Kapitulo 19

Kayari na Armagedon, Paraison Dalin

1. (a) Anto so kaslakan a pantalos ed Armagedon? (b) Anto so ibabaga na Biblia nipaakar ed satan?

 SAY “Armagedon” so makapakebbiew a salita ed dakel. Mabetbet a saray papangulo na mundo so manguusar ed satan diad panukoy ed posiblen Guerra Mundial III. Anggaman kuan, sasalitaen na Biblia so Armagedon a bilang say pasen na matunong a bakal na Dios. (Apocalipsis 16:14, 16, King James Version) Sayan bakal na Dios so mangitarya na dalan a para ed matunong a balon mundo.

2. (a) Siopa ra so naderal ed Armagedon? (b) Sirin anto ran gawa so makabat lan paliisan?

² Aliwan singa saray bakal na totoo, a mamatey ed namparan maong tan mauges, say Armagedon so maneral lambengat ed mauges. (Salmo 92:7) Si Jehova a Dios so Ukom, tan ekalen to so anggan siopan manggagalan agmalabay a manulok ed saray matunong a ganggan to. Natan et dakel a totoo so agmakanengneng a mauges so bengatlan singa say pilalawanan, panagbuanges, panagtila odino panagsaol. Balet, unong ed Dios, sarayan bengatla so mauges. Kanian diad Armagedon et agto iliktar iraman so mantutultuloy a manggagawa ed satan. (1 Corinto 6:9, 10; Apocalipsis 21:8) Diad pikabat ed saray ganggan na Dios ed sarayan pamaakaran, importante ed totoon nayarin manggagawa ed ontan iran mauges a bengatla so panguman ed dalan da.

3. (a) Diad anto so angiparengan nen Jesus ed anggaan na kaplesan a mundo? (b) Anto so nagawa ed si Satanas tan saray demonyos to? (c) Unong ed kasulatan diad onggendan iran pahina, anto ran nengneng na kipapasen so panggayagaan ed paraison dalin?

³ Kayari na Armagedon anggapo so kabiangan na sayan marelmeng a mundo ya atilak. Saray totoon manlilingkor ed Dios lambengat so mantultuloy a manbilay. (1 Juan 2:17) Impareng nen Jesu-Kristo so kipapasen ed samay agew nen Noe. (Mateo 24:37-39; 2 Pedro 3:5-7, 13; 2:5) Kayari na Armagedon, say gobierno na Dios lambengat so alenleneg a gobiernon manuley ed dalin. Naandi la si Satanas tan saray demonyos to. (Apocalipsis 20:1-3) Imanoen, ed onggendan iran pahina,  so arum iran bendisyon ya ipapanengneng na Biblia a panggayagaan na saray matulok a totoo.

  KAREENAN ED AMIN A TOTOO

 “Wala so ugaw a nianak ed sikatayo, sakey ya ugaw a lakin niiter ed sikatayo; tan say maprinsipen uley so wala ed tapew na abala to. Tan say ngaran to so natawag na . . . Prinsipe na Kareenan. Diad inkadaakan na maprinsipen uley tan ed kareenan anggapo so anggaan.”​—Isaias 9:6, 7.

 “Diad saray agew to say matunong so onaligwas, tan say inkadaakan na kareenan so angga ed kaandi na bulan. Tan sikato so nawalaan na uuleyan a manlapud dayat ya angga ed dayat tan manlapud Ilog ya anggad kasampotan na dalin.”​—Salmo 72:7, 8.

 ANGGAPO LAY BAKAL

 “Galidia, sikayon totoo, nengnengen yoray kimey nen Jehova, no panon so impangigeter to’d saray makapakelaw a gawa ed dalin. Patundaen to laray bakal ya anggad kasampotan na dalin.”​—Salmo 46:8, 9.

