1, 2. (a) Antoy imbaga nen Jehova ed si Ezequiel? (b) Anto ray tepet ya konsideraen tayo?

KAKKASUMPAL ya anengneng nen Ezequiel so pasingawey ya nayarin lapud satan et anonotan to so panaon nen Moises tan Josue, manga 900 taon lay apalabas. Diad saman a panaon, indeskribe nen Jehova ed si Moises iray ketegan na Insipan a Dalin insan imbaga to ed si Josue no panon ya apagen itan ya dalin ed saray tribu na Israel. (Num. 34:1-15; Jos. 13:7; 22:4, 9) Balet natan, diad taon 593 B.C.E., imbaga nen Jehova ed si Ezequiel tan ed saray kaiba ton Judio ya apagen da lamet so Insipan a Dalin ed saray tribu na Israel!—Eze. 45:1; 47:14; 48:29.

² Antoy mensahe na sayan pasingawey parad si Ezequiel tan saray kapara ton Judio? Akin et makapaseseg iyan pasingawey parad saray totoo na Dios natan? Wala kasi mas baleg a kasumpalan na saya diad arapen?

3, 4. (a) Diad samay sampot a pasingawey ya anengneng nen Ezequiel, anton apatiran panamaseguro so inter na satan ed saray Judion inawit ed Babilonia? (b) Diad sayan kapitulo, anton panamaseguro so pantongtongan tayo?

³ Say sampot a pasingawey ya anengneng nen Ezequiel et nabasad siameran kapitulo na libro to. (Eze. 40:1–48:35) Angiter itan ed saray Judion inawit ed Babilonia na apatiran makapaseseg ya  panamaseguro nipaakar ed kipawil na nasyon na Israel. Anto iratan ya panamaseguro? Unona, nipawil so dugan panagdayew diad templo na Dios. Komadua, idaulo na saray matunong ya saserdote tan managpastol so nipawil a nasyon. Komatlo, makaawat na tawir a dalin so amin ya ompawil ed Israel. Tan komapat, nakaiba ra si Jehova, tan manayam lamet ed limog da.

⁴ Apantongtongan ed Kapitulo 13 tan 14 na sayan publikasyon no panon ya tinmua so duaran panamaseguro​—say kipawil na dugan panagdayew tan say panangidaulo na saray matunong a pastol. Diad sayan kapitulo, pantongtongan tayo so komatlon panamaseguro, say promisa nipaakar ed tawir ya dalin. Insan diad onsublay ya kapitulo, konsideraen tayo so promisa nipaakar ed kiwawala nen Jehova ed syudad.​—Eze. 47:13-21; 48:1-7, 23-29.

5, 6. (a) Diad pasingawey ya anengneng nen Ezequiel, anton dalin so apagen? (Nengnengen so litrato ed gapo na kapitulo.) (b) Antoy gagala na pasingawey nipaakar ed pangapag ed dalin?

⁵ Basaen so Ezequiel 47:14. Diad pasingawey, impaimano nen Jehova ed si Ezequiel so sakey a dalin ya diad arapen et magmaliw ya “singa hardin na Eden.” (Eze. 36:35) Insan imbaga nen Jehova: “Saya so dalin ya apagen yo bilang tawir a dalin na 12 tribu na Israel.” (Eze. 47:13) Say “dalin” ya apagen et say nipawil ya dalin na Israel ya ditan manayam lamet iray Judion inawit ed Babilonia. Insan, singa nabasa ed Ezequiel 47:15-21, detalyadon indeskribe nen Jehova so eksakton ketegan ed paliber na interon dalin.

⁶ Antoy gagala na sayan pasingawey nipaakar ed pangapag ed dalin? Say deskripsion na eksakton sukat ed saray ketegan et mangipapaseguro ed si Ezequiel tan saray kaiba ton Judio ya talagan nipawil so pinabli dan dalin. Imadyin mo pay liket na saramay Judion walad Babilonia ed panamaseguro nen Jehova diad detalyado tan malinlinew ya impangideskribe to! Talaga kasin akaawat iray totoo na Dios nensaman na apag ya dalin bilang tawir da? On.

7. (a) Antoy agawa nen 537 B.C.E., tan antoy ipapanonot na satan ed sikatayo? (b) Anton tepet so konsideraen tayo nin unona?

⁷ Nen 537 B.C.E., manga 56 taon kayarin anengneng nen Ezequiel so pasingawey, nilibon Judio so pinmawil ed dalin na Israel tan nagmaliw lamet itan ya kayarian da. Ipapanonot ed sikatayo na saman ya makapadinayew ya agawa nensaman so mipadparan nagagawa ed saray totoo na Dios ed panaon tayo. Singa met ira akaawat na apag dan dalin. Akin ya nibaga tayon ontan? Inabuloyan nen Jehova iray lingkor to ya makaloob ed espiritual ya dalin pian magmaliw itan ya kayarian da. Kanian, dakel so naaralan tayo ed impangipawil ed Insipan a Dalin nensaman nipaakar ed panangipawil na espiritual a dalin na totoo na Dios ed panaon tayo. Balet antis tayon konsideraen iratan, ebatan tayo ni iyan tepet, “Akin et nibaga tayo ya talagan walay espiritual a dalin natan?”

