Kapitulo 3

Peteg a Makana So Relihyon Yo

1. Anto so sisiaen na arum a totoo nipaakar ed relihyon?

 ‘AMIN A RELIHYON so maong,’ so kuan na dakel a totoo. ‘Sikara lambengat so nanduruman dalan ya ompugta ed parehon pasen.’ No saya so tua, say relihyon mo so aliwan peteg a makana, lapud kabaliksan ton amin a relihyon so makapaliket ed Dios. Balet tua kasi?

2. (a) Panon so impantrato na saray Pariseos ed si Jesus? (b) Siopa so imbaga na saray Pariseos ya ama ra?

² Sanen si Jesu-Kristo so wadia ed dalin, wala so relihyoson grupo a naamtaan a saray Pariseos. Angiletneg ira na sakey a sistema na panagdayew tan sinisia ran satan so inabobonan na Dios. Ingen, saray Pariseos so manasalin mamatey ed si Jesus! Kanian imbaga nen Jesus ed sikara: “Gagawaen yo so saray gawa nen ama yo.” Diad ebat inkuan da: “Walaan kami na sakey ya Ama, say Dios.”​—Juan 8:41.

3. Anto so imbaga nen Jesus nipaakar ed ama na saray Pariseos?

 ³ Peteg kasin say Dios so ama ra? Kasin inawat na Dios so porma na relihyon da? Andin balot! Anggaman saray Pariseos so walaan na Kasulatan tan inisip dan saratan so tutumboken da, sikara so imbalang na Diablo. Tan ontan so imbaga nen Jesus ed sikara, a kuanto: “Sikayo so nanlapu ed si ama yon Diablo, tan kaliktan yon gawaen iray pilalek na ama yo. Satan a sakey so managpatey sanen sikato so ginmapo, tan agtinmalindeg a malet ed katuaan, . . . sikato so matila tan say ama na tila.”​—Juan 8:44.

4. Panon so impangipasen nen Jesus ed relihyon na saray Pariseos?

⁴ Malinlinew, say relihyon na saray Pariseos so tila. Nilingkoran toray intereses na Diablo, aliwan say Dios. Kanian imbes ya impasen to so relihyon da a maong, sikato so kinondena nen Jesus. Inkuanto ed saraman a relihyoson Pariseos: “Kinaputan yo so panarian na katawenan ed arap na totoo; lapud sikayon mismo so ag-onloob, nisay abuloyan yo raman so onloob.” (Mateo 23:13) Nisengeg ed palson panagdayew da, tinawag nen Jesus iraman a Pariseos a mansimpisimpitan tan maritan uleg. Lapud mauges a kurang da, inkuanto a sikara so mamapaarap ed kaderalan.​—Mateo 23:25-33.

5. Panoy impangipanengneng nen Jesus a saray amayamay a relihyon so aliwa lambengat a nanduruman dalan ya ompugta ed parehon pasen?

⁵ Sirin ag-imbangat nen Jesu-Kristo ya amin a relihyon so nanduruman dalan lambengat ya ompugta ed parehon pasen na kilalaban. Diad samay bantog a Sermon to ed Palandey, imbaga nen Jesus: “Onloob kayo ed mainget a pinto; lapud maawang tan malapar so dalan a mamaarap ed kadederal, tan dakel so ondalan ditan; ingen ta mainget tan masupit so dalan a mamaarap ed bilay, tan daiset so  makaromog ed satan.” (Mateo 7:13, 14) Lapud sinmaew iran mandayew ed Dios diad suston dalan, maslak a totoo so walad dalan a mamaarap ed kadederal. Pigpigara lambengat so wala ed dalan a mamaarap ed bilay.

6. Anto so naaralan tayo diad inengneng ed panagdayew na nasyon na Israel?

⁶ Say inengneng ed paraan na impideneng na Dios ed nasyon na Israel so mamabitar ed no panon kaimportante so pandayew ed Dios diad dalan ya abobonan to. Pinasakbayan na Dios iray Israelitas ya onapalta ed palson relihyon na saray nasyones a walad kaliberliber da. (Deuteronomio 7:25) Saraman a totoo so angibagat ed saray anak da diad dirios da, tan sikara so nanagamil na karutakan ed sekso, a pati say imoralidad. (Levitico 18:20-30) Ginanggan na Dios iray Israelitas a sarayan agamil so paliisan da. Sanen sikara so tinmunganga tan nandayew ed arum a dirios, sikara so dinusa to. (Josue 24:20; Isaias 63:10) Sirin say relihyon da so peteg a makana.