  MARARAKEP YA ABUNG TAN MAGAYAGAN TRABAHO ED AMIN

 “Peteg a sikara so mangipaalagey na abung tan panayaman da ra . . . Agla ra manpaalagey tan sananey so manayam; ag-ira mantanem tan sananey so mangan . . . say kimey na saray dilin lima na pinilik so nausar a nagnap. Agla ra mansagpot ed andi-kakanaan, nisay mananak ed kagonigonan; lapud sikara so ilalak a tinibukel na pinili nen Jehova, tan saray kapolian da ed sikara.”​—Isaias 65:21-23.

 KRIMEN, KARAWALAN TAN KARELMENGAN NAANDI LA

 “Ta saray managgawa na mauges so napegpeg . . . Tan wala ni lambengat so daiset tan say marelmeng so naandi la; tan imanom so pasen to, tan sikato la so naandi.”​—Salmo 37:9, 10.

 “No nipaakar ed saray marelmeng, sikara so napegpeg ed mismon dalin; tan no nipaakar ed saray managpalikdo, sikara la so nabagut.”​—Uliran 2:22.

  AMIN A DALIN SO PARAISO

 Inkuan nen Jesus: “Wala ka naani ed siak diad Paraiso.”​—Lucas 23:43.

 “Saray matunong a mismo so mangayarian na dalin, tan sikara so manayam ed tapew to diad ando lan ando.”​—Salmo 37:29.

 DAAKAN A MAABIG IRAN BENGATLAN KANEN NA AMIN

 “Si Jehova na saray ehersito so peteg a manggawa ed amin a totoo na . . . panliliket ed saray mataban bengatla, tan panliliket ed saray alak ed tapew na bulirek, na saray mataban bengatla a napno na utek.”​—Isaias 25:6.

 “Wala la so daakan ya ilik ed dalin; diad tuktok na palandey wala so panliplippua.” “Say dalin a mismo so peteg a mangiter na bunga; say Dios, Dios tayo, so mamendisyon ed sikatayo.”​—Salmo 72:16; 67:6.

4, 5. (a) Anto ran kipapasen so anggapo la ed paraison dalin? (b) Anto so nayarian na totoon gawaen a, diad dakel iran pasen, et agda nagawaan natan?

⁴ Seguradon labay mo so manbilay ed paraison dalin a singa saman so hardin ya akapalsaan na inmunan toon si Adan. (Genesis 2:8; Lucas 23:43) Isipen pa​—anggapo lay bakal, krimen o karawalan. Nayarian mo la so manakar ed anggan iner tan diad anggan anton oras ed agew odino labi ya anggapo la so kapagaan na kasakitan. Saray marelmeng so naandi la.​—Salmo 37:35-38.

⁵ Kabaliksan na saya ya anggapo laray matitilan pulitiko tan maagum iran papangulo na negosyo a mamapairap ed totoo. Nisay saray totoo so nabelatan ed angkabaleg iran buis a bayaran a para ed armas ed militar. Anggapo lan balot so naandian na maabig a tagano tan kumportablen abung lapud agtora nayarian a pawalaen. Say problema ed trabaho, implasyon tan mablin sasaliwen so anggapo lara. Saray gonigon a mangiiter na kairapan ed pamilya natan so naandi la. Amin so nawalaan la na kimey a gawaen, tan nayarian dan nanengneng tan panggayagaan so resulta na sagpot da.

6. (a) Anton kimey so gawaen na saray niliktar ed Armagedon? (b) Panon so pamendisyon na Dios ed kimey a gawaen?

⁶ Ununa ed amin, saramay makaliktar ed Armagedon so nawalaan na kimey diad panlinis ed dalin tan pangekal ed saray deral na sayan daan a sistema. Tan insan nawalaan ira na pribilehyo diad leksab na panangidirihe na uley na Panarian, diad pamayubo ed dalin tan gawaen dan marakep a pasen a panayaman. Agaylan satan so maliket a kimey! Bendisyonan na Dios so amin a bengatlan nagawaan. Itarya to so suston nengneng na klima a mamabuna ed tantanaman tan ayayep, tan imanoen ton saraya so nasalimbengan a manlapud sakit tan desyang.

