1-3. Akin et maer-ermen si Ezequiel, tan antoy impuyan nen Jehova ya isulat to?

KOMANEM a taon ed saman manlapu la nen inawit si Ezequiel ed Babilonia. * Maer-ermen so propeta legan ton nononoten so mauges ya pananguley ed Juda, say binalegan ton dalin ya nilasus kilometro so kaarawi to. Nanduruman ari so nanuley diad panaon to.

² Niyanak si Ezequiel diad kapegleyan na uley na matoor ya si Arin Josias. Seguradon aliketan si Ezequiel nen naamtaan toy ginawa nen Josias ya impaneral ed saray imahen tan impangipawil ed dugan panagdayew diad Juda. (2 Awa. 34:1-8) Balet, agnanresultad permanentin pananguman so ginawa nen Josias, ta maslak ed saray sinmublay ed sikaton arari et nandayew ed saray idolo. Kanian agla pankelawan ya diad uley na saratan ya mauges ya arari et kinmapuy lan kinmapuy so espiritualidad tan moralidad na nasyon. Anggapo la kasi ilalo? Wala ni!

³ Pinuyanan nen Jehova so matoor a propeta to ya isulat so sakey a propesiya​—say unona ed dakel a propesiya—​nipaakar ed Mesias, say magmaliw ya Manuley tan Managpastol ya permanentin mangipawil ed dugan panagdayew tan maar-aron mangasikaso ed saray karnero nen Jehova. Maabig no aralen tayon maong irayan  propesiya, ta say kasumpalan na saraya et walay epekto tod andi-anggaan ya arapen tayo. Pantongtongan tayo sirin so apatiran Mesianikon propesiya ya walad libro na Ezequiel.

4. Anton propesiya so imbaga nen Ezequiel, tan panon ya impasabi nen Jehova itan ya propesiya?

⁴ Nen manga 612 B.C.E., sinmabi so “mensahe nen Jehova” ed si Ezequiel, tan imbaga to so propesiya a mangipapanengneng no panon kalaknab so panuley na Mesias tan no akin a kaukolan so panmatalek ed Panarian na Dios. Impasabi nen Jehova so propesiya diad impangiganggan To ed si Ezequiel ya mangibagay sakey a pabitla ed saray kapara ton Judio ed Babilonia. Ipanengneng na satan ya saray arari na Juda et anggapoy pananisia ra tan idanet na satan ya kaukolan so matunong ya Mesianikon Manuley.​—Eze. 17:1, 2.

5. Anto ray pigaran detalye na pabitla?

⁵ Basaen so Ezequiel 17:3-10. Nia ray pigaran detalye na pabitla: Pinuter na “baleg ya agila” so sankanguroan a simit na kiew a sedro tan inawit tod “syudad na saray negosyante.” Insan inala na agila so “arum a bini ed saman a dalin” tan intanem tod mabunan uma “ed abay na dakdakel a danum.” Tinmubo so bini, tan nagmaliw ya “onkukurong a sengeg na ubas.” Insan walay sinmabin sananey nin baleg ya “agila.” Mapilit ya inggawat na sengeg na ubas iray lamot to ed samay komaduan agila ta labay ton sikatoy niyalis tan nitanem ed arum a lugar ya dakdakel so danum. Ag-agustoan nen Jehova so ginawa na sengeg na ubas, tan imbaga ton nabagot iray lamot na satan tan “sigpot itan a namagaan.”

6. Ipaliwawa so kabaliksan na pabitla.

⁶ Antoy kabaliksan na pabitla? (Basaen so Ezequiel 17:11-15.) Nen 617 B.C.E., nilusob nen Arin Nabucodonosor na Babilonia (say unonan “baleg ya agila”) so Jerusalem. Pinuter to odino inekal tod trono so ari na Juda ya si Jehoiakin (say “sankanguroan a simit”) tan inawit tod Babilonia (“syudad na saray negosyante”). Si Zedekias (sakey ed saray “bini ed saman a dalin” odino ilalak na ari) so insalat nen Nabucodonosor pian manuley ed Jerusalem. Sayan balon ari na Juda et nansamba ed ngaran na Dios, kanian obligado ya manmatoor tan manpasakop ed Babilonia. (2 Awa. 36:13) Balet nileglemew nen Zedekias so samba to; nanrebelde ed Babilonia tan linmad Faraon na Ehipto (say komaduan baleg ya “agila”) pian onkerew na tulong na militar, pero agda lanlamang atulongan. Ag-agustoan nen Jehova so ginawa nen Zedekias ta agto tinoor so samba to. (Eze. 17:16-21) Kanian, nakal ed trono si Zedekias tan inatey diad prisoan ed Babilonia.​—Jer. 52:6-11.

