1-3. Panon ya binalaw na saray taga Babilonia iray mandadayew ed si Jehova, tan akin?

IMADYIN mon sakey kad saray matoor a Judio ya manaayam ed syudad na Babilonia. Manga limamplon taon kayo lan wadtan bilang aripen. Singa datin gagawaen mo kada agew na Sabaton, oonla kan mitipon ed saray kapananisiaan mo pian mandayew ed si Jehova. Dinmalan kad matoo iran karsada, tan adalanan mo ray angkakabaleg ya templo pati saray agnabilang ya sagradon pasen na saray taga Babilonia. Ondadagsa iray totoo ed saratan ya pasen pian mangiyapay tan mangansion parad saray dios da ya singa si Marduk.

² Nen akaarawi ka lad dakel a totoo, anengneng moy pigaran kapananisiaan mo. * Akalmo kayoy mareen a pasen—nayarin diad abay na sakey ed saray ilog na syudad—pian makapanpikasi, mangansion na saray salmo, tan saniiban dalepdepen so Salita na Dios. Legan kayon manpipikasi, narerengel moy panateet na saray akataker ya baloto diad gilig na ilog. Nainawaan ka ta anggan panon et mareen ditan. Iisipen mo ya agkayo komon naalmo na saray totoo ditan tan agda guloen so pantitipon yo, a singa aminpiga da lan ginawa. Akin et ontay gagawaen da?

 ³ Dakel lan guerra so analoan na Babilonia, tan say amta na saray totoo ditan et mabiskeg so syudad da lapud saray palson dios da. Parad sikara, say impakaderal na Jerusalem et prueba ya mas mabiskeg so dios dan si Marduk nen si Jehova! Kanian babalawen da kayo tan say Dios yo. No maminsan, oniay ikakantiaw dad sikayo: “Kansionan yo kami na sakey ed saray kansion nipaakar ed Sion”! (Sal. 137:3) Dakel ed saray salmo et nipaakar ed selebrasyon lapud tinalo na Sion, odino Jerusalem, iray kalaban nen Jehova. Nayarin sarayan salmo so labalabay ya balawen na saray taga Babilonia. Tan wala ray salmo ya nipaakar ed saray taga Babilonia a mismo. Singa bilang, oniay sakey ed saratan: “Ginawa ran bunton na saray geray so Jerusalem. . . . Leleglemewen tan eelek-elekan kami na saray akapaliber ed sikami.”​—Sal. 79:1, 3, 4.

4, 5. Anton ilalo so iiter na propesiya nen Ezequiel, tan antoy aralen tayo ed sayan kapitulo? (Nengnengen so litrato ed gapo na kapitulo.)

⁴ Wala ra met so apostatan Judio ya mamabalaw ed pananisia yod si Jehova tan ed saray propeta to. Anggano balbalawen da kayo, naliligliwa ka tan say pamilyam lapud dugan panagdayew. Balibali liknaan yo no manpipikasi tan mangakansion kayon saniiba. Makapakalma so panagbasa na Salitay Dios. (Sal. 94:19; Roma 15:4) Imadyin mo ya diad sayan agew, walay espisyal ya inawit na sakey ed saray kaparam ya managdayew—sakey a lukot ya akasulatan na propesiya nen Ezequiel. Labalabay mon dengelen so promisa nen Jehova ya ipawil to ray totoo to ed dalin da. Malikeliket mon dedengelen so pambabasan maksil ed ontan iran propesiya, tan nadadalepdep moy ilalo ya onsabi panaon et makapawil kayo lan sankapamilya tan makatulong kayo ed satan ya marakdakep a panangipawil!

⁵ Say propesiya nen Ezequiel et napnoy promisa nipaakar ed panangipawil. Aralen tayo itan ya tema ya mangiiter na ilalo. Panon ya asumpal iratan ya promisa ed saray Judion inawit ed Babilonia? Antoy kaimportantian na saratan ya propesiya ed panaon tayo? Aralen tayo met iray arum ed saratan ya propesiya a walaan na unor ya kasumpalan diad arapen.

