Kapitulo 15

Pagmaliw ya Uuleyan na Gobierno na Dios

1, 2. Anto so nakaukolan diad pagmaliw ya uuleyan na gobierno na Dios?

 KASIN labay mo so manbilay na ando lan ando ed dalin diad silong na gobierno na Dios? Anggan siopan too ed asimbang a kanonotan to so onebat na, On! Saray makapakelaw a gungguna so panggayagaan. Balet pian saratan so naawat agmo lambengat basta itagey so limam tan kuan mo: ‘Labay ko so magmaliw ya uuleyan na gobierno na Dios.’ Mas ni so nakaukolan.

² Alimbawa, ipasen a labay mo so magmaliw a mibabaley ed sananey a bansa. Pian satan so nagawaan, nakaukolan mon sumpalen iray nakakaukolan ya inggeter na saray manuley na satan a gobierno na bansa. Balet sakbay a nagawaan mo so saya, nakaukolan mon aralen no anto irayan nakakaukolan. Diad mipadparan dalan, nakaukolan mon aralen no anto irayan nakakaukolan na Dios ed saraman so magmaliw ya uuleyan na gobierno to. Tan insan nakaukolan mon sumpalen irayan nakakaukolan.

NAKAUKOLAN SO PIKAKABAT

3. Anto so sakey a nakakaukolan diad pagmaliw ya uuleyan na gobierno na Dios?

³ Say sankaimportantian a nakakaukolan diad pagmaliw ya uuleyan na gobierno na Dios et say igamor na pikakabat ed “lenguahe” to. Peteg a saya so makatunongan. Arum iran gobierno na too so mankaukolan met a saray balon mibabaley so makayarin mansalita na lenguahe ed bansa ra. Bueno, sirin, anton “lenguahe” so nepeg ya aralen na saraman so mangawat na bilay ed silong na gobierno na Dios?

4. Anton “puron lenguahe” so nepeg ya aralen na saray totoo na Dios?

⁴ Imanoen so ibabaga nen Jehova nipaakar ed saya diad Salita to, say Biblia: “Diad satan iter ko ed totoo so sakey a puron lenguahe, ta pian amin da so ontawag ed ngaran nen Jehova, ta pian manlingkor ira ed sikato a benebenek.” (Sofonias 3:9) Sayan “puron lenguahe” et say katuaan na Dios a naromog ed Biblia. Diad partikular, sikato so katuaan nipaakar ed gobiernon Panarian na Dios. Sirin ta pian magmaliw ya uuleyan na gobierno na Dios, nepeg mon aralen iyan “lenguahe” diad  pangasol na pikakabat ed si Jehova tan ed oksuyan na Panarian to.​—Colosas 1:9, 10; Uliran 2:1-5.

5. (a) Anto so nepeg ya amtaen tayo nipaakar ed gobierno na Dios? (b) Anton pikakabat so nakaukolan tayo pian nagamoran so andi-anggaan a bilay?

⁵ Natan arum iran gobierno na too so mankaukolan a saraman so mangawat na pibabaley so mikabat na bengatla nipaakar ed awaran na gobierno ra, ontan met ed saray katuaan nipaakar ed kikukurang to. Ontan met, nepeg mon amtaen iratan a bengatla nipaakar ed gobierno na Dios no labay mo so magmaliw ya uuleyan to. Sayan pikakabat so mangitonton ed maandon bilay. Diad pikakasi to ed si Ama to, inkuan nen Jesus: “Saya et kabaliksan to so bilay ya andi-anggaan, say pangala ra na pikakabat ed sika, say alenleneg a tuan Dios, tan ed saman so imbakim, si Jesu-Kristo.”​—Juan 17:3.

6. (a) Antoray arum a tepet a nayarian ya ebatan na saray uuleyan na gobierno na Dios? (b) Kasin sikara so naebatan mo?

⁶ No naaral mo la so akauna ran kapitulo na sayan libro, sika la natan so akapikabat na malaem ed sayan lawas-importantin pikakabat. Kasin agawaan mo la? Kasin nipanengneng mo a walaan ka la, diad pangebat ed saray tepet a singa say onggendan: Kapigan so inmunan impanalambit na Dios ed gagala to nipaakar ed sakey a gobiernon Panarian? Siopa so arum ed saray ariripen na Dios a nanilalo ed arapen diad pagmaliw a mangaraldalin ya uuleyan? Panon karakel na manuley, odino arari, so mangipakurang ed gobierno na Dios? Manlapud iner so panuleyan na sarayan arari? Siopa ra so inmunan apili a magmaliw ya arari ed gobierno na Dios? Panoy impamaneknek nen Jesus a sikato so magmaliw a maong ya ari? Ingen, pian magmaliw ya uuleyan na  gobierno na Dios, mas ni so nakaukolan nen say basta pangala na pikakabat nipaakar ed satan.

