1, 2. Base ed Ezequiel 47:1-12, antoy anengneng tan naamtaan nen Ezequiel? (Nengnengen so litrato ed gapo na kapitulo.)

ANENGNENG nen Ezequiel so sakey nin makapakelaw ya detalye ed samay pasingawey nipaakar ed templo: Walay danum ya onaagus manlapud sagradon templo! Imadyin mo pan totontonen to so aagusan na malinlinew ya danum. (Basaen so Ezequiel 47:1-12.) Manlalapu itan ed silong na entrada na puerta na santuaryo tan ompapaway diad asingger ed puerta ed bukig. Inyakar na anghel si Ezequiel diad paway na templo, tan susukaten na anghel so distansia legan iran onaakar. Aminpigan pinadalan na anghel si Ezequiel ed danum, tan naamtaan na propeta ya maples itan ya onaaralem, ya anggad nagmaliw lan ilog kanian kaukolan to lay ontiblong tan onlangoy pian makabaliw!

² Naamtaan nen Ezequiel ya onaagus so ilog paarap ed Inatey a Dayat, tan say maasin tan agnapambilayan a danum na dayat et natatambal no nasabi na danum na ilog, kanian nagmaliw ya amayamay so sira ditan. Tan diad gilig na ilog, ontutubo so dakel a klase na kiew. Binulan iratan ya manbubunga na masustansian prutas, tan walaan ira na bulong parad pantambal. Seguradon awalaan si Ezequiel na deen na nonot tan ilalo nen anengneng to irayan amin.  Balet antoy kabaliksan na satan a kabiangan na pasingawey ed sikato tan ed saray kaiba ton Judio ed Babilonia? Tan antoy kabaliksan na satan ed sikatayo natan?

3. Akin et aliwan literal so pakatalos na saray Judio nensaman ed samay anengneng nen Ezequiel ya pasingawey nipaakar ed ilog?

³ Seguradon aliwan literal so pakatalos na saray Judio nensaman ed pasingawey nipaakar ed ilog. Imbes, nayarin lapud satan et anonotan da so sakey nin impuyan a propesiya nipaakar ed panangipawil, samay insulat nen propeta Joel ya nayarin masulok ya duan lasus a taon la so apalabas. (Basaen so Joel 3:18.) Nen abasa na saray Judion walad Babilonia so impuyan ya sulat nen Joel, agda inisip ya literal ya “onagus so masamit ya alak manlapud kapalandeyan” odino “onagus so gatas manlapud saray pukdol”; tan agda met inisip ya literal ya “ompaway so sakey a subol manlapud abung nen Jehova.” Ontan met, seguradon atalosan na saraman a Judio ya aliwan nipaakar ed literal ya ilog imay pasingawey ya anengneng nen propeta Ezequiel. * Kanian anton mensahe so ipapasabi nen Jehova? Diad tulong na Kasulatan, natalosan tayo so kabaliksan na pigaran kabiangan na sayan pasingawey. Balet say pampokusan tayo et say taloran malinew tan maaron panamaseguro ya naaralan tayo ed sayan propesiya.

4. (a) Lapud samay ilog ya anengneng nen Ezequiel ed pasingawey, anto ran bendisyon so inilaloan na saray Judio ya iter nen Jehova? (b) Panon ya say impangusar na Biblia ed saray salitan “ilog” tan “danum” et mamaseguro ed sikatayo ya bendisyonan nen Jehova iray totoo to? (Nengnengen so kahon ya “Saray Ilog ya Panlalapuan na Bendisyon nen Jehova.”)

⁴ Ilog ya panlalapuan na saray bendisyon. Diad Biblia, say ilog tan danum et mabetbet ya uusaren pian iyilustra so iyagus na saray mangiiter na bilay ya bendisyon nen Jehova. Anengneng nen Ezequiel so ontan ya ilog ya onaagus manlapud templo. Kanian lapud satan ya pasingawey, nayarin inilaloan na totoo na Dios ya onagus ed sikara iray mangiiter na bilay ya espiritual a bendisyon nen Jehova basta mansiansia rad dugan panagdayew. Anto iratan ya bendisyon? Ibangat lamet ed sikara na saray saserdote iray espiritual ya instruksion. Tan no niyaapay lamet iray bagat ed templo, makaseguro ira ya nasakbongan iray kasalanan da. (Eze. 44:15, 23; 45:17) Kanian nalinisan lamet ira, ya singa ra naurasan na malinis a danum manlapud templo.