6. Panon ya aminpigan pinasakbayan na Dios iray totoo ton manrerebelde?

⁶ Panamegley nen Ezequiel, malinew ya impaamta nen Jehova ed saray totoo to no panon to ran dusaen lapud impanrebelde ra. “Ibantak ira ed arum a dalin, tan naaripen ira,” so kuan nen Jehova. (Eze. 12:11) Singa naamtaan tayod Kapitulo 6 na sayan publikasyon, inyakto ni ingen nen Ezequiel itan ya panangukom. Balet aliwan sikato so sankaunaan ya angipasabi na ontan ya pasakbay. Manlapu la nen panaon nen Moises, ngalngali sanlibon taon so apalabas, pinasakbayan la nen Jehova iray totoo to ya no itultuloy day manrebelde, ibantak irad arum ya dalin. (Deu. 28:36, 37)  Ontan met so impasakbay na saray propeta ya singa si Isaias tan Jeremias.​—Isa. 39:5-7; Jer. 20:3-6.

7. Panon ya dinusa nen Jehova iray totoo to?

⁷ Balet makapaermen ta agdinengel na maslak a totoo nen Jehova iratan ya pasakbay. Sinmabi panaon, asakitay puso to lapud impanrebelde, panag-idolatriya, ag-impanmatoor, tan kaugsan na totoo to ya inimpluensyaan na saray mauges ya managpastol. Kanian inabuloyan to ran naerasan​—ya satan et mair-irap tan makapabaing, lalo la ta dati et “manag-agus so gatas tan dilo” diad dalin da. (Eze. 20:6, 7) Insan, singa abayag lan impasakbay nen Jehova, inabuloyan ton nibantak ed arum a dalin iray benger ya totoo to bilang dusa. Nen 607 B.C.E., dineral nen Nabucodonosor na Babilonia so Jerusalem tan say templo ditan, say unor tan sankagrabian ya impangataki to. Saray nilibon akaliktar ya Judio et inawit ed Babilonia bilang aripen. Diman et binabalaw tan sinumpa ira a singa adeskribe ed gapo na sayan kapitulo.

8, 9. Panon ya angiter so Dios na pasakbay ed Kristianon kongregasyon nipaakar ed apostasya?

⁸ Wala kasi piparaan na saray Judion inawit ed Babilonia tan say Kristianon kongregasyon? On, wala! Singa saray Judio nensaman, pinasakbayan met iray papatumbok na Kristo. Diad bandad gapo na ministeryo nen Jesus, imbaga to: “Manalwar kayo ed saray palson propeta ya oonla ed sikayo a mankunkunwarin karnero, balet ta diad tua et sikaray masisiban lobo.” (Mat. 7:15) Kalabas na pigaran taon, pinuyanan si apostol Pablo ya mangiter na pasakbay ya miparad satan: “Amtak a sano anggapo ak la et onloob ed limog yo iray masesebeg a lobo tan agda kasian so pulok, tan diad limog yo et wala ray lalakin ontalindeg tan pikeweten da so katuaan pian kombinsien iray disipulo ya ontumbok ed sikara.”​—Gawa 20:29, 30.

⁹ Imbangat iray Kristiano no panon dan nabirbir tan napaliisan iray ontan ya totoo ya mauges so impluensya ra. Ingganggan iray Kristianon mamatatken ya ekalen ed kongregasyon iray apostata. (1 Tim. 1:19; 2 Tim. 2:16-19; 2 Ped. 2:1-3; 2 Juan 10) Balet, singa agawa ed Israel tan Juda nensaman, sinmabi panaon ya agla dengelen na dakel ya Kristiano iray maaron pasakbay. Diad sampot na unonan siglo, akaloob lay apostasya ed kongregasyon. Anengneng nen Juan, say akeran apostol ya mabilay ni diad sampot na unonan siglo C.E., ya naimpluensyaan lay kongregasyon na ontan ya kaugsan tan dakdakel so nagagawan panagrebelde. Sikato labat lay akeran mangaamper ed ikayat na satan ya kaugsan. (2 Tes. 2:6-8; 1 Juan 2:18) Antoy agawa nen inatey lay Juan?

10, 11. Panon ya asumpal so parabolo nen Jesus nipaakar ed trigo tan sisanyas manlapu la nen komaduan siglo C.E. ya manpatuloy?

