1-3. (a) Antoy nagawa lapud “baleg a sanok” nen Jehova? (Nengnengen so litrato ed gapo na kapitulo.) (b) Antoy konsideraen tayo ed sayan kapitulo?

AKAALAGEY a saniiba iray lalaki, bibii, tan ugugaw ya mangakansion na Kingdom song. Insan indaulo na sakey ya elder so impapuson pikakasi ya kekerewen toy proteksion nen Jehova. Matalek irayan membro na kongregasyon ya asikasoen ira nen Jehova, balet kaukolan da nin siansia so ligliwa tan panamaseseg. Diad paway et sankarengel so panlalaban tan ingal na saray totoo. Ginmapo lay Armagedon!​—Apo. 16:14, 16.

² Diad guerra na Armagedon, deralen nen Jehova iray totoo lapud “baleg a sanok” to, balet aliwan diad paraan ya singa anggapoy pibabali to odino anggapoy nalilikna to. (Basaen so Ezequiel 38:18.) Ipaarap toy mapuersa tan mabiskeg a sanok to, aliwan diad saksakey labat ya armada odino diad sakey a bansa, noagta diad dakdakel a totoo ed interon mundo. Diad satan ya agew, saramay deralen nen Jehova et “manlapud sakey a sampot na dalin ya anggad sananey a sampot na dalin.”​—Jer. 25:29, 33.

³ Akin ya ontan so gawaen nen Jehova, ya ondalang so “baleg a sanok” to, anta sikatoy Dios na aro ya adeskribe bilang “mapangasi tan maabagey” tan “matantan a manpasnok”? (Exo. 34:6;  1 Juan 4:16) Nengnengen tayo no panon ya say ebat ed satan a tepet et mangiter ed sikatayo na ligliwa tan pakpel, tan no panon itan ya mamaseseg ed sikatayon mankuli ed kimey tayon panagpulong natan.

4, 5. Antoy pidumaan na sanok na Dios ed sanok na totoon aliwan perpekto?

⁴ Kaukolan tayon bidbiren ya say sanok nen Jehova et agmiparad saray totoon aliwan perpekto. No onsanok so sakey a too tan onkiwas la lapud sobran pasnok to, mabetbet ya agto itan nakontrol tan aliway pansumpalan na satan. Singa bilang, si Cain ya panguloan ya anak nen Adan, et sinmanok ya maong lapud ag-inawat nen Jehova so bagat to balet inawat To so bagat nen Abel. Antoy resulta? Pinatey nen Cain so matunong ya agi to. (Gen. 4:3-8; Heb. 11:4) Imanoen met so agawad si David, sakey a toon adeskribe bilang lakin makapaliket ed puso nen Jehova. (Gawa 13:22) Anggan sayan maong a too et akagawa lawari na krimen nen abalitaan ton ineyagan na mayaman ya lakin si Nabal iray totoo to tan ininsulto to ra pati sikato. Agaylay pasnok nen David tan saray sundalo to kanian “imbalkes day espada ra” pian pateyen si Nabal pati amin ya lalaki ed sankaabungan to. Maong labat ta say asawa nen Nabal ya si Abigail et akombinse toy David tan saray totoo to ya agla ombawi. (1 Sam. 25:9-14, 32, 33) Kanian walay maabig a rason no akin ya pinuyanan nen Jehova si Santiago ya isulat: “No say too et manpapasnok, agto nipatnag so inkatunong na Dios.”​—Sant. 1:20.

⁵ Aliwan singa say too ya no manpasnok et mabetbet ya agto nakontrol tan palpalaran, naynay a kontrolado nen Jehova so sanok to tan malinew no akin ya onsasanok. Anggano ondalang so baleg a sanok nen Jehova, sikatoy siansia nin onkikiwas ya matunong. No milaban ed saray kalaban to, agton balot deralen so “matunong a kaiba na mauges.” (Gen. 18:22-25) Sakey ni, onsanok labat si Jehova lapud makatunongan iran rason. Konsideraen tayoy duaran rason tan saray naaralan tayo ed saratan.