7. Anto ray naaralan tayo ed pabitla?

⁷ Anto ray naaralan tayo ed pabitla? Unona, bilang mandadayew ed tuan Dios, kaukolan ya tooren tayo ray ibabaga tayo. “Komon ta say imbaga yon ‘On’ et on, tan say ‘Andi’ yo et andi,” so kuan nen Jesus. (Mat. 5:37) No bilang ta kaukolan tayoy mansamba  diad arapan na Dios ya ibaga so tua—singa diad pantestigo ed korte—ipasen tayo itan ya seryoso. Komadua, kaukolan tayoy manalwar no siopay panmatalekan tayo. Papasakbayan itayo na Biblia: “Agkayo manmamatalek ed saray prinsipe odino diad anak na too, ya agmakapangiliktar.”​—Sal. 146:3.

8-10. Panon ya indeskribe nen Jehova so onsabin Mesianikon Manuley, tan panon ya asumpal so propesiya? (Nengnengen met so kahon ya “Mesianikon Propesiya​—Say Mabunabunan Kiew a Sedro.”)

⁸ Balet walay sakey a manuley ya talagan manepeg ya panmatalekan tayo. Kayarin imbaga nen Jehova so pabitla nipaakar ed simit ya inawit tan intanem ed sananey a dalin, angusar si Jehova na parehon ilustrasyon pian ideskribe so onsabin Mesianikon Manuley.

⁹ No antoy ibabaga na propesiya. (Basaen so Ezequiel 17:22-24.) Natan et aliwan saray baleg ya agila so onkiwas noagta si Jehova ya mismo. Puteren to so malangwer a simit “ed toktok na atagey a kiew a sedro tan itanem [to] itan . . . ed atagey tan balbaleg a palandey.” Sayan simit et ombaleg tan manbunga, tan magmaliw ya “mabunabunan kiew a sedro” ya panayaman na “amin a klase na manok.” Diad satan et naamtaan na “amin a kakiewan ed uma” ya si Jehova so nampabuna ed sayan kiew.

¹⁰ No panon ya asumpal so propesiya. Pinuter nen Jehova so Anak to, si Jesu-Kristo, ed poli nen David ya panlalapuay arari (say “atagey a kiew a sedro”) tan intanem to ed Palandey Sion ed tawen (say “atagey tan balbaleg a palandey”). (Sal. 2:6; Jer. 23:5; Apo. 14:1) Inala nen Jehova so Anak to, ya ipapasen na saray kalaban to ya “sankaabebaan ed saray totoo,” tan inyatagey to diad impangiter toy “trono nen David ya ama to.” (Dan. 4:17; Luc. 1:32, 33) Singa say mabunabunan sedro, say Mesianikon Ari ya si Jesu-Kristo et magmaliw ya atagtagey, tan uleyan toy interon dalin tan mangiter na bendisyon ed amin ya sakop to. Sinmabin siansia so Manuley a napanmatalekan tayo. Diad silong na uley nen Jesus ed Panarian, saray maunor ya totoo ed interon mundo so “manayam ed kaligenan tan ag-ontakot ed antokaman ya irap.”​—Pro. 1:33.

11. Anto so importantin naaralan tayo ed propesiya nipaakar ed “malangwer a simit” ya nagmaliw a “mabunabunan kiew a sedro”?

¹¹ No antoy naaralan tayo ed propesiya. Lapud sayan balibalin propesiya nipaakar ed “malangwer a simit” ya nagmaliw a “mabunabunan kiew a sedro,” naebatan tayo so importantin tepet: Siopa so panmatalekan tayo? Aliwan maabig no manmatalek tayod saray gobierno na too tan say pakayari dad militar. Pian nawalaan tayoy tuan kaligenan, maabig no sigpot tayon manmatalek ed Mesianikon Ari, si Jesu-Kristo. Sikato so makayarin manuley ed gobierno ed tawen, say alenleneg ya ilalo na totoo.​—Apo. 11:15.

