Say panagdayew et nayarin mankabaliksan na “pangipanengneng na respeto tan panangaro ed sakey a dios.” Diad Biblia, say orihinal iran salita ya impatalos ya “panagdayew” et nayarin mankabaliksay pangipanengneng na aralem ya respeto, odino panagpasakop, ed saray pinalsa. (Mat. 28:9) Saratan ya salita et nayari met ya ontukoy ed panggawa na bengatlan relihyoso parad Dios odino parad sakey a dios. (Juan 4:23, 24) Say konteksto so pakanengnengan no panon ya talosan iratan ya salita.

Si Jehova labat, say Manamalsa tan Soberano na uniberso, so makanepegan na dayew tayo. (Apo. 4:10, 11) Dadayewen tayoy Jehova no ipapanengneng tayoy respeto ed inkasoberano to tan igagalang tayoy ngaran to. (Sal. 86:9; Mat. 6:9, 10) Sarayan duaran tema—say inkasoberano nen Jehova tan say ngaran to—et sankaimano ed libro na Ezequiel. Saray salitan “Soberanon Katawan a Jehova” et nausar ya 217 beses ed libro na Ezequiel, tan saray salitan “naamtaan . . . a siak si Jehova” et nausar ya 55 beses.​—Eze. 2:4; 6:7.

Balet, say panagdayew tayo et aliwa labat ya nalilikna; imbes, say tuan panagdayew et walay kaiba ton gawa. (Sant. 2:26) Nen indedika tayoy bilay tayod si Jehova, impromisa tayo ya diad amin ya parte na bilay tayo et sikatoy unoren tayo bilang Soberano odino manuley tayo tan ipanengneng tayoy aralem ya respeto ed ngaran to. Diad samay komatlon impantuksod si Jesus, inkonekta toy panagdayew ed “sagradon panaglingkor.” (Mat. 4:10, paimanod leksab) Mandadayew tayod si Jehova kanian labalabay tayoy manlingkor ed sikato. * (Deu. 10:12) Iiter tayod Dios tayo so sagradon panaglingkor no manggagawa tayo na saray kimey ya direktan mikonektaan ed panagdayew tayo, tan satan et mankaukolan na panagsakripisyo. Anto ran kimey?

Dakel so klase na sagradon panaglingkor, tan amin iratan et papablien nen Jehova. Manggagawa tayoy sagradon panaglingkor no pupulongan tayoy arum, mibibiang tayod saray aral ed Kingdom Hall, tan mangipapaalagey tayoy pasen ya pantitiponan tan aasikasoen tayo iratan. Ontan met, manggagawa tayoy sagradon panaglingkor no mibibiang tayod panagdayew na pamilya, onsusuporta tayod relief work parad saray mankaukolan ya kapananisiaan tayo, manboboluntaryo tayod saray kombension, odino manlilingkor tayod Bethel. (Heb. 13:16; Sant. 1:27) No manunad isip tan puso tayo so dugan panagdayew, napakiwas tayon ‘agew-labi ya manggawa na sagradon panaglingkor.’ Malikeliket tayon mandadayew ed Dios tayo, si Jehova!​—Apo. 7:15, paimanod leksab.