¹⁰ Nen inatey lay Juan, ginmapon agawa so parabolo nen Jesus nipaakar ed trigo tan sisanyas. (Basaen so Mateo 13:24-30.) Singa impasakbay la nen Jesus, say kongregasyon et sinibwagan nen Satanas na “saray sisanyas” odino saray peke ya Kristiano, tan  maples ya kinmayat so kaugsan ed kongregasyon. Seguradon asakitan si Jehova ta say kongregasyon ya inletneg na Anak to et adutakan lapud idolatriya tan pagano iran selebrasyon tan ritual! Adutakan met so kongregasyon lapud saray palson doktrina na edukadon totoo ya agmandadayew ed Dios tan saray doktrina na relihyon ya konektado ed si Satanas. Antoy ginawa nen Jehova? Singa ginawa tod agmatoor ya Israel nensaman, inabuloyan to ray totoo to ya naaripen. Manlapu nen komaduan siglo C.E. ya manpatuloy, mairap ya nibiig iray singa trigo ya Kristiano ta dakdakel iray peke ya Kristiano. Say tuan Kristianon kongregasyon et nibagan naaripen na Makapanyarin Babilonia, say empiryo na palson relihyon ed interon mundo. Saray peke ya Kristiano balet et nagmaliw a kabiangan na satan a mauges ya empiryo. Legan ya ondadakel iray peke ya Kristiano, aporma so Kakristianoan.

¹¹ Diad saraman ya siglo ya mabisbiskeg so impluensya na Kakristianoan, wala nin siansia iray pigaran tuan Kristiano, saray “trigo” ed parabolo nen Jesus. Singa saray naaripen ya Judio ya abitlad Ezequiel 6:9, anonotan day tuan Dios. Wala ray makpel ya kinmontra ed saray palson doktrina na Kakristianoan. Kanian binalaw tan pinairap da ra. Kasin paulyanan la nen Jehova iray totoo to ed limog na palson relihyon? Andi! Singa agawad saray Israelita  nensaman, dugaruga labat so karukey tan paraan na impanpasnok nen Jehova. (Jer. 46:28) Sakey ni, inikdan to na ilalo iray totoo to. Pawilen tayo pa iramay Judion inawit ed Babilonia nensaman tan nengnengen tayo no panon iran inikdan nen Jehova na ilalo ya manampot so impakaaripen da.

12, 13. Akin et mangangga lanlamang so sanok nen Jehova ed saray naaripen ya totoo to ed panaon nen Ezequiel?

¹² Diretsaan ya imbaga nen Jehova so pasnok tod totoo to, balet pinaseguroan to met ira ya aliwan tuloytuloy so matunong ya sanok to. Singa bilang, imanoen so imbaga to: “Mangangga lay pasnok ko tan onkepa so sanok kod sikara, tan napenek ak. Tan sano nipatnag ko lay sanok kod sikara, naamtaan da a siak, si Jehova, so nansalita lapud kakaukolanen kon siak labat so dayewen da.” (Eze. 5:13) Akin et mangangga lanlamang so sanok nen Jehova?

¹³ Wala ray matoor ya Judion inawit ed Babilonia ya akapila ed saramay aliwan matoor. Ontan met, panamegley nen Ezequiel, impasakbay na Dios ya magbabawi so arum ed saray totoo To legan dan walad Babilonia. Isalaysay na saratan ya magbabawin Judio iray makapabaing ya ginawa da nen nanrebelde rad si Jehova, tan mikasi ra ya perdonaen tan abobonan to ra. (Eze. 6:8-10; 12:16) Sakey si Ezequiel ed saray matoor ya totoo to, tan ontan met  si propetan Daniel tan saray taloran kaiba to. Diad tua, lapud andukey so impanbilay nen Daniel, naimatonan toy inggapo tan impanampot na impakaaripen dad Babilonia. Nabasad Daniel kapitulo 9 so impapuson pikakasi to nipaakar ed pagbabawi to parad saray kasalanan na Israel. Seguradon say nalilikna to et parehod nalilikna na nilibon naaripen ya Judio ya manpipilalek a perdonaen ira nen Jehova tan bendisyonan to ra lamet. Makapaliket sirin iray pinuyanan ya promisa ya insulat nen Ezequiel nipaakar ed kibulos tan panangipawil!

14. Akin et ipawil nen Jehova iray totoo to ed dalin da?

¹⁴ Balet wala ni mas importantin rason no akin ya nibulos tan nipawil so dugan panagdayew ed totoo nen Jehova nensaman. Manampot so abayag ya impakaaripen da, aliwan lapud kanepegan day nibulos, noagta panaon la lamet pian pasantosen nen Jehova so mismon ngaran to ed amin a nasyon. (Eze. 36:22) Naamtaan na saraman ya taga Babilonia ya agbalot naparaan na saray palson dios da, a singa si Marduk, so Soberanon Katawan a Jehova! Konsideraen tayo so limaran promisa ya impuyan nen Jehova ya ibaga nen Ezequiel ed saray kaiba ton Judio diad Babilonia. Unona, pantongtongan tayo no antoy epekto na kada promisa ed saraman ya matoor a Judio. Insan, nengnengen tayo no antoy mas baleg ya kasumpalan na saraman ya promisa.