8. (a) Anton nasyon so insalat nen Jehova ed literal ya nasyon na Israel? (b) Anto so espiritual a dalin odino paraiso? (c) Kapigan itan ginmapo, tan siopa ray manaayam ed satan?

 ⁸ Diad sakey ya akaunan pasingawey ya anengneng nen Ezequiel, napatnagan ed imbaga nen Jehova ya walay baleg a kasumpalan na saray propesiya nipaakar ed kipawil na Israel no nitrono lan Ari si Jesu-Kristo, a tinukoy nen Jehova bilang “si David a lingkor ko.” (Eze. 37:24) Ginmapon nanuley si Jesus nen 1914 C.E. Diad saman a panaon, agla ipapasen na Dios bilang totoo to so literal ya nasyon na Israel noagta abayag lan sinalatan na espiritual ya Israel—saray Kristiano ya alanaan na espiritu. (Basaen so Mateo 21:43; 1 Pedro 2:9.) Balet, aliwan say literal ya nasyon na Israel labat so sinalatan nen Jehova noagta sinalatan to met na espiritual a dalin o espiritual a paraiso so literal ya dalin na Israel. (Isa. 66:8) Singa naaralan tayo ed Kapitulo 17 na sayan publikasyon, say espiritual a dalin et say mayaman ed espiritual a kipapasen odino situasyon, ya manlapu la nen 1919 et pandadayewan ed si Jehova na saray alanaan ya wadia nid dalin. (Nengnengen so kahon ya 9B, “Akin et 1919?”) Legan ya onlalabas so panaon,  saray walaan na ilalon manbilay ed dalin odino saray ‘arum a karnero’ et manaayam met la ed sayan espiritual a dalin. (Juan 10:16) Tua ya tuloytuloy nin onaaligwas tan onlalaknab so espiritual a paraiso natan, balet saray bendisyon na satan et sigpot tayo labat ya naeksperiensya kayari na Armagedon.

9. Anton detalyadon instruksion so inter nen Jehova nipaakar ed pangapag ed mismon dalin?

⁹ Basaen so Ezequiel 48:1, 28. Kayarin imbaga nen Jehova no anggad iner so ketegan na interon dalin, detalyado ton indeskribe no panon ya apagen so mismon dalin. Imbaga to ya say tawir na 12 tribu et apagen ed eksakto tan pareparehon sukat, manlapud amianen anggad abalaten, ya igapod tribu na Dan diad sankasampotan ya ketegan na dalin ed amianen ya anggad tribu na Gad diad sankasampotan ya ketegan ed abalaten. Say teritorya na kada sakey ed saray 12 tawir et pandukey a dalin, manlapud ketegan na dalin diad bukig ya anggad Baleg a Dayat o Dayat a Mediteraneo diad bandad sagur.​—Eze. 47:20.

10. Anto ran panamaseguro so nayarin impasabi na sayan kabiangan na pasingawey ed saray Judion inawit ed Babilonia?

¹⁰ Anto ran panamaseguro so nayarin impasabi na sayan kabiangan na pasingawey ed saray Judion inawit ed Babilonia? Say detalyadon deskripsion ya impasabi nen Ezequiel nipaakar ed pangapag ed dalin et seguradon angipaseguro ed sikara ya talagan organisado so panggawad satan. Sakey ni, idadanet na eksakton pangapag ed dalin parad 12 tribu ya amin ya ompawil et makaawat na tawir. Seguradon nawalaan ira na dalin a panayaman.

11. Anto ray naaralan tayo ed pasingawey nipaakar ed impangapag na dalin? (Nengnengen so kahon ya “Say Impangapag ed Dalin.”)

¹¹ Anto ray makapaseseg ya naaralan tayo natan ed sayan pasingawey? Say nipawil ya Insipan a Dalin et aliwa labat ya parad saray saserdote, saray Levita, tan saray pangulo, noagta para met ed amin ya membro na 12 tribu. (Eze. 45:4, 5, 7, 8) Ontan met natan, say espiritual a paraiso et aliwa labat ya parad saray alanaan ya wadia nid dalin tan saray mangidadaulo ya kabiangan na “baleg ya ulop,” noagta para met ed amin ya kabiangan na baleg ya ulop. * (Apo. 7:9) Anggano melag labat so nagagawaan tayo ed organisasyon, seguradon walaan itayo na pasen tan mabmablin betang diad espiritual a dalin. Talagan makapaseseg itan ya panamaseguro!