PALSON RELIHYON NATAN?

7, 8. (a) Anton talindeg so inala na relihyon kaleganan na sankamundoan a bakal? (b) Panon so isipen mon liknaan na Dios ed ginawa na relihyon legan na panaoy-bakal?

⁷ Anto so nipaakar ed saray nilasuslasus a relihyon natan? Angangko ta sika so mipaknan dakel a bengatlan nagagawa ed ngaran na relihyon so ag-aabobonan na Dios. Legan na agano niran sankamundoan a bakal, ya aliktaran na nilaksalaksan totoon manbibilay natan,  saray relihyon ed parehon dapag so amaseseg ed totoo ra a mamatey. “Patey yoray Aleman​—patey yora,” so inkuan na obispo ed London. Tan, diad biek a dapag, inkuan na arsobispo na Cologne ed saray Aleman: “Iganggan mi kayo ed ngaran na Dios, a mibakal ya anggad ultimon tedter na dala yo a para ed dayew tan gloria na nasyon.”

⁸ Kanian saray Katoliko so amatey na Katoliko diad panangabobon na saray relihyoson papangulo ra, tan ontan met so ginawa na saray Protestante. Inako nen kleron Harry Emerson Fosdick: “Anggan diad saray simbaan mi et intagey miray bandira na bakal . . . Diad sakey a sukong na sangi mi et dinayew mi so Prinsipe na Kareenan tan diad sananey et inggloria mi so bakal.” Panon so panisip mo a liknaan na Dios ed sakey a relihyon a mangibabagan gagawaen to so linawa to balet ta igogloria to so bakal?

9. (a) Panon so liknaan na dakel a totoo nipaakar ed saray krimen a gagawaen na saray membro na nanduruman relihyon? (b) Sano gawaen na relihyon so inkasikaton kabiangan na mundo, anto so nibaga tayo?

⁹ Lapud saray krimen a nagagawa ed ngaran na Dios na saray membro na dakel a nanduruman relihyon ed interon awaran, nilaksalaksan totoo natan so binmeneg ed Dios tan si Kristo. Tinetel da so Dios diad saray makapataktakot a relihyoson bakal, a singa saraman so atawag na Krusada ed baetan na saray Katoliko tan Muslim, saray bakal ed baetan na Muslim tan Hindus, tan saray bakal ed baetan na Katoliko tan Protestante. Inturo ra so impamatey ed saray Judios diad ngaran nen Kristo, tan saray maruksan inkisisyon na Katoliko. Ingen, anggaman ibabaga na saray relihyoson papangulo a responsabli ed ontan iran makapakebbiew a krimen a say Dios so Ama ra, agta sikara so lalon anak na Diablo a singa saraman so Pariseos a kinondena nen Jesus? Lapud si Satanas so dios na sayan mundo, agta ilaloan tayo met a babanlongan toray relihyon ya aagamilen na totoo ed mundo?​—2 Corinto 4:4; Apocalipsis 12:9.

10. Antoray arum a bengatlan gagawaen ed ngaran na relihyon ya agmo abobonan?

¹⁰ Andi-duaruwan walaray dakel a bengatlan nagagawa ed ngaran na relihyon natan ya isipen mon aliwan duga. Mabetbet a nayarin narengel moray totoon imoral so panagbilay da, ingen ta sikara so dederlengan a membro na iglesia. Nayarin kabat mo ni ingen so nipaakar ed saray relihyoson papangulo a sankaugesan so panagbilay da, ingen ta sikaran siansia so inawat a bilang maong a relihyoson papangulo ed iglesia ra. Inkuan na arum a relihyoson papangulo a say homoseksualidad tan say seksual a relasyon na agnankasal so aliwan makapuy. Balet nayarin kabat mo a satan so ag-ibabaga na Biblia. Diad tua, dinusa na Dios so totoo ton Israel na patey lapud inagamil  da so ontan iran bengatla. Nisengeg ed parehon rason et dineral to so Sodoma tan Gomorra. (Judas 7) Agmanbayag et satan met so gawaen to ed amin a modernon-agew a palson relihyon. Diad Biblia, say ontan a relihyon so nirepresentan sakey a balangkantis lapud imoral a relasyon to ed “saray arari na dalin.”​—Apocalipsis 17:1, 2, 16.

