Kapitulo 27

No Panon So Pakagamor na Tulong diad Panamegley na Pikakasi

1. Anton tulong so nakaukolan a manlapud Dios, tan panon so pakaawat tayo ed satan?

 PIAN mansiansian bulos a manlapud marelmeng ya impluensya na mundo, nagkalautlan nakaukolan na saray Kristianos so tulong a naawat diad panamegley na pikakasi. Inkuan nen Jesus: “Say Ama ed tawen [so] mangiter na masanton espiritu ed saraman so onkerew ed sikato.” (Lucas 11:13) Nakaukolan tayo so masanton espiritu na Dios, odino aktibon puersa, anggan singa nakaukolan tayon aralen so Salita to tan milimog ed organisasyon to. Balet pian naawat so masanton espiritu, satan so nepeg tayon ipikasi.

2. (a) Anto so pikakasi? (b) Antoray nanduruman nengneng na pikakasi? (c) Akin a say pikakasi so importante?

² Say pikakasi so magalang a pitotongtong ed Dios. Nayarin diad nengneng na sakey a kerew, a singa sano onkerew na bengatla ed Dios. Balet say pikakasi met so nayarin balikas na pisasalamat odino panagdayew ed Dios. (1 Awaran 29:10-13) Ta pian nawalaan na maabig a relasyon ed mangatatawen ya Ama tayo, nakaukolan tayo so mitongtong a maparanay ed sikato diad pikakasi. (Roma 12:12; Efeso 6:18) Say aktibon puersa to, a naawat diad panamegley na pankerew ed satan, so mamabiskeg ed sikatayon manggawa ed linawa to anggaman ed anton gonigon odino tukso a nayarin idapo nen Satanas odino say mundo to ed sikatayo.​—1 Corinto 10:13; Efeso 3:20.

3. (a) Anton biskeg so naawat tayon manlapud Dios? (b) Panon lambengat so pakabemben tayo na maabig a relasyon ed Dios?

³ Nayarin sika so peteg a mibabakal pian naekal mo so bengatlan ugali odino gawan agmakapaliket ed Dios. No ontan, kerewen so tulong nen Jehova. Onasingger ed sikato diad pikakasi. Satan so ginawa nen apostol Pablo, tan insulat to: “Ta amin a bengatla et siak so walaan na biskeg diad birtud na saman so angiter ed siak na pakayari.” (Filipos 4:13; Salmo 55:22; 121:1, 2) Sakey a biin linmukpos ed kurang na imoralidad so angikuan: “Sikato lambengat so walaan na pakayarin ontulong ed sikan makaagwat ed ontan a kipapasen. Nakaukolan a nawalaan ka na satan a personal a relasyon ed si Jehova, tan say  mogmon dalan na pamasiansia ed satan a personal a relasyon et say pikakasi.”

4. Panon so pakaawat na sakey a too na biskeg diad ilukpos a manlapud ugalin panagtabako?

⁴ Ingen nayarin ikuan na sakey a too: ‘Siak so nampikasi ed Dios a kinmerew na tulong ed dakel lan danay, balet siansian agko met nitunda so panggawa na mauges.’ Saray totoon mansisigarilyo so angibaga ed saya. Sanen atepetan so ontan a too: “Kapigan so pampipikasim?” inmebat: “Diad labi sakbay a naugip, diad kabuasan sano ombangon, tan sano siak so onkapuy tan mansigarilyo, ibagak ed si Jehova a siak so maermen ed ginawak.” Inkuan na kaaro to: “Say panaon a nakaukolan mon peteg so tulong na Dios et diad bektan sika so mangagawat na sigarilyo, agta ontan? Satan so panaon a nepeg mo so manpikasi ed si Jehova pian pabiskegen to ka.” Sanen saman so ginawa na laki, sikato so akaawat na tulong diad itundan mansigarilyo.

5. (a) Anto so kakaukolan na panserbi ed Dios a manepeg? (b) Anto so mangipanengneng a say panirap so mabetbet a nasaglawi diad iyarawi a manlapud gawan makasalanan?

