Diad Ezequiel kapitulo 23, nabasa tayo so panangukom na Dios ed totoo to lapud ag-ira nanmatoor. Dakel so piparaan na satan a kapitulo ed kapitulo 16. Singa sayan akaunan salaysay, inusar met na kapitulo 23 so ilustrasyon nipaakar ed paabang a bii. Nabasa tayo ya say Jerusalem so yugtan tan say Samaria so atsi to. Ipapanengneng na saratan ya kapitulo no panon ya inalig na yugtan so prostitusyon ya gagawaen na atsi to balet mas grabe ni so ginawa ton kaugsan tan imoralidad. Diad kapitulo 23, nginaranan nen Jehova so sanagi: Ohola so ngaran na panguloan, say Samaria, ya capital a syudad na samploran tribu a panarian na Israel; Oholiba so ngaran na yugtan, say Jerusalem, ya capital a syudad na Juda. *​—Eze. 23:1-4.

Wala ni ray pamparaan na duaran kapitulo. Nayarin saraya so sankaimportantian: Diad gapo, sarayan paabang a bibii et pinagka-asawa nen Jehova balet ag-ira nanmatoor ed sikato. Ontan met, napatnagan ed saratan ya kapitulo ya walay ilalo. Diad kapitulo 23, anggaman agdirektan abitla so ilalo na pakapawil da nen inkuan nen Jehova ya, “panganggaen koy mabanday a kagagawam tan say pilalawanan mo,” mipara itan ed samay walad kapitulo 16.​—Eze. 16:16, 20, 21, 37, 38, 41, 42; 23:4, 11, 22, 23, 27, 37.

Diad apalabas, ibabaga na saray publikasyon tayo ya say sanagin si Ohola tan Oholiba et mangirerepresenta ed Kakristianoan ya naapag ed Katoliko tan Protestante. Balet, kayari na kaaruman ya impanaral tan impan-research tekep na pikakasi, wala ray linmesan tepet. Kasin walay panaon ya nagmaliw ya pinagka-asawa nen Jehova so Kakristianoan? Kasin sikatoy akisipanan ed si Jehova anggan aminsan labat? Malinew ya andi. Diad tua, anggapo ni so Kakristianoan nen inletneg so “balon sipanan” ed espiritual ya Israel ya si Jesus so manamegley; tan agbalot nagmaliw a kabiangan so Kakristianoan ed espiritual a nasyon na saray alanaan ya Kristiano. (Jer. 31:31; Luc. 22:20) Abayag lan inatey iray apostol nen linmesa so Kakristianoan. Ginmapo itan nen komapat a siglo C.E. bilang sakey ya apostata tan mauges ya organisasyon ya irerepresenta na “saray sisanyas”—saray peke ya Kristiano—diad propesiya nen Jesus nipaakar ed trigo tan sisanyas.​—Mat. 13:24-30.

Niay sakey nin importantin pandumaan: Angiter si Jehova na ilalo ya nipawil ed datin kipapasen so agmatoor ya Jerusalem tan Samaria. (Eze. 16:41, 42, 53-55) Kasin ibabaga na Biblia ya walay ontan ya ilalo na Kakristianoan? Andi! Anggapo lay ilalo to a singa say amin ya kabiangan na Makapanyarin Babilonia.

Kanian ag-irerepresenta nen Ohola tan Oholiba so Kakristianoan. Balet makatulong so salaysay nipaakar ed sikara pian natalosan tayo iyan mas importantin katuaan: no antoy nalilikna nen Jehova ed saray totoon mamapabanday ed masanton ngaran to tan ed saray estandarte tod dugan panagdayew. Baleg so kasalanan na Kakristianoan ed satan ta ibabaga na dakel a simbaan to ya irerepresenta da kunoy Dios ya nabasad Biblia. Sakey ni, ibabaga ran si Jesu-Kristo so lider da, say mismon inad-aron Anak nen Jehova. Balet, kokontraen da lanlamang itan lapud ibabaga ran si Jesus et kabiangan na dios ya taloray lupa to, tan agda uunoren so malinew ya ganggan to ya mansiansian ‘agkabiangan na mundo.’ (Juan 15:19) Tuloytuloy so panggagawa na Kakristianoan na panag-idolatriya tan sikatoy mibabali ed politika, kanian mapatpatnag ya kabiangan na “maimpluensyan imoral a bii.” (Apo. 17:1) Seguradon sikatoy kaiba ed pakaderal na sankamundoan ya empiryo na palson relihyon!