PANAGDAYEW YA ABOBONAN NA DIOS

11. Anto so nakaukolan pian say panagdayew tayo so makapaliket ed Dios?

¹¹ Lapud ag-abobonan na Dios so amin a relihyon, nakaukolan tayon itepet: ‘Kasin dadayewen ko so Dios ed dalan ya abobonan to?’ Panon so pakaamta tayo? Aliwan wala ed anggan siopan too, noagta ed Dios, a sikato so ukom ed no anto so tuan panagdayew. Sirin ta pian say panagdayew tayo so makapaliket ed Dios, nepeg a satan so mabiskeg a nilamut ed Salita na Dios a katuaan, say Biblia. Nepeg a nalikna tayo so singa alikna na managsulat na Biblia ya angikuan: “Naromog komon so Dios a tua, anggaman balang too so naromog a matila.”​—Roma 3:3, 4.

12. Akin ya imbaga nen Jesus a say panagdayew na saray Pariseos so ag-inabobonan na Dios?

¹² Aliwan ontan so liknaan na saray inmunan-siglon Pariseos. Inggeter daray dilin sisisiaen da tan tradisyon tan saraya so tinumbok da imbes a say Salita na Dios. Tekep na anton nansumpalan? Inkuan  nen Jesus ed sikara: “Ginawa yon andi-kakanaan so salita na Dios nisesengeg ed tradisyon yo. Sikayon mansimpisimpitan, matukotukoy so impangipropesiya nen Isaias ed sikayo, sanen inkuanto, ‘Sayan baley so mangigagalang ed siak ed saray bibil da, ingen say puso ra so arawi ed siak. Andi-kakanaan so pandadayew da ed siak, lapud ibabangat daray bilin na totoo a bilang doktrina.’” (Mateo 15:1-9; Isaias 29:13) Sirin no kaliktan tayo so panangabobon na Dios, nakaukolan a seguroen tayo a say sisisiaen tayo so mipakna ed saray bangat na Biblia.

13. Anto so imbaga nen Jesus a nepeg tayon gawaen pian abobonan na Dios?

¹³ Aliwan magenap so pangibaga a sikatayo so manisia ed si Kristo tan insan gawaen so isipen tayon susto. Sigpot a nakaukolan ya anapen tayo no anto so linawa na Dios ed pamaakaran. Saya so impanengneng nen Jesus diad Sermon to ed Palandey sanen inkuanto: “Aliwan siopaman a mangibaga ed siak na, ‘Katawan, Katawan,’ et onloob ed panarian na katawenan, noagta say manggawa ed linawa nen Amak a wala ed katawenan.”​—Mateo 7:21.

14. Akin a nayarin sikatayo so ipasen nen Jesus a “managgawa na kaugsan” anggamano manggagawa itayo na “maong iran gawa”?

¹⁴ Nayarin gagawaen tayo ni ingen so sisiaen tayon “maong iran gawa,” tan saraya so gagawaen diad ngaran nen Kristo. Ingen amin na saraya so andi-kakanaan no onsaew itayon manggawa ed linawa na Dios. Nayarin wala itayo ed pasen na saraman so ontumbok a  sinalambit nen Kristo: “Dakel so mangikuan ed siak ed satan ya agew, ‘Katawan, Katawan, agkami ta nampropesiya ed ngaran mo, tan amapaway na saray demonyo ed ngaran mo, tan nanggawa na dakel a makapanyarin gawa ed ngaran mo?’ Tan ingen ipatuak ed sikara: Agtakayon balot kabat! Arawi kayo ed siak, sikayon managgawa na kaugsan.” (Mateo 7:22, 23) On, nayarin nagagawaan tayoray bengatlan inisip tayon maong​—tan saratan so nayarin pisalamatan na arum a totoo ed sikatayo tan idayew da itayo ni ingen​—balet tano onsaew itayon manggawa ed ibabaga na Dios a duga sikatayo so ipasen nen Jesu-Kristo a bilang “managgawa na kaugsan.”