6. Antoy nalilikna tan ikikiwas nen Jehova no napapabanday so ngaran to?

⁶ Rason: Napapabanday so ngaran nen Jehova. Saramay mangibabaga ya irerepresenta ray Jehova balet manggagawa ra na mauges et dederalen day reputasyon to kanian duga labat ya sikatoy onsanok. (Eze. 36:23) Singa apantongtongan ed akauna iran kapitulo na sayan publikasyon, pinabanday na nasyon na Israel so ngaran nen Jehova. Natalosan tayo ya sinmanok si Jehova lapud ugali tan saray ginawa ra. Balet naynay a kontrolado to so sanok to​—dugaruga labat so impanusa to ed saray totoo to, aliwan alablabas. (Jer. 30:11) Nen asumpal lay gagala na sanok nen Jehova, naandi la itan tan agnanem-em na sakit na linawa.​—Sal. 103:9.

7, 8. Anto ran leksion so naaralan tayo ed impideneng nen Jehova ed Israel?

 ⁷ Leksion: Say impideneng nen Jehova ed saray Israelita et mangiter ed sikatayo na seryoson pasakbay. Singa saray Israelita nensaman, pribilehyo tayoy natawag ed ngaran nen Jehova. Sikatayo ray Tasi nen Jehova. (Isa. 43:10) Saray ibabaga tan gagawaen tayo et direktan mangapekta ed reputasyon na Dios ya irerepresenta tayo. Agtayon balot labay so magmaliw ya anggapoy baing ya manggaway aliwa tan pabandayen so ngaran nen Jehova. Ondalang so sanok to lapud ontan ya pansimpisimpitan, tan agmanbayag et onkiwas pian protektaan toy reputasyon to.​—Heb. 3:13, 15; 2 Ped. 2:1, 2.

⁸ Kasin agtayo la onasingger ed si Jehova lapud pasakbay ya nayarin ondalang so “baleg a sanok” to? Andi. Amta tayo ya maanos tan mabulos a mamerdona si Jehova. (Isa. 55:7; Roma 2:4) Balet amta tayo met ya sikatoy agmangokonsinti tan agmanpapaapektod emosyon. Diad tua, aralem so respeto tayo ed sikato, ta amta tayon ondalang so sanok to ed saramay agdan balot labay so magbabawi ed saray kasalanan da tan agto abuloyan ya mansiansia ran kaiba ed saray totoo to. (1 Cor. 5:11-13) Malinew ya imbaga nen Jehova ed sikatayo no antoy rason na isanok to. Wala lad sikatayo no kasin paliisan tayoy ugali tan saray kagagawa ya mamasanok ed sikato.​—Juan 3:36; Roma 1:26-32; Sant. 4:8.

9, 10. Antoy gawaen nen Jehova no napepeligro iray matoor ya totoo to? Mangiter na alimbawa.

⁹ Rason: Napepeligro iray matoor ya totoo nen Jehova. Onsanok si Jehova no atakien na saray kalaban iray matoor ya manpapasalimbeng ed sikato. Singa bilang, kayarin tinaynan na saray Israelita so Ehipto, indaulo nen Faraon so mabiskeg ya armada to pian lusoben iray singa anggapoy kalaban-laban a totoo ya atipon ed gilig na Ambalangan Dayat. Balet nen inusilan na satan ya mabiskeg ya armada iray Israelita ya ombabaliw ed amagan dayat, inekalan nen Jehova na dalig iray karwahen pan-guerra na saray Ehipsio tan imbantak to rad dayat. “Anggapoy anggan sakey ya akaliktar ed sikara.” (Exo. 14:25-28) Dinmalang so sanok nen Jehova ed saray Ehipsio lapud ‘matoor a panangaro’ tod totoo to.​—Basaen so Exodo 15:9-13.