NAKAUKOLAN SO MATUNONG YA UGALI

7. Nipaakar ed saray gobierno na too, panoy panduruma na saray nakakaukolan ed mibabaley?

⁷ Saray gobierno natan so mankaukolan a saray balon mibabaley so manumpal na sakey ya estandarte na ugali. Alimbawa, nayarin ikuan da a say sakey a laki so nayarin nawalaan labat na sakey ya asawan bii tan say sakey a bii so nawalaan labat na sakey ya asawan laki. Ingen ta arum iran gobierno so walaan na miduman ganggan. Abuloyan daray mibabaley da a nawalaan na masulok nen say sakey ya asawa. Anton ugali so nailaloan ed saray totoon magmaliw ya uuleyan na gobierno na Dios? Anto so ibaga na Dios a duga nipaakar ed panangasawa?

8. (a) Anto so estandarte na Dios nipaakar ed panangasawa? (b) Anto so pikakalugoran, tan anto so ibabaga na Dios nipaakar ed satan?

⁸ Diad gapo inggeter nen Jehova so estandarte ed panangasawa sanen inikdan to si Adan lambengat na sakey ya asawan bii. Inkuan na Dios: “Taynanan na sakey a laki so ama to tan ina to tan sikato so mikasakey ed asawa to tan sikara so magmaliw a sakey a laman.” (Genesis 2:21-24) Impaliwawa nen Jesus a saya so suston estandarte a para ed saray Kristianos. (Mateo 19:4-6) Lapud saray sanaasawa so magmaliw a “sakey a laman,” modmoraen da so panangasawa no sikara so miakdol ed sekso diad sananey a too. Sayan gawa so tinawag na pikakalugoran, tan ibabaga na Dios a dusaen toray managkalugoran.​—Hebreos 13:4; Malaquias 3:5.

9. (a) Anto so panmoria na Dios ed totoon manaakdol ed sekso anta aliwa ran sanaasawa? (b) Anto so pilalawanan?

⁹ Diad biek a dapag, dakel a sanaasawa so manaamong tan manaakdol ed sekso, balet ta sikara so aliwan kasado. Anggaman kuan, aglabay na Dios ya ibagan sayan maapit a relasyon na laki tan bii so ipasen ed panagsubokan a panaon. Kanian say panamong ya agnankasal so sakey a kasalanan a sumpad Dios, a nanggawa ed oksuyan na panamaley. Satan so tinawag na pilalawanan. Say pilalawanan so seksual a pirelasyonan ed anggan siopan too ya agmo asawa. Tan ibabaga na Biblia: “Saya so linawa na Dios, . . . ya onarawi kayo ed pilalawanan.” (1 Tesalonica 4:3-5) Kanian, sirin, say seksual a pirelasyonan na toon walad kasuloan ed anggan siopa so mauges.

10. Anto niran arum ya agamil ed sekso so sumpad ganggan na Dios?

¹⁰ Natan et dakel a lalaki tan bibii so manaakdol ed sekso diad totoon kapara ed sekso​—lalaki ed lalaki tan bibii ed bibii. Saray ontan a totoo so tinawag na homoseksual. No maminsan saray bibiin homoseksual so  tinawag na Lesbian. Balet ibabaga na Salita na Dios a say gagawaen da so mauges, a sikato so “marutak.” (Roma 1:26, 27) Ontan met, sumpad ganggan na Dios so seksual a piakdol na sakey a too ed ayep. (Levitico 18:23) Siopaman a labay to so manbilay ed leksab na gobierno na Dios so nakaukolan ya onarawi a manlapud sarayan seksual ya agagamil.

11. (a) Antoy panmoria na Dios ed mabayanin iinumen? (b) Saraman so malabay a magmaliw ya uuleyan na gobierno na Dios so nepeg ya onarawi ed anto ran agagamil a makadesyang ed bunigas na laman?

¹¹ Say iyinum na alak, beer odino mabayanin iinumen a kabkaabigan so aliwan sumpad ganggan na Dios. Diad tua, ipapanengneng na Biblia a say daiset ya alak so nayarin maabig ed bunigas na sakey a too. (Salmo 104:15; 1 Timoteo 5:23) Balet say pambuanges so sumpad ganggan na Dios, odino say pibiang ed marawal iran panduruypo a panggagawaan na totoo na imoral. (Efeso 5:18; 1 Pedro 4:3, 4) Niarum ed panangusar na mabayanin iinumen pian nabuek odino “nayengyeng,” dakel a totoo natan so manguusar na nanduruman druga nisesengeg ed sayan parehon gagala. Ontan met, diad panliket et nayarin sikaray mansigarilyo na marihuana odino tabako, bang saray arum so nayarin manggagal na bua odino lawer. Balet sarayan bengatla so mandutak ed laman da tan pasakitan da so bunigas da. Kanian no labay mo so magmaliw ya uuleyan na gobierno na Dios, nepeg mo so onarawi ed sarayan makaderal a bengatla.​—2 Corinto 7:1.