15. Anton pananguman so nagawa ed paraan na panagdayew na saray ompawil ed Jerusalem?

¹⁵ UNONAN PROMISA. Anggapo lay idolatriya odino arum nin makapadimlan kagagawa ya mikonektaan ed palson relihyon. (Basaen so Ezequiel 11:18; 12:24.) Naaralan tayod Kapitulo 5 na sayan publikasyon ya say Jerusalem tan say templo to et naimpluensyaan na kagagawa na palson relihyon, ya singa say idolatriya. Kanian saray totoo et nagmaliw a mauges, a tinaynan day Jehova. Panamegley nen Ezequiel, impasakbay nen Jehova ya onsabi panaon et makapibiang lamet ed malinis a panagdayew iray totoo ton inawit ed Babilonia. Say arum nin bendisyon nipaakar ed panangipawil et akadepende ed sayan importantin  nagawa: say pangipawil ed uksoyan na Dios parad dugan panagdayew.

16. Antoy impromisa nen Jehova nipaakar ed dalin na saray totoo to?

¹⁶ KOMADUAN PROMISA. Ompawil irad dalin da. “Iter kod sikayo so dalin na Israel,” so kuan nen Jehova ed saray naaripen ya totoo to. (Eze. 11:17) Makapakelaw iyan promisa ta lapud panangaripen tan pamabalaw na saray taga Babilonia ed totoo na Dios, naandian la ray ilalo ya makapawil ed pinabpabli dan dalin. (Isa. 14:4, 17) Niarum ni, no mansiansia ran matoor, magmaliw ya mabuna so dalin da tan dakel so produkto ya napawala na satan kanian walay pambilay da tan kimeyan da. Agda lan balot naeksperiensya so kababaingan tan irap lapud eras.​—Basaen so Ezequiel 36:30.

17. Antoy nagawa ed panangiyapay ed si Jehova?

¹⁷ KOMATLON PROMISA. Iyapay lamet iray bagat diad altar nen Jehova. Naaralan tayod Kapitulo 2 na sayan publikasyon ya base ed Ganggan, saray bagat et importantin kabiangan na dugan panagdayew. No mansiansian maunor tan malinis ed espiritual iray ompawil ya Judio, awaten nen Jehova iray apay da. Diad ontan et nasakbongan iray kasalanan da tan mansiansia ran maapit ed Dios da. Impromisa nen Jehova: “Ditan so panlingkoran ed siak na amin a walad interon sankaabungan na Israel diad sayan dalin. Ditan et abobonan ta kayo, tan kerewen ko ray kontribusyon yo tan saray sankaabigan ya apay yo, amin a masanton bengatla a walad sikayo.” (Eze. 20:40) Talagan nipawil so dugan panagdayew ya mangiter na bendisyon ed totoo na Dios.

18. Panon ya pastolan nen Jehova iray totoo to?

¹⁸ KOMAPAT YA PROMISA. Ekalen iray mauges ya managpastol. Say sakey ya rason no akin ya nankasalanan iray totoo na Dios et lapud impluensya na saray mauges a lalaki ya mangidadaulo. Impromisa nen Jehova ya umanen to itan. Oniay imbaga to nipaakar ed saratan ya mauges ya managpastol: “Ekalen ko ra bilang managpakan na saray karnerok . . . Iliktar ko iray karnerok manlapud sangi ra.” Tan oniay impaseguro tod saray matoor ya totoo to:  “Asikasoen ko iray karnerok.” (Eze. 34:10, 12) Panon ton gawaen itan? Usaren to ray matoor ya lalaki bilang managpastol.

19. Antoy impromisa nen Jehova nipaakar ed pankakasakey?

¹⁹ KOMALIMAN PROMISA. Mankakasakey iray mandadayew ed si Jehova. Isipen pay impakaaburido na saray matoor ya mandadayew ed Dios nen anengneng day agpankakasakey na saray totoo to antis nin linmusob so Babilonia. Naimpluensyaan na saray palson propeta tan mauges a managpastol iray totoo kanian nanrebelde irad saray matoor ya propeta ya angirepresenta ed si Jehova; naapag ni ingen iray totoo ed mankokontraan ya grupo. Kanian say sakey ed saray makapalikliket ya nagawa ed panangipawil et sayan promisa to panamegley nen Ezequiel: “Ikdan ko ra na nankakasakey a puso, tan iyan kod sikara so balon espiritu.” (Eze. 11:19) No mansiansian maapit ed si Jehova tan mankakasakey iray ompawil a Judio, anggapoy kalaban ya makatalo ed sikara. Bilang nasyon, niiter da lamet so gloria ed si Jehova imbes ya kabalawan tan kababaingan.

