Kapitulo 30

No Anto So Nepeg Mon Gawaen Pian Manbilay na Ando lan Ando

1. (a) Anto ran duaran kurang so nilukas ed sika? (b) Panon so nayarin pamilim ed dugan kurang?

 IYOOPRESI nen Jehova a Dios ed sika so bengatlan makapakelaw​—andi-anggaan a bilay diad matunong a balon sistema na bengabengatla. (2 Pedro 3:13) Balet say pambilay ditan so mandepende diad panggawam la natan ed linawa na Dios. Say peles a mundon marelmeng, a pati amin a nakekeraan a kabiangan to, so magano lan napaso, “balet say manggawa ed linawa na Dios so mansiansia lawas.” (1 Juan 2:17) Sirin nepeg mo so manpili ed duaran kurang. Sakey so mangitonton ed patey tan say sakey so diad maandon bilay. (Deuteronomio 30:19, 20) Dinan so pilien mo?

2. (a) No walaan ka na tuan pananisia, diad anto so kakumbinsian mo? (b) Panon a say panmatalek ed Dios a singa panmatalek na sakey ya ugaw ed maaron ama so ontulong ed sika a manlingkor ed sikato?

² Panoy pangipanengneng mo a pipilien mo so bilay? Ununa ed amin, nepeg a nawalaan ka na pananisia ed si Jehova tan diad saray sipan to. Kasin sika so akumbinsin mabiskeg a wala so Dios “tan sikato so mananumang ed saraman so maseseg a mananap ed sikato”? (Hebreos 11:6) Nakaukolan mo so manmatalek ed Dios a singa panmatalek na sakey ya anak a laki odino bii ed maaro tan mapangasin ama. (Salmo 103:13, 14; Uliran 3:11, 12) Diad pakawalaan na ontan a pananisia, agmo panduaruwaan a say simbawa to so makabat odino saray dalan to so maptek, anggaman no maminsan et agmo natalosan a nagnap iray bengatla.

3. (a) Niarum ed pananisia, anto ni so nakaukolan? (b) Anto ran gawa so nakaukolan diad pangipanengneng a pipilien mo so bilay?

³ Anggaman kuan, mas nen say pananisia so nakaukolan. Nepeg met a walaray kimey a mangipatnag ed saray tuan liknaan mo ed si Jehova. (Santiago 2:20, 26) Kasin ginawam laray bengatlan mangipanengneng a sika so maermen ed antokaman ya insaew ed abenegan diad panggawa na maptek? Kasin sika so atenyeg a magbabawi odino manpasimbalo diad pangitukoy mo ed bilay mo ed linawa nen Jehova? Kasin sika la so binmeneg, salanti, impulisay mo la so anggan anton mauges a kurang  a nayarin gagawaen mo, tan kasin ginapoan mo lan gawaen iray bengatlan nakakaukolan na Dios? (Gawa 3:19; 17:30) Saray ontan a gawa so mangipanengneng a pipilien mo so bilay.

DEDIKASYON TAN BAUTISMO

4. (a) Anto so nepeg a mamakiwas ed sika a manggawa ed linawa na Dios? (b) Sano desidien mon labay mo so manlingkor ed Dios, anto so manepeg a gawaen?

⁴ Anto so nepeg a mamakiwas ed sika a mamili ed bilay diad panggawa ed linawa na Dios? Nepeg a say apresasyon. Isipen pa: Ginawa nen Jehova a posibli ed sika so pakainawaan a manlapud amin a sakit, irirap, tan anggan diad patey! Diad panamegley na mablin langkap na Anak to et nilukasan to ed sika so dalan a mamaarap ed andi-anggaan a bilay diad paraison dalin. (1 Corinto 6:19, 20; 7:23; Juan 3:16) Sanen say aro nen Jehova so anenyeg ed sika a mangaro ed sikato, anto so nepeg mon gawaen? (1 Juan 4:9, 10; 5:2, 3) Nepeg mon asinggeran so Dios diad ngaran nen Jesus tan ibagam ed sikato diad pikakasi a kaliktan mo so magmaliw ya aripen to, a kaliktan mo so magmaliw a kayarian to. Diad onia et idedikam so inkasika ed Dios. Saya so personal, pribadan pamaakaran. Anggapo so siopaman a makapanggawa ed satan a para ed sika.

5. (a) Kayari na impanggawam na dedikasyon ed Dios, anto so ilaloan ton gawaen mo? (b) Anton tulong so akatarya ed sika diad pambilay mo a tukoy ed dedikasyon mo?

⁵ Kayari na impanggawam na dedikasyon ed Dios, sika so ilaloan ton manbilay a tukoy ed satan. Sirin, paneknekan mon sika so sakey a too na salitam diad panumpal mo ed sayan desisyon, odino dedikasyon, legan na bilay mo. (Salmo 50:14) No sika so mansiansian maapit ed nanengneng a muyongan na Dios, sika so natulongan na saray kaparan Kristianos a magayagan mangiter ed sika na maaron panamaseseg tan panamabiskeg.​—1 Tesalonica 5:11.