5. Panon ya naekal na samay pasingawey nipaakar ed ilog so pampapaga na saray Judio no kasin magenap parad amin so bendisyon?

⁵ Kasin magenap parad amin iray bendisyon diad anggan anton panaon? No bilang ta walay ontan ya pampapagaan da, naekal itan lapud ipapanengneng na pasingawey so makapakelaw ya agawa—samay ontetedter a danum et nagmaliw ya ilog diad loob labat na manga duaran kilometro! (Eze. 47:3-5) No akapawil la ray Judio ed dalin da, nayarin ondakel ira ditan. Balet, ondakel met so bendisyon pian magenap ed sikaran amin ta iyiilustra na ilog so inkaaligwas tan inkarakel!

6. (a) Anton makapaseseg a promisa so ipapasabi na propesiya? (b) Anton pasakbay so ipapasabi met na pasingawey? (Nengnengen so paimanod leksab.)

⁶ Danum ya mangiiter na bilay. Diad pasingawey ya anengneng nen Ezequiel, onaagus so ilog paarap ed Inatey a Dayat, kanian abilay so baleg ya parte na satan. Imanoen ya lapud samay danum et manbilay so dakerakel ya klase na sira ya singa saray walad Baleg a  Dayat odino Dayat a Mediteraneo. Nagmaliw ni ingen ya maasenso so negosyo na panagsigay diad gilig na Inatey a Dayat ya walad baetan na duaran baley ya mapatnag a nanarawian a maong. Inkuan na anghel: “Amin a bengatla et manbilay ed inerman a nasabi na ilog.” Kasin labay ya ibaga na satan ya nasabi na danum a manlalapud abung nen Jehova so amin ya parte na Inatey a Dayat? Andi. Imbaga na anghel ya wala ray mapitek a pasen ya agnasabi na danum ya mangiiter na bilay. Sarayan pasen et ‘nataynanan pian magmaliw a lapuay asin.’ * (Eze. 47:8-11) Kanian ipapasabi na propesiya so makapaseseg a promisa ya ombilay iray totoo lapud dugan panagdayew, tan onaligwas ira. Balet wala met so pasakbay na satan: Aliwan amin et mangawat ed saray bendisyon nen Jehova; tan aliwan amin et natambal.

7. Anton panamaseguro so naaralan na saray Judion walad Babilonia ed saray kiew diad gilig na ilog?

⁷ Saray kiew ya parad kakanen tan parad pantambal. Antoy nibaga tayo ed saray kiew diad gilig na ilog? Agta mamaparakep iratan ed kaliberliber? Tan wala met so naaralan ed saratan. Seguradon panliketan nen Ezequiel tan saray kapara ton Judio no iisipen da iray malamis ya bunga na saratan a kiew, ya binulan a manbubunga! Ipapaseguro met na saratan ya pakanen ira nen Jehova diad espiritual. Anto ni ipapaseguro na saratan? Imanoen ya saray bulong na saratan ya kiew et onkanan “parad pantambal.” (Eze. 47:12) Amta nen Jehova ya manuna ed amin et kaukolan na saray ompawil a Judio so espiritual a pakatambal, tan impromisa ton gawaen to itan. Inaral tayo no panon ton ginawa itan diad arum ni ran propesiya nipaakar ed panangipawil, ya singa samay walad Kapitulo 9 na sayan publikasyon.

8. Antoy pakapatnagan ya walay mas baleg a kasumpalan na pasingawey ya anengneng nen Ezequiel?

⁸ Balet, singa apantongtongan tayo lad Kapitulo 9, naeksperiensya na saray pinmawil ya Judio so limitado labat ya kasumpalan na saratan ya propesiya. Sikara lanlamang so rason no akin ya limitado so kasumpalan na saratan. Talagan ag-ira sigpot ya bendisyonan nen Jehova ta lanang dan papawilen so mauges a kagagawa da, ag-ira matulok, tan ibabaliwala day dugan panagdayew. Lapud saratan ya gagawaen da, nasasakitan tan nadidismaya iray matoor ya kapara dan Judio. Balet, amta na saray matoor ya mandadayew ed si Jehova ya saray promisa to et seguradon nagawa; lanang iratan ya ontua. (Basaen so Josue 23:14.) Kanian onsabi panaon, nagawa so mas baleg a kasumpalan na pasingawey ya anengneng nen Ezequiel. Kapigan balet ey?