20, 21. Panon ya asumpal iray promisa na Dios ed saray nibulos ya Judio ya pinmawil ed dalin da?

²⁰ Asumpal kasi iratan ya limaran promisa ed saray nibulos ya Judio ya pinmawil ed dalin da? Tandaan tayo imay imbaga nensaman na matoor ya si Josue: “Anggapoy anggan sakey a salita ed  amin ya insipan nen Jehova a Dios yo ya agtinmua. Tinmua iratan ya amin ed sikayo. Anggapoy anggan sakey a salita ya agtinmua.” (Jos. 23:14) Tinoor nen Jehova iray promisa to ed panaon nen Josue, kanian seguradon tinoor to met so promisa tod saray Judio ya pinmawil ed dalin da.

²¹ Intunda na saray Judio so pandadayew dad saray idolo tan arum nin makapadimla ya kagagawa na palson relihyon ya angiyarawi ed sikara ed si Jehova. Anggano singa imposible, akapanayam lamet ira ed dalin da, inasikaso da itan tan nagmaliw ya maliket so bilay da. Sakey ed saray unonan ginawa ra et impaalagey da lamet so altar nen Jehova ed Jerusalem tan inabobonan to iray inyapay da ditan. (Esd. 3:2-6) Inikdan ira nen Jehova na maong tan maespiritual iran managpastol, ya singa say matoor ya saserdote tan managkopya ya si Esdras, saray gobernador ya si Nehemias tan Zerubabel, say Atagey a Saserdote ya si Josue, tan saray makpel ya propetan si Aggeo, Zacarias, tan Malaquias. Awalaan iray pankakasakey ya agda nin balot naeksperiensya ed abayag a panaon, tan mantultuloy itan basta unoren da iray instruksion tan panangigiya nen Jehova.​—Isa. 61:1-4; basaen so Jeremias 3:15.

22. Panon tayon amta ya saray propesiya nipaakar ed panangipawil et walaan na mas baleg a kasumpalan?

 ²² Seguradon makapaseseg imay unonan kasumpalan na saray promisa nen Jehova nipaakar ed panangipawil! Balet, wala ni mas baleg ya kasumpalan. Panon tayon amta? On ta saratan ya promisa et base ed sakey a kondisyon: Sumpalen iratan nen Jehova basta mansiansian maunor tan maawat iray totoo to. Sinmabi panaon, aglamet inmunor iray Judio tan nanrebelde ra. Balet singa impaimano nen Josue, naynay ya totooren nen Jehova iray ibabaga to. Kanian, wala sirin so mas baleg tan andi-anggaan ya kasumpalan na saratan ya promisa. Amtaen tayo no panon itan ya agawa.

23, 24. Kapigan tan panon ya ginmapo so ‘panaon na pangipawil ed amin a bengatla’?

²³ Lapud aaralen tayo so Biblia, naamtaan tayo ya manlapu lad 1914, sayan mauges ya sistema na mundo et wala lad kasampotan, say kaunoran iran agew. Balet parad sikatayo ran lingkor nen Jehova, aliwa yan makapaermen ya panaon. Diad tua, ipapanengneng na Biblia ya say 1914 et gapoan na makapalikliket ya panaon—‘say panaon na pangipawil ed amin a bengatla.’ (Gawa 3:21) Panon tayon amta? Isipen pay agawa ed tawen nen 1914. Nitrono si Jesu-Kristo bilang Mesianikon Ari! Akin et nibagan panangipawil itan? Tandaan, impromisa nen Jehova ed si Arin David ya mansiansia ya anggad angga so inkaari ed linya na poli to. (1 Awa. 17:11-14) Apultot itan ya impanari nen 607 B.C.E. nen dineral na saray taga Babilonia so Jerusalem tan anampot so uley na saray ari ya nanlapud poli nen David.

²⁴ Si Jesus, say “Anak na too” et nanlapud poli nen David kanian sikatoy makankanepegan ya manawir ed trono nen David. (Mat. 1:1; 16:13-16; Luc. 1:32, 33) Nen 1914, sanen inter nen Jehova ed si Jesus so trono ed tawen, ginmapo so ‘panaon na pangipawil ed amin a bengatla’! Natan et sarag lan usaren nen Jehova itan ya perpekton Ari pian nituloy so panangipawil.