6. (a) Sano idedikam so bilay mo ed Dios, anton kundang ed satan so nakaukolan? (b) Anto so kabaliksan na bautismo?

⁶ Anggaman kuan, nepeg mon gawaen a nagkalalo nen say pribadan  ibaga ed si Jehova a kaliktan mo so magmaliw a kayarian to. Nakaukolan mon ipanengneng ed imaton na arum a ginawam so sakey a dedikasyon pian manlingkor ed Dios. Panon so panggawam ed saya? Diad kabautismoan ed danum. Say ontan a bautismo ed danum so mapublikon panangipatnag a say sakey a too et indedika to so bilay to ed si Jehova tan ipipresenta to so inkasikato a manggawa ed linawa To.

7. (a) Anton uliran so inter nen Jesus ed saray Kristianos? (b) Akin a say bautismon ingganggan nen Jesus so aliwan para ed saray angkelag ya ugugaw?

⁷ A satan a bautismo ed danum et importantin nakakaukolan so nipanengneng diad alimbawa nen Jesu-Kristo. Aglabat imbaga nen Jesus ed Ama to a sikato so sinmabin manggawa ed linawa To. (Hebreos 10:7) Sanen ngalngali tolan igapo so kimey to a bilang sakey a managpulong na panarian na Dios, impresenta nen Jesus so inkasikato ed si Jehova tan abautismoan ed danum. (Mateo 3:13-17) Lapud inletneg nen Jesus so padron, saraman natan so mangidedika na inkasikara ed si Jehova a manggawa ed linawa to so nepeg a nabautismoan. (1 Pedro 2:21; 3:21) Diad tua, ginanggan nen Jesus iray patumbok to a manggawa na babangatan a totoo ed amin a nasyones tan insan sarayan balon babangatan so bautismoan. Saya so aliwan panagbautismo ed angkelag ya ugugaw. Sikato so bautismo ed totoon nagmaliw a mananisia, a pinasimbalo daray kanonotan da pian manlingkor ed si Jehova.​—Mateo 28:19; Gawa 8:12.

8. No kaliktan mo so nabautismoan, siopa ed kongregasyon so nepeg mon pangipaamtaan ed saya, tan akin?

⁸ No pinasimbalom la so kaisipan mon manlingkor ed si Jehova tan labay mo la so nabautismoan, anto so nepeg mon gawaen? Nepeg mon ipaamta so pilalek mo ed manangimaton a manangasikaso na kongregasyon na saray Tasi nen Jehova a pililimogan mo. Sikato, a kaiba ni na arum a mamatatken ed kongregasyon so maliket a mangirepaso ed sika na impormasyon a nakaukolan mon naamtaan ta pian makapanlingkor ed Dios diad makapaliket a dalan. Insan nayarin iyuksoy ed sika so bautismo.

LINAWA NA DIOS ED SIKA NATAN

9. Anto so ginawa nen Noe sakbay na delap a sikato so linawa na Dios ed sika a gawaen natan?

⁹ Sakbay na delap, inusar nen Jehova si Noe, “sakey a managpulong na inkatunong,” a mamasakbay ed onsasabin kadederal tan diad pangituro ed alenleneg a pasen na kaligenan, say biong. (Mateo 24:37-39; 2 Pedro 2:5; Hebreos 11:7) Say linawa na Dios et say panggawam natan na miulibay a kimey na panagpulong. Impasakbay nen Jesus nipaakar ed panaon tayo: “Sayan maong a balita na panarian so nipulong ed amin ya atooan a dalin ya onkanan pantasi ed amin a  nasyones; tan insan onsabi so anggaan.” (Mateo 24:14) Nepeg a nakabatan na arum so bengatlan naaralan mo nipaakar ed gagala na Dios pian sikara met so makaliktar ed anggaan na sayan sistema tan manbilay na ando lan ando. (Juan 17:3) Kasin say pusom so atenyeg lan nawalaan na pibiang diad pangipanabang ed sayan manangiter-bilay a pikakabat ed arum?

10. (a) Anton uliran nen Jesus so nepeg na aro ed totoo a manenyeg ed sika a tumboken? (b) Panon so kagawa na kaslakan a kimey na panagpulong?

¹⁰ Tumboken so uliran nen Kristo. Agto inalagar iray totoon onasingger ed sikato, noagta sikato so linman nananap ed saraman so ontalineng ed mensahe na Panarian. Tan binilin toray patumbok to​—amin da​—a manggawa met na ontan. (Mateo 28:19; Gawa 4:13; Roma 10:10-15) Diad impanumbok ed bilin tan uliran nen Kristo, saray inmunan Kristianos so dinmalaw ed totoo diad kaabungan da. Sikara so “nankabkaabungan” a tekep na mensahe na Panarian. (Lucas 10:1-6; Gawa 20:20) Saya nin siansia so manunan paraan diad pangisusumpal na saray tuan Kristianos ed ministeryo ra natan.

11. (a) Akin a nakaukolan so tepel diad pampulong nipaakar ed panarian na Dios, balet akin ya agtayo nakaukolan so ontakot? (b) Panon so panmoria nen Jehova ed kimey a gawaen tayo?

