus so inyanak na sakey a birhen. Maria so ngaran to. Inkuan na anghel ed anak to: “Sayan sakey so baleg tan natawag na Anak na Sankatageyan.” (Lucas 1:28-33; Mateo 1:20-25) Balet panon na sakey a biin agnin balot awalaan na relasyon ed sekso diad sakey a laki so nawalaan na anak? Saman so diad panamegley na masanton espiritu na Dios. Inyalis nen Jehova so bilay na makapanyarin espiritun Anak to a manlapud tawen diad panag-anakan nen birhen Maria. Saman so sakey a milagro! Seguradon samay Sakey a nanggawa ed inmunan bii ya inikdan to na makapakelaw ya abilidad a mamawala na ananak so makayarin manggawa ed sakey a biin mananak ya anggapo so toon ama. Isalaysay na Biblia: “Sanen sinmabi la so nagnap a getar na panaon, imbaki na Dios so  Anak to, a nianak ed sakey a bii.”​—Galacia 4:4.

4. (a) Anton bilay so nanggayagaan nen Jesus sakbay na inkianak to bilang sakey ya ugaw? (b) Anto so imbaga nen Jesus a mangipanengneng a sikato la so nambilay nensaman ed tawen?

⁴ Sirin sakbay na inkianak to ed dalin bilang sakey a too si Jesus so wala la ed tawen bilang makapanyarin espiritun persona. Walaan na maespiritun laman ya agnanengneng na too, a singa met say Dios. (Juan 4:24) Sinalita nen Jesus a mismo so atagey a betang to ed tawen. Nampikasi ya aminsan: “Ama, igloria moak ed samay gloria a walad siak sakbay na mundo.” (Juan 17:5) Inkuanto met ed saray dumerengel to: “Sikayo so nanlapud ayaman diad leksab; siak so nanlapud ayaman ed tagey.” “Anto, sirin, no nanengneng yo so Anak na too ya onsesegep ed kawalaan to nensaman?” “Sakbay na inkianak nen Abraham, wala ak la.”​—Juan 8:23; 6:62; 8:58; 3:13; 6:51.

5. (a) Akin a si Jesus so atawag na “Salita,” “Panguloan” tan “bogbogtong”? (b) Anton kimey so akiibaan nen Jesus ed Dios?

⁵ Sakbay na inyakar to ed dalin si Jesus so atawag na Salita na Dios. Ipanengneng na sayan titulo a sikato so nanlingkor ed tawen bilang sakey a sangiyan na Dios. Sikato met so atawag na “Panguloan” na Dios, tan ontan met a “bogbogtong” ya Anak. (Juan 1:14; 3:16; Hebreos 1:6) Kabaliksan na saya a sikato so apalsa ya akauna nen saray amin nin arum ya espiritun anak na Dios, tan sikato lambengat so direktan pinalsa na Dios. Ipapaliwawa na Biblia a sayan “panguloan” ya Anak so akibiang ed si Jehova diad impamalsa ed amin nin arum a bengatla. (Colosas 1:15, 16) Kanian sanen imbaga na Dios, “Manggawa ita na too ed indengan ta,”  sikato so mitotongtong ed sayan Anak. On, say mismon sakey a diad kaunoran et linma dia ed dalin tan nianak ed sakey a bii so akibiang diad impamalsa ed amin a bengatla! Sikato la so nambilay ed tawen a kaiba nen Ama to diad ag-amtan bilang na saray taon!​—Genesis 1:26; Uliran 8:22, 30; Juan 1:3.

SAY BILAY TO ED DALIN

6. (a) Antoray agawgawa sakbay a tuloy tan kayari na inkianak nen Jesus? (b) Iner so nianakan nen Jesus tan iner so binalegan to?