25, 26. (a) Kapigan anampot so abayag ya impakaaripen na totoo na Dios ed Makapanyarin Babilonia, tan panon tayon amta? (Nengnengen met so kahon ya “Akin et 1919?”) (b) Anto so ginmapon asumpal manlapu lad 1919 a manpatuloy?

 ²⁵ Bilang ari, sakey ed saray unonan ginawa na Kristo et akila ed Ama to ya man-inspeksion ed uksoyan parad dugan panagdayew diad dalin. (Mal. 3:1-5) Singa impasakbay la nen Jesus ed ilustrasyon to nipaakar ed trigo tan sisanyas, abayag ya agnanengneng so pandumaan na trigo tan sisanyas, odino saray tuan alanaan a Kristiano tan saray impostor. * Balet natan, ginmapo so panaon na panag-ani nen 1914, tan sankapatnagan lay pandumaan. Pigaran dekada antis na 1914, ipapaamta la na saray matoor ya Estudyante na Biblia iray seryoson lingo na Kakristianoan tan onggagapo la ran onsian ed satan ya mauges ya organisasyon. Panaon la pian ipawil ira nen Jehova. Kanian diad gapo na 1919, pigaran taon labat manlapud inggapo na “panag-ani,” nibulos lad Makapanyarin Babilonia iray totoo na Dios. (Mat. 13:30) Anampot la so impakaaripen da!

²⁶ Ginmapo la so mas baleg ya kasumpalan na saray propesiya nen Ezequiel nipaakar ed panangipawil tan mas malaknab itan nen say naeksperiensya na saray totoo na Dios nensaman. Konsideraen tayo natan no panon ya saramay limaran promisa ya nantongtongan tayo et awalaan na mas baleg ya kasumpalan.

27. Panon ya tinulongan na Dios iray totoo to pian naekal so idolatriya?

²⁷ UNONAN PROMISA. Anggapo lay idolatriya tan arum nin makapadimlan kagagawa na palson relihyon. Diad bandad sampot na koma-19 siglo tan kagapo na koma-20 siglo, saray matoor a Kristiano et manuulop la tan gagapoan da lan ekalen iray kagagawa na palson relihyon. Say Trinidad, panisia ed imortalidad na kamarerwa na too, tan say doktrina ya impierno et impulisay da nen naamtaan dan nanlapu iratan ed palson relihyon, aliwan diad Biblia. Alinewan da ya say panagdayew ed imahen et talagan idolatriya. Tan kalkalnan atalosan na totoo na Dios ya say pangusar na krus et sakey a klase na idolatriya.​—Eze. 14:6.

28. Akin et nibagan nipawil iray totoo nen Jehova ed dalin da?

²⁸ KOMADUAN PROMISA. Ompawil iray totoo na Dios ed espiritual a dalin da. Lapud tinaynan na saray matoor a Kristiano iray  palson relihyon na Babilonia, akapawil irad manepeg ya espiritual a dalin da, say abendisyonan ya kipapasen odino situasyon ya agla ran balot naerasan ed espiritual. (Basaen so Ezequiel 34:13, 14.) Naaralan tayo ed Kapitulo 19 na sayan publikasyon ya benendisyonan nen Jehova itan ya dalin na masustansian espiritual a naakan ya agnasabsabaan.​—Eze. 11:17.

29. Panon ya mas inmaligwas so panagpulong manlapu la nen 1919?

²⁹ KOMATLON PROMISA. Iyapay lamet iray bagat diad altar nen Jehova. Nen unonan siglo C.E., nibangat iray Kristiano ya say iyapay da et aliwa lan saray literal ya ayep, noagta saray mas mablin regalo—saray salita na panangidayew ed si Jehova tan say pampupulong da nipaakar ed sikato. (Heb. 13:15) Legan na nilasus ya taon ya naaripen ira, anggapoy organisadon uksoyan parad panagdayew tan panagpulong. Balet nen asingger lan nibulos iray totoo na Dios, mangiyaapay la ra na panangidayew ed sikato. Makulikuli  iran manpupulong tan malikeliket iran mangidadayew ed Dios diad saray pantitipon. Manlapu la nen 1919, lalon impaseseg na “matoor tan makabat ya aripen” so panagpulong tan mas nagmaliw ya organisado itan. (Mat. 24:45-47) Kanian manleppua ed altar nen Jehova iray apay na ombabaleg ya armada a mangidadayew ed masanton ngaran to!