9. Kapigan nagawa so mas baleg a kasumpalan na pasingawey ya anengneng nen Ezequiel nipaakar ed templo?

⁹ Singa naimano tayo ed Kapitulo 14 na sayan publikasyon, walay mas baleg a kasumpalan na pasingawey ya anengneng nen Ezequiel nipaakar ed templo legan na “kasampotan a parte na saray agew,” say panaon sano mas niyatagey so dugan panagdayew nen say kapiganman. (Isa. 2:2) Panon ya nasusumpal natan iyan kabiangan na pasingawey ya anengneng nen Ezequiel?

10, 11. (a) Anto ran singa ilog a bendisyon so onaagus paonlad sikatayo natan? (b) Panon ya dinmakel so iyaagus na saray bendisyon nen Jehova pian nasuplayan so ombabaleg ya pankaukolan legan na kaunoran iran agew?

 ¹⁰ Ilog ya panlalapuan na saray bendisyon. Anto ran bendisyon natan so ipapanonot na danum ya onaagus manlapud abung nen Jehova? Ipapanonot na satan so amin ya makakatulong ed sikatayo pian ombiskeg tan napesel itayo ed espiritual. Manuna ed satan so dondon bagat na Kristo a walaay pakayarin manlinis, tan lapud satan et naperdona iray kasalanan tayo. Saray malinew a katuaan na Salita na Dios et inkompara ed danum ya mangiiter na bilay tan makalinis. (Efe. 5:25-27) Panon ya onaagus so ontan iran bendisyon ed panaon tayo?

¹¹ Nen 1919, pigaran libo labat iray lingkor nen Jehova, tan makakaawat ira na nakaukolan dan espiritual a naakan. Diad saray sinmublay a dekada, tuloytuloy so indakel da. Natan, masulok lan waloran milyon so totoo na Dios. Kasin tuloytuloy met ya dinmakel so agus na malinis a danum na katuaan? On! Ngalngali agtayo nasabaan so karakel na suplay na espiritual a katuaan. Binilyon ya Biblia, libro, magasin, brosyur, tan tract so onaagus paonlad saray totoo na Dios diad apalabas a siglo. Singa say ilog ya anengneng nen Ezequiel ed pasingawey, maples ya dinmakel so agus na saray katuaan pian nasuplayan so ombabaleg ya pankaukolan na totoon naeerasan ed espiritual diad interon mundo. Abayag lan iyiimprinta iray base ed Biblian publikasyon. Balet natan, panamegley na website tayo ya jw.org, wala la ray publikasyon ed electronic format diad masulok ya 900 a lenguahe! Antoy epekto na saratan ya danum na katuaan ed mauyamon totoo?

12. (a) Anto la ray anengneng mon prueba ya say mensahe na katuaan et angiter na espiritual a bilay tan biskeg ed totoo? (b) Anton pasakbay so ipapaimano ed sikatayo natan na pasingawey? (Nengnengen met so paimanod leksab.)

¹² Danum ya mangiiter na bilay. Imbagad si Ezequiel: “Amin a bengatla et manbilay ed inerman a nasabi na ilog.” Isipen pay inyagus na mensahe na katuaan ed amin ya linmad nipawil ya espiritual a dalin tayo. Angiter na espiritual a bilay tan biskeg ed saray minilyon a matunong a totoo iray katuaan na Biblia. Balet, impaimano met na pasingawey iyan nipanpanaon a pasakbay: Aliwan amin et mangawat ed satan ya katuaan. Singa saray maranum tan mapitek a pasen na Inatey a Dayat diad pasingawey ya anengneng nen Ezequiel, wala ray nagmaliw ya ag-interesado, ya agda labay ya awaten tan iyaplika so katuaan. * Komon ta aliwa tayon ontan!—Basaen so Deuteronomio 10:16-18.