12. Panon ya impalinew nen Jehova ya agto nilingwanan so impisipanan tod si David?

¹² Nen impaliwawa nen Jehova imay pabitla nipaakar ed duaran agila, atalosan nen Ezequiel ya naekal ed trono si Zedekias, sakey ya agmatoor ya ari ed poli nen David, tan awiten ed Babilonia bilang aripen. Nayarin inisip na propeta, ‘Panon to la may impisipanan na  Dios ed si David, ya impromisa ton walay arin manlapud poli nen David ya manuley ed anggad angga?’ (2 Sam. 7:12, 16) No bilang et ontan so inisip nen Ezequiel, agla nanalagar na abayag parad ebat. Nen manga 611 B.C.E., diad komapiton taon manlapu la nen inawit irad Babilonia, legan ya manuuley ni Zedekias ed Juda, sinmabi ed si Ezequiel so “mensahe nen Jehova.” (Eze. 20:2) Impaisalaysay nen Jehova ed sikato so sakey nin Mesianikon propesiya, ya mangipalinew ya agnilingwanan na Dios so impisipanan tod si David. Imbes, ipapanengneng na propesiya ya say onsabin Mesianikon Manuley et makankanepegan ya manawir ed trono nen David.

13, 14. Anton propesiya so akasulat ed Ezequiel 21:25-27, tan panon itan ya asumpal?

¹³ No antoy ibabaga na propesiya. (Basaen so Ezequiel 21:25-27.) Panamegley nen Ezequiel, malinlinew ya impaarap nen Jehova so mensahe ed “mauges a pangulo na Israel” ta asabi lay panusa ed sikato. Imbaga nen Jehova ed sayan mauges ya manuley ya say “turbante” tan “korona” to (saray simbolo na pakayari na ari) et ekalen ed sikato. Insan, saray manuley ya ipapasen ya “abeba” et iyatagey, tan saramay ipapasen ya “atagey” et iyabeba. Saramay inyatagey et mantultuloy ya manuley anggad “onsabi imay makankanepegan,” insan iter nen Jehova ed sikato so Panarian.

 ¹⁴ No panon ya asumpal so propesiya. Nen aderal so Jerusalem nen 607 B.C.E., say ipapasen ya “atagey” ya panarian na Juda ya walad Jerusalem et inyabeba nen dineral na Babilonia itan ya syudad tan inekal dan ari si Zedekias insan da inawit bilang aripen. Lapud anggapo lay manuley ed Jerusalem ya manlapud poli nen David, say pananguley na saray Gentil ya ipapasen ya “abeba” et inyatagey, kanian sikara lay angontrol ed interon dalin—balet diad limitadon panaon labat. Anampot so Panaon na saray Gentil, odino say “aturon panaon na saray nasyon,” nen 1914 sanen inter nen Jehova so pananguley ed si Jesu-Kristo. (Luc. 21:24) Lapud ilalak nen Arin David si Jesus, sikatoy talagan “makankanepegan” ed Mesianikon Panarian. * (Gen. 49:10) Kanian panamegley nen Jesus et sinumpal nen Jehova so promisa tod si David ya sakey ed saray ilalak to so permanentin manawir ed agmangangga ya Panarian.​—Luc. 1:32, 33.

15. Akin et talagan napanmatalekan tayo so Ari, si Jesu-Kristo?

¹⁵ No antoy naaralan tayo ed propesiya. Talagan napanmatalekan tayo so Ari, si Jesu-Kristo. Akin? Lapud si Jesus et ag-imboto na totoo tan agnansamsam na pakayari ya singa nayarin gawaen na saray manuley na mundo, noagta sikatoy pinili nen Jehova tan  “niiter ed sikato so . . . panarian” ya kanepegan ton uleyan. (Dan. 7:13, 14) Talagan say Ari ya tinuron mismo nen Jehova so manepeg ya panmatalekan tayo!

16. Antoy nalilikna nen Jehova ed saray karnero to, tan panon so impantrato na “saray managpastol na Israel” ed pulok nen panaon nen Ezequiel?