⁵ Aglabay ya ibaga na saya a say pikakasi ed Dios, a dingan na panagaral ed Salita to tan say pililimog ed nanengneng a muyongan to, so manggawan mainomay ed sika a manggawa na maptek. Siansian nakaukolan to so sagpot; on, impasyan pibabakal, a nayarin isakup to ni so panirap. (1 Corinto 9:27) Saray mauges ya ugali so nayarin mansumpal diad teriblen pampilalek ed mauges. Sirin say panirap so gendagendat a mansumpal sano say sakey a too so ontunda la ed makasalanan a gawa. Kasin sika so bulos-linawan manirap pian nagawaan mo so maptek?​—1 Pedro 2:20, 21.

PIKAKASIN DENGELEN NA DIOS

6. (a) Akin a naromog na dakel a mairap so pampikasi? (b) Anto so nakaukolan tayo ta pian saray pikakasi tayo so narengel?

⁶ Naromog na dakel a totoon mairap so manpikasi. “Nagonigon ak diad pampikasi ed sakey ya agko nanengneng,” so impatua na sakey a biin walad kalangweran. Lapud anggapo so toon akanengneng ed Dios, nakaukolan tayo so pananisia pian manpikasi tan dengelen na Dios. Nakaukolan tayon sisiaen a si Jehova so peteg a wala tan nayarian ton gawaen so kerewen tayo. (Hebreos 11:6) No walaan tayo na ontan a pananisia, tan no sikatayo so onasingger ed Dios a tekep na masimoon a puso, maseguro itayon sikatayo so tulongan to. (Marcos 9:23) Sirin, anggaman si Romanon opisyal na armada a si Cornelio so diad saman et aliwa nin kabiangan na organisasyon na Dios, sanen sikato so masimoon ya angipikasi ed panangiwanwan, inebatan na Dios so pikakasi to.​—Gawa 10:30-33.

7. (a) Anto ran nengneng na pikakasi so makapaliket ed Dios? (b) Diad anto ran nengneng na pikakasi so agdengelen na Dios?

 ⁷ Arum a totoo so nairapan a mangibalikas na inkasikara ed saray salita. Anggaman kuan, saya so nepeg ya agmangamper ed sikara diad pitongtong da ed Dios diad pikakasi. Makapanseguro itayo a kabat to so nakakaukolan tayo tan natalosan to so labay tayon ibaga. (Mateo 6:8) Saya pa so isipen: Dinan a balikas so apresyaen mon tuloy a manlapud sakey ya ugaw​—say simpli, masimoon a pisasalamat to odino saray nikaduman salita ya imbaga na sananey ya ibaga to? Say Ama tayo ed tawen so mangapresya met ed simpli, masimoon iran balikas a manlapud sikatayo. (Santiago 4:6; Lucas 18:9-14) Anggaporay nikaduman salita odino relihyoson lenguahe a nakaukolan. Agto anggan dengelen iraman so manpipikasi ed nikadkaduma odino mairap-talosan a lenguahe diad panagyat ed arum, odino saraman so mangulit-ulit ed parehon salita diad aliwan masimoon a dalan.​—Mateo 6:5, 7.

8. (a) Antoy mangipanengneng a say Dios et narengel toray andi-esel a pikakasi? (b) Kasin ipapanengneng na Biblia a nepeg tayo so manpikasi ed anggan anton posisyon odino pasen?

⁸ Anggan sano sika so manpikasin andi-esel, satan so narengel na Dios. Sanen ontan so ginawa nen Nehemias, say Dios so kinmiwas ed masimoon a kerew to, tan ontan met ed si Ana. (Nehemias 2:4-8;  1 Samuel 1:11-13, 19, 20) Nisay say personal a posisyon ed pisikal sano manpikasi so importantin bengatla. Nayarian mo so manpikasi ed anggan anton posisyon, ed anggan anton panaon tan ed anggan iner a pasen. Anggaman kuan, ipapanengneng na Biblia a say posisyon na kaumildian, a singa say pangituek na ulo odino italimukor, so matukoy. (1 Arari 8:54; Nehemias 8:6; Daniel 6:10; Marcos 11:25; Juan 11:41) Tan impanengneng nen Jesus a maabig sano saray personal a pikakasi so nibaga ed pasen a maamot, agnanengneng na totoo.​—Mateo 6:6.

9. (a) Diad siopa so nepeg a pangipaarapan na amin a pikakasi tayo, tan akin? (b) Pian saray pikakasi tayo so makapaliket ed Dios, diad siopa ngaran so nepeg a pangiyapayan?