¹⁰ Ontan met ed panaon nen Arin Hezekias, kinmiwas si Jehova lapud panangaro tod totoo to. Saray Asiryano, ya sankabiskegan tan sankaruksaan ya armada ed saman ya panaon, et sinmabi lad syudad na Jerusalem tan akaparaan la ran onataki. Tinaktakot da ray matoor ya lingkor nen Jehova ya paliberan day syudad pian kalkalna tan makapataktakot so ipatey na saray manaayam ditan. (2 Ara. 18:27) Balet imbaki nen Jehova so sakey labat ya anghel; pinatey to so 185,000 ya kalaban a sundalo ed sakey labat a labi! (2 Ara. 19:34, 35) Imadyin moy eksena ed kampo na saray Asiryano kasabi kabuasan. Agnausar iray gayang, panagsamper, tan espada. Anggapoy mamaknol na trumpeta pian bangonen iray lalaki.  Anggapoy mangiganggan ya mantitipon iray sundalo. Makapataktakot ta anggapoy narengel ed saray tolda tan ataytayak iray bangkay diad kampo.

11. Panon ya mangiter ed sikatayo na ligliwa tan pakpel iray alimbawa ed Kasulatan nipaakar ed ikikiwas nen Jehova no napepeligro iray totoo to?

¹¹ Leksion: Saratan ya alimbawa na ikikiwas nen Jehova no napepeligro iray totoo to et mangiiter na mabiskeg a pasakbay ed saray mamubusol ed sikatayo: “Makapataktakot so pakaawat na dusa manlapud mabilay a Dios” no ondalang so sanok to. (Heb. 10:31) Parad sikatayo balet, saratan ya alimbawa et mangiiter na ligliwa tan pakpel. Singa bilang, naligliwa tayo no amta tayon agmanalo so manunan kalaban tayo, si Satanas. “Antikey lay panaon to” kanian magano lan manampot so panuuley to! (Apo. 12:12) Anggad agni agawa itan, manpakpel tayon manlingkor ed si Jehova, ya matalek tayo ya anggapoy anggan siopan indibidual, organisasyon, odino gobierno ya makaamper ed sikatayo ed panggawa na linaway Dios. (Basaen so Salmo 118:6-9.) Satan a kombiksion tayo et mipara ed sayan apuyanan ya imbaga nen apostol Pablo: “No say Dios et walad dapag tayo, siopa so onsumpad sikatayo?”​—Roma 8:31.

12. Diad onsabin baleg a kairapan, akin et ondalang so sanok nen Jehova?

 ¹² Diad onsabin baleg a kairapan, onkiwas si Jehova pian protektaan itayo, ya singa ginawa to ed saray Israelita ya inusilan na saray Ehipsio tan ed saray Judio ed Jerusalem ya pinaliberan na saray Asiryano. No salien na saray mamubusol ed sikatayo ya atakien itayo, ondalang so sanok nen Jehova lapud aralem a panangaro tod sikatayo. Saray makulangkulang ya onataki ed sikatayo et singa da didiwiten so bukel na mata nen Jehova. Tampol ya sikatoy onkiwas tan anggapoy makaamper. (Zac. 2:8, 9) Kanian say ompatey ed satan et sankarakelan ed kapiganman. Pero anggapoy rason na saray kalaban na Dios ya nabigla no ipatnag toy sanok tod sikara. Akin?

13. Anto ran pasakbay so inter nen Jehova?

¹³ Si Jehova et “matantan a manpasnok” tan angiter na magenap a pasakbay ya deralen to iramay onsumpa ed sikato tan saray mameligro ed totoo to. (Exo. 34:6, 7) Inusar nen Jehova iray propeta ya singa si Jeremias, Ezequiel, Daniel, si Kristo Jesus, tan saray apostol ya singa si Pedro, Pablo, tan Juan pian ipasakbay so sakey  a baleg a guerra ya mansumpal ed anggaan.​—Nengnengen so kahon ya “Angiter si Jehova na Pasakbay ed Onsasabin Baleg ya Guerra.”

14, 15. Anton kimey so ginawa nen Jehova, tan akin?

¹⁴ Impaisulat nen Jehova irayan pasakbay diad Salita to. Sineguro to met ya say Biblia et nipatalos ed sankarakelan a lenguahe tan sankarakelan a kopya so nibunog. Diad interon mundo, sikatoy walaan na dakdakel a boluntaryo ya ontutulong ed arum ya mikareenan ed Dios tan papasakbayan day arum nipaakar ed onsasabin “baleg ya agew nen Jehova.” (Sof. 1:14; Sal. 2:10-12; 110:3) Pinakiwas toy totoo to ya ipatalos ed nilasus ya lenguahe iray publikasyon ya usaren ed panagaral na Biblia tan nilasus milyon ya oras kada taon so uusaren da pian ibagad arum iray promisa tan pasakbay ya walad Salita to.

