1, 2. (a) Antoy naaralan tayo diad apalabas ya kapitulo ed samay templon anengneng nen Ezequiel ed pasingawey? (b) Anton duaran tepet so konsideraen tayo ed sayan kapitulo?

SAY templon anengneng nen Ezequiel ed pasingawey et aliwan samay baleg ya espiritual a templo ya indeskribe nen apostol Pablo kayari na nilasus a taon. Naaralan tayo itan ed samay apalabas ya kapitulo. Naaralan tayo met ya say gagala na samay pasingawey et pian ibangat iray totoo na Dios ya importante iray estandarte to parad dugan panagdayew. Nawalaan ira lamet na maong a relasyon ed si Jehova no tumboken da iratan ya estandarte. Kanian satan so rason no akin ya amiduan indanet nen Jehova iyan ideya ed sakey ya bersikulo: “Saya so ganggan nipaakar ed templo.”​—Basaen so Ezequiel 43:12.

² Natan, kaukolan tayon konsideraen so duara nin tepet ed sayan pasingawey nipaakar ed templo. Unona: Anto ray espisipikon naaralan na saray Judio ed panaon nen Ezequiel nipaakar ed saray estandarte nen Jehova parad dugan panagdayew? Ontulong itan pian naebatan tayo so komaduan tepet: Akin et importante iyan pasingawey ed sikatayo diad sayan magulon kaunoran iran agew?

3. Akin ya nayarin alikna na totoo so kababaingan nen naamtaan dan say abung nen Jehova diad pasingawey nen Ezequiel et walad atagtagey a palandey?

³ Pian naebatan so unonan tepet, imanoen tayoy pigaran sankapatnagan ya detalye ed sayan pasingawey nipaakar ed templo. Say atagtagey a palandey. Nayarin diad sayan pasingawey ya anengneng nen Ezequiel et nanonotan na totoo imay makapalikliket ya propesiya nen Isaias nipaakar ed panangipawil. (Isa. 2:2) Balet antoy naaralan da ed impakaamta ran say abung nen Jehova et walad atagtagey a palandey? Naaralan da ya say dugan panagdayew et nepeg a niyatagey, nitandoro, tan mansiansian mas atagey nen say arum. Siempre, dati lan niyatagey so dugan panagdayew, ta uksoyan itan na samay ‘nitandoro a maong nen say arum ni ran dirios.’ (Sal. 97:9) Balet aggagawaen na totoo na Dios so betang da. Diad nilasus a taon, aminpiga dan inabuloyan a magmaliw ya abebbeba, ataynanan, tan adutakan so dugan panagdayew. Seguradon nalikna na saray mauyamon totoo so kababaingan no naamtaan dan say sagradon abung na Dios et niyatagey tan nitandoro ed kanepegan ton magloria tan importantin posisyon.

4, 5. Antoy naaralan na saramay Judion ondedengel ed si Ezequiel nipaakar ed saray atagtagey a puerta diad templo?

⁴ Saray atagtagey a puerta. Diad gapo na pasingawey, anengneng nen Ezequiel ya susukaten na anghel iray puerta. Manga 30 metro odino 100 piye so katagey na saray puerta! (Eze. 40:14) Wala ray kuarto a parad guardia diad saratan ya lolooban. Antoy nayarin naisip na saramay manaral ed plano na sayan parte na templo? Imbaga nen Jehova ed si Ezequiel: “Imanom a maong so lolooban na templo.” Akin? Ta palolooben na totoo iray dayo ya “ag-asegat ed puso tan ed laman” diad mismon sagradon abung a pandadayewan ed Dios. Antoy resulta? “Papabandayen day templok,” so kuan nen Jehova.​—Eze. 44:5, 7.