7. (a) Anton sipan na Dios so nasumpal? (b) Anto so alagden na saray Kristianos unong ed sipan na Dios?

⁷ Sayan sipan na maaron Amalsa, a singa niiter ed panamegley na salmista na Biblia, so nasumpal: “Lukasan mo so limam tan peneken mo so pilalek na amin a bengatlan mabilay.” (Salmo 145:16) On, amin a manepeg a pilalek na matakot-ed-Dios a totoo so sigpot a napenek. Agtayo anggan naisip no panon so kipapasen na makapakelaw a bilay diad paraiso ed dalin. Ibabaga to so nipaakar ed oksuyan na Dios diad kabendisyonan na totoo to, insulat nen apostol Pedro: “Wala so balon katawenan tan balon dalin ya aalagden tayo unong ed sipan [na Dios], tan diad saraya so panayaman na inkatunong.”​—2 Pedro 3:13; Isaias 65:17; 66:22.

8. (a) Akin ya agtayo nakaukolan so balon pisikal a katawenan? (b) Anto so “balon katawenan”?

 ⁸ Anto so sarayan “balon katawenan”? Sikara so aliwan balon pisikal a katawenan. Saray pisikal a katawenan tayo so ginawa na Dios ya ayadyari, tan itatarok da so gloria ed sikato. (Salmo 8:3; 19:1, 2) Saray “balon katawenan” so manutukoy ed sakey a balon pananguley ed dalin. Saray “katawenan” natan so tinibukel na saray ginaway-toon gobierno. Saraya so napaso ed Armagedon. (2 Pedro 3:7) Saray “balon katawenan” ya onsandi ed sikara et say mangatatawen a gobierno na Dios. Say ari to et si Jesu-Kristo. Balet saray miuley ed sikato a bilang kabiangan na “balon katawenan” et saray 144,000 a matoor a patumbok to.​—Apocalipsis 5:9, 10; 14:1, 3.

9. (a) Anto so “balon dalin”? (b) Anto so dalin a naderal?

⁹ Anto, sirin, so “balon dalin”? Sikato so aliwan sakey a balon planeta. Sayan planetan dalin so ginawa na Dios a dugarugan pambilayan na totoo, tan linawa ton saya so mansiansia lawas. (Salmo 104:5) Say “balon dalin” et tutukoyen to so sakey a balon grupo odino sosyedad na totoo. Mabetbet ya uusaren na Biblia so salitan “dalin” ed ontan a dalan. Alimbawa, kuanto: “Amin a dalin [kabaliksan to, saray totoo] so nantultuloy ed sakey a lenguahe.” (Genesis 11:1) Say “dalin” a naderal et saray totoo a ginawa ra so inkasikaran kabiangan na sayan marelmeng a sistema na bengabengatla. (2 Pedro 3:7) Say “balon dalin” ya onsandi ed sikara so tibukelen na saray tuan ariripen na Dios ya angisian ed inkasikara a nanlapud sayan mundo na marelmeng a totoo.​—Juan 17:14; 1 Juan 2:17.

10. (a) Siopa ra so natitipon, tan onloob ed anto? (b) Unong ed kasulatan ed onggendan iran pahina, anto so nagawa ed paraison dalin ya agnagawaan na saray gobierno na totoo?

¹⁰ Anggan natan saray totoo ed amin a rasa tan nasyonalidad a manitibukel ed “balon dalin” so natitipon ed Kristianon kongregasyon. Say pankakasakey tan kareenan a wala ed limog da so melag lambengat a pakanengnengan ed saman so manggawan maliket ed bilay diad paraison dalin kayari na Armagedon. Tua, gawaen na panarian na Dios so agnailaloan a gawaen na gobierno na too. Imanoen pa so pigara ed saratan a bendisyon diad onggendan iran pahina.