12, 13. Anton espisipikon instruksion so inter nen Jehova nipaakar ed dalin ya tawiren na kada tribu?

¹² Nayarin pankelawan nen Ezequiel so arum ya instruksion nen Jehova ed pangapag ed dalin ta midumaan iratan ed saramay naawat nen Moises. Imanoen tayo so duaran pandumaan. Say unona et nipaakar ed dalin, tan say komadua et nipaakar ed saray manayam ditan.

 ¹³ Unona, say dalin. Ingganggan na Dios si Moises ya mas baleg a dalin so iter tod saray mas baleg a tribu. (Num. 26:52-54) Balet, diad pasingawey ya anengneng nen Ezequiel, sikatoy inikdan nen Jehova na espisipikon instruksion ya amin a tribu et nepeg ya nawalaan na “nampaparan apag [“balang sakey et singa say agi ton laki,” paimanod leksab].” (Eze. 47:14) Kanian, say dalin ya tawiren na kada tribu et nampapara so distansia ra manlapud ketegan na tribu ed amianen ya anggad ketegan na tribu ed abalaten, diad amin ya 12 apag. Amin ya Israelita—antokaman so tribu da—et pareparehon minabang ed dakdakel a produkton naala ed mabunan Insipan a Dalin.

14. Anton instruksion nen Jehova nipaakar ed saray dayo so anggapo ed Mosaikon Ganggan?

¹⁴ Komadua, saray manayam ditan. Prinotektaan na Mosaikon Ganggan iray dayo tan naabuloyan iran mibiang ed panagdayew ed si Jehova, balet anggapoy apag da ed dalin. (Lev. 19:33, 34) Balet natan, sayay ibaga nen Jehova ed si Ezequiel et anggapo ed Mosaikon Ganggan. Oniay instruksion nen Jehova ed sikato: “Ikdan na tawir so dayo diad teritorya na tribu a panaayaman to.” Diad satan et inekal nen Jehova so baleg a pandumaan na “saray niyanak ya Israelita” tan saray dayon miaayam ed dalin. (Eze. 47:22, 23) Diad nipawil a dalin ya anengneng  nen Ezequiel ed pasingawey, naimano to ya walay pampapara tan pankakasakey na saray manaayam ditan diad panagdayew da.​—Lev. 25:23.

15. Anton agnauman ya katuaan nipaakar ed si Jehova so papaneknekan na saray instruksion to nipaakar ed dalin da tan saray manayam ditan?

¹⁵ Lapud sarayan duaran makapadinayew ya instruksion ya naawat nen Ezequiel nipaakar ed dalin da tan saray manayam ditan, lalon apaseguroan iray Judion walad Babilonia. Amta ra ya ikdan ira nen Jehova na nampaparan apag, balanglan niyanak iran Israelita odino dayo ya mandadayew ed si Jehova. (Esd. 8:20; Neh. 3:26; 7:6, 25; Isa. 56:3, 8) Papaneknekan met na sarayan instruksion so makapaseseg tan agnauman ya katuaan ya amin a lingkor nen Jehova et pareparehon mabmabli ed sikato. (Basaen so Aggeo 2:7.) Natan, balanglan say ilalo tayo et manbilay ed tawen odino diad dalin, panliliketan tayo itan ya katuaan.

16, 17. (a) Panon itayon nagunggonaan ed impangonsidera tayo ed sarayan detalye nipaakar ed samay dalin tan saray manayam ditan? (b) Antoy konsideraen tayo ed onsublay ya kapitulo?

¹⁶ Panon itayon nagunggonaan ed impangonsidera tayo ed sarayan detalye nipaakar ed samay dalin tan saray manayam ditan? Ipapanonot na saya ed sikatayo natan ya nepeg ya sankapatnagan so pampapara tan pankakasakey na impanaagi tayo diad interon mundo. Anggapoy lalabien nen Jehova. Kanian tepetan tayoy sarili tayo: ‘Kasin aaligen koy Jehova ya anggapo met so lalabien ko? Kasin impapuson rerespetoen ko so amin ya kaparak a mandadayew, antokaman so lahi odino kipapasen da?’ (Roma 12:10) Maliket tayo ta parepareho itayon inikdan nen Jehova na pribilehyon manayam ed espiritual a paraiso, ya ditan et interon puso ya manlilingkor tayo ed Ama tayod tawen tan panliliketan tayo iray bendisyon to.​—Gal. 3:26-29; Apo. 7:9.

¹⁷ Ikonsidera tayo natan so komapat ya panamaseguro ed konklusyon na sampot ya pasingawey ya anengneng nen Ezequiel​—say promisa nen Jehova ed saray Judion walad Babilonia ya sikatoy nakaiba ra. Anto ray naaralan tayo ed satan ya promisa? Naamtaan tayoy ebat ed onsublay a kapitulo.