⁵ Ag-inunor na saray “ag-asegat ed . . . laman” so malinlinew ya ganggan na Dios ya inter to manlapu nid panaon nen Abraham. (Gen. 17:9, 10; Lev. 12:1-3) Balet mas seryoso so kasalanan na saramay “ag-asegat ed puso.” Rebelyoso tan benger ira ta agda aawaten iray instruksion tan panangigiya nen Jehova. Saray ontan a totoo et agnepeg ya palooben ed sagradon abung ya pandadayewan ed si Jehova! Kabusol nen Jehova so pansimpisimpitan, balet inabuloyan na totoo to ya onloob tan onkayat itan ed abung to. Saray puerta tan kuarto a parad guardia diad templon anengneng nen Ezequiel et mangiiter na malinlinew ya leksion: Agla naabuloyan so ontan iran gagawaen da! Kaukolan a pansiansiaen na saramay onloob ed abung na Dios so atagey ya estandarte. Insan lad satan bendisyonan nen Jehova so panagdayew na totoo to.

6, 7. (a) Panon ya inusar nen Jehova so padir ya akapaliber ed maawa-awang ya bakantin dalin pian ipasabi so sakey a mensahe ed totoo to? (b) Panoy impangipasen nensaman na totoo nen Jehova ed abung to? (Nengnengen so paimanod leksab.)

⁶ Say akapaliber a padir. Say sakey nin sankaimano ed sayan templo et say padir ya akapaliber ed interon dalin ya kawalaan na templo. Imbaga nen Ezequiel ya say karukey na padir ed kada diking  et 500 a tanubong odino 1,555 metro—masulok a sakey tan kapalduan kilometro! (Eze. 42:15-20) Balet, samay kuadradon pasen ya kawalaan mismo na saray bilding tan sular na templo et 500 kasiko odino 259 metro labat so kada diking to. Kanian walay maawa-awang ya bakantin dalin ed baetan na templo tan samay akapaliber a padir. * Antoy gagala na satan?

⁷ Inkuan nen Jehova: “Natan et iyarawi rad siak komon iray gagawaen dan espiritual a prostitusyon tan saray bangkay na saray arari ra, tan manayam ak ed sikara diad andi-anggaan.” (Eze. 43:9) Nayarin say natutukoy ya “saray bangkay na saray arari ra” et saray idolo. Kanian nen inusar nen Jehova ed pasingawey so padir ya akapaliber ed maawa-awang ya bakantin dalin, singa to ipapasabi iyan mensahe: “Iyarawi yo so amin ya karutakan. Agyo anggan iyaasingger ed siak.” No pansiansiaen dan malinis so panagdayew da, bendisyonan ira nen Jehova tan agto ra taynanan.

8, 9. Antoy nayarin naaralan na saray totoo ed ambelat ya simbawa nen Jehova ed saray lalakin walaan na responsabilidad?

⁸ Ambelat ya simbawa ed saray lalakin walaan na responsabilidad. Angiter si Jehova na ambelat balet maaron simbawa ed saray lalakin walaay baleg ya responsabilidad. Mapuersa ton impetek iray Levitan inmarawi ed sikato lapud idolatriya. Balet kinomendaan to ray anak nen Zadok ‘ya angasikaso ed saray obligasyon ed santuaryo to sanen inmarawi ed sikato iray Israelita.’ Patas tan mapangasi so impanimbawa to ed kada grupo, ya ibabase tod ginawa ra. (Eze. 44:10, 12-16) Saray pangulo na Israel et akaawat met na mapuersan panangipetek.​—Eze. 45:9.

⁹ Kanian malinew ya impaamta nen Jehova ya saray lalakin manangasikaso tan walaay autoridad et walay eebatan dad sikato diad paraan na panggagawa dad saray responsabilidad da. Ag-ira nipuera ed panangipetek, disiplina, tan simbawa. Imbes, nepeg a sikara so manunan ontumbok ed saray estandarte nen Jehova!

10, 11. Anto ray pakapatnagan ya arum ed saray pinmawil ed Jerusalem et inyaplika day naaralan da ed pasingawey ya anengneng nen Ezequiel?