  MAARON IMPANAAGI ED AMIN A KATOOAN

 “Say Dios so aliwan manangiduma, balet dia ed amin a nasyon makapaliket ed sikato so toon ontakot ed sikato tan manggawa na inkatunong.”​—Gawa 10:34, 35.

 “Nia! sakey a baleg ya ulop, ya agnayarian na toon bilangen, a nanlapud amin a nasyones tan tribu tan totoo tan pansasalita . . . Sikara la so agnaerasan nisay napegaan.”​—Apocalipsis 7:9, 16.

 DEEN ED BAETAN NA TOTOO TAN AYAYEP

 “Say lobo so peteg lan miayam ed kordero, tan say kilaw na kanding so miakdol ed leopardo, tan say kilaw na baka tan say kilaw na leon tan say pinataban ayep so mantitipon; tan sakey a melag ya ugaw so mangitonton ed sikara.”​—Isaias 11:6; 65:25.

  ANGGAPO LA SO SAKIT, ITATATKEN O PATEY

 “Diad satan saray mata na bulag so nilukas, tan saray mismon layag na telek so nibuang. Tan diad satan say lupoy so onkalab a singa usa, tan say dila na umel so mankelyaw ed gayaga.”​—Isaias 35:5, 6.

 “Tan say Dios a mismo so wala ed sikara. Tan punasen to so amin a lua ed kamataan da, tan anggapo la so patey, nisay pannangis nisay pandageyem nisay ot-ot. Saray gendat a bengatla so naandi la.”​—Apocalipsis 21:3, 4.

 SARAY INAATEY SO NAPAOLI ED BILAY

 “Say oras so onsabi sano amin na saraman so wala ed pakanodnonotan a lubok so makadngel ed boses to tan ompaway ira.”​—Juan 5:28, 29.

 “Say dayat so angiter ed inaatey to, tan say patey tan Hades so angiter ed inaatey da.”​—Apocalipsis 20:13.

11. Anto so mabetbet a manederal ed nengneng na paraison gagawaen na totoo natan?

¹¹ Agaylan lalon magmaong so paraiso ed leksab na panarian na Dios nen say antokaman a nayarin itarok na sayan daan a sistema!  Tua, agawaan na arum a totoo natan so pasen a panaayaman da diad singa nengneng na sakey a paraiso. Balet saray totoon manaayam ed sarayan pasen so nayarin masiblet, tan nayarin manggugulaan ed balang sinansakey. Tan, kabekta, sikara so mansakit, ontatken tan ompatey. Kayari na Armagedon, anggaman kuan, say paraiso ed dalin et isakup to so mas nagkalalo nen say basta mararakep ya ayaman, hardin tan parke.

12, 13. (a) Anto ran kipapasen na kareenan so wala la kayari na Armagedon? (b) Anto so nakaukolan diad pangitarok ed sarayan kipapasen?

¹² Isipen pa. Saray totoo ed amin a rasa tan nasyonalidad so manaral lan manbilay a mankakasakey bilang sakey a pamilya na agagin lalaki tan bibii. Peteg lan sikara so manaarowan ed balang sinansakey. Anggapo so masiblet odino mapasang. Anggapo so manggula ed sananey a too lapu lambengat ta sananey so rasa to, kolor, odino pasen a nanlapuan to. Anggapo so panangidumaduma. Balang sakey ed dalin so magmaliw a tuan kaaro tan kaabay na balang sakey. Tua, sikato so sakey a paraiso ed espiritual a dalan. Kasin kaliktan mo so manayam ed sayan paraiso diad leksab na “balon katawenan”?