¹⁶ Talagan iyaansakit nen Jehova, say Sankatagyan a Managpastol, iray karnero to—saray mandadayew ed sikato diad dalin. (Sal. 100:3) No ipapaasikaso to ray karnero to ed saray totoon katulongan ya managpastol—saramay inikdan toy autoridad—iimanoen ton maong no panon dan tratratoen iray karnero to. Kanian isipen pay alikna nen Jehova ed “saray managpastol na Israel” nen panaon nen Ezequiel. Saraman ya lider et anggapoy baing ya nanuley diad “maruksa tan masebeg a paraan.” Kanian nanirap so pulok tan tinaynan na dakel so dugan panagdayew.​—Eze. 34:1-6.

17. Panon ya inliktar nen Jehova iray karnero to?

¹⁷ Antoy gawaen nen Jehova? “Singilen ko ra,” so kuan to nipaakar ed saray maruksan manuley na Israel. Insan to impromisa: “Iliktar ko iray karnerok.” (Eze. 34:10) Naynay ya totooren nen Jehova so ibabaga to. (Jos. 21:45) Nen 607 B.C.E., inliktar to iray karnero to diad impangusar tod saray linmusob ya taga Babilonia pian ekalen so pananguley na saray makasarilin managpastol. Kayari pitomplon taon, inliktar to ray singa karneron mandadayew ed sikato ya walad Babilonia tan impawil to ra ed dalin da pian nipawil so dugan panagdayew diman. Balet siansia nin aliwan maligen iray karnero nen Jehova, ta wala ni rad pakauley na saray makapanyarin nasyon ed mundo. Saray “aturon panaon na saray nasyon” et mantultuloy ni ed loob na nilasus a taon.​—Luc. 21:24.

18, 19. Antoy impropesiya nen Ezequiel nen 606 B.C.E.? (Nengnengen so litrato ed gapo na kapitulo.)

¹⁸ Nen 606 B.C.E., manga sakey taon kayarin aderal so Jerusalem tan pigaran dekada antis ya nibulos iray Israelita ed Babilonia, pinuyanan nen Jehova si Ezequiel ya mangibaga na propesiya. Ipapanengneng na satan ya talagan iyaansakit na Sankatagyan a Managpastol iray karnero to tan labay ton manbilay ira ya anggapoy anggaan. Idedeskribe na propesiya no panon ya pastolan na Mesianikon Manuley iray karnero nen Jehova.

¹⁹ No antoy ibabaga na propesiya. (Basaen so Ezequiel 34:22-24.) “Patalindegen [na Dios] so sakey a managpastol,” ya tinawag ton “say lingkor kon si David.” Ipapanengneng na saray salitan “sakey a managpastol” tan “say lingkor” ya saksakey tan permanente so Manuley ya manawir ed trono nen David, aliwa lan mantutumbokan ya manuley ya manlapud poli nen David. Sayan Manuley tan Managpastol et pakanen to ray karnero na Dios tan magmaliw ya “pangulo ed limog da.” “Misipanan” si Jehova na “sakey a sipanan na kareenan” ed saray karnero to. “Onuran na bendisyon” ed sikara tan makapaliket so kipapasen da ta walaan ira na kaligenan, tan balibali tan maaligwas so bilay da. Talagan wala lay kareenan  ed limog na totoo, tan anggan diad baetan na totoo tan ayayep!—Eze. 34:25-28.

20, 21. (a) Panon ya asumpal so propesiya nipaakar ed “say lingkor kon si David”? (b) Diad arapen, antoy kasumpalan na samay imbaga nen Ezequiel nipaakar ed “sakey a sipanan na kareenan”?

²⁰ No panon ya asumpal so propesiya. Tinawag na Dios so Manuley ya “say lingkor kon si David,” ya say tutukoyen To ed sayan propesiya et si Jesus, ta sikatoy ilalak nen David ya makankanepegan ya manuley. (Sal. 89:35, 36) Nen wadia ed dalin si Jesus, sikatoy nagmaliw ya “maong a managpastol,” tan inter toy bilay to “parad saray karnero.” (Juan 10:14, 15) Balet, anggano wala lad tawen natan, sikatoy siansia nin sakey a Managpastol. (Heb. 13:20) Nen 1914, introno na Dios si Jesus bilang Ari tan inmatalek To ed sikato so responsabilidad ya manpastol tan mamakan ed saray karnero To ed dalin. Ag-abayag, nen 1919, say balon nitronon Ari et anuro na “matoor tan makabat ya aripen” ya mamakan ed “saray lingkor na sankaabungan”—saray matoor ya mandadayew ed Dios ya walaay ilalon manbilay balanglan diad tawen odino diad dalin. (Mat. 24:45-47) Diad panangidaulo na Kristo, say matoor ya aripen et tuloytuloy a mangiiter na dakel ya espiritual ya naakan ed saray karnero na Dios. Akatulong iya pian niwalay kareenan tan kaligenan diad espiritual ya paraiso ya naeeksperiensya da la natan.