¹⁰ Kasin inyaplika na saray pinmawil ed Jerusalem iray naaralan dad pasingawey ya anengneng nen Ezequiel? Siempre agtayo amta no antoy inisip na saray matoor a lalaki tan bibii ya kapanaonan nen Ezequiel nipaakar ed sayan makapadinayew ya pasingawey. Balet, dakel so nabasa tayod Salita na Dios nipaakar ed ginawa na saray pinmawil ed Jerusalem tan no antoy panmoria da ed dugan panagdayew ed si Jehova. Kasin inyaplika da iray prinsipyon naaralan ed pasingawey ya anengneng nen Ezequiel? Anggan panon et agawaan da met itan—lalo la no ikomparad saray rebelyoson inmuunan atateng da antis ya nilusob na Babilonia so Jerusalem.

¹¹ Saray matoor a lalaki ya singa si propeta Aggeo tan Zacarias, say saserdote tan managkopyan si Esdras, tan say gobernador a si Nehemias et nansagpot a maong pian ibangat ed totoo iray prinsipyo ya singa samay impasabi na pasingawey ya anengneng nen Ezequiel. (Esd. 5:1, 2) Imbangat da ray totoo ya say dugan panagdayew et nepeg ya iyatagey tan iyuna nen saray materyal ya bengatla  tan saray makasarilin pilalek. (Ag. 1:3, 4) Impurek da ya nepeg a respetoen da ray estandarte ed dugan panagdayew. Singa bilang, mapuersan sinimbawa nen Esdras tan Nehemias iray totoo ya pataynanen da iray dayon asawa ra ta onkakapuy so espiritualidad na totoo lapud sarayan asawa ra. (Basaen so Esdras 10:10, 11; Neh. 13:23-27, 30) Say nipaakar ed idolatriya ey? Mapatnag ya nen akapawil la rad Jerusalem, naaralan dan siansia ya busolen itan, say kasalanan ya aminpiga dan akatuksoan ed apalabas. Kumusta balet iray saserdote tan pangulo, odino prinsipe? Singa impaimano ed pasingawey ya anengneng nen Ezequiel, kaiba irad saramay sinimbawa tan impetek nen Jehova. (Neh. 13:22, 28) Dakel so mapaabeban dinmengel ed satan ya simbawa.​—Esd. 10:7-9, 12-14; Neh. 9:1-3, 38.

12. Anto ray bendisyon ya inter nen Jehova nen pinmawil ed Jerusalem iray totoo to?

¹² Lapud satan, benendisyonan nen Jehova iray totoo to. Nagmaliw ya mabiskeg so espiritualidad da, maksil so laman da, tan awalaan iray kareenan ya agda nin balot naeksperiensya ed abayag a panaon. (Esd. 6:19-22; Neh. 8:9-12; 12:27-30, 43) Akin et abendisyonan ira? Lapud tinumbok dan siansia iray matunong ya estandarte nen Jehova parad dugan panagdayew. Sinmabid puso na dakel ed sikara iray leksion ya naaralan dad pasingawey nipaakar ed templo. Kanian bilang sumaryo, nibaga tayo ya saray inawit ed Babilonia et agunggonaan ed pasingawey ya anengneng nen Ezequiel diad duaran importantin paraan. (1) Akaaral ira na praktikal iran leksion nipaakar ed estandarte parad dugan panagdayew tan no panon dan tumboken iratan ya estandarte. (2) Sakey itan ya  propesiyan mangiter na panamaseguro. Ipapasakbay na satan ya nipawil so dugan panagdayew, tan ipapasabi met na satan ya bendisyonan nen Jehova iray totoo to basta gagawaen da so dugan panagdayew. Balet natan, labay tayon naamtaan: Kasin walay kasumpalan na satan ya pasingawey diad panaon tayo?