30. Antoy ginawa nen Jesus pian niiter so maong iran managpastol ya kaukolan na totoo to?

³⁰ KOMAPAT YA PROMISA. Ekalen iray mauges ya managpastol. Imbulos na Kristo iray totoo na Dios ed panangontrol na saray mauges tan makasarili ya palson managpastol na Kakristianoan. Diad pulok na Kristo, inekal iray managpastol ya onkikiwas a singa saraman ya palson managpastol. (Eze. 20:38) Sineguro nen Jesus, say Maong a Managpastol, ya naasikaso iray karnero to. Nen 1919, tinuro to so matoor tan makabat ya aripen. Indaulo na satan ya melag a grupo na saray matoor ya alanaan a Kristiano so pangitarya na espiritual a naakan pian naasikaso iray totoo na Dios. Sinmabi panaon, impasal iray elder ya ontulong a mangasikaso ed “pulok na Dios.” (1 Ped. 5:1, 2) Say impuyan ya deskripsion ed Ezequiel 34:15, 16 et mabetbet ya nauusar pian ipanonot ed saray Kristianon managpastol so estandarte nen Jehova a Dios tan si Jesu-Kristo.

31. Panon ya sinumpal nen Jehova imay propesiya ed Ezequiel 11:19?

³¹ KOMALIMAN PROMISA. Mankakasakey iray mandadayew ed si Jehova. Diad inlabas na nilasus a taon, naapag-apag so Kakristianoan ed nilibon denominasyon, kaiba lay dakdakel ya grupo tan sekta ya mankokontraan. Balet, walay makapadinayew ya milagron ginawa nen Jehova ed nipawil ya totoo to. Talagan tinoor to imay promisa to panamegley nen Ezequiel ya: “Ikdan ko ra na nankakasakey a puso.” (Eze. 11:19) Diad interon mundo, minilyon so papatumbok na Kristo ya dati et dumay relihyon da, tan nandurumay kultura, kabibilay, tan kipapasen dad komunidad. Balet, amin et nibangat ed parehon katuaan tan makapakelaw so pankakasakey da diad panggagawa ra na parehon kimey. Diad sampot lan labi nen Jesus diad dalin, impapuson nampikasi ya mankakasakey komon iray papatumbok to. (Basaen so Juan 17:11, 20-23.) Diad panaon tayo, sankaimano lan maong so ebat nen Jehova ed satan ya pikakasi.

32. Antoy naliliknam ed kasumpalan na saray propesiya nipaakar ed panangipawil? (Nengnengen met so kahon ya “Saray Propesiya Nipaakar ed Impakaaripen tan Panangipawil.”)

³² Agka kasi naliliketan ta manbibilay ka ed sayan eksayting ya panaon na panangipawil ed dugan panagdayew? Nanenengneng tayoy kasumpalan na saray propesiya nen Ezequiel ed amin ya aspekto na panagdayew tayo natan. Matalek tayo ya papaboran la natan nen Jehova iray totoo to, ya singa impasakbay to panamegley nen Ezequiel: “Ipatnag koy panangabobon kod sikayo.” (Eze. 20:41) Talagan baleg a pribilehyo so pagmaliw a kabiangan na nankakasakey a totoo ya napapakan a maong ed espiritual tan mangidadayew ed si Jehova diad interon mundo—totoon nibulos kayari  na nilasus a taon ya impakaaripen ed espiritual! Kasin ontan so naliliknam? Balet arum ed saray propesiya nen Ezequiel nipaakar ed panangipawil et wala ni mas baleg ya kasumpalan.

33-35. (a) Antoy epekto na propesiya ya nabasad Ezequiel 36:35 ed saray Judio ya walad Babilonia? (b) Antoy epekto na satan ya propesiya ed saray totoo nen Jehova natan? (Nengnengen met so kahon ya “Say ‘Panaon na Pangipawil ed Amin a Bengatla.’”)

³³ Singa anengneng tayo la, ginmapo so ‘pangipawil ed amin a bengatla’ nen nipawil so inkaari ed linya na poli nen David ya agawa nen nitrono si Jesus nen 1914. (Eze. 37:24) Insan inikdan nen Jehova na pakayari so Kristo pian ipawil ed totoo To so dugan panagdayew kayari na nilasus a taon ya impakaaripen ed espiritual. Balet kasin ontunda lad satan so kimey na Kristo? Andi! Diad arapen, satan ya kimey ya panangipawil et mantultuloy ni diad makapadinayew a paraan—tan ipapaamta na saray propesiya nen Ezequiel iray eksayting ya detalye.