⁶ Si Maria so nisipan a miasawa ed si Jose. Balet nen akabatan to a sikato so malukon sinisia ton sikato so akirelasyonan ed sekso diad sananey a laki, tan sirin agtola labay ya asawaen. Anggaman ontan, sanen imbaga nen Jehova ed sikato a diad panamegley na masanton espiritu To a say ugaw so ninginew, inasawa nen Jose si Maria. (Mateo 1:18-20, 24, 25) Saginonor, legan na indalaw da ed syudad na Bethlehem, si Jesus so nianak. (Lucas 2:1-7; Miqueas 5:2) Sanen si Jesus so ugaw ni, sikato so sinali nen Arin Herodes a pateyen. Ingen ta pinasakbayan nen Jehova si Jose ta pian ibatik to so pamilya to ed Ehipto. Kayari na impatey nen Arin Herodes, si Jose tan si Maria so pinmawil a kaiba ra si Jesus diad syudad na Nazareth ed Galilea. Dia binmaleg.​—Mateo 2:13-15, 19-23.

7. (a) Anto so agawa sanen manedad si Jesus na 12? (b) Anton kimey so naaralan nen Jesus a gawaen kaleganan na ibabaleg to?

⁷ Sanen si Jesus so manedad na 12 taon sikato so nambiahen kaiba to so pamilya to ed Jerusalem pian atendian da so nikaduman selebrasyon ya atawag na Paskua. Legan ton wadman sikato so nanayam ed templo a taloy agew pian ontalineng ed saray managbangat tan tinetepetan tora. Amin a totoon tinmalineng ed sikato so nikelawan ed agaylan karakel na kabat to. (Lucas 2:41-52) Legan na imbaleg nen Jesus ed Nazareth, akaaral a mankarpentero. Andi-duaruwan nipasal a manggawa’d sayan kimey diad panamegley nen nampabaleg ed sikato ya ama to, si Jose, a sikato met so sakey a karpentero.​—Marcos 6:3; Mateo 13:55.

8. Anto so agawa sanen manedad si Jesus na 30?

⁸ Diad edad a talumplo abalbaleg ya impanguman so agawa ed bilay nen Jesus. Linma ed si Juan a Managbautismo tan kinerew ton sikato so bautismoan to, a sikato so sigpot a nipalgep ed saray danum na Ilog Jordan. Inreport na Biblia: “Kayari na inkabautismoan to tampol a si Jesus so tinmatdang ed danum; tan nia! saray katawenan so alukasan, tan anengneng ton onaakseb ed sikato so espiritu na Dios a singa  sakey a malapati. Nia! Ontan met, wala so sakey a boses a nanlapud katawenan a kuanto: ‘Saya so Anako, say inad-aro, ya inabobonan ko.’” (Mateo 3:16, 17) Anggapoy duaruwa ed kanonotan nen Juan a si Jesus so imbaki na Dios.

9. (a) Diad tua, kapigan so impagmaliw nen Jesus a Kristo, tan akin a nanlapulad saman? (b) Diad inkabautismoan to, anto so impresenta nen Jesus ed inkasikato a gawaen?

⁹ Diad impangikalbo to’d masanton espiritu To ed si Jesus, sikato so nilanaan odino tinuro nen Jehova a magmaliw ya ari ed onsabin panarian To. Diad inkalanaan to na espiritu, si Jesus so nagmaliw a “Mesias,” odino say “Kristo,” a saratan a salita ed Hebreo tan Griegon lenguahe et kabaliksan to so “Alanaan.” Sirin, sikato so nagmaliw, diad tua, a Jesu-Kristo, odino Jesus ya Alanaan. Kanian sinalita na apostol ton si Pedro si “Jesus a nanlapud Nazareth, no panon so impanlana na Dios ed sikato na masanton espiritu tan pakayari.” (Gawa 10:38) Ontan met, diad inkabautismoan to ed danum et impresenta nen Jesus so inkasikato ed Dios a manumpal ed kimey ya angibakian na Dios ed sikato diad dalin a gawaen. Anto ‘tan ya importantin kimey?