13, 14. (a) Panon tayon amta ya say pasingawey ya anengneng nen Ezequiel nipaakar ed templo et walaay kasumpalan ed panaon tayo? (b) Diad anton duaran paraan ya makagunggona ed sikatayo natan so pasingawey? (Nengnengen met so kahon ya 13A, “Nandumaan a Templo, Nandumaan a Leksion.”)

¹³ Segurado tayo kasi ya onaplikad panaon tayo so pasingawey ya anengneng nen Ezequiel nipaakar ed templo? On! Imanoen so pamparehoan na pasingawey ya anengneng nen Ezequiel nipaakar ed sagradon abung na Dios ya walad “atagtagey a palandey” tan say propesiya nen Isaias ya “say palandey a kawalaan na abung nen Jehova et niletneg a malet ed tagey na saray toktok na kapalandeyan.” Espisipikon imbaga nen Isaias ya say propesiya to et walaan na kasumpalan diad “kasampotan a parte na saray agew,” odino “diad kaunoran iran agew.” (Eze. 40:2; Isa. 2:2-4; paimanod leksab; nengnengen met so Miqueas 4:1-4.) Sarayan propesiya et asumpal diad kaunoran iran agew nen niyatagey odino nipawil so dugan panagdayew manlapu lad 1919, ya singa impasen itan ed atagtagey a palandey. *

¹⁴ Segurado sirin ya say pasingawey ya anengneng nen Ezequiel et onaplika ed dugan panagdayew diad panaon tayo. Singa saray Judio ya inawit ed Babilonia nensaman, walay duaran paraan ya nagunggonaan tayo met natan ed sayan pasingawey. (1) Mangiiter itan na praktikal ya leksion no panon tayon tumboken iray estandarte nen Jehova parad dugan panagdayew. (2) Sakey itan ya propesiyan mamaseguro ed sikatayo ya nipawil so dugan panagdayew tan bendisyonan itayo nen Jehova.

15. Antoy nepeg tayon tandaan legan tayon iimanoen iray naaralan tayod pasingawey ya anengneng nen Ezequiel nipaakar ed templo?

¹⁵ Konsideraen tayo natan so arum ed saray espisipikon detalye na pasingawey ya anengneng nen Ezequiel. Imadyin mon kaiba tayoy Ezequiel diad pasingawey legan ya ompapasyar ed satan ya makapadinayew ya templo. Tandaan ya aliwan say baleg ya espiritual a templo so nanenengneng tayo; imbes, iimanoen ti labat iray naaralan tayo ya onaplika ed panagdayew tayo natan. Anto ray pigaran leksion ya naaralan tayo?

16. Antoy naaralan tayo ed detalyadon impansukat diad pasingawey ya anengneng nen Ezequiel? (Nengnengen so litrato ed gapo na kapitulo.)

¹⁶ Akin et detalyado so impansukat? Legan ya ombabantay si Ezequiel, say anghel ya singa gansa so itsura to et detalyado ton sinukat so templo, pati saray padir, puerta, kuarto na saray guardia, sular, tan say altar. Diad karakel na detalye, ompan nawetwet kad saratan. (Eze. 40:1–42:20; 43:13, 14) Balet isipen pa iray importantin punto ya naaralan tayod saratan ya detalye. Diad satan et talagan idadanet nen Jehova ya importante iray estandarte to. Sikato so mangiiter ed saratan, aliwan saray totoo. Saramay mangibabaga  ya ag-importante so paraan na panagdayew ed Dios et nalilingo. Tan diad samay detalyadon impansukat ed templo, mangiiter si Jehova na panamaseguro ya talagan nipawil so dugan panagdayew. Segurado ya eksakton nasumpal so amin ya promisa na Dios a singa saramay eksakton sukat. Apaseguroan sirin si Ezequiel ya say panangipawil ed dugan panagdayew diad kaunoran iran agew et nagawan nagawa!