15. Akin a say kurang ya inala na totoo ed kadaanan a Berea so makabat ed sikatayo a tumboken?

¹⁵ Lapud dakel a relihyon natan so agmanggagawa ed linawa na Dios, agtayo basta nipasen a saray bangat na relihyoson muyongan ya akikasakeyan tayo so mipakna ed Salita na Dios. Say katuaan lambengat a say Biblia so uusaren na sakey a relihyon so agmamaneknek ya amin a bengatlan ibabangat to tan gagawaen to et wala ed Biblia. Importante a sikatayon dili so mangusisa no kasin sikara so wala ed Biblia odino anggapo. Saray totoo ed syudad na Berea so akomendaan lapud, kayari na impanpulong nen Kristianon apostol Pablo ed sikara, inusisa ra so Kasulatan pian seguroen da a saray bengatlan ibabaga to’d sikara so tua. (Gawa 17:10, 11) Say relihyon ya abobonan na Dios so nepeg a mipakna ed amin a dalan diad Biblia; agto awaten so arum a parte na Biblia tan ipulisay to so arum.​—2 Timoteo 3:16.

ALIWAN MAGENAP SO INKASIMOON LAMBENGAT

16. Anto so imbaga nen Jesus a mangipanengneng a say inkasimoon lambengat so aliwan magenap ed sakey a too pian abobonan na Dios?

¹⁶ Balet nayarin itepet na sakey: ‘No masimoon so sakey a too ed sisisiaen to, agta sikato so abobonan na Dios anggan say relihyon to so palso?’ Bueno, inkuan nen Jesus ya agto abobonan iray “managgawa na kaugsan” anggauan sisiaen da a susto so gagawaen da. (Mateo 7:22, 23) Kanian say inkasimoon lambengat so agmet abobonan na Dios. Imbaga ya aminsan nen Jesus ed saray patumbok to: “Onsabi so oras sano siopaman a mamatey ed sikayo so manisip a sikato so akapangisaklang na sagradon lingkor ed Dios.” (Juan 16:2) Saray ontan a managpatey ed Kristianos so nayarin sisisimoon a manisian sikara so makapanlilingkor ed Dios, ingen ta mabitabitar ya andi. Ag-abobonan na Dios so gagawaen da.

17. Anggaman si Pablo so masimoon, anto so ginawa to sakbay na impagmaliw ton Kristiano?

 ¹⁷ Sakbay na impagmaliw ton Kristiano, si apostol Pablo so tinmulong diad impamatey ed si Esteban. Saginonor, inanap to so paraan na pamatey ed dakel nin Kristianos. (Gawa 8:1; 9:1, 2) Impaliwawa nen Pablo: “Diad inkalablabas et inanap kon pasegsegangen so kongregasyon na Dios tan deralen, tan siak so onaaligwas a tuloy ed Judaismo nen saray dakel a kataonan ko diad katooan ko, unong a siak so lalon maseseg ed saray tradisyon na atateng ko.” (Galacia 1:13, 14) On, si Pablo so masimoon, ingen ta satan et agto ginawa so relihyon to a susto.

18. (a) Anto so relihyon nen Pablo sanen pinasegsegang toray Kristianos? (b) Akin a si Pablo tan saray arum ed agew to et kinaukolan dan salatan so relihyon da?

¹⁸ Diad saman, si Pablo so sakey a membro na Judion relihyoson sistema, ya angipulisay ed si Jesu-Kristo, tan sirin sikato, met, so impulisay na Dios. (Gawa 2:36, 40; Uliran 14:12) Sirin ta pian nagamoran so abobon na Dios kinaukolan nen Pablo a salatan so relihyon to. Insulat to met so arum a walaan na “seseg ed Dios”​—a sikara so masimoon balet ta ag-ira inabobonan na Dios lapud say relihyon da so agniletneg ed suston pikakabat ed gagala na Dios.​—Roma 10:2, 3.

19. Antoy mangipanengneng a say katuaan et agto abuloyan so nanduruman nengneng na relihyoson doktrina?

¹⁹ Ag-abuloyan na katuaan so amin a nanduruman nengneng na relihyoson doktrina ed mundo. Alimbawa, balanglan saray totoo so walaan na kamarerwa a makaliktar ed ipatey na laman odino andian. Balanglan say dalin so mansiansia lawas odino andi. Balanglan say karelmengan so itarok na Dios ed panganggaan odino andi. Saraya tan dakel nin arum a sisisiaen so balanglan susto o aliwa. Agnayarin wala so duaran dagup na katuaan sano say sakey so agmipakna ed sananey. Say sakey odino samay sananey so tua, balet ta aliwan sikaran dua. Say masimoon a panisia ed bengatla, tan agamilen itan a pananisia, agto gawaen a duga no talagan sikato so aliwa.