NO AKIN A SIKATO SO LINMA DIA ED DALIN

10. Anto ran katuaan so inakaran nen Jesus ed dalin ya ibaga?

¹⁰ Ipapaliwawa to no akin a sikato so linma dia ed dalin, inkuan nen Jesus ed Romanon gobernador a si Pontio Pilato: “Nisengeg ed saya siak so nianak, tan nisengeg ed sayan [gagala] siak so linma ed mundo, pian tasian ko so katuaan.” (Juan 18:37) Balet anto ran katuaan so nibakian nen Jesus diad dalin ya ipaamta? Ununa, saray katuaan nipaakar ed mangatatawen ya Ama to. Imbangat toray patumbok ton mangipikasi a say ngaran nen Ama to so “narayew,” odino napasanto. (Mateo 6:9, King James Version) Tan impikasi to: “Impakabat ko so ngaran mo ed saray totoon inter mo ed siak.” (Juan 17:6) Ontan met, inkuanto: “Nepeg kon iyabawag so maong a balita na panarian na Dios, lapud nisengeg ed saya et siak so nibaki.”​—Lucas 4:43.

11. (a) Akin ya impasen nen Jesus so kimey to ya importantin tuloy? (b) Anto so agbalot inkibot nen Jesus a gawaen? Sirin anto so nepeg tayon gawaen?

¹¹ Panon kaimportante ed si Jesus iyan kimey na panangipaamta ed ngaran nen Ama to tan panarian? Inkuanto ed saray babangatan to: “Say taganok et say panggawak ed linawa na saman so angibaki ed siak tan pian sumpalen so kimey to.” (Juan 4:34) Akin ya impasen nen Jesus so kimey na Dios a singa kaimportante na tagano? Sikato  so lapud say Panarian so paraan a panumpal na Dios ed saray makapakelaw a gagala to ed katooan. Sikatoyan panarian so maneral ed amin a karelmengan tan manlinis ed ngaran nen Jehova ed kabalawan a nibunton ed sikato. (Daniel 2:44; Apocalipsis 21:3, 4) Kanian agbalot inkibot nen Jesus ya impakabat so ngaran na Dios tan say panarian. (Mateo 4:17; Lucas 8:1; Juan 17:26; Hebreos 2:12) Naynay a sinalita to so katuaan, balanglan popular odino andi. Inter to sirin so uliran a nepeg tayon tumboken no labay tayon paliketen so Dios.​—1 Pedro 2:21.

12. Nisengeg ed anto nin arum ya importantin rason na inakaran nen Jesus ed dalin?

¹² Ingen, pian nagamoran tayo so andi-anggaan a bilay ed silong na uley na panarian na Dios, nakaukolan nen Jesus ya ikalbo so dala to ed patey. A singa inkuan na duaran apostoles nen Jesus: “Sikami so niyabawag a matunong natan diad panamegley na dala to.” “Say dala nen Jesus ya Anak [na Dios] so manlinis ed sikatayo ed amin a kasalanan.” (Roma 5:9; 1 Juan 1:7) Sirin say sakey ya importantin rason no akin a si Jesus so linma dia ed dalin et say ipatey to a nisesengeg ed sikatayo. Inkuanto: “Say Anak na too so sinmabi, aliwan pian panlingkoran, noagta pian manlingkor tan pian iter to so kamarerwa to [odino, bilay] a dondon ya onsalat ed amayamay.” (Mateo 20:28) Ingen anto so kabaliksan na impangiter nen Kristo na bilay to a “dondon”? Akin a say kikalbo na dala to ed patey so nakaukolan ed kilalaban tayo?

INTER TO SO BILAY TO A DONDON

13. (a) Anto so dondon? (b) Anto so bili na dondon ya imbayar nen Jesus a pangibulos ed sikatayo diad kasalanan tan patey?