12. (a) Anto so arum iran pikewet ya ugalin sumpad ganggan na Dios? (b) Panoy pakagamor na sakey a toon manggagawa ed saraya na pabor na Dios?

¹² Mapatnag a saray gobierno na too so agmalabay ed saray kriminal a bilang balon mibabaley. Tan si Jehova so walaan na mas lalon atagey ya estandarte. Nakakaukolan to a sikatayo so “manugalin simamatua ed amin a bengatla.” (Hebreos 13:18) No agsumpalen na totoo so ganggan na Dios, sikara so agnaabuloyan a manbilay ed leksab na panarian to. Natan saray totoo so mabetbet a mankunwarin matua, balet ta sumlangen da so dakel a ganggan. Anggaman kuan, nanengneng na Dios so amin a bengatla. Anggapo so makapalikdo ed sikato. (Hebreos 4:13; Uliran 15:3; Galacia 6:7, 8) Sirin seguroen nen Jehova a saray totoon mamuyak ed ganggan to, a singa saraman so ganggan a sumpad panagtila tan panagtakew, so agmagmaliw ya uuleyan na gobierno to. (Efeso 4:25, 28; Apocalipsis 21:8) Ingen say Dios so maanos tan manamerdona. Kanian no itunda la na sakey a managgaway-mauges so mauges iran ugali to tan manggawa la na maong, sikato so awaten na Dios.​—Isaias 55:7.

13. Anto so nepeg a panmoria na saray ariripen na Dios ed saray ganggan na gobierno na totoo?

¹³ Balet anto so nipaakar ed pananumpal ed saray ganggan na gobierno na too? Legan a saray gobierno na totoo so wala ni,  nakakaukolan na Dios a saray ariripen to so pauleyan ed sarayan “atagey a pakauley.” Saray buis so nepeg a bayaran ed sikara, anggamano saray buis so atagey tan say sakey a too so nayarin agmipakna ed paraan a pangigagastosan ed buis a kuarta. Ontan met, saray ganggan na gobierno so nepeg a tuloken. (Roma 13:1, 7; Tito 3:1) Say alenleneg lambengat a nilikud ed saya et sano say katutulok ed ganggan so pansengegan na sakey a toon manumlang ed ganggan na Dios. Diad ontan a kipapasen, singa inkuan nen Pedro tan arum ya apostoles, “Nepeg min tuloken so Dios a manuley nen saray totoo.”​—Gawa 5:29.

14. Panon so pakapangipanengneng tayo a sikatayo so walaan na parehon panmoria na Dios ed kablian na bilay?

¹⁴ Pinabpablin tuloy na Dios so bilay. Saramay malabay a magmaliw ya uuleyan na gobierno to so nepeg a makatalos ed saya. Mapatnag, say panagpatey so sumpad ganggan na Dios. Balet, say gulaan so mabetbet a mangipapaarap ed panagpatey, tan anggan say mangitultuloy na panggula to ed kapara ton too so agmakapagmaliw ya uuleyan na gobierno na Dios. (1 Juan 3:15) Makana, sirin, so pangiyaplika ed saman  so nibaga ed Biblia diad Isaias 2:4 nipaakar ed agpamemben na ayura diad pamatey ed kakaabay tayo. Ipapanengneng na Salita na Dios ya anggan say bilay na saray agni inyanak ya ugugaw a wala ni ed panag-anakan na ina to so mabmabli ed si Jehova. (Exodo 21:22, 23; Salmo 127:3) Tan ingen minilmilyon a panagpaekal so nagagawa ed kada taon. Sayan panagderal ed bilay so sumpad ganggan na Dios, lapud say toon walad dalem na ina to so sakey lan mabilay a persona tan agnepeg a deralen.

15. Anto ran bilin na impasen na Dios ya Ari so nepeg a tuloken na amin ya uuleyan na Panarian?

¹⁵ Ingen, diad saraman so magmaliw ya uuleyan na gobierno na Dios, mas ni so nakaukolan nen say basta agpanggawa na mauges odino imoral. Nepeg met a sikaray manggawa na peteg a sagpot diad panggawa na maabig tan andi-siblet a bengatla ed arum. Nepeg da so manbilay diad maridios a totontonen ya inter na Ari, si Jesu-Kristo: “Amin a bengatla, sirin, a labay yon gawaen na totoo ed sikayo, sikato met so gawaen yo ed sikara.” (Mateo 7:12) Inletneg nen Jesus so ehemplo diad pangipanengneng na aro ed arum. Inter to ni ingen so bilay to a para ed katooan, tan ginanggan toray patumbok to: “Manaarowan so balang sinansakey; unong a singa impangarok ed sikayo.” (Juan 13:34; 1 Juan 3:16) Sikatoyan nengneng na andi-siblet ya aro tan panangimano ed arum so manggawa ed panagbilay a peteg a maliket diad silong na uley na panarian na Dios.​—Santiago 2:8.