20. Nipaakar ed relihyon, panon so nayarin panumbok tayo ed dugan “mapa”?

²⁰ Panon so liknaan mo no niiter so prueba a say sisisiaen mo et aliwa? Alimbawa, ipasen a sika so akalugan ed kotse, a pirprimerom so manbiahe ed sakey a pasen. Sankaawit mo so mapa, ingen ta andian ka na panaon a mangusisan maalwar. Wala so angibaga’d sika ed kalsadan tontonen mo. Nanmatalek ka ed sikato, a masimoon mon sinisia a say imbaga to’d sika a dalan et susto. Balet ta aliwa manaya. Anto no wala so angibaga na lingo? Anto no sikato, diad impangituro to ed dilin mapam, et impanengneng ton aliwa so dalan mo? Kasin say  inkakinon odino kaawetan so manebel ed sika diad pangawat ya aliwa so dalan mo? Bueno, sirin, no naaralan mo a manlapud impangusisa ed Bibliam a sika so manbibiahe ed lingon relihyoson kalsada, mabulos komon a manguman. Paliisan so maawang a dalan a mamaarap ed kaderalan; ondalan ed mainget a dalan a mamaarap ed bilay!

NAKAUKOLAN SO PANGGAWA ED LINAWA NA DIOS

21. (a) Niarum ed pikabat ed katuaan, anto so nakaukolan? (b) Anto so gawaen mo no naaralan mon ag-abobonan na Dios so arum a bengatlan gagawaen mo?

²¹ Importante so pangamta ed saray katuaan na Biblia. Ingen sayan pikakabat so andi-kakanaan no agmo dadayewen so Dios ed katuaan. (Juan 4:24) Say makana et say pangagamil ed katuaan, panggawa ed linawa na Dios. “Say pananisian andian na gawa so inatey,” so kuan na Biblia. (Santiago 2:26) Pian napaliket so Dios, sirin, say relihyon mo so aglabatla nagnap a mitukoyan ed Biblia noagta iyaplika met ed amin a kiwas na bilay. Kanian, no naaralan mon gagawaen mo so ibabaga na Dios ya aliwa, kasin sika so mabulos a manguman?

22. Anto ran gungguna so nayarin panggayagaan tayo natan tan diad arapen, no agamilen tayo so tuan relihyon?

²² Walaray baleg a bendisyon a nitarya ed sika no gawaen mo so linawa na Dios. Anggan natan et nagunggunaan ka la. Say pangagamil ed tuan relihyon et gawaen to kan magmaong a too​—magmaong a laki, asawa odino ama, magmaong a bii, asawa odino ina, magmaong ya ugaw. Pawalaen to’d sika so maridios iran kalidad a gawaen to kan miduma ed limog na arum lapud ta gagawaen mo so susto. Ingen mas lalo ni, kabaliksan ton wala ka ed talindeg a mangawat ed saray bendisyon na bilay ya andi-anggaan diad liket tan ayadyarin bunigas ed paraiso na Dios a balon dalin. (2 Pedro 3:13) Anggapo so suppiat ed satan​—say relihyon yo so peteg a makana!

[Tepetepet Parad Panagaral]

[Litrato ed pahina 25]

Kasin saray papangulo na relihyon a manasalin mamatey ed si Jesus so manlilingkor ed Dios?

[Saray litrato ed pahina 26, 27]

Maslak a totoo so wala ed maawang a dalan a mamaarap ed kadederal, so imbaga nen Jesus. Pigpigara lambengat so wala ed mainget a dalan a mamaarap ed bilay

[Litrato ed pahina 28, 29]

“Iyaabawag da ed lapag a kabat da so Dios, balet sikato so imburi ra ed saray gawa ra.”​—Tito 1:16.

Ed Salita

Ed Gawa

[Litrato ed pahina 30]

Lapud pidumaan na relihyon, akibiang si Pablo diad impanupak ed si Esteban a babangatan nen Kristo

[Litrato ed pahina 33]

No wala ka ed lingon dalan, kasin sika so amperen na kinon tan kaawetan a mangawat ed satan?