¹³ Say salitan “dondon” so mabetbet a nausar sano wala so nakidnap. No nadakep na kidnaper so sakey a too, nayarin ibaga to ya ipawil to so too no nabayaran so sakey a kantidad na kuarta a bilang dondon. Kanian say dondon so bengatlan mangitarok na kililiktar ed sakey a toon kinautibo. Sikato so bengatlan ibayar pian agto nabalang so bilay to. Say ayadyarin bilay nen Jesus so niiter pian nibulos so katooan a manlapud panangaripen na kasalanan tan patey. (1 Pedro 1:18, 19; Efeso 1:7) Akin a nakaukolan so ontan a kibulos?

14. Akin a nakaukolan so dondon ya intarya nen Jesus?

¹⁴ Saya so lapud si Adan, say ateng tayon amin, so tinmunganga ed Dios. Say mauges a gawa to so nanggawa ed sikaton makasalanan, lapud ipapaliwawa na Biblia a say “kasalanan so kaugsan.” (1 Juan 3:4; 5:17) Bilang nansumpalan, sikato so agmakanan mangawat ed  langkap na Dios a bilay ya andi-anggaan. (Roma 6:23) Kanian abalang nen Adan so ayadyarin atooan a bilay diad sakey a paraison dalin. Abalang to met iyan makapakelaw ya ilalo a para ed amin a pawalaen ton anak. ‘Balet akin,’ nayarin itepet mo, ‘ya amin na saray anak to so nakaukolan ya ompatey, anta si Adan so nankasalanan?’

15. Lapud si Adan so nankasalanan, akin a saray anak to so nakaukolan a manirap tan ompatey?

¹⁵ Saya so lapud si Adan, sanen nagmaliw a makasalanan, so angipasa na kasalanan tan patey ed saray anak to, a pati amin a totoon manbibilay natan. (Job 14:4; Roma 5:12) “Amin so nankasalanan tan kinmulang ed gloria na Dios,” kuan na Biblia. (Roma 3:23; 1 Arari 8:46) Anggan si maridios a David so angikuan: “Diad kasulitan siak so nianak ed irap, tan diad kasalanan siak so innginew nen inak.” (Salmo 51:5) Saray totoo, sirin, so ompapatey lapud kasalanan ya atawir ed si Adan. Panon a posibli, sirin, a say bagat a bilay nen Jesus so mangibulos ed amin a totoo a manlapud panangaripen na kasalanan tan patey?

16. (a) Diad impangitarya ed dondon, panoy impangipanengneng na Dios na galang ed ganggan to a ‘bilay so nepeg ya iter ed bilay’? (b) Akin a si Jesus so alenleneg a toon makapambayar ed dondon?

¹⁶ Alanor so sakey a legal a prinsipyo ed ganggan na Dios ed nasyon na Israel. Ibabaga to a say ‘bilay so nepeg ya iter ed bilay.’ (Exodo 21:23; Deuteronomio 19:21) Diad intunganga to abalang nen ayadyarin toon Adan so ayadyarin bilay ed paraison dalin tan ed amin ya anak to. Inter nen Jesu-Kristo so dilin ayadyarin bilay to a panaliw ed saman so abalang nen Adan. On, “inter [nen Jesus] so inkasikato a kasimbangan a dondon ed amin.” (1 Timoteo 2:5, 6) Lapud sikato so sakey ya ayadyarin too, a singa si Adan, si Jesus so atawag na “say unor ya Adan.” (1 Corinto 15:45) Anggapoy arum a too nilikud ed si Jesus so makayarin mangitarya na dondon. Saya so lapud si Jesus so alenleneg a toon nambilay a kasimbang nen Adan ya ayadyarin toon anak na Dios.​—Salmo 49:7; Lucas 1:32; 3:38.

17. Kapigan so impakapambayar ed Dios na dondon?

¹⁷ Inatey si Jesus ed edad a 33¹/2 taon. Balet diad komatlon agew kayari na impatey to et sikato so apaoli ed bilay. Apataplon agew ed saginonor sikato so pinmawil ed tawen. (Gawa 1:3, 9-11) Diman, bilang sakey ya espiritun persona lamet, inmapireng ed “arap na persona na Dios a nisesengeg ed sikatayo,” ya inawit to so bili na dondon bagat to. (Hebreos 9:12, 24) Diad saman say dondon so nibayar ed Dios diad tawen. Akatarya la natan so kililiktar ed katooan. Ingen kapigan so pakanengneng ed saray gungguna to?