16, 17. (a) Antoray maabig a rason diad pampasimbalo ed bilay pian nasumpal iray nakakaukolan na Dios? (b) Akin a maseguro itayon nagawaan tayo so anggan anton nakaukolan a pananguman?

¹⁶ Ipapanengneng na Biblia a saray totoo so nepeg a manpasimbalo ed saray bilay da ta pian nasumpal daray nakakaukolan a para ed pagmaliw ya uuleyan na gobierno na Dios. (Efeso 4:20-24) Kasin kikimeyan mo so sarayan panagpasimbalo? Peteg a makanakana so anggan anton sagpot diad panggawa na ontan! Akin ya ontan? Agto kabaliksan a sika lambengat so nawalaan na magmaong a bilay diad pigaran taon ed silong na gobierno na too. Andi, noagta awaten mo so andi-anggaan a bilay ed ayadyarin bunigas diad paraison dalin ed leksab na gobiernon uleyan na Dios!

¹⁷ Anggan natan, diad pakasumpal ed saray nakakaukolan na Dios, et napanggayagaan mo so mas maliket a bilay. Balet nayarin nakaukolan mo so pampasimbalo. Bueno, dakerakel a totoon managbusol odino maagum so anguman. Ontan met, saray managlawan, managkalugoran, homoseksual, managbuanges, managpatey, managtakew, managdruga tan managtabako so amasimbalo la ed saray dalan na bilay da. Satan so agawaan da diad peteg a sagpot tan diad tulong na Dios. (1 Corinto 6:9-11; Colosas 3:5-9) Kanian no nairapan kan manpasimbalo ta pian  nasumpal moray nakakaukolan na Dios, ag-onsusuko. Satan so nasarag mon gawaen!

KATOORAN ED GOBIERNO NA DIOS

18. Diad anton nikaduman dalan a sikatayo so ilaloan na Dios a mangipanengneng na matoor a pananuporta ed panarian to?

¹⁸ A si Jehova a Dios et kakaukolan to’d saray uuleyan to so matoor a panuporta ed gobiernon Panarian to so aliwan makapakelaw. Saray gobierno na totoo so mankaukolan na ontan met a bengatla ed saray mibabaley to. Balet diad anton nikadkaduman dalan ya iilaloan na Dios a niiter so matoor a pananuporta? Diad pamemben na saray uuleyan to na ayura a pibakal nipaakar ed panarian to? Andi. Noag ingen, singa si Jesu-Kristo tan saray inmunan patumbok to, sikara so nepeg a magmaliw a matoor a sangiyan odino manangiyabawag na panarian na Dios. (Mateo 4:17; 10:5-7; 24:14) Linawa nen Jehova a balang sakey so nayarin mikabat ed no anto so panarian to tan no panon so panresolbe to ed saray problema na totoo. Kasin sarayan bengatlan naaralan mo a manlapud Salita na Dios so innabang mo la ed saray kakanayon mo, kakaarom tan diad arum? Linawa na Dios a satan so gawaen mo.​—Roma 10:10; 1 Pedro 3:15.

19. (a) Akin a nailaloan tayo so isusumpa sano itongtong tayo ed arum so nipaakar ed panarian na Dios? (b) Anto ran tepet so nepeg mon ebatan?

¹⁹ Si Kristo tan saray inmunan patumbok to so nankaukolan na tepel diad pangitongtong ed arum nipaakar ed Panarian, lapud mabetbet ya asagmak daray isusumpa. (Gawa 5:41, 42) Satan met so tua natan. Sayan inuleyan-na-Diablon mundo so agmalabay a nipulong so maong a balita na Panarian. Kanian saray tepet so: Iner so talindegan mo? Kasin iter mo so matoor a suporta ed panarian na Dios? Linawa to a niiter so baleg a pantasi ed Panarian sakbay ya onsabi so anggaan. Kasin sika so mibiang a mangiter ed satan?

[Tepetepet Parad Panagaral]

[Litrato ed pahina 128]

Saramay magmaliw ya uuleyan na gobierno na Dios so nepeg a nawalaan na pikakabat ed satan

[Saray litrato ed pahina 131]

Saray uuleyan na gobierno na Dios so nepeg ya ompaliis ed saray gawan kinondena na Dios

[Litrato ed pahina 133]

Saray uuleyan na gobierno na Dios so nepeg a mangibaga ed satan diad arum