¹³ Natan et totongtongen na dakel a totoo so nipaakar ed pambilay a mankakasakey ed kareenan, tan inletneg da ni so muyongan na “Nasyones Unidas.” Ingen saray totoo tan nasyones so mas lalon naapag-apag. Anto so nakaukolan? Saray puso na totoo so nakaukolan a manguman. Balet say panggawa ed ontan a milagro so imposiblen tuloy ed saray gobierno na sayan mundo. Say mensahe na Biblia nipaakar ed panangaro na Dios, anggaman kuan, so manggawa ed satan.

14. Anto so nagagawa natan a mamaneknek a sarayan kipapasen na paraiso so nasumpal?

¹⁴ Diad impakaaral na nipaakar ed matunong a balon sistema, saray puso na dakel a totoo so napapakiwas a mangaro ed Dios. Tan sirin gapoan da met so onkiwas ed maaron dalan ed arum, a singa ginawa na Dios. (1 Juan 4:9-11, 20) Kabaliksan na saya so baleg a pampasimbalo ed bilay da. Dakel a masiblet tan managgula, a singa ra masesebeg ya ayep, so nagmaliw lan maamo tan mareen. Singa matulok a karnero, sikara so atipon ed Kristianon pulok.

15. (a) Anton duaran grupo na Kristianos so wala? (b) Siopa ra so ununan manibukel na “balon dalin”?

¹⁵ Diad masulok a 1,900 taon wala so panitipon ed “melag a pulok” na 144,000 Kristianon miuley ed si Kristo. Wala lambengat so pigara ed saraya a natitilak ed dalin; kaslakan so miuuley la ed si Kristo diad  tawen. (Lucas 12:32; Apocalipsis 20:6) Balet sasalitaen to so arum a Kristianos, inkuan nen Jesus: “Siak so walaan na arum a karnero, ya anggapo ed sayan panangipukokan [na “melag a pulok”]; saratan met so awiten ko, tan dengelen da so boses ko, tan sikara so magmaliw a sakey a pulok, sakey a pastol.” (Juan 10:16) Sakey a “baleg ya ulop” na “arum a karnero” so natitipon la natan. Sikara so manibukel na saray ununa ed “balon dalin.” Sikara so salimbengan nen Jehova a makaliktar “ed baleg a kairapan” diad anggaan na sayan marelmeng a sistema pian manbilay ed mangaraldalin a paraiso.​—Apocalipsis 7:9, 10, 13-15.

16. Anton milagro so manggawan maliket diad pambilay a kaiba so ayayep?

¹⁶ Kayari na Armagedon sananey a milagro so mangarum ed kipapasen na paraiso. Saray ayayep a singa say leon, tigre, leopardo tan uso, a sikara natan so makapataktakot, so mareen lan manlilimog. Agaylan maabig ed satan so panakar ed kakiewan tan miulop ed sakey a leon, tan angangko kabekta diad sakey a baleg ya uso! Anggapo lan balot so ontakot ed sananey a bengatlan mabilay.

17, 18. (a) Anton sengegen na kaermenan so anggapo la ed paraison dalin? (b) Akin a sikatayo so maseguro a say ayadyarin bunigas so panggayagaan na amin?

¹⁷ Ingen anggan panon lan inkarakep so ayaman tan hardin, agaylan mapangasi tan maaron totoo, odino agaylan makaaron ayayep, no sikatayo so mansakit, ontatken tan ompatey siansian wala so kaermenan. Balet siopa so makapangitarok na ayadyarin bunigas ed amin? Ag-ayarian na saray gobierno na too a punasen so kanser, sakit ed puso tan arum iran beblay. Ingen anggano nasarag dan punasen iratan, akuen na saray doktores a saya so agmangamper ed itatken na too. Siansia nin sikatayo so ontatken. Kabekta saray mata tayo so onkuyep, saray masel tayo so onkapuy, say baog tayo so onkumanet tan saray loobloob tayo so onkapuy. Ontumbok so patey. Agaylan makapaermen!