⁹ Say pikakasi so kabiangan na panagdayew tayo. Nisengeg ed sayan rason saray pikakasi tayo so nepeg a nipaarap lambengat ed Manamalsa tayo, si Jehova a Dios, aliwan diad siopaman ni. (Mateo 4:10) Tan ipapanengneng na Biblia a saray Kristianos so nepeg ya onasingger ed Dios diad panamegley nen Jesus, ya angiter na bilay to a pangekal ed saray kasalanan tayo. Kabaliksan na saya a nepeg tayon ibaga iray pikakasi tayo diad ngaran nen Jesus.​—Juan 14:6, 14; 16:23; Efeso 5:20; 1 Juan 2:1, 2.

10. (a) Siopa pikakasi so aliwan makapaliket ed Dios? (b) Anton manunan nakaukolan so nepeg a sumpalen tayo pian saray pikakasi tayo so dengelen na Dios?

¹⁰ Anggaman kuan, kasin amin na saray pikakasi tayo so makapaliket ed si Jehova? Ibabaga na Biblia: “Siopaman a mangipaliis na layag to a manlapud pandengel ed ganggan​—anggan say pikakasi to so bengatlan makapadimla.” (Uliran 28:9; 15:29; Isaias 1:15) Kanian no labay tayon saray pikakasi tayo so dengelen na Dios, say manunan nakakaukolan et say panggawa tayo ed linawa to, ya unoren tayoray ganggan to. Tano andi et sikatayo so agtalinengen na Dios, a singa met say toon maptek so ag-ondengel ed programa na radyo ya ipapasen ton imoral. Kuan na Biblia: “Antokaman a kerewen tayo so naawat tayon manlapud sikato, lapud susumpalen tayoray ganggan to tan gagawaen tayoray bengatlan makapaliket ed mata to.”​—1 Juan 3:22.

11. Anto so kabaliksan na pankimey ed ipipikasi tayo?

¹¹ Kabaliksan na saya a nepeg tayon kimeyan so ipipikasi tayo. Alimbawa, lingo ed sakey a too so pankerew ed Dios na tulong to diad pangitundan pangusar ed tabako odino marihuana tan insan ompaway a manaliw ed sarayan bengatla. Nisay sikato so makakerew ed si Jehova na tulong ya ompaliis ed imoralidad tan insan manbasa ed literatura tan manbantay ed saray sine tan programa na telebisyon a mangipapabitar ed imoralidad. Odino no say kakapuyan na too et say panagsugal, agto nayarian so manpikasi ed Dios a tulongan ton ontunda tan insan onla ed saray palumbaan odino arum a pasen na sugalan. Pian saray pikakasi tayo so dengelen na Dios, nakaukolan tayon ipanengneng ed sikato diad panamegley na saray kiwas tayo a gagawaen tayon peteg so ibabaga tayo.

12. (a) Anto ran bengatla so nayarin isakup tayo ed saray pikakasi tayo? (b) Ta pian saray pikakasi tayo so makapaliket ed Dios, anto so nepeg tayon aralen?

 ¹² Anto, sirin, iray personal a bengatlan nayarian tayon isakup ed saray pikakasi tayo ed si Jehova? Peteg, antokaman a mangapekta ed relasyon tayo ed Dios so manepeg a tema na pikakasi, a pati say pisikal a bunigas tayo, tan ontan met ed panangumponi ed saray anak. (2 Arari 20:1-3; Uko-ukom 13:8) Insulat nen apostol Juan: “Antokaman a kerewen tayo unong ed linawa to, dengelen to itayo.” (1 Juan 5:14) Sirin say importantin bengatla et saray kerew tayo so nepeg a mitukoyan ed linawa na Dios. Kabaliksan na saya ya ununan aralen tayo no anto so linawa to. (Uliran 3:5, 6) Sirin no isakup tayo so linawa na Dios tan gagala to diad pikakasi tayo, imbes a sikatayo lambengat so sinononot ed personal iran interes tayo, saray pikakasi tayo so makapaliket ed si Jehova. Manepeg a sikatayo so misalamat ed si Jehova a kada agew nisengeg ed saray maabig a bengatlan itatarya to.​—Juan 6:11, 23; Gawa 14:16, 17.