13. Anto ray naaralan tayo ed saray kiew ed pasingawey?

¹³ Saray kiew ya parad kakanen tan parad pantambal. Kasin walay makapaseseg ya naaralan tayo ed saray kiew ed gilig na ilog? On, wala! Tandaan, saratan a kiew et binulan ya manbubunga na malamis iran prutas, tan makatambal iray bulong da. (Eze. 47:12) Kanian ipapanonot ed sikatayo na saratan ya say Dios a panlilingkoran tayo et labalabay to tayon pakanen tan paabigen diad sankaimportantian a paraan, diad espiritual. Say mundo natan et mansasakit tan naeerasan ed espiritual. Balet, isip mo pa iray iiter nen Jehova. Kasin asalim lan alikna ya abendisyonan ka nen binasam so sakey ya artikulo na magasin tayo, odino kayarim ya kinansion so sampot ya kansion ed asemblea o kombension, o kayarim ya  binantayan so sakey a video o programa ed broadcasting? Talagan napapakan itayon maong. (Isa. 65:13, 14) Kasin ombibiskeg tayod espiritual lapud sarayan espiritual a naakan? On, ta saray makapaseseg ya simbawan naaawat tayo ya base ed Salita na Dios so ontutulong ed sikatayon napaliisan iray kasalanan ya singa say imoralidad, agum, tan inka-andiay pananisia. Angitarya met si Jehova na uksoyan ya ontulong ed saray Kristiano ya akagaway seryoson kasalanan pian onabig irad sakit ed espiritual. (Basaen so Santiago 5:14.) Talagan nabebendisyonan itayo, a singa ipapatnag na saray kiew ed pasingawey ya anengneng nen Ezequiel.

14, 15. (a) Antoy naaralan tayo ed saramay agnatambal ya mapitek a pasen diad pasingawey ya anengneng nen Ezequiel? (b) Panon itayon nagugunggonaan natan ed ilog ya anengneng nen Ezequiel ed pasingawey?

¹⁴ Wala met so naaralan tayo ed saramay mapitek a pasen ya agnatambal. Agtayo labay ya amperen so iyagus na saray bendisyon nen Jehova ed bilay tayo. Pakaskasi itayo no ag-itayo natambal a singa saray dakel a totoo ed sayan mansasakit a mundo. (Mat. 13:15) Balet aliwa tayon ontan ta nagugunggonaan itayo ed singa ilog iran bendisyon! No labalabay tayon inumen so malinis a danum na katuaan ed Salita na Dios, no inanabang tayod arum iratan ya katuaan diad pampupulong tayo, tan no aawaten tayoy maaron panangigiya, ligliwa, tan tulong na saray elder ya impasal na matoor ya aripen, nayarin nanonotan tayoy ilog ed pasingawey ya anengneng nen Ezequiel. Satan ya ilog et mangiiter na bilay tan pakatambal ed inerman ya agusan to!

¹⁵ Anto balet so kasumpalan na sayan pasingawey diad arapen? Nanengneng tayod onsublay iran parapo ya no onsabi lay Paraiso, onagus iyan ilog diad sankabalegan ya kasumpalan na propesiya.

16, 17. (a) Panon ya mas ombaleg so danum na bilay diad Paraiso? (b) Panon tayon nagunggonaan ed singa ilog iran bendisyon diad Paraiso?

¹⁶ Kasin naiimadyin moy sarilim ed Paraiso ya kaibam iray kakaarom tan kapamilyam, tan malikeliket kayo? Mas lalon magmaliw a tudtua itan ed sika no aralen mo so nipaakar ed ilog ya anengneng nen Ezequiel ed pasingawey. Panon? Konsideraen pa lamet so taloran malinew tan maaron panamaseguro na pasingawey.

¹⁷ Ilog ya panlalapuan na saray bendisyon. Samay simbolikon ilog et nibagan mas baleg diad Paraiso, ta aliwa labat ya espiritual so pakagunggonaan ed satan noagta pati diad pisikal. Legan na Sanlibon Taon ya Uley nen Jesus, tulongan na Panarian na Dios iray matoor pian nagunggonaan irad dondon diad mas baleg a paraan. Kalkalna iran magmaliw a perpekto! Anggapo lay sakit, doktor, nurse, hospital, pati health insurance! Onagus so danum na bilay ed minilyon ya totoon makaliktar ed Armagedon, “sakey a baleg ya ulop” ya “nanlapud baleg a kairapan.” (Apo. 7:9, 14) Tua ya makapadinayew itan ya unonan iyagus na singa ilog iran bendisyon, balet singa sankatedter labat itan no ikomparad onsublay iran nagawa. Singa samay anengneng nen Ezequiel ed pasingawey, mas ombaleg so ilog pian magenap ya nataryaan so mas baleg iran pankaukolan.

18. Panon a magmaliw ya balbaleg so “ilog na danum na bilay” legan na Sanlibon Taon?

 ¹⁸ Danum ya mangiiter na bilay. Legan na Sanlibon Taon, magmaliw ya balbaleg so “ilog na danum na bilay”! (Apo. 22:1) Minilyon, o binilyon ni ingen, so napaoli tan naikday pankanawnawan manbilay ya anggapoy anggaan ed Paraiso! Kaibad saray bendisyon nen Jehova panamegley na Panarian so pamaoli ed dakdakel ya totoon naugip ed patey, ya abayag lan nagmaliw a dabok. (Isa. 26:19) Balet kasin tuloytuloy a manbilay so amin ya napaoli?