18. (a) Panoy kagunggunaan tayo la natan diad dondon? (b) Anto so gawaen a posibli na dondon ed arapen?

 ¹⁸ Anggan natan say dondon bagat nen Jesus so mangungguna ed sikatayo. Panon? Diad pangagamil na pananisia ed satan napanggayagaan tayo so malinis a talindeg ed arap na Dios tan onsilong ed maaro tan matamoy a panangasikaso to. (Apocalipsis 7:9, 10, 13-15) Dakel ed sikatayo so nayarin akapanggawa na teriblen kasalanan sakbay a naaralan tayo so nipaakar ed Dios. Tan anggan natan et makagagawa itayo na lingo, no maminsan et graben tuloy. Ingen ta sarag tayon mabulbulos ya anapen so panamerdona na Dios diad letnegan na dondon, tekep na talek a sikatayo so dengelen to. (1 Juan 2:1, 2; 1 Corinto 6:9-11) Ontan met, diad arapen iran agew, say dondon so mangilukas ed sikatayo na dalan pian awaten so langkap na Dios a bilay ya andi-anggaan diad matunong a balon mundo to. (2 Pedro 3:13) Diad satan a panaon amin na saraman so mangaagamil na pananisia ed dondon so nagnap a nabulos diad panangaripen na kasalanan tan patey. Nayarian da la so onnengneng ed arapen diad ando lan andon bilay ed inkayadyari!

19. (a) Antoy epekto na taryan dondon ed sika? (b) Panoy impangibaga nen apostol Pablo a nepeg tayon pangipanengneng na pisasalamat ed dondon?

 ¹⁹ Panoy liknaan mo diad impakaaral na nipaakar ed dondon? Agta paligsaen to so pusom ed si Jehova a Dios diad pikabat a sikato so manataliman tuloy ed sika ya inter to so pinabpabli ton anak a nisesengeg ed sika? (Juan 3:16; 1 Juan 4:9, 10) Ingen isipen, met, so aro nen Kristo. Sikato so bulos-linawan linma dia ed dalin pian ompatey a nisesengeg ed sikatayo. Agta nepeg tayo so misalsalamat? Impaliwawa nen apostol Pablo no panon so nepeg tayon pangipanengneng na pisasalamat sanen inkuanto: “Sikato so inatey a nisesengeg ed amin pian saraman komon so manbilay so agla manbilay ed inkasikara, noagta ed saman so inatey a nisesengeg ed sikara tan apaoli.” (2 Corinto 5:14, 15) Kasin ipanengneng mo so pisasalamat mo diad pangusar mo ed bilay mo a manlingkor ed Dios tan ed mangatatawen ya Anak ton Jesu-Kristo?

NO AKIN A SI JESUS SO NANGGAWA NA MILAGRO

20. Anto so naaralan tayo nipaakar ed si Jesus diad impanambal to ed akating?

²⁰ Bantog si Jesus ed saray milagron ginawa to. Walaan na aralem a panangabagey ed totoon nagogonigon, tan sikato so magunaet a mangusar ed pakayarin inter na Dios ed sikato diad panulong ed sikara. Alimbawa, sakey a toon walaan na teriblen sakit a kating so inmasingger ed sikato tan kuanto: “No labay mo, siak so linisan mo.” Si Jesus “so atenyeg ed panangabagey, tan inyunat to so lima to tan diniwit to, tan inkuanto ed sikato: ‘Labay ko. Nalinisan ka.’” Tan inmabig so toon mansasakit!​—Marcos 1:40-42.