¹¹ Nakaukolan to so tepel diad panggawa ed sayan kimey. Si Satanas tan say mundo to so maseguron manali a mamatunda ed sika, unong a singa sinali ran patundaen iray inmunan patumbok nen Kristo diad panagpulong. (Gawa 4:17-21; 5:27-29, 40-42) Balet agmo nepeg so ontakot. Unong a si Jehova et tinulongan tan pinabiskeg to raman so inmunan Kristianos, satan met so gawaen to ed sika natan. (2 Timoteo 4:17) Sirin manpakpel! Paneknekan mon peteg ya inarom si Jehova tan saray kaparam a totoo diad pibiang a nagnap ed manangiliktar-bilay a kimey na panagpulong tan panagbangat. (1 Corinto 9:16; 1 Timoteo 4:16) Agbalot nalingwanan nen Jehova so kimey mo, balet sika so siyayaman a tumangan to.​—Hebreos 6:10-12; Tito 1:2.

12. Anto so naaralan tayo ed ehemplo na asawa nen Lot?

¹² Anggapo so bengatlan peteg a mabli a niyopresi na sayan daan a sistema, sirin agmon balot iisipen a sika so makakasaew diad ibeneg mo ed satan. “Nonoten so asawa nen Lot,” so kuan nen Jesus. (Lucas 17:32) Kayari na impakataynan to tan say pamilya to ed Sodoma, sikato so linmingaw diad pampilalek ed saray bengatlan tinaynanan da. Anengneng na Dios no iner so kawalaan na  puso to, tan sikato so nagmaliw a pungol na asin. (Genesis 19:26) Agmagmaliw a singa say asawa nen Lot! Iteen moray matam ed arapen, diad “peteg a bilay” ed matunong a balon sistema na Dios.​—1 Timoteo 6:19.

PILIEN SO MAANDON BILAY ED PARAISO DIAD DALIN

13. Panon nen Jesus ya impresenta so pampili a nepeg tayon gawaen ya amin?

¹³ Peteg, wala lambengat so duaran pampilian. Satan so impareng nen Jesus diad pampili ed balanglan sakey ed duaran dalan. Sakey a dalan, inkuanto, so “maawang tan malapar.” Ditan et saray manbibiahe so naabuloyan na kawayangan a mamaliket ed inkasikara. Say sananey a dalan, anggaman kuan, so “masupit.” On, saraman so wala ed satan a dalan so nakaukolan a mangunor ed saray bilibilin tan ganggan na Dios. Say karaklan, naimano nen Jesus, so wala ed maawang a dalan, pigpigara lambengat so wala ed mainget. Dinan a dalan so pilien mo? Diad pampilim, saya so nonoten: Say maawang a dalan so biglan manampot ed makapatey ya anggaan to​—kadederal! Diad biek a dapag, say mainget a dalan so mangitonton ed sika diad balon sistema na Dios. Ditan et sika so makapibiang diad panggawa ed dalin a sakey a maglorian paraiso, a ditan et sika so makapambilay na ando lan ando ed liket.​—Mateo 7:13, 14.

14. Anto so nepeg mon pagmaliwan a kabiangan ta pian makaliktar ya onloob ed balon sistema na Dios?

¹⁴ Ag-iisipen a wala so nanduruman dalan, odino basbas, a nayarian mon tumboken pian nagamoran mo so bilay ed balon sistema na Dios. Wala lambengat so sakey. Wala lambengat so sakey a biong ya akaliktar ed Delap, aliwan dakel a baluto. Tan wala lambengat so sakey a muyongan​—nanengneng a muyongan na Dios​—a makaliktar ed maples ya onsasabin “baleg a kairapan.” Aliwan tua ya amin a relihyon et mangipaarap ed parehon kalat. (Mateo 7:21-23; 24:21) Nepeg mo so magmaliw a kabiangan na muyongan nen Jehova, a gawaen so linawa na Dios, ta pian naawat so bendisyon to ya andi-anggaan a bilay.​—Salmo 133:1-3.

15. (a) Anto so nakaukolan tayon gawaen ya inagew-agew? (b) Anton ilalo so aliwa labatlan sakey a kugip?

¹⁵ Sirin pansiansiaen a masnag so retrato na insipan na Dios a balon sistema na bengabengatla diad kanonotan tan pusom. Inagew-agew a nonoten so engranden tumang ya itatarya nen Jehova a Dios ed sika​—say pambilay na ando lan ando ed Paraiso diad dalin. Saya so aliwan kugip. Sikato so petepeteg! Lapud insipan na Biblia a seguradon nasumpal: “Saray matunong a mismo so mangayarian ed dalin, tan sikara so manayam ditan ed ando lan ando. . . . Sano saray marelmeng so napegpeg, sikato so nanengneng mo.”​—Salmo 37:29, 34.

[Tepetepet Parad Panagaral]

[Litrato ed pahina 251]

Idedikam so inkasika ed si Jehova . . . tan manpabautismo

[Litrato ed pahina 253]

“Nonoten so asawa nen Lot”

 [Saray litrato ed pahina 254]

Pansiansiaen a masnag so balon sistema na Dios ed kanonotan tan pusom