19. (a) Panon tayon amta ya walay balon danum na katuaan ya manlapud Dios diad Paraiso? (b) Diad anton paraan ya wala ray ‘nataynanan pian magmaliw a lapuay asin’ diad satan a panaon?

¹⁹ Kada sakey so nepeg a manpili. Diad satan a panaon, wala ray balon lukot ya lukasan. Kanian kaibad makarepreskon danum ya manlapud si Jehova iray katuaan ya naamtaan tayo ditan, saray balon espiritual ya instruksion. Agta makapaliket so pannonot ed satan ya nagawa? Balet, wala ray agmalabay ed satan ya bendisyon, mas pilien da ni ag-ontulok ed si Jehova. Nayarin wala ray manrebelde legan na Sanlibon Taon, balet ag-ira naabuloyan ya maneral ed Paraiso. (Isa. 65:20) Ompan nanonotan tayo so pasingawey ya anengneng nen Ezequiel tan naisip tayo iramay mapitek a pasen ya nansiansian agnapambilayan, ya ‘nataynanan pian magmaliw a lapuay asin.’ Talagan makulangkulang iramay agda labay so oninum ed mablin danum na bilay! Kayari na Sanlibon Taon, wala ray manrebelde tan ondapag ed si Satanas. Amin ya  mangipulisay ed matunong ya uley nen Jehova et parehoy pansumpalan da: patey ya anggapo lay kioli.​—Apo. 20:7-12.

20. Anton uksoyan so ipapanonot ed sikatayo na saray kiew ya anengneng nen Ezequiel ya pakagunggonaan tayo diad Sanlibon Taon?

²⁰ Saray kiew ya parad kakanen tan parad pantambal. Aglabay nen Jehova ya nabalang na anggan siopad sikatayo so bilay ya anggapoy anggaan. Pian natulongan itayon nagamoran so marakdakep ya pankanawnawan iiter to, seguroen ton wala lamet so uksoyan ya miparad saramay kiew ya anengneng nen Ezequiel. Balet diad Paraiso, saray bendisyon nen Jehova et parehon pisikal tan espiritual. Diad tawen, manuley si Jesus tan saray kaiba ton 144,000 bilang arari diad loob na Sanlibon Taon. Bilang saserdote, seguroen na 144,000 ya nagunggonaan ed dondon bagat na Kristo iray matoor ya totoo, tan tulongan da ran magmaliw ya perpekto. (Apo. 20:6) Ipapanonot na sayan nagawan pisikal tan espiritual ya panagtambal iramay kiew ya anengneng nen Ezequiel diad gilig na ilog, saray kiew ya manbubunga na masustansian prutas tan walaan na bulong ya makatambal. Walay piparaan na pasingawey ya anengneng nen Ezequiel ed sakey nin balibalin propesiya ya insulat nen apostol Juan. (Basaen so Apocalipsis 22:1, 2.) Saray bulong na saray kiew ya anengneng nen Juan et “mamaabig ed saray nasyon.” Nagunggonaan so minilyon ya matoor a totoo ed panlingkor na saray 144,000 bilang saserdote.

21. Antoy epektod sika na impandalepdep mod ilog ya anengneng nen Ezequiel ed pasingawey, tan antoy onsublay ya konsideraen tayo? (Nengnengen so kahon ya “Onaagus a Danum a Nagmaliw ya Ilog!”)

²¹ Nen dinalepdep mo so ilog ya anengneng nen Ezequiel ed pasingawey, seguradon awalaan kay deen na nonot tan ilalo. Talagan makapalikliket iray nagawad arapen! Tan isip mo pa labat—nilibon taon lay apalabas nen inusar nen Jehova irayan malinew a salita ya ontulong ed sikatayon naimadyin so Paraiso, kanian maanos to tayon iimbitaan ya mansagpot ya makasabi ditan tan nengnengen so baleg ya kasumpalan, saray katuaan ya impromisa ed saray propesiya. Kasin wadman ka? Nayarin iisipen mo no kasin talagan makasabi kad Paraiso. Diad onsublay et konsideraen tayo no panon itayon napaseguroan na saray sampot ya kabiangan na propesiya nen Ezequiel.