²¹ Diad arapen, antoy kasumpalan na samay imbaga nen Ezequiel nipaakar ed “sakey a sipanan na kareenan” tan iyuran na bendisyon? Diad balon mundo, naeksperiensya na saray tuan mandadayew ed si Jehova diad dalin so dakel ya bendisyon na “sipanan na kareenan.” Manbilay iray matoor ya totoo ed literal ya paraiso diad interon mundo, tan agla ran balot napeligro na guerra, krimen, eras, sakit, tan masebeg iran ayayep. (Isa. 11:6-9; 35:5, 6; 65:21-23) Agka ta naliliketan ed ilalo ya manbilay ya anggapoy anggaan diad paraison dalin, tan saray karnero na Dios et ‘manayam ed kaligenan, ya anggapoy manaktakot ed sikara’?​—Eze. 34:28.

22. Antoy nalilikna nen Jesus ed saray karnero, tan panon ya naalig na saray katulongan ya managpastol so panangiyansakit to?

²² No antoy naaralan tayo ed propesiya. Singa say Ama to, talagan iyaansakit nen Jesus iray karnero. Seseguroen na sayan Ari tan Managpastol ya napapakan a maong ed espiritual iray karnero na Ama to tan naeeksperiensya day kareenan tan kaligenan diad espiritual ya paraiso. Talagan makapaliket so walad panangasikaso na ontan ya Manuley! Kaukolan met ya aligen na saray katulongan a managpastol so panangiyansakit nen Jesus ed saray karnero. Nepeg ya “mabulos” tan “labalabay” ya pastolan na saray elder so pulok tan magmaliw iran alimbawa ed saray karnero. (1 Ped. 5:2, 3) Komon ta agbalot mamaltratoen na elder so sakey ed saray karnero nen Jehova! Tandaan so imbaga nen Jehova ed saray maruksan managpastol na Israel ed panaon nen Ezequiel: “Singilen ko ra.” (Eze. 34:10) Iimanoen a maong na Sankatagyan a Managpastol tan na Anak to no panon ya tratratoen iray karnero to.

23. Antoy impromisa nen Jehova nipaakar ed pankasakey na nasyon na Israel, tan panon to itan ya sinumpal?

²³ Labay nen Jehova ya manlingkor a nankakasakey iray mandadayew ed sikato. Diad sakey a propesiya nipaakar ed panangipawil, impromisa na Dios ya tiponen to ray totoo to—saray datin kabiangan na duaran tribu ya panarian na Juda tan samploran tribu ya panarian na Israel—tan pankasakeyen to ra bilang “sakey a nasyon,” ya singa duaran “bislak” ya “magmaliw iran saksakey” ed lima to. (Eze. 37:15-23) Unonan asumpal iyan propesiya nen impankasakey na Dios so Israel tan impawil to ra ed Insipan a Dalin nen 537 B.C.E. * Balet melag labat itan ya impankasakey ta diad arapen et walay nagawan mas baleg tan permanentin pankakasakey. Kayarin impromisa nen Jehova ya pankasakeyen so Israel, inter tod si Ezequiel so sakey a propesiya nipaakar ed no panon ya permanentin pankasakeyen na onsabin Manuley iray tuan mandadayew ed Dios diad interon dalin.

24. Panon ya deneskribe nen Jehova so Mesianikon Manuley, tan antoy nibaga tayod panuley na sayan Ari?

²⁴ No antoy ibabaga na propesiya. (Basaen so Ezequiel 37:24-28.) Tinukoy lamet nen Jehova so Mesianikon Manuley bilang “si David a lingkor ko,” “saksakey a pastol,” tan “pangulo,” balet tinawag met nen Jehova ya “ari” iyan impromisa ton manuley. (Eze. 37:22) Antoy nibaga tayod panuley na sayan Ari? Say panuley to et permanente. Ipapanengneng na impangusar ed salitan “andi-anggaan”  ya agmanampot iray bendisyon ed uley na sayan Ari. * Walay pankakasakey diad uley to. Diad silong na uley na “saksakey ya ari,” saksakey iran “ganggan” so tumboken na saray matoor ya sakop to tan mankakasakey iran ‘manayam ed dalin.’ Diad uley na Ari, mas onapit iray sakop to ed si Jehova a Dios. Misipanan si Jehova na “sakey a sipanan na kareenan” ed saray sakop na Ari. Si Jehova so magmaliw a Dios da, tan magmaliw iran totoo to. Tan say santuaryo to et “walad pegley da diad andi-anggaan.”