21. Panoy impanulong nen Jesus ed ulop?

²¹ Imanoen so sananey ya eksena ed Biblia, tan isipen so matamoy a liknaan nen Jesus ed saray totoon adeskribe: “Insan sinmingger ed sikato so baleg ya ulop, a sankaawit daray totoon piley, sikwel, bulag, umel, tan dakel nin arum, tan inggaton da ra ed saliyan to, tan pinaabig to ra; et ontan lan nikelawan so ulop nen anengneng dan say umel so mansasalita tan say piley so manaakar tan say bulag so makakanengneng, tan inggloria ra so Dios na Israel.”​—Mateo 15:30, 31.

22. Antoy mangipanengneng a si Jesus et peteg ya inabagey toray totoo a tinulongan to?

²² A si Jesus so peteg ya angabagey ed sarayan maniirap a totoo tan tuan labay toran tulongan so nanengneng diad ontumbok ya imbaga to ed saray babangatan to. Kuanto: “Kaskasian ko so ulop, lapud taloran agew la ya akipanayam ira ed siak tan anggapo so naakan da; tan agko ra labay a pasempeten a manaayunal. Ompan sikara so  onkapuy ed dalan.” Sirin si Jesus, diad pitoran tinapay labat tan pigaran angkelag a sira, mamilagron pinakan toy “apatalibon lalaki, nilikud iray bibii tan ugugaw.”​—Mateo 15:32-38.

23. Antoy anenyeg ed si Jesus a mamaoli ed anak a laki na balon bii?

²³ Diad sananey ya inkagawa nabet nen Jesus so tulor na inatey ya ompapaway ed syudad na Nain. Dineskribe na Biblia, a kuanto: “Wala so toon inatey a sankaawit da, say bogbogtong ya anak nen ina to. Sakey ni, say ina to so balo. . . . Tan sanen sikato so anengneng na Katawan, sikato so atenyeg ed panangabagey.” Alikna ton tuloy so kaermenan to. Kanian, inkuan nen Jesus ed inatey, ingganggan to: “Balolaki, ikuan ko ed sika, Ombangon ka!” Makapakelkelaw! “Say toon inatey so yinmurong tan ginmapon nansalita, tan inter to ed si ina to.” Isipen so agaylan liket na saman ya ina! Panon so liknaan mo? Linmaknab ed arawin pasen so balita nipaakar ed sayan makatantandan agawa. Agpankelawan a si Jesus so nibanbantog a tuloy.​—Lucas 7:11-17.

24. Antoy ipanengneng na saray milagro nen Jesus nipaakar ed arapen?

²⁴ Ingen saray milagron ginawa nen Jesus so temporaryon pankaabigan lambengat. Saray totoon tinambal to so nanproblema ed pisikal lamet. Tan saramay pinaoli to so inatey lamet. Balet saray milagro nen Jesus so amaneknek a sikato so imbaki na Dios, a sikato so peteg ya Anak na Dios. Tan pinaneknekan dan, diad pakayari na Dios, amin a problema na too so nayarin naresolbe. On, impanengneng da ed melag a kalaknab so nagawa ed dalin diad silong na panarian na Dios. Diad satan a panaon say narasan so napakan, say mansasakit so natambal, tan anggan saray inaatey so napaoli! Tan aglan balot lamet pansengegan na kaermenan so sakit, patey odino anggan dinan nin arum a gonigon. Agaylan bendisyon itan!​—Apocalipsis 21:3, 4; Mateo 11:4, 5.

MANULEY ED PANARIAN NA DIOS

25. Diad anton taloran parte so akaapagan na bilay nen Jesus?

²⁵ Wala so taloran parte ed bilay na Anak na Dios. Ununa, wala so ag-amtan bilang na taon a sikato so kaiba nen Ama to ed tawen sakbay na impagmaliw ton sakey a too. Ontumbok, say 33¹/2 taon ya impambilay to ed dalin kayari na inkianak to. Tan natan et wadtan a nipawil so bilay to ed tawen bilang sakey ya espiritun persona. Anton betang so niwala’d sikato ed tawen nanlapulad inkioli to?