13. (a) Panon nen Jesus ya impanengneng no anto so nepeg a pamaakaran ya ununa ed saray pikakasi tayo? (b) Antoray bengatlan segundaryo ed kakanaan a nepeg tayon ipikasi?

¹³ Inter nen Jesus ed saray patumbok to so modelon pikakasi pian itonton to ra ed no anton nengneng na pikakasi so awaten na Dios. (Mateo 6:9-13) Sayan pikakasi so mangipanengneng a say ngaran na Dios, panarian to tan say panaggawa ed linawa to diad dalin so ununa. Ontumbok, nayarin kerewen tayoray personal a nakakaukolan tayo, a singa say inagew-agew a tagano, say kaperdona na saray kasalanan tayo, tan say kililiktar a manlapud tukso tan manlapud sakey a marelmeng, si Satanas a Diablo.

 PIKAKASIN ONTULONG ED ARUM

14. Panoy pangipanengneng na Biblia ed kaimportantian na panangipikasi ed arum?

¹⁴ Impanengneng nen Jesus ed panamegley na ehemplo to so kaimportantian na panagpikasi a nisesengeg ed arum. (Lucas 22:32; 23:34; Juan 17:20) Kabat nen apostol Pablo so kablian na ontan iran pikakasi tan mabetbet a kinerew to ed arum a sikato so ipikasi ra. (1 Tesalonica 5:25; 2 Tesalonica 3:1; Roma 15:30) Legan a walad pangawan insulat to: “Iilaloan ko a diad panamegley na saray pikakasi yon totoo et siak so nawayangan.” (Filemon 22; Efeso 6:18-20) A si Pablo so agnambayag kayari na saman et nibulos ed pangawan so mangipanengneng ed gungguna na panangipikasi ra ed sikato.

15. Anto ran nengneng na kerew so nayarin gawaen tayo nipaakar ed totoon inad-aro tayo?

¹⁵ Si Pablo met so angipikasi ed arum. “Naynay a sikayo so ipipikasi mi, pian komon say Dios tayo so mangibilang ed sikayon makana ed impanawag to,” so insulat to. (2 Tesalonica 1:11) Tan impaliwawa to ed sananey a kongregasyon: “Ipikasi mi ed Dios a sikayo komon so agmanggawa na mauges . . . noagta komon sikayo so manggawa na maabig.” (2 Corinto 13:7) Peteg a maabig so panumbok ed uliran nen Pablo tan say panggawa na nikabiig iran kerew a para ed totoon inaro tayo. Peteg, “saray kerew na matunong a too [masimoon a pikakasi], sano mankikimey, so walaan na baleg a biskeg.”​—Santiago 5:13-16.

16. (a) Pian nagamoran so nakaukolan a tulong, kapigan so nepeg tayon pampikasi? (b) Akin a say pikakasi so ontan lan baleg a pribilehyo?

¹⁶ Sano mangikokondukta na sakey a panangiyaral ed Biblia, mabetbet ya itepet na sakey a ministro: “Kasin sika so manpipikasi ed arum a panaon a niarum ed sinimban panagaral mo ed Biblia?” Pian nagamoran so tulong a nakaukolan tayo, nepeg tayo so mitongtong ed Dios a mabetbet diad pikakasi. (1 Tesalonica 5:17; Lucas 18:1-8) Aralen so mitongtong a mapaabeba ed sikato a singa gawaen mo ed sakey ya inad-aro tan napanmatalkan a kaaro. Peteg, agaylan makapakelaw a pribilehyo so pakayarin mitongtong diad pikakasi ed maglorian Manuley na amin a talba, say Dumerengel na pikakasi, tan amtam a sika so dengelen to!​—Salmo 65:2.

[Tepetepet Parad Panagaral]

[Litrato ed pahina 227]

Anto so nepeg a gawaen na sakey sano natukso a mansigarilyo​—manpikasin onkerew na tulong odino onsuko la?

[Litrato ed pahina 229]

Kasin ipipikasim so tulong tan insan mibiang ed gawa a mangitonton ed gawan-mauges?

[Litrato ed pahina 230]

Kasin sika so manpipikasin bukor odino sano kaibam so arum lambengat?