25. Panon ya asumpal so propesiya nipaakar ed Mesianikon Ari?

²⁵ No panon ya asumpal so propesiya. Nen 1919, saray alanaan et nagmaliw ya walad panangidaulo na “sakey a managpastol,” say Mesianikon Ari, si Jesu-Kristo. Insan, say “baleg ya ulop” a nanlapu “ed amin a nasyon tan tribu tan rasa tan lenguahe” et akikasakey ed saray kapananisiaan dan alanaan. (Apo. 7:9) Nagmaliw irayan “sakey a pulok” diad panangidaulo na “sakey a managpastol.” (Juan 10:16) Balanglan say ilalo ra et manbilay ed tawen odino ed dalin, amin da et manguunor ed saray ganggan nen Jehova. Kanian naeeksperiensya ra so espiritual a paraiso bilang nankakasakey a sanaagi ed interon dalin. Benendisyonan ira nen Jehova na kareenan, tan walad pegley da so santuaryo to, ya mangirerepresenta ed dugan panagdayew. Si Jehova so Dios da, tan proud ira ta sikatoy dadayewen da​—natan tan anggad angga!

26. Panon kan makapitulongan pian napansiansia so pankakasakey diad espiritual ya paraiso?

 ²⁶ No antoy naaralan tayo ed propesiya. Pribilehyo tayo so makapikasakey ed saray agagi ed interon mundo ya mandadayew ed si Jehova ed dugan paraan. Balet, kaibad satan ya pribilehyo so sakey a responsabilidad—say pitulongan tayo pian napansiansia so pankakasakey. Kaukolan tayon amin ya gawaen so betang tayo pian mansiansia tayon manpapakna ed pananisia tan ed saray gagawaen tayo. (1 Cor. 1:10) Kanian nepeg ya parehon espiritual ya naakan so maseet tayon kanen, parehon estandarte ed Biblia so pangibasiyan tayod kakikiwas tayo, tan parehon importantin kimey ya pangipulong ed Panarian tan panagbangat ed Biblia so pibiangan tayo. Balet say talagan importante pian napansiansia so pankakasakey tayo et say aro. No pansasagpotan tayon paaligwasen so panangaro tayo tan ipanengneng iray dakel ya aspekto na satan—kaiba lay empatya, panangabagey, tan panamerdona—makapitulongan tayod pankakasakey tayo. Kuan na Biblia ya say “aro . . . so perpekton bedber na pankakasakey.”​—Col. 3:12-14; 1 Cor. 13:4-7.

27. (a) Antoy nibagam ed saray Mesianikon propesiya ed libro na Ezequiel? (b) Antoy aralen tayo ed saray onsublay ya kapitulo?

²⁷ Talagan misalsalamat tayo ed saray Mesianikon propesiya ya walad libro na Ezequiel! No basaen tan dalepdepen tayo irayan propesiya, naaralan tayo ya say inad-aro tayon Ari, si Jesu-Kristo, so nepeg ya panmatalekan tayo. Naaralan tayo met ya sikato so makankanepegan ya manuley, maaron manpapastol, tan manproprotekta ed sikatayo pian mansiansia so pankakasakey tayo ed andi-anggaan. Baleg ya pribilehyo so pagmaliw tayon sakop na Mesianikon Ari! Tandaan tayo ya sarayan Mesianikon propesiya et kabiangan na manunan tema ya panangipawil ya ipapaamta ed libro na Biblia ya Ezequiel. Si Jesus so usaren nen Jehova pian tiponen iray totoo To tan ipawil ed sikara so dugan panagdayew. (Eze. 20:41) Diad onsublay iran kapitulo na sayan publikasyon, aralen tayo itan ya balibalin tema ya panangipawil tan no panon itan ya nipaamta ed libro na Ezequiel.