17. Antoy nayarin ipanonot ed sikatayo na akapaliber a padir?

¹⁷ Say akapaliber a padir. Singa naaralan tayo la, anengneng nen Ezequiel so padir ya akapaliber ed interon dalin ya kawalaan na templo. Satan ya padir et seryoson panonot ya nepeg ya arawian na saray totoo na Dios so amin ya kagagawa na palson relihyon ya manutak ed abung to. (Basaen so Ezequiel 43:7-9.) Kakkaukolan tayo met so ontan ya simbawa natan! Kayarin nibulos iray totoo na Dios ed abayag ya espiritual ya impakaaripen ed Makapanyarin Babilonia, tinuro na Kristo so matoor tan makabat ya aripen nen 1919. Manlapu lad saman, lalon nansagpot iray totoo na Dios ya ekalen iray palson doktrina tan kagagawa ya alaokan na idolatriya tan pagano. Pansiasiansiaen tayo ya arawi ed dugan panagdayew iray espiritual ya karutakan. Diad tua, agtayo anggan mannenegosyo diad saray Kingdom Hall tayo, tan agtayo ilalaok iray ontan ya ag-importantin bengatla diad panagdayew tayo.​—Mar. 11:15, 16.

18, 19. (a) Antoy naaralan tayo ed saray atagtagey ya puerta diad templon anengneng nen Ezequiel? (b) Antoy nepeg ya reaksion tayo no wala ray mangiyabeba ed saray atagtagey ya estandarte nen Jehova? Mangiter na alimbawa.

¹⁸ Saray atagtagey a puerta. No nodnonoten tayo iramay atagtagey ya puertan anengneng nen Ezequiel, anto ray naaralan tayo? Diad satan ya parte na templon anengneng nen Ezequiel, seguradon naaralan na saray Judio ya saray estandarte nen Jehova ed moral et atagtagey. No ontan so iilaloan nen Jehova nensaman, natan balet ey? Mandadayew tayo ed baleg ya espiritual a templo nen Jehova. Agta lalon importante natan ya pansiansiaen tayon andiay pansimpisimpitan so kagagawa tayo? (Roma 12:9; 1 Ped. 1:14, 15) Diad sarayan kaunoran ya agew, tuloytuloy ya igigiya nen Jehova so totoo to pian natumbok da iray estandarte to ed moral. * Singa bilang, eekalen ed kongregasyon iray agmagbabawin nankasalanan. (1 Cor. 5:11-13) Sakey ni, saray kuarton parad guardia ya walad lolooban a dalan na saray puerta et nayarin mangipanonot ed sikatayo ya ag-awaten nen Jehova so panagdayew na saramay agto aabobonan. Singa bilang, anggano makaloob ed Kingdom Hall so sakey a toon doble panagbilay to, agto naala so panangabobon nen Jehova anggad agto ipetek so kagagawa to pian napaliket toy Dios. (Sant. 4:8) Talagan makaseguro tayo ya naprotektaan so dugan panagdayew diad sayan mundon abebbebay moralidad!

¹⁹ Ipapasakbay na Biblia ya magmaliw ya abebbebay moralidad na sayan mundo antis na anggaan. Oniay nabasa tayo: “Saray mauges a totoo tan saray impostor et magmaliw a lalon mauges, a mamapalikdo tan napapalikdo ira.” (2 Tim. 3:13) Ondarakel so totoo ya napapalikdo tan iisipen dan masyadon istrikto, daan la, odino  aliwa iray atagtagey ya estandarte nen Jehova. Kasin napalikdo ka met? Singa bilang, no walay mangombinse ed sika ya aliwa so estandarte na Dios nipaakar ed homoseksual ya kagagawa, kasin miabobon kad sikato? Odino miabobon kad si Jehova a Dios, ya diad Salita to et malinew ton ibabaga ya ‘manggagawa na mabanbanday’ iramay ontan so kagagawa ra? Papasakbayan itayo na Dios ya agtayo nepeg ya abobonan iray imoral ya kagagawa. (Roma 1:24-27, 32) No wala ray ontan ya isyu, maabig no nodnonoten tayo imay templon anengneng nen Ezequiel ya walaan na saray atagtagey a puerta, tan tandaan tayo: Ag-iyabeba nen Jehova iray matunong ya estandarte to, anggano antoy ibaga na sayan mauges a mundo. Kasin miabobon tayo ed Ama tayon walad tawen tan suportaan tayo no antoy duga?