¹⁸ Kayari na Armagedon, diad paraison dalin, sakey ya engranden milagro na Dios so manguman ed saratan ya amin, ta isisipan na Biblia: “Anggapo la so manaayam a mangibaga: ‘Siak so mansasakit.’” (Isaias 33:24) Sanen si Jesu-Kristo so wadia ed dalin pinaneknekan to so pakayari ton mamaabig ed amin a nengneng na sakit tan beblay, a nansumpal lapud kasalanan ya atawir tayo ed si Adan. (Marcos 2:1-12; Mateo 15:30, 31) Say itatatken so patundaen met la na uley na Panarian. Say matatken so unugaw lamet. On, ‘say laman na too so magmaliw a tadtariwa nen say inkatobonbalo to.’ (Job 33:25) Agaylan makapaliket ed satan so iliing ed kada kabuasan tan  nanengneng a sika so wala ed magmaong a bunigas na laman nen say karuman!

19. Anto so unor a kabusol a napaandi, tan panon?

¹⁹ Seguradon anggapo so manbibilay ed inkatobonbalo, ayadyarin bunigas ed paraison dalin a malabay ya ompatey. Tan anggapo so mankaukolan ya ompatey! Say pakaawat da ed gungguna na dondon bagat so mankabaliksan na panggayaga ed engranden langkap na Dios a “bilay ya andi-anggaan diad panamegley nen Jesus a Katawan tayo.” (Roma 6:23) Singa ibabaga na Biblia, si Kristo “so nepeg a manuley bilang ari ya anggad pangipasen na Dios ed amin a kakabusol to diad leksab na sali to. Unong a say unor a kabusol, say patey so naandi.”​—1 Corinto 15:25, 26; Isaias 25:8.

20. Siopa, nilikud ed totoon manbibilay natan, so manggayaga ed paraison dalin, tan panon a satan so posibli?

²⁰ Anggan saray inaatey natan so manggayaga ed paraison dalin. Sikara so ompawil ed bilay! Sirin, diad satan a panaon, imbes a saray anunsyo ed impatey, wala so magayagan balita nipaakar ed saraman so napaoli. Agaylan makapakelaw so pangabrasa ed saray inaatey a kaamaan, kainaan, ananak tan arum niran inad-aro a manlapud lubok! Anggapo laray punerarya, sementeryo odino pantyon a mansiansian maneral ed kalimgasan na paraison dalin.

21. (a) Siopa so ontulong a mangimanon saray ganggan tan bilibilin na “balon katawenan” so nasumpal? (b) Panon so pakapangipanengneng tayo a sikatayo so peteg a malabay ed “balon katawenan” tan say “balon dalin”?

²¹ Siopa so manguley odino mangidirihe ed saray kurang na paraison dalin? Amin na saray ganggan tan bilibilin so manlapud “balon katawenan” ed tagey. Balet diad dalin et walaray matoor a lalakin naturon mangimano a sarayan ganggan tan bilibilin so nasumpal. Lapud sarayan lalaki so mangilalaman ed mangatatawen a panarian diad nikadkaduman dalan, sikara so tinawag na Biblia a “piprinsipe.” (Isaias 32:1, 2; Salmo 45:16) Anggan diad Kristianon kongregasyon natan et saray lalaki so tinuro na masanton espiritu na Dios a mangasikaso tan mangidirihe ed saray kimey to. (Gawa 20:28) Kayari na Armagedon makapanmatalek itayo ya imanoen nen Kristo a saray maptek a lalaki so naturon mangilaman ed gobiernon Panarian, lapud diad satan et sikato so direktan mangimano ed kurang na dalin. Panon so pakapangipanengneng mo a sika so magunaet a manaalagar ed “balon katawenan” na Dios tan “balon dalin”? Diad panggawa ed anggaan na nayarian mo a manumpal ed saray nakakaukolan diad pambilay ed satan a matunong a balon sistema.​—2 Pedro 3:14.

[Tepetepet Parad Panagaral]