¹⁵ Ginawa nen Jehova irayan amin “ta agto labay a walay siopaman a naderal noagta labay to ya amin et naikday pankanawnawan magbabawi.” (2 Ped. 3:9) Talagan pribilehyo tayon irepresenta so maaro tan maanos a Dios tayo tan nawalaan na melag a betang diad pangiyabawag ed mensahe to! Balet agla manbayag et naupot lay panaon parad saray agmangiimano ed pasakbay.

16, 17. Kasin inggeter la nen Jehova no kapigan so sampot ya guerra? Ipaliwawa.

¹⁶ Inggeter la nen Jehova no kapigan so sampot ya guerra. Amta to la no kapigan atakien na kalaban iray totoo to. (Mat. 24:36) Panon ton amta?

¹⁷ Singa naaralan tayod apalabas ya kapitulo na sayan publikasyon, imbaga nen Jehova ed si Gog: “Mangiyan ak na saray taga ed saray pangam.” Itonton nen Jehova iray nasyon ed sampot ya guerra. (Eze. 38:4) Aglabay ya ibaga na saya ya sikato so mangigapo ed sayan panlalaban; tan agmet labay ya ibaga na saya ya ekalen tod saray onsusumpad sikato so kanepegan dan mandesisyon parad sarili da. Imbes, ipapanengneng na saya ya nabasa nen Jehova so walad puso tan amta to no panoy ikiwas na saray kalaban to no walay pankanawnawa ra.​—Sal. 94:11; Isa. 46:9, 10; Jer. 17:10.

18. Akin et makpel ya milaban ed Makapanyarin-amin iray totoo?

¹⁸ No aliwan si Jehova so mangigapo ed sayan panlalaban tan agto puersaen iray kalaban to ya miguerra ed sikato, akin et agaylay pakpel dan milaban ed mismon Makapanyarin-amin anta totoo labat ira? Say sakey a rason et ompan diad satan a panaon, kombinsido la ran maong ya anggapoy Dios odino sikatoy agmibabali ed saray totoo. Nayarin ontan so isipen da ta kakkayari dan  dineral so amin ya palson relihyoson organisasyon ed dalin. Kanian nayarin ibaga ra ya no walay Dios, seguradon idepensa to ray institusyon ya mangibabagan mangirerepresenta ed sikato. Agda namoria ya diad tua, say Dios a mismo so angiyan ed kapusoan da ya deralen irayan palson relihyon ya aliway pangirerepresenta da ed sikato.​—Apo. 17:16, 17.

19. Antoy nayarin nagawa kayarin naderal so palson relihyon?

¹⁹ Kayarin naderal so palson relihyon, nayarin iganggan nen Jehova iray totoo to ya ipasabi ed arum so sakey ya ambelat a mensahe ya inkompara na libro na Apocalipsis ed uran a kristal ya manbelat na manga 20 kilo so kada sakey. (Apo. 16:21, paimanod leksab) Sayan mensahe, a posiblin sakey a deklarasyon ya mangangga la so sistema na politika tan komersyo, et ansakit na saray makakadngel kanian mudmoraen day Dios. Nayarin saya so mensahen mamakiwas ed saray nasyon ya gawaen day pinasyan iyataki ed totoo na Dios, pian maminpinsan da tayon napatunda. Say amta ra et anggapoy kalaban-laban tayo, tan mainomay da tayon deralen. Alingo-lingo ra!

20, 21. Siopa si Gog, tan antoy nagawad sikato?

²⁰ Singa naaralan tayod Kapitulo 17 na sayan publikasyon, inusar nen Ezequiel ed propesiya to so titulo ya “Gog ed dalin na Magog,” tan naamtaan tayo ya say alyansa na saray bansa so onataki ed sikatayo. (Eze. 38:2) Balet, saray membro na sayan alyansa et aliwan tua ya nankakasakey. Anggano singa mantutulongan ira, siansian walad sikaray espiritu na panlalaslasan, inkamapaatagey, tan ambisyon parad sarili dan bansa. Main-inomay ya imaneobra nen Jehova ya “say espada na balang sakey so onsumpa ed dilin agi to.” (Eze. 38:21) Balet aliwan too so panlapuan na kaderal na sarayan nasyon.