20. Diad samay pasingawey ya anengneng nen Ezequiel, anto ray makapaseseg ya naaralan na “baleg ya ulop”?

²⁰ Saray sular. Seguradon aliketan si Ezequiel nen anengneng toy maawang ya paway a sular na templo, tan nayarin naisip toy karakel na totoon mandadayew ed si Jehova ya maliket ya mantitipon diman. Diad panaon tayo, mandadayew iray Kristiano ed mas sagradon pasen. Saramay kabiangan na “baleg ya ulop” ya mandadayew ed paway a sular na espiritual ya templo nen Jehova et napapaseseg ed saray naaaralan da ed pasingawey ya anengneng nen Ezequiel. (Apo. 7:9, 10, 14, 15) Anengneng nen Ezequiel ya saray sular et apaliberan na kuarton pananganan ya diman nayarin kanen na saray mandadayew so inawit dan bagat a pandurungoan. (Eze. 40:17) Nibagan singa ra midudungo ed si Jehova a Dios, tan  pakanengnengan itan ya kaaro to ra! Diad panaon tayo, agtayo la mangiyaapay na bagat a singa saray Judion walad silong na Mosaikon Ganggan. Imbes, mangiyaapay tayoy “bagat a panangidayew” sano mibibiang itayo ed dugan panagdayew, a singa diad panagkomento tan pangibabalikas tayoy pananisia tayo diad saray aral odino diad panagpulong. (Heb. 13:15) Napapabiskeg itayo met na espiritual a naakan ya itatarya nen Jehova. Agpankelawan ya mipara so nalilikna tayo ed saray anak nen Kora ya angansion parad si Jehova: “Say sakey agew ed saray sular na templom et magmaong ni nen say sanlibon agew ed arum a pasen!”—Sal. 84:10.

21. Antoy nayarin naaralan na saray alanaan a Kristiano nipaakar ed inkasaserdote diad pasingawey ya anengneng nen Ezequiel?

²¹ Say inkasaserdote. Anengneng nen Ezequiel ya wala ray puerta ya nayarin dalanen na saray saserdote tan Levita pian makaloob irad loob a sular tan naobserbaan to ya kaparpara iratan na saray puerta ya nayarin dalanen na saray arum a tribu pian makaloob irad paway a sular. Epektibo itan ya ilustrasyon pian napanonotan iray saserdote ya kaukolan da met ya tumboken iray estandarte nen Jehova parad dugan panagdayew. Kumusta natan ey? Agla natan ipapatawir ed saray lingkor na Dios so inkasaserdote. Imbes, oniay imbaga ed saray alanaan a Kristiano: “Sikayo so ‘pinilin kapolian, saray saserdote ya ari.’” (1 Ped. 2:9) Nensaman, saray saserdote ed Israel et mandadayew ed akabiig ya sular. Diad panaon tayo, saray alanaan a Kristiano et aliwan literal ya akabiig ed saray kapara dan mandadayew, balet walay espisyal ya relasyon dad si Jehova bilang tinagibi ya ananak to. (Gal. 4:4-6) Natulongan met iray alanaan ed saray naaralan dad pasingawey ya anengneng nen Ezequiel. Singa bilang, sankanonot da ya saray saserdote et kaukolan met ya simbawaen tan disiplinaen. Kaukolan ya tandaan na amin a Kristiano ya kabiangan itayo na “sakey a pulok” ya manlilingkor ed panangidaulo na “sakey a managpastol.”​—Basaen so Juan 10:16.