26. Diad katooran to ed dalin, pinaneknekan nen Jesus a sikato so makana ed anto?

²⁶ Malinlinew, si Jesus so magmaliw a sakey ya ari. Unong a singa  inyabawag na anghel ed si Maria: “Sikato so manuley a bilang ari . . . ed ando lan ando, tan anggapo so anggaan na panarian to.” (Lucas 1:33) Kaleganan na mangaraldalin a ministeryo to sinalita ton naynay so nipakar ed panarian na Dios. Imbangat toray babangatan ton manpikasi: “Onsabi komon so panarian mo. Nagawa komon so linawam, unong ed tawen, ontan met ed dalin.” Tan pinaseseg toran “itultuloy, sirin, ya anapen ya ununa so panarian.” (Mateo 6:10, 33) Diad panamegley na katooran to ed dalin, pinaneknekan nen Jesus a sikato so makanan magmaliw ya ari ed panarian na Dios. Kasin sikato so ginmapon manuley a bilang ari diad samay bektan impawil to ed tawen?

27. (a) Antoy ginawa nen Jesus kayari na impawil to ed tawen? (b) Anto so inmunan ginawa nen Jesus bilang ari ed panarian na Dios?

²⁷ Andi. Tutukoyen nen apostol Pablo so Salmo 110:1, impaliwawa to: “Sayan too [si Jesus] so angisaklang na sakey a bagat ed saray kasalanan a magnayon tan yinmurong ed nikawanan na Dios, a nanlapulad saman et aalagden to ya anggad saray kakabusol to so nipasen a gagatinan na sali to.” (Hebreos 10:12, 13) Aalagden nen Jesus so ganggan nen Jehova: “Onla kan manuley ed pegley na kakabusol mo.” (Salmo 110:2) Sanen satan a panaon so sinmabi, ginapoan ton nilinisan so katawenan ed si Satanas tan saray angheles to. Say nansumpalan na saman a bakal so nidalatdat ed sarayan salita: “Natan sinmabi so kilalaban tan say pakayari tan say panarian na Dios tayo tan say pakauley nen Kristo to, lapud say manangidalem ed saray agagi tayo so nibantak, a mangidadalem ed sikara diad agew tan labi ed arap na Dios tayo!” (Apocalipsis 12:10) A singa anengneng la ed akadkaunan kapitulo na sayan libro, ipanengneng na katuaan a sayan bakal ed tawen so agawa la, tan si Jesu-Kristo so manuuley la natan ed pegley na kakabusol to.

28. (a) Anto la so maganon gawaen nen Kristo? (b) Antoy nepeg tayon gawaen pian napanggayagaan so pananalimbeng to?

²⁸ Agla mabayag et si Kristo tan saray mangatatawen ya angheles to so onkiwas lan manlinis ed dalin diad amin a peles a minumundon gobierno. (Daniel 2:44; Apocalipsis 17:14) Ibabaga na Biblia a sikato so walaan na “makdem ya andukey a kampilan, pian pangabil to ed saray nasyones, tan pastolan to ra ed tayukor a balatyang.” (Apocalipsis 19:11-16) Pian makanan nasalimbengan legan na sayan onsasabin kadederal, nakaukolan tayon agamilen so pananisia ed si Jesu-Kristo. (Juan 3:36) Nepeg a sikatayo so magmaliw a babangatan to tan isuko tayo so inkasikatayo ed sikato a bilang mangatatawen ya Ari tayo. Kasin satan so gawaen mo?

[Tepetepet Parad Panagaral]

[Litrato sa panid 58]

Tinaynanan nen Jesus so karpenteron kimey to pian manpabautismo tan magmaliw a nilanaan nen Jehova

[Litrato sa panid 63]

Si Jesus so kasimbangan nen ayadyarin toon Adan

 [Saray litrato sa panid 64]

Atenyeg si Jesus ed panangabagey diad panulong ed mansasakit tan narasan

 [Litrato sa panid 67]

Diad impamaoli ed inaatey, impanengneng nen Jesus so gawaen to ed mas babaleg a kalaknab sano manuley so Panarian na Dios