²¹ Antis ya naderal iray kalaban tayo, nanengneng da ni tanda na Anak na too, nayarin sakey a makapanyari tan makapakelkelaw ya pangipatnag nen Jehova tan nen Jesus ed pakayari ra. Wala ray nanengneng dan pakataktakotan dan maong. Singa impasakbay nen Jesus, “onkapuy iray totoo lapud takot tan pantatalaran dad saray nagawa diad dalin.” (Luc. 21:25-27) Nabigla ra tan namoria ra ya alingo-lingo ra nen inataki day totoo nen Jehova. Napilitan iran bidbiren so betang na Manamalsa bilang komandante na militar, si Jehova na saray armada. (Sal. 46:6-11; Eze. 38:23) Seguradon usaren nen Jehova so armada to ed tawen tan saray natural a puersa diad paraan ya naprotektaan iray matoor ya lingkor to balet naupot iray kalaban to.​—Basaen so 2 Pedro 2:9.

22, 23. Siopa ray usaren na Dios ya manprotekta ed totoo to, tan antoy seguradon pangipasen dad sayan gawaen da?

²² Isipen pay inkaseseg nen Jesus ya idaulo so paneral ed saray kalaban na Dios tan protektaan iramay mangaaro tan manlilingkor ed Ama to. Isipen met so nalikna na saray alanaan diad satan  a panaon. Antis ya onggapo so Armagedon, saramay kabiangan na 144,000 ya wadia nid dalin et napaoli ed tawen pian amin da et nakaiba nen Jesus ed piguerra. (Apo. 17:12-14) Seguradon dakel ya alanaan so awalaan na maapit iran kaaro ya membro na arum a karnero ta nankimey iran saniiba legan na kaunoran iran agew. No wadman lad tawen iray alanaan, naikdan la ray autoridad tan pakayari ya protektaan iramay matoor ya sinmuporta ed sikara nen dinmalan irad nanduruman subok.​—Mat. 25:31-40.

²³ Kaiba met iray anghel ed armada nen Jesus diad tawen. (2 Tes. 1:7; Apo. 19:14) Tinulongan da lay Jesus nensaman ya ekalen ed tawen si Satanas tan saray demonyo to. (Apo. 12:7-9) Tan tinmulong met iran tiponen iramay walad dalin ya labay day mandayew ed si Jehova. (Apo. 14:6, 7) Duga labat sirin ya pibiangen nen Jehova iray anghel pian protektaan irayan matoor! Say sankaimportantian, ipapasen na amin ya kabiangan na armada nen Jehova ya kagalangan so pamasanto tan pangiyalangon ed ngaran, odino reputasyon to, diad itulong dan paneral ed saray kalaban to.​—Mat. 6:9, 10.

24. Antoy reaksion na baleg ya ulop lapud pakayari na armada na Dios?

²⁴ Anggapoy rason ya ontakot so baleg ya ulop na arum a karnero lapud baleg so pakapanyari na armada na Dios tan determinado iran manprotekta ed sikara. Diad tua et ‘onalagey iran maptek tan itangwa day ulo ra, lapud asingger lay kililiktar da.’ (Luc. 21:28) Talagan importante ya antis ya onsabi so agew nen Jehova, natulongan tayoy dakel a totoo anggad posible ya kabaten tan aroen so mapangasi tan maasikaso ya Ama tayo!​—Basaen so Sofonias 2:2, 3.

25. Antoy pantongtongan tayo ed onsublay ya kapitulo?

²⁵ Saray guerra na totoo et manreresulta ed gulo tan ermen. Balet say resulta na Armagedon et deen tan liket. Antoy nagawa no naandi lay sanok nen Jehova, nisinop la ray espada na armada to, tan asumpal lay baleg ya guerra? Diad onsublay ya kapitulo, pantongtongan tayo itan ya marakdakep ya arapen.