22, 23. (a) Antoy nayarin naaralan na saray elder ed samay pangulo ya abitla ed pasingawey ya anengneng nen Ezequiel? (b) Antoy nayarin nagawa ed arapen?

²² Say pangulo. Diad pasingawey ya anengneng nen Ezequiel, say pangulo et prominentin too. Sikatoy agnanlapud tribu na saray saserdote, tan diad templo et kaukolan toy manpasakop ed panangidaulo na saray saserdote. Balet, sikatoy mangidadaulo met ed saray totoo tan tutulongan to ran mangitarya na saray bagat. (Eze. 44:2, 3; 45:16, 17; 46:2) Kanian sikatoy maong ya alimbawa parad saray Kristianon lalaki natan ya walaan na responsabilidad ed kongregasyon. Tan tua itan ta anggan saray elder, kaiba iray ombiabiahen manangasikaso, et kaukolan ya lanang iran manpasakop ed matoor ya aripen. (Heb. 13:17) Mansasagpot iray elder pian tulongan so totoo na Dios ya mangiyapay na saray bagat na panangidayew da diad saray aral tan diad ministeryo. (Efe. 4:11, 12) Tan sankanonot na saray elder so impandisiplina nen Jehova ed saray pangulo ed Israel ya angabuso ed autoridad da. (Eze. 45:9) Ontan met natan, ag-iisipen na saray elder ya agda kaukolan so simbawa tan panangipetek. Imbes, papablien day amin ya pankanawnawa ya  napino ira nen Jehova pian magmaliw iran mas epektibo bilang managpastol tan manangasikaso.​—Basaen so 1 Pedro 5:1-3.

²³ Itultuloy nen Jehova so mangiter na saray kualipikado tan maaron manangasikaso anggan diad Paraison dalin. Dakel ya elder natan so nibagan nipapasal la no panon so pagmaliw ya matulong tan kualipikadon managpastol diad Paraiso. (Sal. 45:16) Agta makapaliket ya nodnonoten ya talagan bendisyon ed balon mundo iray ontan ya lalaki? Singa saray arum nin propesiya nipaakar ed panangipawil, nayarin mas onlinew ni so pakatalos tayo ed pasingawey ya anengneng nen Ezequiel diad panaon ya pinili nen Jehova. Ompan saray arum ya detalye ya agtayo ni tanton natalosan natan et walaan na eksayting ya kasumpalan diad arapen. Naamtaan tayo lanlamang itan.

24, 25. Panon ya inyilustra na pasingawey ya anengneng nen Ezequiel iray bendisyon nen Jehova ed totoo to no tumboken da ray estandarte to parad dugan panagdayew?

²⁴ Bilang konklusyon, pawilen tayo pa may sakey ya importantin agawa ed pasingawey ya anengneng nen Ezequiel. Linmoob si Jehova ed samay templo ed pasingawey, tan impromisa tod saray totoo to ya sikatoy mansiansia ditan basta matoor dan tumboken iray estandarte to parad dugan panagdayew. (Eze. 43:4-9) Antoy epekto na presensia nen Jehova ed saray totoo to tan ed dalin da?

²⁵ Dedeskribien na pasingawey iray bendisyon na Dios diad duaran makapaseseg ya propesiya: (1) Sakey ya ilog ya onaagus manlapud santuaryo na templo, ya mangiiter na bilay tan pabubunaen to so dalin; tan (2) inapag so dalin ed mauksoy tan eksakton paraan, tan impasen ed sentro iray bilding na templo tan saray sular na satan. Antoy kabaliksan na saratan ed sikatayo natan? Importante itan ta manbibilay tayod panaon ya linmoob lay Jehova ed mas sagradon paraan na panagdayew, say baleg ya espiritual a templo ya pinino tan inabobonan to. (Mal. 3:1-4) Aralen tayo irayan duaran propesiya diad Kapitulo 19 anggad 21 na sayan publikasyon.