³⁴ Singa bilang, imanoen pa irayan impuyan a salita: “Ibaga na saray totoo: ‘Say dalin ya agpanaayaman et nagmaliw a singa hardin na Eden.’” (Eze. 36:35) Antoy epekto na satan ya promisa ed si Ezequiel tan saray kapara ton Judio ya walad Babilonia? Seguradon agda iilaloan ya literal so kasumpalan, ya singano say pawilen dan dalin et magmaliw ya Paraiso, singa samay orihinal ya hardin ya imparaan a mismo nen Jehova. (Gen. 2:8) Imbes, seguradon atalosan da ya ipapaseguro nen Jehova ed sikara ya say pawilen dan dalin et magmaliw ya marakdakep tan mabuna.

³⁵ Anto met so epekto na satan ya promisa ed sikatayo natan? Agtayo iilaloan so literal ya kasumpalan natan, ta wala tayod sayan mauges a mundo ya uuleyan nen Satanas a Diablo. Imbes, natatalosan tayo ya saratan ya salita et walaan na espiritual ya kasumpalan natan. Bilang lingkor nen Jehova, wala tayod espiritual ya dalin, say kipapasen odino kaliberliber, ya dia tayo mabungan manlilingkor tan iyuuna ed bilay tayo so sagradon panaglingkor ed Dios. Sayan espiritual ya dalin et kalkalna tan tuloytuloy a magmamaliw ya singa paraiso. Anto balet so nagawad arapen?

36, 37. Anto ran promisa so nasumpal diad literal ya Paraiso?

³⁶ Kayari na Armagedon, mas baleg so gawaen nen Jesus ya panangipawil pian nalaknaban to anggan say literal ya dalin. Legan na Sanlibon Taon ya Uley to, idaulo to ray totoo pian pagmaliwen dan singa hardin na Eden odino paraiso iyan planeta, ya singa samay gagala nen Jehova manlapu la nen gapo! (Luc. 23:43) Insan mankakasakey lay amin a totoo tan asikasoen da lay dalin pian ag-itan naderal. Anggapo lay peligro tan panlapuay takot ed anggan iner. Isip mo pay panaon sano nasumpal met la iyan promisa: “Misipanan ak ed sikara nipaakar ed sakey a sipanan na kareenan, tan paandien kod dalin iray masesebeg ya atap ya ayep, pian maligen iran makapanayam diad kalawakan tan makaugip ira ed katakelan.”​—Eze. 34:25.

 ³⁷ Kasin naiimadyin mo ’tan? Sarag mo lan laen so anggan iner ya pasen ed sayan maaw-awang ya dalin ya agka natatakot. Agka la sakitan na anggan anton ayep. Mareen so nonot mo ta anggapo lay peligro. Sarag mo lay manakar ya bukor ed katakelan, tan na-enjoy mon nengnengen so marakdakep ya kaliberliber. Sarag mo ni ingen so onugip ditan ya maligeligen, ta segurado kan kabangon mo et akapainawa ka tan anggapoy mauges ya agawad sika!

38. Antoy naliliknam no naimadyin moy kasumpalan na promisa ya walad Ezequiel 28:26?

³⁸ Nanengneng tayo met ya nasumpal iyan promisa: “Maligen iran manayam [ed dalin] tan mangipaalagey ira na kaabungan tan mantanem ira na kaubasan, tan maligen iran manayam ditan sano ukomen kon amin iramay manbabalaw ed sikara a walad kaliberliber da; tan naamtaan da a siak si Jehova a Dios da.” (Eze. 28:26) No anggapo lay amin ya mamubusol ed si Jehova, na-enjoy tayo lay kareenan tan kaligenan ed interon mundo. Legan tayon aasikasoen so dalin, naasikaso tayo met so sarili tayo tan saray inad-aro tayo, tan mangipaalagey tayo na saray komportablen abung tan mantanem tayoy kaubasan.

39. Akin et segurado ka ya ontua iray propesiya ya insulat nen Ezequiel nipaakar ed Paraiso?

³⁹ Kasin singa kugip labat ed sika irayan promisa? No ontan, isip mo pa ray anengneng mo lad sayan panaon na ‘pangipawil ed amin a bengatla.’ Anggan panoy insumpa nen Satanas, naikdan na pakayari si Jesus pian ipawil so dugan panagdayew diad sayan sankaugesan ya panaon na mundo. Talagan mabiskeg itan ya ebidensya ya ontua so amin ya promisa na Dios ya impaisulat tod si Ezequiel!